28 C
Phnom Penh

ប្រទះឃើញ​​​សាកសព​​​អ្នក​​​កាសែត​​​កាណាដា​​​ដែល​​​បាត់​​​ខ្លួន​​​នៅ​​​តំបន់​​​ព្រៃ​​​នៃ​​​ឧទ្យាន​​​អង្គរ​​​

ដោយ ឌឹ ខេមបូឌា ដេលី

បទវិភាគ

នគរបាល​​​និយាយ​​​ថា សាកសព​​​អ្នក​​​កាសែត​​​ និង​​​ជា​​​ផលិត​​​ករ​​​ភាពយន្ត​​​ជនជាតិ​​​កាណាដា ម្នាក់​​​ឈ្មោះ​​​ ដេវ វ៉កឃើ (Dave Walker) ដែល​​​បាន​​​បាត់​​​ខ្លួន​​​នៅ​​​ក្នុង​​​ខេត្ត​​​សៀមរាប​​​ កាល​​​ពី​​​ជាង​​​ពីរ​​​ខែ​​​មុន​​​ ត្រូវ​​​បាន​​​ប្រទះ​​​ឃើញ​​​កាល​​​ពី​​​ព្រឹក​​​ម្សិលមិញ​​​ នៅ​​​ក្នុង​​​បរិវេណ​​​ប្រាសាទ​​​អង្គរ​​​ធំ។

លោក​​​ ចៅ ម៉ៅវីរៈ នាយការិយាល័យ​​​នគរបាល​​​អន្តោប្រវេសន៍​​​ខេត្ត​​​សៀមរាប​​​បាន​​​មាន​​​ប្រសាសន៍​​​ថា ក្មេង​​​ជំទង់​​​ពីរ​​​នាក់​​​ ដែល​​​បាន​​​ចូល​​​ទៅ​​​តំបន់​​​ព្រៃ​​​នៃ​​​ឧទ្យាន​​​អង្គរ​​​ ដើម្បី​​​រក​​​បេះ​​​​​​ផ្លែឈើ បាន​​​ប្រទះឃើញ​​​សាកសព​​​​​​រលួយ​​​សាច់​​​អស់​​​មើល​​​លែង​​​ស្គាល់​​​នេះ​​​នៅ​​​ម៉ោង​​​៦ និង​​​៣០​​​នាទី​​​ព្រឹក​​​ ហើយ​​​បាន​​​រត់​​​ចម្ងាយ​​​ផ្លូវ​​​កន្លះ​​​គីឡូម៉ែត្រ​​​ដើម្បី​​​ប្រាប់​​​នគរបាល​​​​​​​​​មូលដ្ឋាន​​​។

លោក​​​មាន​​​ប្រសាសន៍​​​ថា យើង​​​ទទួល​​​បាន​​​ព័ត៌មាន​​​នៅ​​​ម៉ោង​​​៧ និង​​​៣០​​​នាទី​​​ព្រឹក​​​ថា សាកសព​​​​​​មួយ​​​ត្រូវ​​​បាន​​​ប្រទះ​​​ឃើញ​​​នៅ​​​ក្នុង​​​បរិវេណ​​​អង្គរ​​​ធំ​​​ ចម្ងាយ​​​ប្រហែល​​​២៥០​​​ម៉ែត្រ​​​ពី​​​ផ្លូវ​​​ចូល​​​ នៅ​​​ក្នុង​​​តំបន់​​​ព្រៃ​​​តូច​​​មួយ” ។​​​ តំបន់​​​ខាង​​​លើ​​​នេះ​​​ត្រូវ​​​បាន​​​នគរបាល​​​បិទ​​​មិន​​​ឲ្យ​​​ចេញ​​​ចូល​​​ទេ​​​ ហើយ​​​សាកសព​​​នឹង​​​ត្រូវ​​​រក្សា​​​ទុក​​​នៅ​​​កន្លែង​​ដើម​​​ដដែល​​​​​​ ខណៈ​​​ពេល​​​នគរបាល​​​កំពុង​​​​​​រង់ចាំ​​​គ្រូពេទ្យ​​​កោសល្យ​​​វិច័យ​​​មួយ​​​រូប​​​មក​​​ពី​​​ក្រុង​​​បាងកក​​​ ដែល​​​នឹង​​​មក​​​ដល់​​​នៅ​​​ថ្ងៃ​​​នេះ​​​តាម​​​សំណើ​​​របស់​​​ស្ថានទូត​​​កាណាដា ប្រចាំ​​​ប្រទេស​​​ថៃ​​​។

លោក ដេវ​​​ វ៉កឃើ​​​ អាយុ​​​៥៨​​​ឆ្នាំ​​​ ដែល​​​រស់​​​នៅ​​​ក្នុង​​​ប្រទេស​​​កម្ពុជា​​​និង​​​ដែល​​​ធ្វើ​​​ដំណើរ​​​ចេញ​​​ចូល​​​ក្រៅ​​​ប្រទេស​​​ទៅ​​​មកៗ​​​អស់​​​រយៈ​​​ពេល​​​ពីរ​​​ទសវត្សរ៍​​​មក​​​នេះ​​​ បាន​​​បាត់​​​ខ្លួន​​​ដោយ​​​គ្មាន​​​តម្រុយ​​​ បន្ទាប់ពី​​​ចាកចេញ​​​ពី​​​ផ្ទះ​​​សំណាក់​​​ដែល​​​គាត់​​​ស្នាក់​​​នៅ​​​ក្នុង​​​ក្រុង​​​សៀមរាប​​​កាល​​​ពី​​​ថ្ងៃ​​​ទី​​​១៤ ខែ​​​កុម្ភៈ ខណៈ​​​ពេល​​​បុគ្គលិក​​​ផ្ទះ​​​សំណាក់​​​បោស​​​សម្អាត​​​បន្ទប់​​​របស់​​​គាត់​​​។ គាត់​​​បាន​​​ចាក​​​ចេញ​​​ពី​​​ផ្ទះ​​​សំណាក់​​​ដោយ​​​ទុក​​​របស់​​​របរ​​​ប្រើប្រាស់​​​ផ្ទាល់​​​ខ្លួន​​​មួយ​​​ចំនួន​​​ដូច​​​ជា​​​ទូរស័ព្ទ​​​ កុំ​​​ព្យូទ័រ​​​យួរដៃ​​​ និង​​​លិខិត​​​ឆ្លង​​​ដែន​​​នៅ​​​ទីនោះ​​​។

លោក​​​ សត ណាឌី ស្នង​​​ការ​​​​​​នគរបាល​​​ខេត្ត​​​សៀម​​​រាប​​​បាន​​​មាន​​​ប្រសាសន៍​​​ថា កាល​​​ពី​​​ព្រឹក​​​ម្សិលមិញ​​​ ម្ចាស់​​​ផ្ទះ​​​សំណាក់​យីហោ​​ Green Village Angkor Guesthouse រួម​​​ជាមួយ​​​មិត្តភក្ដិ​​​និង​​​ជា​​​ដៃ​​​គូ​​​រកស៊ី​​​របស់​​​ជន​​​រងគ្រោះ​​​ បាន​​​អម​​​ដំណើរ​​​ជាមួយ​​​នគរបាល​​​ទៅ​​​កាន់​​​ទីតាំង​​​ទេសចរណ៍​​​ដ៏​​​ពេញ​​​និយម​​​នេះ​​​ ដើម្បី​​​ជួយ​​​កំណត់​​​អត្តសញ្ញាណ​​​សាកសព​​​។

លោក​​​បាន​​​លើក​​​ឡើង​​​ថា មិត្តភក្ដិ​​​របស់គាត់​​​និង​​​ម្ចាស់​​​ផ្ទះ​​​សំណាក់​​​បាន​​​អះអាង​​​ថា សាក​​​សព​​​នេះ​​​ គឺ​​​ជា​​​អ្នក​​​កាសែ​​​ត​​​រូប​​​នោះ​​​ ពីព្រោះ​​​គាត់​​​ស្លៀក​​​សម្លៀក​បំពាក់​​​ផ្ទាល់ខ្លួន​​​ដូច​​​ដែល​​​គាត់​​​បាន​​​ស្លៀក​​​ពាក់នៅ​​​ថ្ងៃ​​​គាត់​​​បាត់​​​ខ្លួន​​។ លោក​​​បានមាន​​​ប្រសាសន៍​​​បន្ថែម​​​ទៀត​​​ថា រហូត​​​មក​​​ទល់​​​ពេល​​​នេះ​​​ នគរបាល​​​របស់​​​យើង​​​មិន​​​ទាន់​​​សន្និដ្ឋាន​​​​​​បាន​​​ថា តើ​​​ការ​​​ស្លាប់​​​នេះ​​​បណ្ដាល​​​មក​​​ពី​​​ឃាតកម្ម​​​ ឬ​​​ដោយ​​​ធម្មជាតិ​​​នោះ​​​ទេ ពីព្រោះ​​​យើង​​​កំពុង​​​រង់ចាំ​​​ការ​​​វិភាគ​​​សាកសព​​​ដោយ​​​អ្នក​​​ជំនាញ​​​មក​​​ពី​​​ប្រទេស​​​ថៃ”

សេចក្ដីថ្លែង​​​ការណ៍​​​មួយ​​​ចេញ​​​ដោយ​​​​​​ក្រុម​​​គ្រួសារ​​​ជន​​​រងគ្រោះ​​​កាល​​​ពី​​​ម្សិលមិញ​​​បាន​​​លើក​​​ឡើង​​​ថា គ្រូពេទ្យ​​​ជំនាញ​​​ម្នាក់​​​បាន​​​ពិនិត្យ​​​សាកសព​​​នេះ​​​តាម​​​សំណើ​​​របស់​​​ពួក​​​គេ​​​ ប៉ុន្តែ​​​គ្រូ​​​ពេទ្យ​​​ជំនាញ​​​នោះ​​​មិន​​​អាច​​​កំណត់​​​ដឹង​​​ពី​​​មូល​​​ហេតុ​​​នៃ​​​ការ​​​ស្លាប់​​​ទេ​​​ ហើយ​​​ថា អ្នក​​​ជំនាញ​​​ខាង​​​​​​កោសល្យ​​​វិច័យ​​​ម្នាក់​​​ទៀត​​​នឹង​​​ត្រូវ​​​នាំ​​​មក​​​​​​ពិនិត្យ​​​សាកសព​​​នេះ​​​ដើម្បី​​​កំណត់​​​រក​​​មូលហេតុ​​​ និង​​​ពេល​​​វេលា​​​នៃ​​​ការ​​​ស្លាប់​​​។

សេចក្ដីថ្លែង​​​ការណ៍​​​ដដែល​​​មាន​​​ខ្លឹម​​​សារ​​​ដូច្នេះ​​​ថា គ្រួសារ​​​របស់​​​លោក​​​ ដេវ វ៉កឃើ ​​​សូម​​​ស្នើ​​​ឲ្យ​​​អាជ្ញាធរ​​​កម្ពុជា​​​បន្ត​​ការ​​​ខំប្រឹងប្រែង​​​របស់​​​ខ្លួន​​​ដើម្បី​​​កំណត់​​​រក​​​មូល​​​ហេតុ​​​នៃ​​​ការ​​​បាត់​​​ខ្លួន​​​និង​​​ការ​​​ស្លាប់​​​របស់​​​លោក​​​ ដេវ ហើយ​​​ក្រុម​​​គ្រួសារ​​​និង​​​អ្នក​​​ជា​​​ទី​​​ស្រឡាញ់​​​របស់​​​លោក​​​ ដេវ សូម​​​ស្នើ​​​ទៅ​​​រដ្ឋាភិ​​​បាល​​​កាណាដា មេត្តា​​​ចាប់​​​ផ្ដើម​​​ស៊ើបអង្កេត​​​ជា​​​ផ្លូវ​​​ការ​​​​​​នៅ​​​ពេល​​​នេះ​​​ ដើម្បី​​​នាំ​​​ខ្លួន​​​ជន​​​ទទួល​​​ខុស​​​ត្រូវ​​​ចំពោះ​​​ការ​​​ស្លាប់​​​របស់​​​លោក​​​ ដេវ មក​​​ផ្ដន្ទាទោស​​​

ឧត្តមសេនីយ៍ឯក គៀត​​​ ច័ន្ទថារិទ្ធ អ្នក​​​នាំពាក្យ​​​អគ្គស្នងការ​​​នគរបាល​​​ជាតិ​​​​​​បាន​​​មាន​​​ប្រសាសន៍​​​ថា ពេល​​​នេះ​​​វា​​​ឆាប់​​​រហ័ស​​​ពេក​​​ មិន​​​អាច​​​កំណត់​​​ដឹង​​​បាន​​​ថា តើ​​​ការ​​​ស្លាប់​​​របស់​​​អ្នក​​​កាសែត​​​រូប​​​នេះ​​​ជា​​​ករណី​​​ឃាតកម្ម​​​ ឬ​​​យ៉ាងណា​​​បាន​​​នៅឡើយ​​​ទេ​​​។ លោក​​​បាន​​​មាន​​​ប្រសាសន៍​​​ទៀត​​​ថា សាកសព​​​រលួយ​​​សាច់​​​ខ្លាំង​​​ពេក​​​ធ្វើ​​​ឲ្យ​​​នគរបាល​​​កម្ពុជា​​​​​​ មិន​​​អាច​​​ឈាន​​​ដល់​​​ការ​​​សន្និដ្ឋាន​​​​​​អំពី​​​មូលហេតុ​​​នៃ​​ការ​​​ស្លាប់​​​បាន​​​ទេ​​​។

លោក​​​បាន​​​បន្ត​​​ថា សាកសព​​​នេះ​​​ត្រូវ​​​បាន​​​ប្រទះ​​​ឃើញ​​​​​​បន្ទាប់ពី​​​រយៈ​​​ពេល​​​ពីរ​​​ខែ​​​​​​ ជា​​​ហេតុ​​​ធ្វើ​​​ឲ្យ​​​នគរបាល​​​កម្ពុជា​​​មាន​​​ការ​​​ពិបាក​​​។ ប៉ុន្តែ​​​យើង​​​បាន​​​រាយការណ៍​​​ទៅ​​​ស្ថានទូត​​​កាណាដា ​​​រួច​​​ហើយ​​​ ហើយ​​​ពួក​​​គេ​​​នឹង​​​​​​បញ្ជូន​​​ក្រុម​​​កោសល្យវិច័យ​​​និង​​​នគរបាល​​​ស៊ើបអង្កេត​​​ពី​​​កាណាដា ហើយ​​​យើង​​​នឹង​​​​​​សហការ​​​ជាមួយ​​​ពួក​​​គេ​​​

ការ​​​បាត់​​​ខ្លួន​​​របស់​​​លោក ដេវ វ៉កឃើ បាន​​​ធ្វើ​​​ឲ្យ​​​ក្រុម​​​គ្រួសារ​​​និង​​​មិត្តភក្ដិ​​​របស់​​​គាត់​​​​​​ព្រម​​​ទាំង​​​នគរបាល​​​ស្រឡាំងកាំង​​​រហូត​​​ដល់​​​ពេល​​​ប្រទះ​​​ឃើញ​​​សព​​​ជន​​​រងគ្រោះ​​​កាល​​​ពី​​​ម្សិលមិញ ហើយ​​​ពេល​​​នេះ​​​នគរបាល​​​មិន​​​ទាន់​​​មាន​​​ភ័ស្ដុតាង​​​ដើម្បី​​​ស្រាយ​​​អាថ៌កំបាំង​​​នៃ​​​ការ​​​ស្លាប់​​​របស់​​​គាត់​​​នៅ​​​ឡើយ​​​ទេ។

ដោយ​​​មាន​​​ដើម​​​កំណើត​​​​​​នៅ​​​ក្នុង​​​ទីក្រុង​​​អេដ​​​ម៉ុនថុន (Edmonton) ប្រទេស​​​កាណាដា លោក​​​ ដេវ វ៉កឃើ មាន​​​ទំនាក់ទំនង​​​ជាយូរ​​​មក​​​ហើយ​​​ជាមួយ​​​កម្ពុជា ដែល​​​បាន​​​ចាប់​​​ផ្ដើម​​​នៅ​​​ក្នុង​​​ទសវត្សរ៍​​​ឆ្នាំ​​​១៩៨០ ដែល​​​នៅ​​​ពេលនោះ​​​ គាត់​​​បាន​​​ធ្វើ​​​ជា​​​អ្នក​​​ស៊ើប​​​អង្កេត​​​ឲ្យ​​​គ្រួសារ​​​ជន​​​ភៀស​​​ខ្លួន​​​កម្ពុជា​​​មួយ​​​រស់នៅ​​​ក្នុង​​​ប្រទេស​​​កាណាដា ហើយ​​​បាន​​​រក​​​ឃើញ​​​​​​កូន​​​ស្រី​​​វ័យ​​​១៥​​​ឆ្នាំ​​​របស់​​​ពួក​​​គេ​​​នៅ​​​ជំរំ​​​ជនភៀសខ្លួន​​​ក្នុង​​​ប្រទេស​​​ថៃ​​​ ដោយ​​​ជោគ​​​ជ័យ​​​។

កាល​​​ពីខែ​​​កក្កដា ឆ្នាំ២០១២ គាត់​​​បាន​​​បង្កើត​​​ក្រុមហ៊ុន​​​ផលិត​​​ខ្សែ​​​​​​ភាពយន្ត​​​ឯករាជ្យ​​​មួយ​​​ឈ្មោះ​​​ថា Animist Farm Films ហើយ​​​គាត់​​​បាន​​​ផលិត​​​ភាពយន្ត​​​ឯកសារ​​​មួយ​​​ស្ដី​​​ពី​​​របប​​​ខ្មែរ​​​ក្រហម​​​ ជាមួយ​​​ដៃ​​​គូ​​​រកស៊ី​​​របស់​​​គាត់​​​ឈ្មោះ​​​ ឈួន​​​ សូនី អាយុ​​​៣៧​​​ឆ្នាំ​​​ ដែល​​​បាន​​​ជួយ​​​នគរបាល​​​កំណត់​​​អត្តសញ្ញាណ​​​សាកសព​​​នេះ​​​។

លោក​​​ ឈួន សូនី បាន​​​លើក​​​ឡើង​​​ថា គាត់​​​សង្ឃឹម​​​ថា មិត្តភក្ដិ​​​រូប​​​នេះ​​​​​​ដែល​​​គាត់​​​បាន​​​ស្គាល់​​​ជា​​​យូរ​​​ឆ្នាំ​​​មក​​​ហើយ​​​ នឹង​​​​​​ទទួល​​​បាន​​​ការ​​​ស៊ើប​​​អង្កេត​​​ដែល​​​ស័ក្ដិសម​​​។ គាត់​​​និយាយ​​​ថា ខ្ញុំ​​​សង្ឃឹម​​​ថា នគរបាល​​​មិន​​​ចេះ​​​តែ​​​​​​បញ្ចប់​​​សំណុំ​​​រឿង​​​នេះ​​​ឆាប់ៗ​​​នោះ​​​ទេ​​​ ទោះជា​​​​ខ្ញុំ​​​ចំណាំ​​​សម្លៀក​​​បំពាក់ និង​​​ស្បែក​​​ជើង​​​​​​របស់​​​គាត់​​​បាន​​​ក៏ដោយ។ ក្រៅពីនេះ ខ្ញុំ​​​ពិត​​​ជា​​​មិន​​​អាច​​​ប្រាប់​​​បាន​​​ថា តើ​​​សព​​​នេះ​​​ជា​​​គាត់​​​ ឬមិន​​​មែន​​​នោះ​​​ទេ​​​

គាត់​​​និយាយ​​​ទៀត​​​ថា មាន​​​សំណួរ​​​ជា​​​ច្រើន​​​ដូចជា​​​ តើ​​​គាត់​​​ទៅ​​​អង្គរ​​​ធំ​​​​​​ដោយ​​​របៀប​​​ណា​​​ តើ​​​គាត់​​​ដើរ​​​ ជិះ​​​ធុកៗ គាត់​​​បាន​​​ទិញ​​​សំបុត្រ​​​ចូល​​​ទស្សនា​​​ឧទ្យាន​​​នេះ​​​ឬយ៉ាងណាប៉ុន្តែ​​​ភាគ​​​ច្រើន ​​​ខ្ញុំ​​​គ្រាន់​​​តែ​​​ចង់​​​ឲ្យ​​​សាកសព​​​របស់​​​គាត់​​​និង​​​សំណុំ​​​រឿង​​​នេះ​​​ត្រូវ​​​បាន​​​ដោះស្រាយ​​​ប្រកប​​​​​​ដោយ​​​វិជ្ជា​​​ជីវៈ​​​ប៉ុណ្ណោះ​​​ សុខុម​​​

(រាយការណ៍​​​បន្ថែម​​​ដោយ សាំង សុឥន្ទរិទ្ធ)

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស