នគរបាលមូលដ្ឋានម្នាក់បាននិយាយកាលពីម្សិលមិញថា បុរសម្នាក់ត្រូវបានចាប់ខ្លួនក្នុងខេត្តស្វាយរៀងកាលពីថ្ងៃពុធ បន្ទាប់ពីបានជួលគេឲ្យយកកូនស្រីទើបកើតបានមួយថ្ងៃរបស់ខ្លួនទៅកប់ទាំងរស់ ពីព្រោះនាងកើតមកមានបបូរមាត់ឆែប។
ទារិកាទើបកើតដែលត្រូវបានគេយកទៅកប់នៅក្នុងបរិវេណវត្តព្រៃឆ្លកក្នុងក្រុងស្វាយរៀងនេះត្រូវបានជួយសង្គ្រោះ ហើយឥឡូវនេះបាននៅជាមួយម្តាយរបស់នាងសម្រាកព្យបាលនៅក្នុងមន្ទីរពេទ្យបង្អែកខេត្ត។
លោក ប្រាក់ ជុត អធិការរងនគរបាលក្រុងស្វាយរៀងបានប្រាប់អត្តសញ្ញាណជនសង្ស័យថា ឈ្មោះ គង់ សុខធី អាយុ២៩ឆ្នាំជាគ្រូវិទ្យាល័យមកពីខេត្តព្រៃវែង។
លោក ប្រាក់ ជុត បានមានប្រសាសន៍ថា “ជនសង្ស័យបានសារភាពថា គាត់ពិតជាបានជួលគេឲ្យយកទារិកានេះទៅកប់មែន“។លោកបានបន្ថែមថា “មូលហេតុដែលឪពុកទារិកានេះចង់សម្លាប់កូនរបស់ខ្លួនដោយសារទារិកានេះកើតមកមានសុខភាពមិនល្អ និងឆែបបបូរមាត់ពីកំណើត ហើយគាត់មានអារម្មណ៍ខ្មាសគេ”។
លោកបានបន្ថែមថា តុលាការនឹងចេញដីកាចាប់ខ្លួនអ្នកសមគំនិតជាមួយលោក សុខធី និងអ្នករត់រ៉ឺម៉កម៉ូតូកង់បីម្នាក់ដែលបានទៅជាមួយគាត់យកទារិកានេះទៅកប់ដែរ ប៉ុន្តែគេមិនទាន់ស្គាល់អត្តសញ្ញាណជននេះនៅឡើយទេ។
លោក ហ៊ុន សុវណ្ណ នាយប៉ុស្តិ៍សង្កាត់ព្រៃឆ្លកបានមានប្រសាសន៍ថា “ទារិកានេះត្រូវបានគេយកទៅកប់ទាំងរស់នៅខាងកើតវត្តព្រៃឆ្លកក្រោមដើមឈើមួយដើម”។
លោក សុវណ្ណ បានមានប្រសាសន៍បន្ថែមទៀតថា “ក្មេងៗពីរបីនាក់បានឃើញទារិកានេះនៅក្នុងវត្តនេះនៅម៉ោងប្រហែល៥ល្ងាចថ្ងៃពុធ។ ពួកវាបានឮសំឡេងទារិកានេះយំ ហើយបានរត់ទៅប្រាប់ព្រះសង្ឃមួយអង្គគង់ក្នុងវត្តនេះ…។ ព្រះសង្ឃអង្គនោះបានជីកដីជួយសង្គ្រោះទារិកានេះ ហើយយកនាងទៅងូតទឹក និងបានបញ្ជូននាងទៅមន្ទីរពេទ្យបង្អែកខេត្ត។ ម្តាយទារិការូបនេះដែលកំពុងសម្រាកព្យាបាលនៅក្នុងមន្ទីរពេទ្យនៅឡើយនោះ បានធូរស្រាលច្រើនហើយ បន្ទាប់ពីឆ្លងទន្លេរួច។
លោក នុត កុសស នាយប៉ុស្តិ៍សង្កាត់នេះមានប្រសាសន៍ថា ទារិកានេះត្រូវបានគេគ្របក្រមា កន្សែងពោះគោ សារុង និងភួយ ហើយត្រូវបានគេកប់ជម្រៅប្រហែល១០សង់ទីម៉ែត្រ។ លោក កុសស បានមានប្រសាសន៍ថា ទារិកានេះស្អាតណាស់ មានសម្បុរស ហើយទម្ងន់ប្រហែល៣គីឡូក្រាម បើទោះជានាងឆែបបបូរមាត់ពីកំណើតក៏ដោយ”។
លោកបានមានប្រសាសន៍ថា ក្មេងៗដែលបានឮទារិកានេះយំ បានឃើញបុរសពីរនាក់ជិះម៉ូតូមួយគ្រឿង និងរឺុម៉កកង់បីមួយគ្រឿងទៀតចូលទៅក្នុងបរិវេណវត្តនេះ មុនពេលមានហេតុការណ៍បែបនេះ។
លោក ជា ភិរម្យ មន្ត្រីស្តារនីតិសម្បទាកុមារនៅអង្គការកសាងសមត្ថភាពកុមារក្នុងសហគមន៍ (Cabdico)បានមានប្រសាសន៍ថា ប្រជាពលរដ្ឋជាច្រើនគ្រួសារ ដែលលោកបានធ្វើការជាមួយមានអារម្មណ៍ខកចិត្តនៅពេលដែលកូនៗរបស់ខ្លួនកើតមកឆែបបបូរមាត់ពីកំណើត ឬឆែបក្រអូមមាត់ ដែលងាយស្រួលកែបំផុតតាមរយៈការវះកាត់។
លោកវេជ្ជបណ្ឌិត កែវ វណ្ណា អ្នកគ្រប់គ្រងផ្នែកវះកាត់កែសម្រស់នៅមជ្ឈមណ្ឌលវះកាត់កុមារក្នុងរាជធានីភ្នំពេញបានមានប្រសាសន៍ថា “ទារកដែលកើតមកមានស្ថានភាពដូចនេះ តាមធម្មតាច្រើនមកពីគ្រួសារក្រីក្រ។ ក្រុមគ្រួសារមានអារម្មណ៍អស់សង្ឃឹម ហើយពួកគាត់មានចំណេះដឹងតិចតួចទៀតនោះ ដូច្នេះពួកគាត់មិនដឹងថា ជួយដោយវិធីណាឡើយ។
លោកវេជ្ជបណ្ឌិតបានមានប្រសាសន៍ថា “ជួនកាលពួកគាត់បារម្ភថា ពិការភាពនេះគឺដោយសារការធ្វើអ្វីខុសកាលពីជាតិមុន។ នៅពេលដែលទារិកានេះកើតមក ពួកគាត់បារម្ភពីកេរ្តិ៍ឈ្មោះនៅក្នុងភូមិ”។
កាលពីឆ្នាំមុនលោកបានធ្វើការវះកាត់បបូរមាត់ឆែបដល់កុមារចំនួន៨៩នាក់ក្នុងចំណោមកុមារ២២៩នាក់ នៅមជ្ឈមណ្ឌលវះកាត់កែសម្រស់ ដែលផ្តល់ការវះកាត់ដោយឥតគិតថ្លៃចាប់តាំងពីឆ្នាំ១៩៩៩មក។ ការវះកាត់ក៏ត្រូវបានធ្វើដោយឥតគិតថ្លៃផងដែរនៅគ្លីនិក Operation Smile ស្ថិតក្នុងមន្ទីរពេទ្យមិត្តភាពខ្មែរ–សូវៀត៕ សារុន
(រាយការណ៍បន្ថែមដោយ Lauren Crothers )