37.3 C
Phnom Penh

មន្ត្រី​ម្នាក់​​​នៅ​​​ខេត្ត​​​តាកែវ​​​​ត្រូវ​​​បាន​​​ចោទ​​​ប្រកាន់​​​​​​និង​​​ឃុំ​​​ខ្លួន​​​ពី​​​បទ​កិប​​​កេង​​​ប្រាក់​​​

ដោយ ឌឹ ខេមបូឌា ដេលី

បទវិភាគ

ក្រុមមន្ត្រី​អង្គភាព​ប្រឆាំង​អំពើ​ពុក​រលួយ​​​បានឲ្យ​ដឹងថា ​សាលា​ដំបូង​ខេត្ត​តាកែវ បាន​ចោទ​មន្ត្រី​សង្គម​កិច្ច​ម្នាក់​ពីបទ​កិប​​​កេង​​​​យក​ប្រាក់​កាលពីម្សិលមិញ​ និង​បាន​បញ្ជូន​មន្ត្រី​​​រូប​​​នេះ​​​​ទៅ​ឃុំខ្លួន​ជា​បណ្ដោះ​អាសន្ន​។

លោក ឱម យ៉ិនទៀង ប្រធាន​អង្គភាព​ប្រឆាំង​អំពើ​ពុករលួយ​បាន​មាន​ប្រសាសន៍​ថា លោក​ អ៊ុំ ម៉ានីរ៉ា ប្រធាន​មន្ទីរ​សង្គម​កិច្ច​ អតីត​យុទ្ធជន និង​ស្ដារនីតិសម្បទាខេត្ត​​ ត្រូវ​បាន​ចោទ​ប្រកាន់​​ប្រាំករណី​​​ពីបទ​ពុក​រលួយ​​ បន្ទាប់ពី​ការ​ចាប់​ខ្លួន​លោក​ក្នុង​រាជ​ធានីភ្នំពេញ​កាលពីថ្ងៃ​ពុធ។

លោក យ៉ិនទៀង បាន​ថ្លែង​ថា “គាត់​​​​បាន​ផ្ដល់​សក្ខីកម្ម​​​​ជុំវិញ​ការ​ចោទ​ប្រកាន់​អំពី​​​ការ​​​កិបកេង​​​នេះ​​​​។ លោក​បន្ថែម​ថា គាត់​​​​​​ចាំ​​​មិន​​​បាន​អំពី​ចំនួន​ប្រាក់​​ដែល​ពាក់​ព័ន្ធ​ក្នុង​ករណី​ពុក​រលួយ​នេះទេ ពីព្រោះ​មន្ត្រី​​​​ក្រោម​បង្គាប់​របស់​គាត់​​​​​ជា​​​អ្នក​​​ធ្វើ​​​​រឿង​នេះ​។ លោក​បានឲ្យ​ដឹង​ថា យើង​បាន​ចាប់​ខ្លួនគាត់​កាលពី​ម្សិលមិញ​ និង​បញ្ជូនគាត់​ទៅ​សាលា​ដំបូង​ខេត្ត​តាកែវ ដើម្បី​ចោទ​ប្រកាន់​ [ពីបទ​ពុក​រលួយ​] នៅ​ថ្ងៃ​នេះ​

លោក​បាន​បន្ថែម​ថា មុន​ពេលយើង​បាន​ធ្វើ​សេចក្ដី​សម្រេចចាប់​ខ្លួន​គាត់​ យើង​បាន​អញ្ជើញ​គាត់​ម្ដង​ហើយ​ម្ដង​ទៀត​ឲ្យ​ផ្ដល់​សក្ខីកម្ម​​​​ជា​ច្រើន​លើក​ ជា​ពិសេស​ពីព្រោះ​យើង​ក៏បាន​ចេញ​លិខិត​ព្រមាន​មួយ​ផង​ដែរ​

ករណី​​​​ចាប់​ខ្លួន​បែប​​​នេះ​​​ គឺ​​​ជា​​​លើក​​​ទី​​​២​ហើយ​​​​ នៅ​ក្នុង​ខេត្ត​តាកែវ​ ចាប់​តាំង​ពី​អង្គភាព​នេះ​ត្រូវ​បាន​បង្កើត​ឡើង​ក្នុង​ឆ្នាំ​២០១០​មក​​​។

លោកស្រី សុខ រ៉ាន់នី ប្រធាន​មជ្ឈមណ្ឌល​បណ្ដុះ​បណ្ដាល​វិជ្ជាជីវៈ​ខេត្ត​ត្រូវ​បាន​ចាប់​ខ្លួន​ក្នុង​ខែ​មករា បន្ទាប់ពី​ការ​ស៊ើប​អង្កេត​រយៈ​​ពេល​ច្រើន​ខែ​លើ​ការ​ចោទ​​ប្រកាន់​​ដោយ​មន្ត្រី​អង្គភាព​ប្រឆាំង​អំពើ​ពុក​រលួយ​ពីបទ​ពុក​រលួយ។ លោកស្រី​ត្រូវ​បាន​ចោទ​ប្រកាន់​ពីបទ​កិប​​​កេង​​​​ប្រាក់​ចំនួន​១,២ពាន​់​លាន​រៀល​ (៣០០.០០០​ដុល្លារ​) នៅ​ចន្លោះ​ឆ្នាំ​២០០៦ទៅ​២០១៣។

លោក ទិន សុចិត្រា ព្រះរាជ​អាជ្ញារង​អម​សាលា​ដំបូង​​​​ខេត្ត​​​បាន​មាន​ប្រសាសន៍​ថា លោក​បាន​ចោទ​ប្រកាន់​លោក​ ម៉ូនីរ៉ា ប្រាំករណីពីបទ​កិប​​​កេង​​​​ប្រាក់​ យោង​​​​តាម​មាត្រា​៥៩៧​និ​ង​មាត្រា​​​៥៩៨​នៃ​ក្រម​ព្រហ្មទណ្ឌ​ ជា​បទ​ល្មើស​ដែល​​ត្រូវ​ផ្ដន្ទាទោស​ឲ្យ​​​ជាប់​ពន្ធនាគារ​រយៈ​ពេល​ប្រាំឆ្នាំ​ និង​ពិន័យ​ជា​ប្រាក់​១០លាន​រៀល​។

លោក​​​បាន​​ឲ្យ​ដឹង​ថា ខណៈ​ដែល​កំពុង​សាក​សួរ​ គាត់​បាន​សារភាព​ថា ពិត​ជា​បាន​កិប​​​កេង​​​​ប្រាក់​មែន​។ ចៅក្រម​ស៊ើប​​​​សួរ​បាន​សម្រេច​ឃុំខ្លួន​គាត់​ក្នុង​ពន្ធនាគារ​ ដូច្នេះ ពេល​នេះ​គាត់​កំពុង​ជាប់​ក្នុង​ពន្ធនាគារ​ខេត្ត​

មន្ត្រី​ម្នាក់​នៅ​អង្គភាព​ប្រឆាំង​អំពើ​ពុក​រលួយ​ដែល​ដឹង​អំពីករណី​នេះ​ ប៉ុន្តែ​មិន​ត្រូវ​បាន​អនុញ្ញាត​ឲ្យ​និយាយ​ជា​មួយ​បណ្ដាញ​ព័ត៌មាន​បាន​ឲ្យ​ដឹង​ថា លោក​ ម៉ូនីរ៉ា បាន​កិបកេង​​​​ប្រាក់​ជាង​៤៤៩លា​ន​រៀល​ (១១១.៨០០​ដុល្លារ​) ចាប់​តាំង​​ពីឆ្នាំ​២០១០​មក​។

មន្ត្រីរូប​នេះ​បាន​ឲ្យ​ដឹង​ថា បទ​ចោទ​ដំបូង​គឺ​ថា គាត់​បាន​កិប​​​កេង​​​​ប្រាក់​រង្វាន់​​​​សម្រាប់​អតីត​យុទ្ធជន​រយៈ​ពេល​ប្រាំមួយ​ខែ​ដំបូង​​​ដើម​​​​ឆ្នាំ​២០១២​ឮ”។ គាត់​ក៏ត្រូវ​បាន​ចោទ​ប្រកាន់​ផង​ដែរ​ថា បាន​កិប​​​កេង​​​​ប្រាក់​កាក​បាទ​ក្រហម​កម្ពុជា​ក្នុង​ឆ្នាំ​២០១០​ ព្រម​ទាំង​ប្រាក់​សម្រាប់​មន្ត្រី​​​​ក្រោម​បង្គាប់​របស់​គាត់​ចុះ​​​បំពេញ​​​​បេសកកម្ម​ទៅ​ខេត្ត​ផ្សេង​ទៀត​៕ ប៊ុននី​​​​

​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស