គ្លីនិកមួយដែលអះអាងព្យាបាលជំងឺមហារីកទឹកនោមផ្អែម និងជំងឺធ្ងន់ផ្សេងទៀត តាមរយៈការបំបាត់ជាតិពុលកំ ពុងប្រតិបត្តិការដោយគ្មានអាជ្ញាប័ណ្ណនៅឡើយរយៈពេលប្រាំខែ បន្ទាប់ពីគ្លីនិកនេះបើកខុសច្បាប់ក្នុងរាជធានីភ្នំពេញ។
មជ្ឈមណ្ឌល Immanuel Bicom True Healing Center នៅក្នុងខណ្ឌ ចំការមនបានស្ថិតក្រោមការត្រួតពិនិត្យភ្លាមៗ បន្ទាប់ពីបើកដំណើរការកាលពីដើមខែធ្នូនៅពេល ដែលមន្ទីរសុខាភិបាលរាជធានីបានរកឃើញថា គ្លីនិក នេះកំពុងព្យាបាលអ្នកជំងឺដោយគ្មានអាជ្ញាប័ណ្ណ។
លោក សំាង សារី ប្រធាន នាយកដ្ឋានសុខាភិបាលរបស់ក្រសួងសុខាភិបាលបានមាន ប្រសាសន៍កាលពីម្សិលមិញថា ទោះជាយ៉ាងណា គ្លីនិកនេះនៅតែ ប្រតិបត្តិការមិនត្រឹមត្រូវ ហើយគ្មានអាជ្ញាប័ណ្ណពី ក្រសួងសុខាភិបាលឡើយ។លោក សារី បាន ឲ្យដឹងថា លោកបានស្នើឲ្យគ្លីនិកនេះម្ដងទៀត នៅសប្ដាហ៍នេះឲ្យឈប់ប្រតិបត្តិការ បន្ទាប់ពីទទួល បានការសាកសួរពីអ្នកយកព័ត៌មានម្នាក់។
លោកបានមានប្រសាសន៍ថា “បញ្ហា សំខាន់ពេលនេះគឺថា យើងបានស្នើឲ្យពួកគេបញ្ឈប់ អាជីវកម្មរបស់ខ្លួនជាបណ្ដោះអាសន្ន និងឈប់ព្យាបាល អ្នកជំងឺថែមទៀត រហូតដល់ពួកគេទទួលបានអាជ្ញាប័ណ្ណ ពីក្រសួងសុខាភិបាល”។
កាលពីខែធ្នូ លោក សារី និង មន្ត្រីសុខាភិបាលផ្សេងទៀតបានឲ្យដឹងថា ពួកគេនឹងបិទ គ្លីនិកនេះជាបណ្ដោះអាសន្ន ដោយថា មានគ្រោះថ្នាក់ ដល់សុខភាពសាធារណៈ ដោយសារតែខ្វះបុគ្គលិកដែលមាន ការបំពាក់បំប៉នត្រឹមត្រូវ និងឧបករណ៍សមរម្យ ដើម្បី ព្យាបាលជំងឺធ្ងន់។
គ្លីនិក នេះអះអាងព្យាបាលជំងឺដូចជា រោគមហារីក និងជំងឺទឹក នោមផ្អែមតាមរយៈការព្យាបាលបន្សាបជាតិពុលដែល សំដៅដល់រាងកាយ ព្រមទាំងខ្យល់ អាហារ និងទឹក ដែលអ្នកជំងឺប្រើប្រាស់។ លោកស្រី ហេលេណា គុណលីម ម្ចាស់គ្លីនិក នេះបានអះអាងថា ការព្យាបាលដោយម៉ាស៊ីនបន្សាបជាតិ ពុលពិសេសអាចព្យាបាលជំងឺស្ទើរតែទាំងអស់។ លោក ស្រី គុណលីម មិនអាចទាក់ទងសុំការអត្ថាធិប្បាយបាន ឡើយកាលពីម្សិលមិញ។
នៅពេល ដែលមន្ទីរសុខាភិបាលរាជធានីភ្នំពេញ បានធ្វើអធិការកិច្ច គ្លីនិកនេះកាលពីដើមឆ្នាំនេះ អ្នកស្រី គុណលីម បានឲ្យ ដឹងថា អ្នកស្រីនឹងទទួលបានអាជ្ញាប័ណ្ណមួយឆាប់ៗនេះ ។
លោក សុខ សុគន្ធ ប្រធានមន្ទីរសុខាភិបាលរាជធានី បានមានប្រសាសន៍កាលពីម្សិលមិញថា “ពេល យើងទៅគ្លីនិកនេះ ពួកគេបាននិយាយថា ពួកគេកំពុង តែរៀបចំឯកសារ ដើម្បីស្នើសុំអាជ្ញាប័ណ្ណពី ក្រសួងសុខាភិបាល បើទោះជាការពិតថា ពួកគេមិនអាចបើក អាជីវកម្មគ្មានអាជ្ញាប័ណ្ណក៏ដោយ”។
លោក សុគន្ធ បានបន្ថែមថា “នៅក្នុងរាជធានីភ្នំពេញ មានគ្លីនិកជាង២.០០០ កន្លែង ដូច្នេះយើងមិនអាចទៅបញ្ឈប់គ្លីនិកទាំង នេះបានភ្លាមៗនោះទេ ពីព្រោះដំបូងយើងត្រូវស្នើ ឲ្យម្ចាស់គ្លីនិកផ្ដល់ឲ្យយើងនូវឯកសារ និង អាជ្ញាប័ណ្ណរបស់ពួកគេចេញដោយក្រសួងសុខាភិបាល”។
លោក ធា គ្រុយ អនុរដ្ឋលេខាធិការ នៅក្រសួងសុខាភិបាល បានមានប្រសាសន៍ថា ប្រសិនបើ ពាក្យសុំអាជ្ញាប័ណ្ណកំពុងតែត្រួតពិនិត្យឡើងវិញ នោះ មិនគួរអនុញ្ញាតឲ្យគ្លីនិកធ្វើប្រតិបត្តិការស្រប ពេលតែមួយនោះទេ។
លោក ធា គ្រុយ បានឲ្យដឹងថា “នេះជា គ្លីនិកខុសច្បាប់។ ប្រសិនបើពួកគេគ្មានអាជ្ញាប័ណ្ណ ពួកគេក៏ត្រូវតែបិទដែរ បើទោះជាឯកសារកំពុងតែ រៀបចំក៏ដោយ”៕ ប៊ុននី