28 C
Phnom Penh

រដ្ឋមន្ត្រី​​​ក្រសួង​ការ​ងារ​​លើក​​​ឡើង​​​ថា ពេល​នេះ​កំពុង​មាន​ការ​ព្យាយាម​រក​ដំណោះស្រាយ​ចំពោះ​​​កូដកម្ម​នៅ​បាវិត

ដោយ ឌឹ ខេមបូឌា ដេលី

បទវិភាគ

នៅ​​​ខាង​ក្រៅ​​ព្រឹត្តិការណ៍​​មួយ​របស់​រដ្ឋាភិបាល ដើម្បី​​​ប្រារព្ធ​​​ទិវា​ពលកម្ម​អន្តរជាតិ លោក អុិត សំហេង រដ្ឋមន្ត្រី​ក្រសួង​ការងារ កាលពី​ម្សិលមិញ​បាន​ស្ដីបន្ទោស​កូដ​កម្ម​ថ្មីៗ​នេះ​នៅ​ក្នុង​ទីក្រុង​បាវិត​ លើ​អ្នក​បង្ក​ហេតុ​មិន​បញ្ចេញ​​ឈ្មោះ ក៏ប៉ុន្តែ​បាន​លើកឡើង​ថា កិច្ច​ប្រឹង​ប្រែង​កំពុង​ធ្វើ​ឡើង​ដើម្បី​ដោះស្រាយ​ជម្លោះ​​​នេះ​។

លោក​ក៏បាន​លើក​ឡើ​ង​ផង​​​ដែរ​ថា ការ​បិទ​រោងចក្រ​ជាង​៣០​កន្លែង​ដែល​បញ្ជា​ដោយ​រដ្ឋាភិបាល​ ​ដើម្បី​បង្ក្រាប​​​ការ​​ប្រើ​អំពើ​ហិង្សា​ដែល​កាន់​តែ​រីក​ធំឡើង​ និង​ដែល​ត្រូវ​បញ្ចប់​កាល​​​ពី​​​ម្សិលមិញ​នោះ អាច​អូស​បន្លាយ​ពេល​។

ក្នុង​សុន្ទរកថា​របស់​លោក​​ថ្លែង​ទៅកាន់​កម្មករ​កាត់​ដេរ​ប្រមាណ​២.០០០​នាក់​នៅ​កោះពេជ្រ​ រាជ​ធានី​​​ភ្នំពេញ លោក សំហេង បាន​លើក​ឡើង​ថា លក្ខខណ្ឌ​សម្រាប់​កម្មករ និង​សហជីព​ក្នុង​ប្រទេស​កម្ពុជា​ មាន​ភាព​ប្រសើរ​ជាង​មុន​​​មិន​ធ្លាប់​មាន​នៅ​ក្នុង​ប្រវត្តិសាស្ត្រ​​​​”ហើយ​ថា រោងចក្រ​កាត់​ដេរ​ចំនួន​៩៦០​កន្លែង​ក្នុង​ប្រទេស​នេះ​ ពេល​នេះ​កំពុង​ផ្ដល់​ការងារ​សម្រាប់​ប្រជាពលរដ្ឋ​​​ចំនួន​៦២៨.១៦៦​នាក់​។

ដោយ​ត្រូវ​បាន​សួរ​តាម​ក្រោយ​អំពី​កូដ​កម្ម​នៅ​បាវិត​ លោក​​​រដ្ឋមន្ត្រី​បាន​មាន​ប្រសាសន៍​ថា ​រដ្ឋាភិបាល​កំពុង​តែ​​ព្យាយាម​ធ្វើ​ឲ្យ​រោងចក្រ​ត្រឡប់​មក​ដំណើរ​ការ​វិញ​។

រដ្ឋាភិបាល​បាន​បញ្ជា​ឲ្យ​បិទ​រោងចក្រ​រយៈ​ពេល​បី​​​ថ្ងៃ​កាលពី​ថ្ងៃ​អង្គារ បន្ទាប់ពី​កូដ​កម្ម​ដែល​កំពុង​តែ​​​រីក​ធំឡើង​ក្លាយ​ជា​អំពើ​ហិង្សា ដោយ​មាន​កម្មករ​​គប់​ដុំ​​​ថ្ម​​​វាយ​ប្រហារ​រោងចក្រ​មួយ​ចំនួន​។ កូដ​កម្ម​នេះ​បាន​ចាប់​ផ្ដើម​បន្ទាប់​​​ពី​​​កម្មករ​បាន​ឮ​​​ថា រោងចក្រ​មួយ ​ថ្មីៗ​នេះ​បាន​ផ្ដល់​ឲ្យ​និយោជិត​របស់​ខ្លួន​នូវ​ប្រាក់​រង្វាន់​៥០​ដុល្លារ​ ហើយ​បាន​ចាប់​ផ្ដើម​ទាម​ទារ​​ដូច​គ្នា​​។ កម្មករ​និយាយ​ថា រោងចក្រ​នេះ​បើក​ប្រាក់​រង្វាន់​ ពីព្រោះ​និយោជិត​របស់​ខ្លួន​បាន​រក្សា​ការ​សន្យា​ថា មិន​ធ្វើ​កូដ​កម្ម​រយៈ​ពេល​ពីរ​បី​​​ខែ​មក​​នេះ។​ រោងចក្រ​ឲ្យ​ដឹង​ថា ខ្លួន​បើក​ប្រាក់​ ពីព្រោះ​និយោជិត​បាន​សម្រេច​គោល​ដៅ​ផលិត​របស់​ខ្លួន​។

លោក សំហេង បាន​មាន​ប្រសាសន៍​ថា យើង​កំពុង​តែ​ព្យាយាម​ដោះស្រាយ​ស្ថាន​ភាព​រវាង​និយោជិត​ និ​ង​និយោជក​ ហើយ​ស្វែង​រក​វិធី​​​មួយ​ដើម្បី​​​ចាប់​ផ្ដើម​ការ​ងារ​ឡើង​វិញ​។ ពេល​នេះ​ខ្ញុំ​​​កំពុង​ស្នើឲ្យ​ពួកគេ​ដាក់​សំណើ​របស់​ខ្លួន​ទៅ​ក្រុម​ប្រឹក្សា​អាជ្ញាកណ្ដាល​​​​”

ប៉ុន្តែ​នៅ​ពេល​ត្រូវ​បាន​សួរ​ថា តើ​ពេល​ណា​រដ្ឋាភិបាល​អាច​ផ្ដល់​ភ្លើង​ខៀវ​ឲ្យ​រោងចក្រ​នៅ​បាវិត​​ ដើម្បី​បើក​ឡើង​វិញ​នោះ​ លោក​រដ្ឋមន្ត្រី​បាន​បដិសេធ​មិន​ផ្ដល់​កាលបរិច្ឆេទ​ជាក់​លាក់​ឡើយ​។លោក​បាន​ថ្លែង​ថា យើង​នឹង​ព្យាយាម​បើក​រោងចក្រ​​ទាំង​នេះ​កាន់​តែ​ឆាប់​កាន់​តែល្អ​​​​”

សមាគម​រោងចក្រ​កាត់​ដេរ​នៅ​​​កម្ពុជា បាន​ស្ដីបន្ទោស​សម្ព័ន្ធ​សហជីព​ចលនា​​​កម្ពុជា​ និង​លោក ប៉ាវ ស៊ីណា ដែល​ជា​ប្រធាន​​សម្ព័ន្ធ​សហជីព​នេះ​ចំពោះ​​​ការ​ញុះញង់​ឲ្យ​មាន​កូដ​កម្ម​ និង​បាន​លើកឡើង​ថា មេដឹកនាំ​​​សហជីព​ត្រូវ​រ៉ាប់​រង​ការ​ខាត​បង់​​​ រួម​​​ទាំង​ការ​បាត់​បង់​ប្រាក់​ឈ្នួល​ផង​ដែរ។

លោក ស៊ីណា បាន​បដិសេធ​ដាច់​ខាត​ចំពោះ​ការ​អះអាង​នេះ ហើយ​កាល​​​ពីម្សិលមិញ​បាន​ទទូច​ថា រដ្ឋាភិបាល​គួរ​តែ​បើក​ប្រាក់​ឲ្យ​កម្មករ​សម្រាប់​ថ្ងៃ​ដែល​ខ្លួន​បាន​បញ្ជា​ឲ្យ​បិទ​រោងចក្រ​។

លោក​បាន​មាន​ប្រសាសន៍​ថា រដ្ឋាភិបាល​ត្រូវ​តែ​ទទួល​ខុស​ត្រូវ​ ពីព្រោះ​ខ្លួន​បាន​​​បញ្ជា​ឲ្យ​រោងចក្រ​ទាំង​អស់​នៅ​បាវិត ផ្អាក​ការ​ងារ​ ពីព្រោះ​ខ្លួន​បារម្ភ​​​ខ្លាច​កូដ​កម្ម​នឹង​រីក​​​កាន់តែ​​​ធំ​​​ទៅៗ​​​​”។ ប្រសិន​បើ​មិន​បើក​ប្រាក់​ឲ្យ​កម្មករ​សម្រាប់​ថ្ងៃ​ទាំង​នោះ​ នៅ​ពេល​ណា​​​ដែល​រោងចក្រ​បើក​ឡើង​វិញ​ លោក​ព្យាករ​ថា កូដ​កម្ម​ពិត​ជា​បន្ត​ទៀត​។

ទោះ​​​ជា​​​យ៉ាង​ណា លោក​ វង់ សុវណ្ណ អគ្គនាយក​រង​នៃ​អគ្គនាយកដ្ឋាន​ដោះស្រាយ​វិវាទ​ការ​ងារ​នៅ​ក្រសួង​ការ​ងារ​ បាន​ឲ្យ​ដឹង​ថា ការ​បើក​​ប្រាក់​សម្រាប់​​​ថ្ងៃ​ទាំង​នោះ​គឺ​មិន​​​អាច​ទៅ​រួច​ឡើយ​។លោក​បាន​មាន​ប្រសាសន៍​ថា ទាំង​រដ្ឋាភិបាល​ និង​រោងចក្រ​​នឹង​​មិន​បើក​ប្រាក់​ឲ្យ​ទេ ពីព្រោះ​ពួកគេ​ធ្វើ​កូដ​កម្ម​ខុស​ច្បាប់​ ហើយ​ប្រសិន​បើ​យើង​មិន​បិទ​រោងចក្រ​ទេ​ ការ​បំផ្លិច​បំផ្លាញ​កាន់​តែ​ធ្ងន់ធ្ងរ​ទៅ​​​​”

នៅ​ក្នុង​ខេត្ត​ស្វាយ​រៀង​នោះ​ដែរ សាលាដំបូង​ខេត្ត​កាលពី​ម្សិលមិញ​បាន​ចោទ​កម្មករ​ម្នាក់​​ដែល​បាន​ចូល​រួម​ក្នុង​កូដ​កម្ម​នៅ​ក្រុង​បាវិត​​កាល​​​ពី​​​ថ្ងៃ​ច័ន្ទ ពី​​​បទ​បំបែក​បង្អួច​រោងចក្រ​មួយ​ចំនួន និង​រថយន្ត​​​ទំនើប​​​មួយ​គ្រឿង​ជា​របស់​រដ្ឋបាល​​រោងចក្រ​ម្នាក់​។

លោក ហ៊ឹង ប៊ុនជា ព្រះរាជ​អាជ្ញា​​​អម​សាលា​ដំបូង​​​ខេត្ត​បាន​ឲ្យ​ដឹង​ថា ឈ្មោះ​ ចាន់ សារិទ្ធ អាយុ​២១​ឆ្នាំ ត្រូវ​បាន​ចោទ​ប្រកាន់​កាល​​​ពី​​​ម្សិលមិញ​​​ពី​​​បទ​​បង្ក​ការ​ខូច​ខាត​ដោយ​ចេតនា​ មាន​ស្ថាន​​​ទម្ងន់​​​ទោស​​។លោក​បាន​មាន​ប្រសាសន៍​ថា យើង​បាន​ចោទ​ប្រកាន់​គាត់​នៅ​ព្រឹក​នេះ​…​ហើយ​ពេល​នេះ​ គាត់​កំពុង​ត្រូវ​ឃុំខ្លួន​ជា​បណ្ដោះ​អាសន្ន​នៅ​​​ពន្ធនាគារ​ខេត្ត​​​​”

លោក នុត បូពិន​ណារ័ត្ន អ្នក​សម្រប​សម្រួល​របស់​អង្គការ​សិទ្ធិមនុស្ស​លីកាដូ​​​ប្រចាំ​​​នៅ​ខេត្ត​នេះ​ ​បាន​មាន​ប្រសាសន៍​ថា អង្គការ​របស់​លោក​បាន​ព្រមព្រៀង​ផ្ដល់​មេធាវី​មិន​យក​ថ្លៃ​ឈ្នួល​ម្នាក់​ឲ្យ​លោក សារិទ្ធ ៕ ប៊ុននី​​​​​

​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស