ដោយចាត់វិធានការប្រឆាំងនឹងការផ្តល់យោបល់របស់នគរបាល និងព្រះរាជអាជ្ញា កាលពីថ្ងៃសុក្រសាលាដំបូងខេត្តរតនគិរីបានដោះលែងបុរសបីនាក់ឲ្យនៅក្រៅឃុំបណ្ដោះអាសន្ន រួមមានមន្ត្រីមូលដ្ឋានម្នាក់ដែលជាប់ចោទពីបទរំលោភជាក្រុមលើនារីម្នាក់នៅក្រុងបានលុងកាលពីខែមុន។
លោកស្រី ជ័យ មាលា ចៅក្រមស៊ើបសួរសាលាដំបូងខេត្តបានមានប្រសាសន៍ថា លោកស្រីបានសម្រេចដោះលែងជនសង្ស័យទាំងបីនាក់ឈ្មោះ ណាង វណ្ណៈ អាយុ២៧ឆ្នាំ ស៊ឹម ឃឿន អាយុ២៧ឆ្នាំ និង ង៉ែត សាគឿន អាយុ៣២ឆ្នាំ ពីព្រោះមិនមានភ័ស្តុតាងគ្រប់គ្រាន់ក្នុងការឃុំខ្លួនពួកគេពាក់ព័ន្ធការរំលោភជាក្រុមលើនារីអាយុ១៨ឆ្នាំម្នាក់។
លោកស្រីបានមានប្រសាសន៍ថា “ខ្ញុំសម្រេចមិនឃុំខ្លួនអ្នកទាំងបីនេះ ពីព្រោះនគរបាលបានរាយការណ៍ថា មានភ័ស្តុតាងមិនគ្រប់គ្រាន់ក្នុងកាចោទប្រកាន់ពួកគេ”។ លោកស្រីបានមានប្រសាសន៍ថា នគរបាលមិនបានសាកសួរជនសង្ស័យទាំងបីនាក់ទេ ហើយបានធ្វើ ” របាយការណ៍តែម្នាក់ឯង”។
ទោះជាយ៉ាងណា លោក ឯម វ៉ុន អធិការនគរបាលក្រុងបានលុងបានជំទាស់នឹងសេចក្ដីសម្រេចរបស់លោកស្រីចៅក្រម មាលា ដោយលើកឡើងថា នគរបាលបានសាកសួរជនទាំងបីនាក់នេះបន្ទាប់ពួកគេត្រូវបានចាប់ខ្លួនកាលពីថ្ងៃទី១ ខែឧសភា ហើយថា ពួកគេទាំងអស់បានសារភាពចំពោះបទល្មើសនោះ។
លោកបានមានប្រសាសន៍ថា “ជនសង្ស័យទាំងបីនាក់បានសារភាពថា ពួកគេបានបង្ខំនារីនេះឲ្យផឹកស្រារហូតដល់សន្លប់ បន្ទាប់មកពួកគេបាននាំនាងទៅព្រៃមួយ ហើយបានរំលោភម្នាក់ម្ដងៗ”។ លោកបានបន្ថែមថា ការធ្វើកោសល្យវិច័យនារីអាយុ១៨ឆ្នាំរូបនេះបង្ហាញថា នាងពិតជាត្រូវបានរំលោភថ្មីៗមែន។
លោក ជា សុភក្ត្រ ព្រះរាជអាជ្ញារងអមសាលាដំបូងខេត្តបានមានប្រសាសន៍ថា លោកចង់ឲ្យឃុំខ្លួនជនសង្ស័យទាំងបីនាក់នេះ ប៉ុន្តែ ចៅក្រមមិនយកចិត្តទុកដាក់នឹងដីកាឃុំខ្លួនរបស់លោកឡើយ។
ក្នុងចំណោមជនសង្ស័យទាំងនោះ ឈ្មោះ វណ្ណៈ និង ឃឿន គឺជាកសិករ ហើយត្រូវជាមិត្តភក្ដិរបស់ សាគឿន ដែលជាប្រធានការិយាល័យផែនការអភិវឌ្ឍន៍ស្រុកកូនមុំ។
លោក ឈឿន ចាន់ធាន អភិបាលស្រុកកូនមុំបានអះអាងថា សាគឿន បានបម្រើការនៅការិយាល័យនេះ ហើយបាននិយាយថា គាត់នឹងត្រឡប់ទៅធ្វើការវិញ ពីព្រោះតុលាការសម្រេចថា គាត់គ្មានជាប់ពាក់ព័ន្ធឡើយ។ លោកបានមានប្រសាសន៍ថា ” យើងមិនមានគម្រោងបណ្ដេញគាត់ចេញទេ ពីព្រោះតុលាការមិនបានរកឃើញថា គាត់មានពិរុទ្ធភាពពីបទរំលោភឡើយ”។
ម្ដាយជនរងគ្រោះបាននិយាយថា កូនស្រីរបស់គាត់ត្រូវបានចាប់រំលោភកាលពីថ្ងៃទី២៥ ខែមេសា ហើយបានបាក់ទឹកចិត្តយ៉ាងខ្លាំង ប៉ុន្តែភ័យខ្លាចមិនហ៊ានប្រាប់គេទេ រហូតដល់ប៉ុន្មានថ្ងៃក្រោយមកនេះ។ អ្នកស្រីបាននិយាយថា “ខ្ញុំខកចិត្តណាស់បន្ទាប់ពីទទួលបានព័ត៌មានថា ជនសង្ស័យទាំងបីនាក់ត្រូវបានដោះលែង។ ខ្ញុំយល់ថា វាអយុត្តិធម៌ណាស់ចំពោះកូនស្រីរបស់ខ្ញុំ។
លោក ឆាយ ធី អ្នកស៊ើបអង្កេតអង្គការសិទ្ធិមនុស្សអាដហុកប្រចាំខេត្តនេះបានមានប្រសាសន៍ថា លោកបានជួយស្ត្រីជាម្ដាយ និងកូនស្រីឲ្យដាក់ពាក្យបណ្ដឹងទៅសាលាឧទ្ធរណ៍កាលពីថ្ងៃសៅរ៍ ប្ដឹងជំទាស់នឹងការដោះលែងបុរសទាំងបីនាក់នេះ។ គេមិនអាចទាក់ទងឈ្មោះ សាគឿន ដើម្បីសុំអត្ថាធិប្បាយបានទេ៕ សារុន