យោងតាមលោក ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានឲ្យដឹងថា ប្រធាននាយកដ្ឋានអធិការកិច្ចរបស់ក្រសួងប្រៃសណីយ៍ និងទូរគមនាគមន៍ ត្រូវបានចាប់ខ្លួនកាលពីថ្ងៃសុក្រ និងត្រូវបានសាកសួរនៅឯសាលាដំបូងរាជធានីភ្នំពេញកាលពីថ្ងៃសៅរ៍ ពីបទលួចប្រាក់ប្រហែល១០០.០០០ដុល្លារពីក្រសួងរយៈពេលប៉ុន្មានឆ្នាំនេះ។
លោកបានមានប្រសាសន៍ថា លោក ចែម សង្វា ត្រូវបានរាយការណ៍ទៅអង្គភាពប្រឆាំងអំពើពុករលួយ បន្ទាប់ពីបដិសេធមិនព្រមសងប្រាក់ ដែលក្រុមហ៊ុនឯកជនមួយបានកក់ជាមួយក្រសួង ជាការធានាសម្រាប់អាជ្ញាប័ណ្ណប្រតិបត្តិការមួយ និងដែលលោក សង្វា តាមចោទថា បានដកយកពីរបីឆ្នាំមុននេះ។
លោក សុខុន បានមានប្រសាសន៍កាលពីម្សិលមិញថា “យើងបានស្នើឲ្យគាត់បង្វិលប្រាក់ឲ្យក្រសួងវិញ ក៏ប៉ុន្តែគាត់បានបដិសេធ ហើយបន្ទាប់នោះយើងបានបញ្ជូនករណីនេះទៅអង្គភាពប្រឆាំងអំពើពុករលួយ ដោយស្នើឲ្យមានការស៊ើបអង្កេត”។ លោកបានមានប្រសាសន៍ថា លោក សង្វា ត្រូវបានបញ្ជូនទៅសាលាដំបូងរាជធានីដើម្បីសាកសួរកាលពីថ្ងៃសៅរ៍ ក៏ប៉ុន្តែមិនបានដឹងថា លោកត្រូវបានចោទប្រកាន់នៅឡើយទេ។
លោក កោ វណ្ឌី ចៅក្រមសាកសួរនៅសាលាដំបូងរាជធានីភ្នំពេញបានមានប្រសាសន៍ថា រឿងក្ដីនេះស្ថិតក្នុងដៃព្រះរាជអាជ្ញារង មាស ច័ន្ទពិសិដ្ឋ ក៏ប៉ុន្តែលោក ច័ន្ទពិសិដ្ឋ បានបដិសេធមិនអត្ថាធិប្បាយ។ លោក កែវ រ៉េមី អ្នកនាំពាក្យរបស់អង្គភាពប្រឆាំងអំពើពុករលួយក៏បានបដិសេធមិនអត្ថាធិប្បាយដែរ៕ ប៊ុននី