កិច្ចប្រជុំមួយនៅឯក្រសួងរ៉ែ និងថាមពល កាលពីថ្ងៃសុក្រ អំពីផែនការសាងសង់ទំនប់វារីអគ្គិសនីដ៏ចម្រូងចម្រាសមួយនៅក្នុងខេត្តកោះកុង មិនបានសម្រាលភាពភ័យខ្លាចក្នុងចំណោមអ្នកដែលព្យាយាមបញ្ឈប់គម្រោង ដែលការសាងសង់ត្រូវបានសម្រេចយល់ព្រម
រួចហើយនោះឡើយ។
សហគមន៍មួយមានប្រជាពលរដ្ឋជនជាតិដើមភាគតិចរាប់រយនាក់បម្រុងនឹងត្រូវបានបណ្ដេញចេញពីដីដូនតារបស់ខ្លួនដើម្បីទុកផ្លូវសម្រាប់គម្រោងនេះ និងកំពុងត្រូវបានក្រុមយុវជន ព្រះសង្ឃដែលសកម្ម និងអង្គការក្រៅរដ្ឋាភិបាល Mother Nature ជួយព្យាយាមបញ្ឈប់គម្រោងនេះ។
អំឡុងកិច្ចប្រជុំកាលពីថ្ងៃសុក្រ ក្រុមមន្ត្រីមកពីក្រសួងនេះ និងក្រុមហ៊ុនចិន Sinohydro (Cambodia) United ដែលពាក់ព័ន្ធនឹងគម្រោងនេះ បានពន្យល់ពីមូលហេតុដែលកម្ពុជាត្រូវការទំនប់បែបនេះ និងបានបញ្ជាក់ថា គម្រោងមួយនេះនៅក្នុងខេត្តកោះកុង មិនទាន់ត្រូវបានសម្រេចយល់ព្រមនៅឡើយទេ នេះបើយោងតាមលោក អាឡិច ហ្គោនហ្សាឡេ ដេវីដសុន (Alex Gonzalez-Davidson) ស្ថាបនិកអង្គការក្រៅរដ្ឋាភិបាល Mother Nature។
លោកបានមានប្រសាសន៍ថា ” ពួកគេបានលើកឡើងថា វាស្ថិតក្រោមការពិចារណានៅឡើយ។ ពួកគេបន្តថា ពួកគេនឹងបន្តនិងធ្វើការស្រាវជ្រាវ ហើយជួបជាមួយសហគមន៍ និងទីបញ្ចប់ជួបជាមួយសង្គមស៊ីវិល បន្ទាប់មកពួកគេនឹងធ្វើសេចក្ដីសម្រេច”។
ប៉ុន្តែលោក ហ្គោន ហ្សាឡេ ដេវីដសុន បានលើកឡើងថា ក្រុមប្រឆាំងនឹងគម្រោងនេះនៅតែសង្ស័យ ដោយសារបានឃើញឯកសារដាក់ស្នើសុំសេចក្ដីសម្រេចគម្រោងនេះ និងបានឮពីមន្ត្រីមូលដ្ឋានដែលបានបញ្ជាក់ដូច្នេះដែរ។ លោកបានមានប្រសាសន៍ថា “យើងមិនទុកចិត្តពួកគេសោះឡើយ ពីព្រោះអ្វីៗដែលយើងដឹង បញ្ជាក់ថា ពួកគេកំពុងតែចាប់ផ្ដើមសាងសង់”។
លោកបានឲ្យដឹងផងដែរថា ទាំងតំណាងក្រុមហ៊ុននិងមន្ត្រីរដ្ឋាភិបាល ដែលមានវត្តមាននៅឯកិច្ចប្រជុំដែលក្រសួងបានកោះហៅនោះ មិនបានបង្ហាញអត្តសញ្ញាណរបស់ខ្លួនឡើយ។ មន្ត្រីនៅក្រសួង និងក្រុមហ៊ុនមិនអាចទាក់ទងសុំការអត្ថាធិប្បាយបានឡើយ៕ ប៊ុននី