28 C
Phnom Penh

គណបក្ស​​​សង្គ្រោះ​​​ជាតិ​​​ព្យាយាម​​​ស៊ើប​​​ករណី​​​ជីក​​​កំណប់​​​នៅ​​​ស្ពានថ្ម​​​ចាស់​​​ក្នុង​​​ខេត្ត​​​​​​បាត់ដំបង​​​

ដោយ ឌឹ ខេមបូឌា ដេលី

បទវិភាគ

លោកស្រី  មូរ សុខហួរ ប្រធាន​​​កិច្ច​​​ការ​​​សាធារណៈ​​​របស់​​​គណបក្ស​​​សង្គ្រោះជាតិ​​​បាន​​​​​​ចុះ​​​ទៅ​​​ពិនិត្យ​​​មើល​​​ស្ថាន​​​ភាព​​​ស្ពានថ្ម​​​ចាស់​​​ក្នុង​​​ក្រុង​​​បាត់ដំបង​​​ កាល​​​ពី​​​ថ្ងៃ​​​សៅរ៍ ដើម្បី​​​ស៊ើប​​​អង្កេត​​​សេចក្ដី​​​រាយការណ៍​​​ ដែល​​​លើ​​​កឡើង​​​ថា បុរស​​​ជនជាតិ​​​វៀតណាម​​​បាន​​​ជីក​​​រក​​​កំណប់​​​នៅ​​​ទីនោះ​​​។ 

លោកស្រី មូរ សុខហួរ​​​ ដែល​​​ជា​​​តំណាង​​​រាស្ត្រ​​​ជាប់​​​ឆ្នោត​​​មួយ​​​រូប​​​ដែរ​​​នោះ​​​ បាន​​​សរសេរ​​​បង្ហោះ​​​នៅ​​​ក្នុង​​​ទំព័រ​​​ហ្វេសប៊ុក​​​​​​របស់​​​លោកស្រី​​​ថា លោក​​​ស្រី​​​បាន​​​ចុះ​​​ទៅ​​​កន្លែង​​​កើត​​​ហេតុ​​​ដើម្បី​​​ “រារាំង​​​ជន​​​ជាតិ​​​វៀតណាម​​​កុំ​​​ឲ្យ​​​ព្យាយាម​​​ស្វែង​​​រក​​​កំណប់​​​មាស​​​” នៅ​​​កន្លែង​​​នោះ​​​។

ពេល​​​ទាក់ទង​​​ទៅលោក​​​ស្រី​​​​​កាលពី​​​ម្សិលមិញ​​​ លោក​​​ស្រី​​​បាន​​​បញ្ជាក់​​​ថា លោក​​​ស្រី​​​បាន​​​ចុះ​​​ទៅ​​​ទីតាំង​​​នោះ​​​មែន​​​ ពីព្រោះ​​​ប្រជាពលរដ្ឋ​​​រស់​​​នៅ​​​​​ក្នុង​​​ក្រុង​​​បាត់​​​ដំបង ​​​ព្រួយ​​​បារម្ភ​​​ខ្លាច​​​មាន​​​កំណប់​​​កប់​​​នៅ​​​ក្រោម​​​ស្ពាន​​​ ហើយ​​​ថា បុរស​​​ដែល​​​ជីក​​​រក​​​កំណប់​​​ទាំង​​​នោះ​​​​​​ទំនង​​​ជា​​​ជន​​​ជាតិ​​​វៀតណាម​​​។ លោក​​​ស្រី​​​ក៏​​​បាន​​​មាន​​​ប្រសាសន៍​​​ដែរ​​​ថា លោក​​​ស្រី​​​ព្រួយ​​​បារម្ភ​​​​​​ ដែល​​​ទាហាន​​​​​​រារាំង​​​ប្រជាពល​​​រដ្ឋ​​​មិន​​​ឲ្យ​​​ចូល​​​ទៅ​​​កន្លែង​​​ដែល​​​បុរស​​​ជនជាតិ​​​វៀតណាម​​​បាន​​​ជីក​​​។

លោក​​​ស្រី​​​មាន​​​ប្រសាសន៍​​​ថា “មាន​​​ជនជាតិ​​​វៀតណាម​​​បី​​​នាក់​​​បាន​​​ជីក​​​ដី​​​។ ជម្រៅ​​​ [រណ្ដៅ] គឺ​​​ប្រហែល​​​ពីរ​​​ម៉ែត្រ​​​ ហើយ​​​ទំហំ​​​ប្រហែល​​​ប៉ុន​​​ខ្លួន​​​មនុស្ស​​​ម្នាក់​​​”។ លោក​​​ស្រី​​​បាន​​​មាន​​​ប្រសាសន៍​​​ទៀត​​​ថា “សប្ដាហ៍​​​ក្រោយ​​​ ខ្ញុំ​​​នឹង​​​សរសេរ​​​លិខិត​​​មួយ​​​ច្បាប់​​​ផ្ញើ​​​ទៅ​​​តំណាង​​​រាស្ត្រ​​​ដែល​​​ឈ្នះ​​​ការ​​​បោះឆ្នោត​​​ក្រុម​​​ប្រឹក្សា​​​ខេត្ត​​​ ហើយ​​​ស្នើ​​​សុំ​​​ឲ្យ​​​អភិបាល​​​ខេត្ត​​​បញ្ជាក់​​​ពី​​​ការ​​​ជីក​​​នេះ​​​”។

កាល​​​ពី​​​ឆ្នាំ​​​មុន​​​ ជន​​​ជាតិ​​​វៀតណាម​​​ប្រាំ​​​មួយ​​​នាក់​​​ត្រូវ​​​បាន​​​ចាប់​​​ខ្លួន​​​នៅ​​​ក្រុង​​​បាត់​​​ដំបង​​​ ពី​​​បទ​​​ព្យាយាម​​​ជីក​​​រក​​​កេស​​​គ្រាប់​​​មួយ​​​ដាក់​​​មាស​​​នៅ​​​ក្នុង​​​នោះ​​​ ដែល​​​ពួក​​​គេ​​​បាន​​​កប់​​​នៅ​​​ទីនោះ​​​កាលពី​​​បី​​​ទសវត្សរ៍​​​មុន​​​ នៅ​​​ពេល​​​ពួក​​​គេ​​​ឈរ​​​ជើង​​​នៅ​​​ក្នុង​​​ប្រទេស​​​កម្ពុជា​​​ ប្រយុទ្ធ​​​ជាមួយ​​​នឹង​​​ខ្មែរ​​​ក្រហម​​​។

លោក​​​ ចាន់​​​ សុផល អភិបាល​​​ខេត្ត​​​បាត់​​​ដំបង​​​ បាន​​​បដិសេធ​​​ថា គ្មាន​​​បំណង​​​អាក្រក់​​​ណាមួយ​​​ស្ថិត​​​នៅ​​​ពីក្រោយ​​​ការ​​​ជីក​​​ដី​​​នេះ​​​ទេ​​​ ហើយ​​​មាន​​​ប្រសាសន៍​​​ថា លោក​​​គ្រាន់​​​តែ​​​បញ្ជា​​​ឲ្យ​​​ការិយាល័យ​​​សាធារណការ​​​ខេត្ត​​​ជួសជុល​​​ស្ពាន​​​នេះ​​​ប៉ុណ្ណោះ​​​​​​កាលពី​​​ថ្ងៃ​​​សៅរ៍​​​។ លោក​​​បាន​​​មាន​​​ប្រសាសន៍​​​បន្ថែម​​​ទៀត​​​ថា “ខ្ញុំ​​​បាន​​​បញ្ជា​​​ឲ្យ​​​ការិយាល័យ​​​សាធារណការ​​​បញ្ជា​​​កម្មករ​​​ឲ្យ​​​ជួសជុល​​​កន្លែង​​​ចាស់ៗ​​​ដែល​​​មាន​​​ទឹក​​​ហូរ​​​ចូល​​​ ហើយ​​​ខ្ញុំ​​​បារម្ភ​​​ខ្លាច​​​ក្បាល​​​តោ​​​ថ្ម​​​ [នៅ​​​លើ​​​ស្ពាន] បាក់”៕ សុខុម​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស