អ្នកភូមិរាប់សិបនាក់នៅក្នុងខណ្ឌប្ញស្សីកែវ រាជធានីភ្នំពេញ កំពុងតែប្រឈមនឹងការបណ្ដេញចេញ បន្ទាប់ពីគណៈកម្មការសុរិយោដីជាតិ បានប្រកាសកាលពីសប្ដាហ៍មុនថា តំបន់មួយចំនួននៅក្នុងសង្កាត់ទួលសង្កែ ត្រូវបានទុកសម្រាប់ការអភិវឌ្ឍជាថ្មីនាពេលអនាគត។
ផែនការសម្រាប់គម្រោងថ្មីរបស់គណៈកម្មការនេះ ដែលរាប់ទាំងការពង្រីកផ្លូវថ្នល់ផង ត្រូវបានបិទនៅតាមជញ្ជាំងសាលារៀនមួយ កាលពីថ្ងៃទី២៥ ខែមេសា ដោយធ្វើឲ្យអ្នកស្រុកជាច្រើនខកចិត្តនៅពេលដែលពួកគេដឹងថា ផ្ទះនិងអាជីវកម្មរបស់ពួកគេស្ថិតនៅក្នុងតំបន់ដែលនឹងក្លាយជាទីកន្លែងសាងសង់។
លោកតា ឡា សុខហេង អាយុ៧៤ឆ្នាំ ជាអ្នកភូមិនៅទីនោះ បានមានប្រសាសន៍ថាគាត់នឹងត្រូវបោះបង់ចោលផ្ទះរបស់គាត់រយៈពេលជាង៣០ឆ្នាំ ប្រសិនបើការអភិវឌ្ឍបន្តធ្វើ។ លោកតាបានមានប្រសាសន៍ថា “ខ្ញុំរស់នៅលើដីនេះតាំងពីឆ្នាំ១៩៨២មក ហើយខ្ញុំមានប័ណ្ណកម្មសិទ្ធិដី ប៉ុន្តែពេលនេះ ខ្ញុំដេកមិនលក់ទេនៅពេលយប់ ពីព្រោះខ្ញុំបារម្ភថា ការអភិវឌ្ឍនឹងបំផ្លាញជីវិតរបស់ខ្ញុំ។ ខ្ញុំជាមនុស្សចាស់ តើខ្ញុំអាចទៅណាបាន?”។
ផ្ទះរបស់លោក ប៉ែន សុធន អាយុ៣៣ឆ្នាំ នឹងមិនត្រូវកាត់ទាំងស្រុង ដោយសារការវាស់វែងថ្មីនេះទេ ក៏ប៉ុន្តែត្រូវបានកំណត់ព្រំជាថ្មី ដើម្បីពង្រីកផ្លូវនៅទល់មុខផ្ទះរបស់គាត់ ដែលនឹងកាត់បន្ថយប្រវែងដីរបស់គាត់ពី១០ម៉ែត្រ មកត្រឹម៣ម៉ែត្រប៉ុណ្ណោះ។
លោកបានមានប្រសាសន៍ថា “ខ្ញុំនឹងនៅសល់តែ៣ម៉ែត្រប៉ុណ្ណោះ ហើយផ្លូវនឹងពង្រីកទៅដល់ត្រឹមបន្ទប់ទឹករបស់ខ្ញុំ តើខ្ញុំអាចរស់នៅបែបនេះយ៉ាងម៉េចទៅ? តើខ្ញុំនឹងទៅណា?”។ លោកបន្ថែមថា អាជ្ញាធរមិនបាននិយាយអំពីសំណងអ្វីដែលពួកគេនឹងផ្ដល់ឲ្យសម្រាប់ការបាត់បង់ដីនោះទេ។ លោក សុធន បានមានប្រសាសន៍ថា “ភាគច្រើនក្នុងចំណោមពួកយើងរស់នៅទីនេះចាប់តាំងពីក្រោយសង្គ្រាមសីុវិលមកម្លេះ ដូច្នេះប្រសិនបើពួកគេមិនផ្ដល់សំណងសមរម្យទេយើងនឹងមិនព្រមចេញឡើយ”។
លោក សូយ សុកល ចៅសង្កាត់ទួលសង្កែ បានមានប្រសាសន៍ថា អ្នកភូមិមានសិទ្ធិដាក់ពាក្យបណ្ដឹងទៅអាជ្ញាធរ ប្រសិនបើពួកគេមិនសប្បាយចិត្តនឹងលទ្ធផលវាស់វែងដីនេះ។ លោកបានឲ្យដឹងថា “កាលពីថ្ងៃទី២៥ ខែមេសា គណៈកម្មការសុរិយោដីបានប្រកាសលទ្ធផល ហើយទុកពេលឲ្យអ្នកភូមិ៣០ថ្ងៃនៅក្នុងតំបន់នេះ ដើម្បីដាក់ពាក្យបណ្ដឹងរបស់ខ្លួន”។ លោក កុសល បានមានប្រសាសន៍ថា ប្រសិនបើពួកគេមិនប្តឹងផ្លូវការក្នុងពេលនោះ នឹងសន្មតថា ពួកគេគ្មានបញ្ហាជាមួយនឹងផែនការនេះឡើយ ហើយពួកគេនឹងបាត់បង់សិទ្ធិរបស់ខ្លួនក្នុងការតវ៉ា។
លោកបានមានប្រសាសន៍ថា “យើងដឹងថា គ្រួសារខ្លះនឹងបាត់បង់ដី និងផ្ទះរបស់ខ្លួន ហើយថា អ្នកផ្សេងទៀតប្រឈមនឹងការកាត់ចូលក្នុងអចលនទ្រព្យរបស់ខ្លួននៅក្នុងតំបន់នេះ ហើយមកទល់ពេលនេះមានប្រជាពលរដ្ឋ៤៥គ្រួសារហើយ ក្នុងចំណោមប្រជាពលរដ្ឋជាង១.០០០គ្រួសារ បានដាក់ពាក្យបណ្ដឹង”៕ ប៊ុននី