ព្រះសង្ឃ សមាជិកសភាជាប់ឆ្នោតគណបក្សប្រឆាំង និងអ្នកកាសែតដែលត្រូវបានកម្លាំងសន្តិសុខខណ្ឌដូនពេញវាយដំនៅជិតទីលានប្រជាធិបតេយ្យកាលពីថ្ងៃសុក្របានលើកឡើងថា ពួកគាត់កំពុងរៀបចំដាក់ពាក្យបណ្ដឹងប្តឹងកម្លាំងសន្តិសុខខណ្ឌទាំងនោះ នៅពេលដែលពួកគាត់ជាពីរបួសវិញ។
លោក ញ៉យ ចំរើន សមាជិកសភាជាប់ឆ្នោតគណបក្សសង្គ្រោះជាតិមណ្ឌលកំពង់ចាម ដែលស្ថិតក្នុងចំណោមមនុស្សប្រាំនាក់ដែលរងរបួសប្រេះលលាដ៍ក្បាល និងរបួសជើងឆ្វេង បន្ទាប់ពីត្រូវបានវាយដោយដំបងឆក់ និងដំបងដែកនោះ បានមានប្រសាសន៍ថា “ខ្ញុំមានគម្រោងដាក់ពាក្យបណ្ដឹង ប៉ុន្តែឥឡូវនេះខ្ញុំកំពុងផ្ដោតលើសុខភាពរបស់ខ្ញុំសិន”។
លោក ចំរើន បានមានប្រសាសន៍កាលពីម្សិលមិញថា “ខ្ញុំស្ទើរតែមិនអាចដើរបាន ហើយមិនអាចអង្គុយនៅផ្នែកខាងឆ្វេងបានឡើយ និងនៅវិលមុខបន្តិចបន្តួច” ។ លោកបានបន្ថែមថា លោកមានគម្រោងធ្វើដំណើរទៅសហរដ្ឋអាមេរិក ដើម្បីព្យាបាលបន្ថែម ហើយដើម្បីជម្រាបអ្នកនយោបាយនៅទីនោះអំពីស្ថានភាពនយោបាយនៅក្នុងប្រទេសកម្ពុជាថា “ដែលកំពុងដើរថយក្រោយ”។
កាលពីម្សិលមិញ ព្រះតេជគុណ លួន សុវ៉ាត សកម្មជនសិទ្ធិមនុស្សបានរៀបរាប់អំពីរបៀបដែលកម្លាំងសន្តិសុខខណ្ឌដូនពេញបានគប់ដុំថ្មមកលើព្រះអង្គ ដាល់ព្រះអង្គ និងយកទូរស័ព្ទដៃរបស់ព្រះអង្គទៅបោកបំបែកតាមបញ្ជាថ្នាក់លើរបស់ពួកគេ អំឡុងយុទ្ធនាការឃោសនាបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ថ្ងៃដំបូង។
ព្រះតេជគុណបានមានសង្ឃដីកាកាលពីម្សិលមិញថា “ដំបូងអាត្មាបានថតកម្លាំងសន្តិសុខទាំងនេះនៅពេលពួកគេឈរយាម និងបិទផ្លូវនៅទីលានប្រជាធិបតេយ្យ ហើយពួកគេនៅស្ងៀម”។ ព្រះតេជគុណមានសង្ឃដីកាថា “បន្ទាប់មកអាត្មាបានឮបញ្ជាពីថ្នាក់លើប្រាប់ពួកគេតាមវិទ្យុទាក់ទង ហើយបន្ទាប់មកពួកគេបានរត់សំដៅអាត្មាតែម្តង។ បន្ទាប់មកពួកគេបានព្យាយាមវាយព្រះកេស និងខ្លួនអាត្មា ប៉ុន្តែអាត្មាបានយកដៃរងការពារព្រះកេស ហើយអាត្មាក៏បានរងរបួសដៃ។ ពេលនោះពួកគេបានយកដុំថ្មគប់សំដៅអាត្មាតែម្ដង។ ដុំថ្មនោះត្រូវចំព្រះកេសអាត្មា”។
យោងតាមលោក ណុប វី នាយកផ្នែកប្រព័ន្ធផ្សព្វផ្សាយនៃវិទ្យុសំឡេងប្រជាធិបតេយ្យ (វីអូឌី)បានឲ្យដឹងថា លោក ឡាយ សាមាន អ្នកយកព័ត៌មានវីអូឌី ដែលបានព្យាយាមយកព័ត៌មានអំពីការវាយព្រះតេជគុណ លួន សុវ៉ាត នោះបានធូរស្រាលហើយនៅផ្ទះរបស់លោក បន្ទាប់ពីត្រូវបានវាយដំរហូតដល់បាក់ឆ្អឹងថ្ពាល់ និងសន្លប់កាលពីថ្ងៃសុក្រ។
អង្គការអ្នកយកព័ត៌មានគ្មានព្រំដែនបានចេញសេចក្ដីថ្លែងការណ៍មួយបន្ទាប់ពីការវាយលោក សាមាន ថា “រដ្ឋាភិបាលមិនអាចបដិសេធមិនទទួលខុសត្រូវចំពោះអសន្តិសុខដល់អ្នកសារព័ត៌មានក្នុងប្រទេសបានឡើយ…រដ្ឋាភិបាលខ្លួនឯងនៅតែស្ងៀមស្ងាត់ចំពោះការវាយប្រហារមកលើអ្នកកាសែតដដែល”។
ព្រះតេជគុណ លួន សុវ៉ាត មានសង្ឃដីកាថា នៅថ្ងៃសុក្រ ព្រះអង្គសង្ឃឹមថា អ្នកដែលរងរបួសទាំងអស់អាចដាក់ពាក្យបណ្ដឹងរួមគ្នាប្ដឹងកម្លាំងសន្តិសុខខណ្ឌដែលប្រើអំពើហិង្សាកាន់តែខ្លាំងនេះ។
ព្រះតេជគុណមានសង្ឃដីកាបន្ថែមថា “អាត្មាគិតថា ប្រសិនបើអាត្មាដាក់ពាក្យបណ្ដឹងតែម្នាក់ឯង វាមិនសូវរឹងមាំទេ។ ប្រសិនបើអ្នកកាសែត និងប្រជាពលរដ្ឋដទៃទៀតដែលរងរបួសដូចជាសមាជិកសភាគណបក្សសង្គ្រោះជាតិរូបនេះរួមសាមគ្គីគ្នាដាក់ពាក្យបណ្ដឹងតែមួយនោះ វានឹងកាន់តែរឹងមាំ”៕ សារុន