សកម្មជនប្រហែល៨០នាក់មកពីសហគមន៍បុរីកីឡា និងសហគមន៍បឹងកក់នៅក្នុងទីក្រុងភ្នំពេញបានធ្វើការតវ៉ានៅខាងក្រៅសាលារាជធានីកាលពីព្រឹកម្សិលមិញ ប៉ុន្តែបានប្រឈមនឹងសន្ដិសុខក្រុង ដែលបានរារាំងពួកគាត់មិនឲ្យដាក់ញត្តិជូនអភិបាលក្រុង។
អ្នកស្រី ស សួន តំណាងគ្រួសារមកពីសហគមន៍បុរីកីឡា ដែលបានរស់នៅក្នុងជម្រកបណ្ដោះអាសន្នតាំងពីពួកគាត់ត្រូវបានបណ្ដេញចេញកាលពីពីរឆ្នាំមុន បាននិយាយថា អ្នកតវ៉ាគ្រាន់តែចង់ប្រាប់លោក ប៉ា សុជាតិវង្ស អភិបាលក្រុងថា គំនរសំរាម ដែលគ្មានអ្នកប្រមូលកំពុងធ្វើឲ្យស្ថានភាពរស់នៅក្នុងតំបន់នេះពិបាកទ្រាំណាស់។
អ្នកស្រីបាននិយាយថា “ថ្ងៃនេះយើងមកដាក់ញត្តិនិងរូបថតដើម្បីជំរុញឲ្យសាលារាជធានីចាត់វិធានការដោះស្រាយបញ្ហាសំរាមនេះ។ គោលនយោបាយរបស់រដ្ឋាភិបាល គឺរក្សាទីក្រុងភ្នំពេញឲ្យស្អាត ប៉ុន្តែនៅក្នុងសហគមន៍របស់ខ្ញុំដែលស្ថិតនៅចំកណ្ដាលទីក្រុង កន្លែងនោះសុទ្ធតែសំរាម”។
នៅពេលតំណាងសហគមន៍នេះព្យាយាមចូលទៅក្នុងសាលារាជធានី ដើម្បីដាក់ញត្តិ សន្ដិសុខបានកញ្ឆក់យកឯកសារ និងរឹបអូសឧបករណ៍បំពងសំឡេងមុនពេលរុញ និងទាត់ធាក់អ្នកតវ៉ា ដែលភាគច្រើនជាស្ត្រី និងមានវ័យចំណាស់ឲ្យចេញពីទីនោះ។
អ្នកស្រី សួន បាននិយាយថា “នៅពេលយើងមកដល់ទីនេះ សន្ដិសុខស្លៀកពាក់ខ្មៅ ដែលយើងមិនស្គាល់ឈ្មោះ និងដែលបានបង្ក្រាបយើងនោះ បានចាប់ទាញយកញត្តិរបស់យើង និងទាត់ធាក់យើងឲ្យចេញ ហើយសន្ដិសុខម្នាក់បានទាត់ខ្ញុំបីជើង”។ អ្នកស្រីបានបន្ថែមថា ការតវ៉ានេះបានបញ្ចប់នៅពេលថ្ងៃត្រង់។
អ្នកស្រីបាននិយាយទៀតថា “យើងគ្រាន់តែចង់ឲ្យសាលារាជធានីដោះស្រាយបញ្ហានេះប៉ុណ្ណោះ ពីព្រោះក្មេងៗ និងមនុស្សចាស់កំពុងធ្លាក់ខ្លួនឈឺ ដោយសារសំរាម ដែលគេមិនប្រមូលនេះ”។
អ្នកស្រី ស៊ា ណារ៉េត អាយុ៥៧ឆ្នាំ អតីតអ្នកភូមិបឹងកក់បាននិយាយថា ប្រជាពលរដ្ឋដែលត្រូវបានបណ្ដេញចេញពីសហគមន៍អ្នកស្រីបានចូលរួមការតវ៉ានេះកាលពីម្សិលមិញ ពីព្រោះពួកគាត់បន្តទាមទារសំណងបន្ថែមពីលើសំណងដែលពួកគាត់បានទទួលកាលពីឆ្នាំ២០០៨ និងឆ្នាំ២០០៩ ដែលនៅពេលនោះពួកគាត់បានចាកចេញពីផ្ទះនៅកណ្ដាលទីក្រុងដើម្បីបើកផ្លូវសម្រាប់គម្រោងអភិវឌ្ឍន៍របស់សមាជិកព្រឹទ្ធសភាម្នាក់មកពីគណបក្សប្រជាជនកម្ពុជា។
អ្នកស្រីបាននិយាយថា “កាលពីមុនយើងបានទទួលសំណង និងត្រូវបានបង្ខំឲ្យផ្លាស់ទៅរស់នៅក្នុងផ្ទះជួល ប៉ុន្តែឥឡូវនេះយើងត្រូវការប្រាក់៨.០០០ដុល្លារទៀតក្នុងមួយគ្រួសារៗ ដើម្បីផ្លាស់ទៅទីកន្លែងថ្មីដែលមិនសូវពិបាករស់នៅ”។
លោក ឡុង ឌីម៉ង់ អ្នកនាំពាក្យសាលារាជធានីបាននិយាយថា លោក ប៉ា សុជាតិវង្ស ជាប់រវល់មិនអាចជួបអ្នកតវ៉ាបានទេ ប៉ុន្តែលោកបានបន្ថែមថា សាលារាជធានីដឹងអំពីកង្វល់របស់ពួកគាត់។
លោកបាននិយាយថា “ពាក់ព័ន្ធនឹងសំរាមនៅកន្លែងរស់នៅបណ្ដោះអាសន្ននេះ យើងកំពុងដោះស្រាយ ហើយអភិបាលក្រុងកំពុងសហការជាមួយអង្គការក្រៅរដ្ឋាភិបាលមួយចំនួនដើម្បីឲ្យជួយ ប៉ុន្តែយើងបានរកដំណោះស្រាយរួចហើយសម្រាប់សហគមន៍បឹងកក់ និងគ្មានអ្វីត្រូវផ្លាស់ប្ដូរទេ”៕ គឹមហឿន