តំណាងអ្នកភូមិយ៉ាងហោចណាស់១០០គ្រួសារដែលត្រូវបានបណ្ដេញចេញកាលពីពេលថ្មីៗនេះ ដោយត្រូវបានចោទប្រកាន់ថា បានកាន់កាប់ដីរដ្ឋដោយខុសច្បាប់នៅក្នុងខេត្តក្រចេះ បានធ្វើដំណើរមកកាន់រាជធានីភ្នំពេញកាលពីព្រឹកម្សិលមិញ ដើម្បីដាក់ញត្តិជូនលោកនាយករដ្ឋមន្ត្រី ហ៊ុន សែន សុំឲ្យលោកជួយយកដីរបស់ពួកគាត់មកវិញ។
អ្នកភូមិជាច្រើនគ្រួសារនិយាយថា អាជ្ញាធរមូលដ្ឋានបានអនុញ្ញាតឲ្យពួកគាត់រានដីនៅក្នុងឃុំឃ្សឹម ស្រុកស្នួល ចាប់តាំងពីឆ្នាំ២០០៨ ហើយថា អ្នកភូមិ៤០៥គ្រួសារបានចូលមកកាន់តំបន់នេះនិងបានរានដីធ្វើស្រែចម្ការបានប្រហែល២.០០០ហិកតា ចាប់តាំងពីពេលនោះមក។
ពួកគាត់និយាយថា កងរាជអាវុធហត្ថប្រហែល៥០នាក់បានយកត្រាក់ទ័រជាច្រើនគ្រឿងមកទីនេះកាលពីថ្ងៃសុក្រ និងបានឈូសកម្ទេចតង់ដែលពួកគាត់កំពុងស្នាក់នៅ ហើយបានរុះផ្ទះពីរខ្នងមុនពេលដុតផ្ទះប្រក់ស្បូវរបស់ពួកគាត់។
លោក ធី សារ៉េត តំណាងម្នាក់ក្នុងចំណោមតំណាង៣៧នាក់ ដែលបានធ្វើដំណើរមកកាន់រាជធានីភ្នំពេញ និងបានប្រមូលផ្ដុំគ្នានៅសួនមុខវត្តបទុមបាននិយាយថា “អាជ្ញាធរបានបញ្ជាឲ្យត្រាក់ទ័របីគ្រឿងចូលមកក្នុងដីនោះ ហើយបានយកខ្សែកាបទាញផ្ដួលផ្ទះរបស់ខ្ញុំ ហើយបន្ទាប់មកបានដុតចោលតែម្ដង”។
លោក ហេង គឹមហ៊ាត ដែលបានធ្វើដំណើរមកកាន់រាជធានីភ្នំពេញដែរនោះនិយាយថា “អាជ្ញាធរបានអនុញ្ញាតឲ្យពួកយើងរានដីព្រៃដើម្បីដំាដំណាំ ប៉ុន្តែពួកគេបានបណ្ដេញពួកយើងចេញបន្ទាប់ពីយើងបានរានដីរួច”។ លោកបានបន្ថែមថា “យើងមកទីនេះមិនមែនតវ៉ាប្រឆាំងរដ្ឋាភិបាលទេ។ យើងមកទីនេះគឺសុំឲ្យសម្ដេច ហ៊ុន សែន ជួយរកដំណោះស្រាយឲ្យពួកយើង”។
តំណាងទាំងនោះត្រូវបានលោក គង់ ចំរើន មន្ត្រីនៅខុទ្ទកាល័យលោកនាយករដ្ឋមន្ត្រីចេញមកជួបនៅសួននោះ ហើយបានទទួលយកលិខិតរបស់ពួកគាត់ និងបានសុំឲ្យពួកគាត់ត្រឡប់ទៅខេត្តក្រចេះវិញទៅជួបជាមួយក្រុមមន្ត្រីខេត្តនៅទីនោះ ដើម្បីដោះស្រាយវិវាទដីធ្លីនេះ។
លោក ខន ចំណាន អភិបាលរងខេត្តបានមានប្រសាសន៍ថា លោកនឹងជួបប្រជុំជាមួយគ្រួសារទាំងនោះ ដើម្បីព្យាយាមបញ្ចុះបញ្ចូលពួកគាត់ថា តាមពិតពួកគាត់កំពុងរស់នៅលើដីរដ្ឋដោយខុសច្បាប់ ហើយគួរឈប់ទាមទារដីនេះវិញទៅ។ ប៉ុន្តែលោកបានមានប្រសាសន៍ថា រដ្ឋាភិបាលកំពុងរៀបចំដីសម្បទានសង្គមកិច្ចទំហំ៧.០០០ហិកតាសម្រាប់ពួកគាត់នៅក្នុងស្រុកមួយផ្សេង។
លោកបានមានប្រសាសន៍ថា “យើងនឹងសុំឲ្យពួកគាត់ទទួលយកលិខិតពីអាជ្ញាធរមូលដ្ឋាន ដែលលើកឡើងថា ពួកគាត់មិនមានដីទេ បន្ទាប់មកយើងនឹងផ្ដល់ដីសម្បទានសង្គមកិច្ចឲ្យពួកគាត់”។
អ្នកភូមិជាច្រើនគ្រួសារអះអាងថា ពួកគាត់ត្រូវបានបណ្ដេញចេញដោយបង្ខំ ពីព្រោះរដ្ឋាភិបាលចង់យកដីនេះទៅឲ្យក្រុមហ៊ុនវៀតណាម ដែលមានគម្រោងធ្វើចម្ការកៅស៊ូ។
លោក គង់ គឹមនី អភិបាលស្រុកបានមានប្រសាសន៍ថា ក្រុមហ៊ុនវៀតណាមឈ្មោះ ប៊ិញ ភឿក ២ (Binh Phoeuk 2) ទទួលបានដីសម្បទានសេដ្ឋកិច្ចទំហំ៤.០០០ហិកតា នៅក្បែរនោះកាលពីឆ្នាំ២០០៨ ប៉ុន្តែបានអះអាងថា ដីនេះមិនត្រួតស៊ីគ្នានឹងដីដែលអ្នកភូមិប្រហែល១០០គ្រួសារកំពុងរស់នៅ និងធ្វើស្រែចម្ការនេះទេ។
លោកបានអះអាងថា អាជ្ញាធរមូលដ្ឋានបានរុះរើតង់និងផ្ទះរបស់ពួកគាត់កាលពីថ្ងៃសុក្រ ហើយបានលើកឡើងថា ពួកគាត់ត្រូវបានជូនដំណឹងជាមុនច្រើនលើកច្រើនសាមកហើយ៕សារុន