យោងតាមអគ្គលេខាធិការគណបក្ស សម រង្ស៊ី បានឲ្យដឹងថា សមាជិកក្រុមប្រឹក្សាស្រុក និងខេត្តរបស់គណបក្សប្រឆាំងមិនទាន់ទទួលបានប្រាក់ខែពីរខែមកហើយ បន្ទាប់ពីក្រសួងមហាផ្ទៃចេញសារាចរណែនាំកាលពីខែមីនាអំពាវនាវឲ្យឈប់បើកប្រាក់ខែឲ្យពួកគេ និងបានដកតួនាទីទាំងនេះចេញទៀតផង។
លោក ហង្ស សុខហួ ដែលក៏ជាសមាជិកព្រឹទ្ធសភាគណបក្ស សម រង្ស៊ី ដែរនោះបានមានប្រសាសន៍ថា សមាជិកក្រុមប្រឹក្សាស្រុកខេត្តមួយចំនួនក្នុងចំណោមសមាជិកក្រុមប្រឹក្សាគណបក្ស សម រង្ស៊ី ៥៧៦នាក់ នៅក្នុងខេត្តសៀមរាប តាកែវ កណ្ដាល បាត់ដំបង កំពង់ស្ពឺ ស្វាយរៀង កំពង់ចាម និងខេត្តព្រះវិហារ ត្រូវបានដកប្រាក់ខែ។ លោក សុខហួ បានមានប្រសាសន៍ថា “យើងស្នើឲ្យ[ក្រសួងមហាផ្ទៃ]ពិនិត្យមើលករណីនេះ ប៉ុន្តែក្រសួងនេះមិនដែលឆ្លើយតបទេ”។
លោក គង់ គាំ ប្រធានគណបក្ស សម រង្ស៊ី បានសរសេរលិខិតមួយច្បាប់ផ្ញើជូនលោក ស ខេង រដ្ឋមន្ត្រីក្រសួងមហាផ្ទៃ កាលពីខែមុន រិះគន់លិខិតចុះថ្ងៃទី២០ ខែមីនា ដែលនៅក្នុងលិខិតនោះលោក ស ខេង បានណែនាំឲ្យមន្ត្រីមូលដ្ឋានឈប់បើកប្រាក់ខែឲ្យសមាជិកក្រុមប្រឹក្សាណាដែលបានចូលរួមជាមួយគណបក្សសង្គ្រោះជាតិសម្រាប់ការបោះឆ្នោតជ្រើសរើសសមាជិកក្រុមប្រឹក្សាបច្ចុប្បន្ននេះ ពីព្រោះពួកគេទទួលបានតួនាទីរបស់ខ្លួនក្នុងនាមជាសមាជិកគណបក្ស សម រង្ស៊ី។
សារាចរណែនាំរបស់លោក ស ខេង សំដៅដល់មាត្រា ១៥ និង១៦ នៃច្បាប់ស្ដីពីគណបក្សនយោបាយដែលចែងថា អ្នកនយោបាយអាចធ្វើជាសមាជិកគណបក្សតែមួយប៉ុណ្ណោះ។
លោក គង់ គាំ បានលើកឡើងថា មាត្រា ១២០ នៃច្បាប់បោះឆ្នោតផ្ដល់រយៈពេល៦ខែដល់អ្នកនយោបាយក្នុងករណីបែបនេះ។ លោក គង់ គាំ បានសរសេរនៅក្នុងលិខិតចុះថ្ងៃទី៨ខែមេសាថា “ម្យ៉ាងវិញទៀតសមាជិកគណបក្សនយោបាយអាចផ្លាស់ប្ដូរទៅជាសមាជិកគណបក្សនយោបាយថ្មីក្នុងរយៈពេល៦ខែមុនថ្ងៃបោះឆ្នោតបាន និងអាចរក្សាតួនាទីជាប់ឆ្នោតនិងប្រាក់ខែរបស់ខ្លួនរហូតដល់ចប់អាណត្តិ”។
ប៉ុន្តែសមាជិកក្រុមប្រឹក្សាគណបក្ស សម រង្ស៊ី មួយចំនួនមិនបានទទួលប្រាក់ខែទេហើយត្រូវបានដកតួនាទីនៅមុនការបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ នៅថ្ងៃទី១៨ ខែឧសភាទៀតផង។
លោក តាវ ហន អាយុ៤៨ឆ្នាំជាសមាជិកក្រុមប្រឹក្សាគណបក្ស សម រង្ស៊ី ស្រុកសាមគ្គីមានជ័យ ខេត្តកំពង់ឆ្នាំង បានមានប្រសាសន៍ថា លោកមិនទទួលបានប្រាក់ខែរបស់លោកចំនួន៥០០.០០០រៀលទេចាប់តាំងពីចុងខែកុម្ភៈមក។ លោកបានមានប្រសាសន៍ថា “ខ្ញុំបានលាលែងពីគណបក្ស សម រង្ស៊ី ដើម្បីឈរឈ្មោះជាបេក្ខជនគណបក្សសង្គ្រោះជាតិ។ ខ្ញុំទាមទារឲ្យគេបើកប្រាក់ខែឲ្យខ្ញុំ ប៉ុន្តែ [ប្រធានក្រុមប្រឹក្សាស្រុក] មិនបើកប្រាក់ខែឲ្យខ្ញុំទេ”។
បេក្ខជនតំណាងរាស្ត្រមួយចំនួនក្នុងចំណោមបេក្ខជនតំណាងរាស្ត្រគណបក្សប្រឆាំង ដែលពីមុនជាសមាជិកសភាគណបក្ស សម រង្ស៊ី និងគណបក្ស សិទ្ធិមនុស្ស បានប្រឈមនឹងស្ថានភាពស្រដៀងគ្នានេះនៅមុនការបោះឆ្នោតជាតិកាលពីខែកក្កដា ដែលនៅពេលនោះគណៈកម្មាធិការអចិន្ត្រៃយ៍រដ្ឋសភាដែលគ្រប់គ្រងដោយគណបក្សប្រជាជនកម្ពុជាបានសម្រេចកាលពីខែមិថុនា មិនបើកប្រាក់ខែឲ្យសមាជិកសភាគណបក្សប្រឆាំងណាដែលបានប្រកាសថាជាសមាជិកគណបក្សសង្គ្រោះជាតិ៕ សារុន