ខណៈដែលគណបក្សសង្គ្រោះជាតិបានធ្វើយុទ្ធនាការនៅតាមផ្លូវនានាក្នុងរាជធានីភ្នំពេញ និងនៅតាមបណ្ដាខេត្តដើម្បីកៀងគរការគាំទ្រមុនការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ នៅថ្ងៃទី១៨ ខែឧសភា គណបក្សប្រជាជនកម្ពុជាដែលគ្រប់គ្រងអំណាចបានលើកឡើងកាលពីម្សិលមិញថា ខ្លួនគ្មានផែនការធ្វើយុទ្ធនាការប្រជែងនឹងគណបក្សសង្គ្រោះជាតិឡើយ ដោយសារតែខ្លួនមានការជឿជាក់ថា មន្ត្រីក្រុមប្រឹក្សាភាគច្រើនជាអ្នកស្មោះស្ម័គ្រនឹងគណបក្សប្រជាជនកម្ពុជា។
លោក ជាម យៀប សមាជិកសភាជាន់ខ្ពស់ និងជាអ្នកនាំពាក្យរបស់គណបក្សប្រជាជនកម្ពុជា បានមានប្រសាសន៍ថា “មានក្រុមប្រឹក្សាឃុំសង្កាត់ស្ថិតក្នុងមុខតំណែងតែ១១.៤៥៩រូបប៉ុណ្ណោះ ដែលអាចបោះឆ្នោតបាន។ ដូច្នេះ យើងមានសុទិដ្ឋិនិយមថា ក្រុមប្រឹក្សារបស់គណបក្សប្រជាជនកម្ពុជាជាង៨.០០០រូបនឹងបោះឆ្នោតឲ្យគណបក្សរបស់យើង ហើយយើងនឹងទទួលបានអាសនៈនៅតាមស្រុក និងខេត្តខ្លះ”។
គណបក្ស សម រង្ស៊ី និងគណបក្សសិទ្ធិមនុស្ស ដែលរួមបញ្ចូលគ្នាដើម្បីបង្កើតគណបក្សសង្គ្រោះជាតិកាលពីឆ្នាំ២០១២ មានសមាជិកក្រុមប្រឹក្សាឃុំសង្កាត់តិចជាងគណបក្សប្រជាជនកម្ពុជា។គណបក្សសង្គ្រោះជាតិបានខំធ្វើយុទ្ធនាការយ៉ាងសកម្មរយៈពេលប៉ុន្មានថ្ងៃនេះ ដោយធ្វើការហែក្បួន និងជួបជុំគ្នានៅទូទាំងប្រទេស ហើយនឹងការហែក្បួនយុទ្ធនាការបន្ថែមទៀត។
ក៏ប៉ុន្តែលោក ជាម យៀប បានមានប្រសាសន៍ថា គណបក្សប្រជាជនកម្ពុជានឹងរក្សាការធ្វើយុទ្ធនាការឃោសនារបស់ខ្លួននៅតាមការិយាល័យរបស់គណបក្សនៅតាមខេត្ត ដោយអនុវត្តតាមអ្វីដែលលោកលើកឡើងថា ជាការហាមប្រាមមួយចេញដោយគណៈកម្មាធិការជាតិរៀបចំការបោះឆ្នោត(គ.ជ.ប.)មិនឲ្យមានបាតុកម្មនៅខាងក្រៅគណបក្សឡើយ។
លោកបានមានប្រសាសន៍ថា “យើងមិនមែនជាបក្សប្រឆាំង ដូច្នេះយើងគោរពរដ្ឋធម្មនុញ្ញ ព្រះមហាក្សត្រ និងបទបញ្ជារបស់គណៈកម្មាធិការជាតិរៀបចំការបោះឆ្នោត ខណៈដែលគណបក្សសង្គ្រោះជាតិប្រើយុទ្ធនាការឃោសនាបោះឆ្នោតជាលេសមួយសម្រាប់ការជួបជុំគ្នាខុសច្បាប់ និងបាតុកម្មខុសច្បាប់”។ លោកបានបន្ថែមថា “យើងជាគណបក្សគ្រប់គ្រងអំណាច។ ដូច្នេះយើងគ្រាន់តែប្រើឧគ្ឃោសនសព្ទដើម្បីឃោសនានៅតាមស្រុក ខណ្ឌ រាជធានី និងខេត្តអំពីកម្មវិធី និងគោលនយោបាយរបស់គណបក្ស ហើយយើងដំឡើងបដា និងអ្វីផ្សេងទៀត”។
លោក ញឹក ប៊ុនឆ័យ អគ្គលេខាធិការគណបក្សហ្វិនស៊ិនប៉ិច បានមានប្រសាសន៍ថា គណបក្សរបស់លោក ដែលជាលើកដំបូងមិនបានទទួលអាសនៈរដ្ឋសភាក្នុងការបោះឆ្នោតជ្រើសរើសតំណាងរាស្ត្រកាលពីឆ្នាំមុន នឹងផ្ដោតការខិតខំប្រឹងប្រែងរបស់ខ្លួនលើខេត្តចំនួនបួន ជាទីដែលខ្លួនមានក្រុមប្រឹក្សាឃុំច្រើនបំផុត គឺខេត្តបន្ទាយមានជ័យ កំពង់ធំ ឧត្តរមានជ័យ និងខេត្តសៀមរាប។
លោក ញឹក ប៊ុនឆ័យ បានមានប្រសាសន៍ថា “បេក្ខជនរបស់គណបក្សនឹងចុះទៅសំណេះសំណាលជាមួយក្រុមប្រឹក្សាឃុំទាំងអស់ដើម្បីផ្សព្វផ្សាយគោលនយោបាយរបស់គណបក្ស ពីព្រោះនេះមិនមែនជាការបោះឆ្នោតថ្នាក់ជាតិទេ ហើយមានតែក្រុមប្រឹក្សាឃុំសង្កាត់ប៉ុណ្ណោះមានសិទ្ធិបោះឆ្នោត”។ លោកបានឲ្យដឹងថា “ប្រសិនបើក្រុមប្រឹក្សាឃុំសង្កាត់ពីគណបក្សរបស់យើងគ្មាននរណាម្នាក់បោះឆ្នោតឲ្យអ្នកផ្សេងទេនោះ ខ្ញុំជឿថា យើងនឹងមានលទ្ធផលល្អក្នុងការបោះឆ្នោតនេះ”៕ ប៊ុននី