28 C
Phnom Penh

ការតវ៉ា​​​ធ្វើ​​​ឲ្យ​​​ការ​​​រក​​​ស៊ី​​​មួយ​​​ចំនួ​​​​​​ន​​​មាន​​​ផល​​​ល្អ​​​ និ​​​ងមួួ​យ​​​ចំនួន​​​មាន​​​ផល​​​អាក្រក់​​​

ដោយ ឌឹ ខេមបូឌា ដេលី

បទវិភាគ

អ្នក​​​តវ៉ារាប់​​​រយ​​​នាក់​​​តែង​​​តែ​​​ប្រមូល​​​ផ្តុំ​​​គ្នា​​​នៅ​​​ខាង​​​ក្រៅ​​​សាលា​​​ដំបូង​​​រាជ​​​ធានី​​​ភ្នំ​​​ពេញ​​​ នៅ​​​ពេលតុលាការ​​​បើក​​​សវនាការ​​​ជំនុំ​​​ជម្រះ​​​សំណុំ​​​រឿង​​​ធំៗ​​​ ប៉ុន្តែ លោក​​​ ភី ម៉េង​​​ឡេង​ អ្នក​​​គ្រប់​​​គ្រង​​​​​​ហាង​​​លក់​​​គ្រឿង​​​អេឡិចត្រូនិក​​​មួយ​​​កន្លែង​​​នៅ​​​ទល់​​​មុខ​​​សាលា​​​ដំបូង​​​ ចង់​​​ឲ្យ​​​ពួកគេ​​​ទៅ​​​ឲ្យ​​​​​​ឆ្ងាយ​​​។

សមត្ថ​កិច្ចបាន​ដាក់​របាំងបិទ​ផ្លូវ​ខាងមុខ​ផ្សា​ទំ​នើប​ ស៊ី​ធី​ម៉ល​ អំឡុង​ពេល​តុលា​ការ​កំ​ពុង​សាក​សួរ​ជន​ជាប់​ចោទ​ទាំង​២៣នាក់​ កាល​ពី​ម្សិល​មិញ​ ។​ ស៊ី​​ ចាន់​ណា
សមត្ថ​កិច្ចបាន​ដាក់​របាំងបិទ​ផ្លូវ​ខាងមុខ​ផ្សា​រទំ​នើប​ ស៊ី​ធី​ម៉ល​ អំឡុង​ពេល​តុលា​ការ​កំ​ពុង​សាក​សួរ​ជន​ជាប់​ចោទ​ទាំង​២៣នាក់​ កាល​ពី​ម្សិល​មិញ​ ។​ ស៊ី​​វ ចាន់​ណា

លោក​​​បាន​​​លើក​​​ឡើង​​​​​​ក្នុង​​​បទ​​​សម្ភាស​​​កាល​​​ពី​​​សប្តាហ៍​​​មុន​​​ថា “នៅ​​​ថ្ងៃ​​​​​​ដែល​​​គ្មាន​​​ការ​​​តវ៉ា យើង​​​អាច​​​រក​​​ចំណូល​​​បាន​​​ចន្លោះ​​​ពី​​​២.០០០ដុល្លារ​​​ទៅ​​​៤.០០០ដុល្លារ​​​ក្នុង​​​មួយ​​​ថ្ងៃ​​​។ ប៉ុន្តែ នៅ​​​ពេល​​​មាន​​​ការ​​​តវ៉ា​​​ យើង​​​បាត់​​​បង់​​​ចំណូល​​​នោះ​​​”។

នៅ​​​ពេល​​​អ្នក​​​តវ៉ា​​​ស្រែក​​​ ហ៊ោ​​​កញ្ជ្រៀវ​​​ និង​​​ច្រៀង​​​ចម្រៀង​​​ដើម្បី​​​បង្ហាញ​​​ការ​​​គាំទ្រ​​​របស់​​​ខ្លួន​​​ចំពោះ​​​សកម្មជន​​​សហ​​​ជីព​​​និង​​​កម្មករ ​​​ដែល​​​ត្រូវ​​​តុលាការ​​​ជំនុំ​​​ជម្រះ​​​ដោយសារ​​​ពួកគេ​​​ជាប់​​​ពាក់ព័ន្ធ​​​នៅក្នុងការ​​​តវ៉ា​​​ហិង្សា​​​កាល​​​ពីខែ​​​វិច្ឆិកា​​​ និង​​​ខែ​​​មករា​​​ ផ្សារ​​​ទំនើប​​​សីុធី​​​ម៉ល កម្ពស់​​​៤​​​ជាន់​​​បាន​​​បិទ​​​ទ្វារ​​​ ហើយ​​​ស្ថាន​​​ភាព​​​បែប​​​នេះ​​​កើត​​​ឡើង​​​ជា​​​ញឹក​​​ញាប់។

លោក​​​ ភី ​​​ម៉េង​​​ឡេង អ្នកគ្រប់​​​គ្រង​​​ក្រុមហ៊ុន​​​ ខេហ្វ័រ ដែល​​​ជា​​​ក្រុមហ៊ុន​​​លក់​​​រាយ​​​គ្រឿង​​​អេឡិច​​​ត្រូ​​​និក​​​នៅក្នុង​​​ផ្សារ​​​នេះ​​​បានមាន​​​ប្រសាសន៍​​​ថា​​​ ការ​​​បិទ​​​ទ្វារ​​​ផ្សារ​​​សីុធី​​​ម៉ល ជា​​​ញឹក​​​ញាប់​​​នៅ​​​មុន​​​ពេល​​​តុលាការ​​​បើក​​​សវនាការ​​​ជំនុំ​​​ជម្រះ​​​សំណុំ​​​រឿង​​​ធំៗ​​​ ដោយកំណាត់​​​​​​មហាវិថី​​​ព្រះ​​​មុនី​​​រ៉េត​​​​​ត្រូវ​​​បិទ​​​ដោយ​​​អ្នក​​​តវ៉ា​​​ និង​​​របាំង​​​នគរបាល​​​នោះ​​​ បាន​​​ធ្វើ​​​​ឲ្យ​​​ក្រុមហ៊ុន​​​របស់​​​លោកខាត​​​បង់​​​ប្រាក់​​​រាប់​​​ពាន់​​​ដុល្លារ។

ស្ត្រី​​​ម្នាក់​​​ឈ្មោះ នី ជីង ដែល​​​មាន​​​តូប​​​លក់​​​សម្លៀក​​​បំពាក់​​​តូច​​​មួយ​​​នៅ​​​ក្នុង​​​ផ្សារ​​​នេះ​​​បាន​​​ត្អូញ​​​ត្អែរ​​​ថា ​​​ផ្សារ​​​ទំនើប​​​ស៊ីធី​​​ម៉ល​​​ ដែល​​​តំណាង​​​របស់​​​ខ្លួន​​​​​​មិន​​​បាន​​​ធ្វើ​​​អត្ថាធិប្បាយ​​​ពាក់​​​ព័ន្ធ​​​នឹង​​​រឿង​​​នេះ​​​នោះ​​​ មិន​​​បាន​​​ព្យាយាម​​​ផ្តល់​​​សំណង​​​ដល់​​​អាជីវ​​​កម្ម​​​នានា​​​​​​ ចំពោះ​​​ការ​​​បិទ​​​ទ្វារ​​​នេះ​​​ទេ​​​។

ស្ត្រី​​​រូប​​​នេះ​​​​​​និយា​​​យ​​​ទៀត​​​​​ថា “ដោយសារ​​​ការតវ៉ា​​​ទាំង​​​នេះ​​​ យើង​​​បាន​​​ខាត​​​បង់​ប្រហែល​​​១០០​​​ដុល្លារ​​​ទៅ​​​២០០ដុល្លារ​​​ក្នុង​​​មួយ​​​ថ្ងៃ​​​ ហើយ​​​​​​ផ្សារ​​​សីុ​​​ធី​​​ម៉ល​​​ មិនបាន​​​បញ្ចុះថ្លៃ​​​ជួល​​​សម្រាប់​​​ពួក​​​យើង​​​ទេ​​​ នៅពេល​​​ប្រឈម​​​នឹងការ​​​លំបាក​​​បែប​​​នេះ​​​។ យើង​​​មិ​​​ន​​​សប្បាយ​​​ចិត្ត​​​ទេ​​​ ដែល​​​ការ​​​រក​​​ស៊ី​​​របស់​​​ពួក​​​យើង​​​រង​​​​​​ផល​​​ប៉ះពាល់​​​បែប​​​នេះ​​​”។

ចំណែក​​​ឯនៅ​​​ទីលាន​​​ប្រជា​​​ធិបតេយ្យ​​​ ដែល​​​គណបក្ស​​​ប្រឆាំង​​​បាន​​​ប្រើ​​​ប្រាស់​​​ធ្វើ​​​ជា​​​មូល​​​ដ្ឋាន​​​នៃ​​​មហា​​​បាតុកម្ម​របស់​​​ខ្លួន​​​​​​​​ចន្លោះ​​​ពីខែ​​​កក្កដាដល់​​​​​​ខែមករា​​​ និងដែល​​​ត្រូវ​​​បាន​​​នគរបាល​​​បិទ​​​ និង​​កាន់​​​កាប់​​​នាពេល​​​ថ្មី​​​ៗ​​​នេះ ខណៈ​​​ពេល​​​ដែល​​​គណបក្ស​​​សង្គ្រោះ​​​ជាតិ​​​បាន​​​ចាប់​​​ផ្តើម​​​ការ​​​ជួប​​​ជុំ​​​គ្នា​​​វិញ​​​នៅ​​​ក្នុង​​​រាជធា​​​នី​​​ភ្នំពេញ​​​ឯណោះ​​​វិញ​​​ ​​​ប៉ះពាល់​​​លើ​​​អាជីវកម្ម​​​នានា​​​ គឺកាន់​​​តែធ្ងន់​​​ធ្ងរ​​​ជាង​​​នេះ​​​ទៅ​​​ទៀត​​​។

លោក ហ្គើ​​​រី​​​ សាន់ (Gerry Sun) ម្ចាស់​​​ផ្ទះសំណាក់​​​ King Guesthouse ដែល​​​ស្ថិត​​​នៅ​​​តាម​​​បណ្តោយ​​​ផ្លូវ​​​លេខ​​​១១០​​​ជិត​​​ទីលាន​​​ប្រជាធិបតេយ្យ​​​បាន​​​លើក​​​ឡើង​​​ថា លោក​​​បា​​​នបង្ខំចិត្ត​​​បិទ​​​ផ្ទះ​​​សំណាក់​​​នេះ​​​ជា​​​អចិន្ត្រៃយ៍​​​កាល​​​ពីខែ​​​មេសា បន្ទាប់​​​ពី​​​ដំណើ​​​រការ​​​អស់​​​រយៈ​​​ពេល​​​១០​​​ឆ្នាំ​​​ ក្រោយ​​​ពី​​​ខាត​​​បង់​​​ប្រាក់​​​យ៉ាង​​​ច្រើន​​​សន្ធឹក​​​សន្ធាប់​​​រហូត​​​ដល់​​​ទៅ​​​៥​​​ម៉ឺុន​​​ដុល្លារ។

លោក​​​បាន​​​លើក​​​ឡើង​​​បន្ត​​​ទៀតថា “យើង​​​បាន​​​ខាត​​​បង់​​​៥​​​មឺុន​​​​​​ដុល្លារ​​​ពីឆ្នាំ​​​២០១៣​​​ដល់​​​ឆ្នាំ​​​២០១៤​​​ដោយ​​​សារ​​​តែ​​​បញ្ហា​​​នយោបាយ​​​កើត​​​ឡើង​​​ស្ទើរ​​​រាល់​​​ថ្ងៃ​​​កាល​​​ពី​​​ឆ្នាំ​​​មុន​​​។ អតិថិ​​​ជន​​​មើល​​​ឃើញ​​​មនុស្ស​​​ និង​​​នគរបាល​​​​​​កក​​​កុញ​​​ពីជាន់​​​ខាង​​​លើ​​​បង្អស់​​​ ហើយ​​​ក៏​​​ឈប់​​​ស្នាក់​​​នៅ​​​ នៅ​​​ថ្ងៃ​​​បន្ទាប់​​​។ខ្ញុំ​​​ត្រូវ​​​បិទវាចោល​​​ ហើយ​​​ខ្ញុំ​​​គ្មាន​​​ប្រាក់​​​បើក​​​វា​​​ឡើង​​​វិញ​​​ទេ ខ្ញុំ​​​ខាត​​​បង់​​​អស់​​​ហើយ​​​”។

 

លោក​​​  គៀត​​​ ច័ន្ទ​​​ថារិទ្ធ អ្ន​​​កនាំពាក្យ​​​អគ្គ​​​ស្នង​​​ការ​​​នគរបាល​​​ជាតិ​​​បានមាន​​​ប្រសាសន៍ថា របាំង​​​ការពាររបស់​​​នគរបាល​​​កាល​​​ពី​​​ម្សិលមិញ និង​​​វិធានការស្រដៀង​​​គ្នា​​​នេះ​​​ គឺ​​​ជាការ​​​ចាំ​​​បាច់​​​​​​ណាស់​​​ដើម្បី​​​រក្សា​​​ច្បាប់​​​ និងស​​​ណ្តាប់​​​ធ្នាប់​​​ដែ​​​ល​​​​​​ធ្វើ​​​ឲ្យ​​​អាជីវកម្មនានា​​រស់​​​រាន​​​។

លោក​​​មាន​​​ប្រសាសន៍​​​ថា “ច្បាប់​​​អនុញ្ញាត​​​ឲ្យ​​​ប្រជា​​​ពល​​​រដ្ឋ​​​មក​​​ពី​​​គ្រប់​​​និន្នាការ​​​គណបក្ស​​​នយោ​​​បាយ​​​​​​ធ្វើ​​​បាតុកម្ម​​​ ប៉ុន្តែ ពួកគាត់​​​ត្រូវ​​​តែ​​​ស្នើ​​​សុំ​​​ការ​​​អនុញ្ញាត​​​​​​ជា​​​មុន​​​សិន​​​។ ប៉ុន្តែ ពួកគាត់​​​មិនដែល​​​ស្តាប់​​​អា​​​ជ្ញាធរ​​​ទេ ដូច្នេះដើម្បី​​​រក្សា​​​ច្បាប់​​​ និង​​​សណ្តាប់ធ្នាប់​​​ យើង​​​ត្រូវ​​​តែ​​​បិទ​​​ផ្លូវ​​​។​​​តាម​​​​​​ពិត​​​ យើង​​​មិន​​​ចង់​​​ទេ​​​ ប៉ុន្តែបើ​​​មិន​​​​​​ធ្វើ​​​ដូច្នេះ​​​ទេ ស្ថាន​​​ភាព​​​នឹង​​​កាន់​​​តែ​​​អស្ថិរភាព​​​ ហើយនឹង​​​​​​ប៉ះពាល់​​​ដល់​​​អាជីវ​​​កម្ម​​​កាន់​​​តែ​​​ច្រើន​​​”។ ទោះ​​​ជា​​​យ៉ាង​​​ណា សម្រាប់​​​អាជីវកម្ម​​​មួយ​​​ចំនួន​​​នៅ​​​ក្បែរ​​​សាលា​​​ដំបូង​​​រាជធានី​​​ ការ​​​តវ៉ា​​​មាន​​​ផល​​​ល្អ​​​សម្រាប់​​​ពួកគេ​​​ទៅ​​​វិញ​​​ទេ​​​​​​។

តេលាម៉ាត នៅ​​​ចំណុច​​​​​​កាច់ជ្រុង​​​នៃ​​​ផ្លូវ​​​នេរុហ៍​​​ និង​​​មហាវិថី​​​ព្រះ​​​សី​​​ហនុ ការ​​​លក់​​​ដូរ​​​​​​របស់​​​ខ្លួន​​​បាន​​​កើន​​​ឡើង​​​ពី​​​១០​​​ទៅ​​​២០​​​ភាគ​​​រយ​​​ ដោយ​​​សារ​​​តែ​​​រំហូរ​​​ចរាចរណ៍​​​លើកំណាត់​​​​​​មហាវិថី​​​ព្រះមុនី​​​រ៉េត​​​ត្រូវ​​​បាន​​​កាត់​​​ផ្តាច់​​​ជាញឹក​​​ញាប់​​​ដោយសារ​​​របាំង​​​នគរបាល​​​ ប៉ុន្តែ ស្ថានីយ​​​ប្រេង​​​ឥន្ធនៈ​​​តូតាល់​​​ដែល​​​ស្ថិត​​​នៅ​​​ចម្ងាយ​​​ប្រហែល​​​៥០​​​ម៉ែត្រ​​​ពី​​​មហាវិថី​​​ព្រះ​​​សីហនុ​​​ ដែល​​​នគរបាល​​​ពុំបាន​​​បិទ​​​របាំង​​​នោះ​​​ មាន​​​អតិថិជន​​​ពេញ​​​ៗ​​​ ហើយ​​​ការលក់​​​ដូរ​​​នៅ​​ទី​​​នេះ​​​កើ​​​ន​​​ឡើង​​​៦០​​​ភាគ​​​រយដល់​​​៦០០​​​ដុល្លារ​​​នៅថ្ងៃ​​​ដែល​​​មានការ​​​តវ៉ា​​​។

បេឡាករ​​​​​​ម្នាក់​​​នៅ​​​ស្ថានីយ​​​ប្រេង​​​ឥន្ធនៈតូតាល់​​​​​​ឈ្មោះ សុន​​​ ខេមា និយាយ​​​ថា “នៅ​​​ថ្ងៃ​​​មាន​​​ការ​​​តវ៉ា​​​ ការ​​​លក់​​​ដូរ​​​របស់​​​យើង​​​កើន​​​ឡើង​​​ប្រហែល​​​៥០​​​ភាគរយ​​​សម្រាប់​​​ផលិត​​​ផល​​ទូទៅ​​​រួមទាំង​​​ប្រេង​​​សាំង​​​ផង​​​។ តាម​​​ធម្មតា​​​យើង​​​លក់​​​បាន​​​ប្រហែល​​​២០០​​​ដុល្លារ​​​ ក្នុង​​​មួយ​​​ថ្ងៃ​​​ចាប់​​​ពី​​​ព្រឹក​​​ព្រលឹម​​​រហូត​​​ដល់​​​ម៉ោង​​​ប្រហែល​​​៦​​​ល្ងាច​​​ ប៉ុន្តែ នៅ​​​ថ្ងៃ​​​មាន​​​កា​​​រតវ៉ា ការ​​​លក់​​​ដូរ​​​បានកើ​​​ន​​​ឡើង​​​ដល់​​​ប្រហែល​​​៥០០​​​ដុល្លារ​​​ទៅ​​​៦០០ដុល្លារ​​​ក្នុង​​​រយៈ​​​ពេល​​​ដូចគ្នា​​​”។

សម្រាប់​​​អ្នក​​​លក់​​​លៀស​​​ហាល​​​ម្នាក់​​​ឈ្មោះ អ៊ុយ សុខ​​​ចិត្រា​​​ ដែល​​​កើប​​​លៀស​​​​​​​​​​​​នៅសល់​​​ចុង​​​ក្រោយ​​​ដាក់​​​ក្នុង​​​ថង់​​​លក់​​​ឲ្យអ្នក​​​ទិញ​​​ម្នាក់​​​ដែល​​​បាន​​​ចំណាយ​​​ពេល​​​ចូល​​​រួម​​​ការ​​​តវ៉ា​​​កាល​​​ពី​​​ព្រឹក​​​ម្សិលមិញ​​​ ការ​​​តវ៉ា​​​គឺជា​​​ឱកាស​​​ដ៏ល្អដែល​​​ធ្វើ​​​ឲ្យគាត់​​​លក់​​​ដាច់ឆាប់​​​អស់​​​។ គាត់​​​និយាយ​​​ថា ជា​​​ធម្មតាគាត់​​​ត្រូវ​​​ចំណាយ​​​ពេល​​​ពេញ​​​មួយ​​​ថ្ងៃ​​ទើប​​​​​​លក់​​​លៀស​​​ហាល​​​អស់​​​ ប៉ុន្តែ​​​នៅ​​​ថ្ងៃ​​​មាន​​​ការ​​​តវ៉ា​​​ គាត់​​​លក់​​​លៀស​​​អស់​​​ពីរទេះ​​​រុញ​​​​​ក្នុង​​​រយៈ​​​ពេល​​​ប្រហែល​​​៣​​​ម៉ោង​​​ប៉ុណ្ណោះ​​​។

គាត់​​​និយាយ​​​ទៀត​​​ថា “ជាធម្មតា​​​ខ្ញុំ​​​រក​​​ចំណូល​​​បាន​​​ប្រហែល​​​១៥​​​ដុល្លារ​​​ទៅ​​​១៨​​​ដុល្លារ​​​ក្នុង​​​មួយ​​​ថ្ងៃ ប៉ុន្តែ អំឡុង​​​ពេល​​​មាន​​​ការ​​​តវ៉ា ខ្ញុំ​​​លក់​​​អស់​​​រលីង​​​ដោយ​​​ប្រើ​​​ពេល​​​តិច និង​​​រក​​​ចំណូល​​​​​​បាន​​​ចន្លោះពី​​​២៣​​​ដុល្លារ​​​ទៅ​​​២៥​​​ដុល្លារ​​​”។

ស្ត្រី​​​ម្នាក់​​​ឈ្មោះ កៅ ស្រស់ អាយុ​​​៣៦​​​ឆ្នាំ​​​ជាអ្នក​​​លក់​​​ពោត​​​ចំហុយ​​​នៅ​​​ជិត​​​សាលា​​​ដំបូង​​​រាជធានី​​​ភ្នំពេញ​​​បាន​​​យល់​​​ស្រប​​​ថា ការតវ៉ា​​​បាន​​​ជួយ​​​ឲ្យគាត់​​​លក់​​​ដូរ​​​ដាច់​​​។ គាត់​​​និយាយថា ការ​​​លក់ដូរ​​​នៅថ្ងៃ​​​មាន​​​ការ​​​តវ៉ា​​​ គឺ​​​លក់ដាច់​​​លឿន​​​ជាង​​​ធម្មតា។អាជីវកម្ម​​​ [ នៅ​​​ជុំ​​​វិញសាលាដំបូង​​​]​​​ គឺ​​​មាន​​​ណាស់​​​ ដូច្នេះ​​​ ប្រសិន​​​បើ​​​ពួកគេខាត​​​ ខ្ញុំ​​​មិន​​​ខ្វល់ទេ​​​”៕សុខុម

​​​​​​​​​​

​​​​​​​​​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស