32 C
Phnom Penh

កម្មករ​​បី​នាក់​ត្រូវ​បាន​ចាប់​ខ្លួន​ដោយសារ​ការ​តវ៉ា​នៅ​រោងចក្រ​វីង​ស្តា

ដោយ ឌឹ ខេមបូឌា ដេលី

បទវិភាគ

យោង​តាម​នគរ​បាល​ និង​តំណាង​សហជីព​ម្នាក់​បាន​ឲ្យ​ដឹង​ថា កម្មករ​​បី​នាក់​ត្រូវ​បាន​ចាប់​ខ្លួន​កាល​ពី​ព្រឹក​ម្សិលមិញ​នៅ​ខាង​ក្រៅ​រោងចក្រ​ផលិត​ស្បែក​ជើង​ វីង​ស្តា ក្នុង​ខេត្ត​កំពង់​ស្ពឺ ជា​ទី​ដែល​សហជីព​សេរី​កម្មករ​ (FTU) បាន​ដឹក​នាំ​ការ​ធ្វើ​កូដ​កម្ម​ដើម្បី​ទាម​ទារ​ប្រយោជន៍​ និង​សំណង​។

តំណាង​ FTU ម្នាក់​បាន​ឲ្យ​ដឹង​ថា នគរ​បាល​បាន​ចាប់​ខ្លួន​កម្មករ​បី​នាក់​ ចំណែក​មន្ត្រី​នគរ​បាល​មូល​ដ្ឋាន​ម្នាក់​បាន​និយាយ​ថា កម្មករ​ប្រាំមួយ​នាក់​​ត្រូវ​បាន​ចាប់​ខ្លួន​។

លោក គឹម សុផាន់​ណារ៉ា អធិការ​នគរ​បាល​ស្រុក​គងពិសី ជា​ទី​ដែល​រោងចក្រ​វីង​ស្តា ស្ថិត​នៅ​ទីនោះ​បាន​មាន​ប្រសាសន៍​ថា ” នគរ​បាល​ខេត្ត​បាន​ចាប់​ខ្លួន​មនុស្ស​ប្រាំ​មួយ​នាក់​ដើម្បី​សាក​សួរ​។ វា​​ទាក់​ទង​នឹង​ការ​តវ៉ា​” ។ លោក​បាន​បន្ថែម​ថា “ពួកគេ​ត្រូវ​បាន​ចាប់​ខ្លួន​ពី​បទ​ញុះញង់​ឲ្យ​មាន​ការ​តវ៉ា​”។ លោក​បាន​បដិសេធ​មិន​ធ្វើ​អត្ថា​ធិប្បាយ​ថែម​ទៀត​ឡើយ​។ លោក​ កែវ ពិសី ស្នង​ការ​នគរ​បាល​ខេត្ត​កំពង់​ស្ពឺ បាន​បដិសេធ​មិន​ធ្វើ​អត្ថាធិប្បាយ​ទេ​។

អ្នកស្រី ប៊ិន ស្រីមុំ ប្រធាន​សហជីព​សេរី​កម្មករ​ប្រចាំ​នៅ​រោង​ចក្រ​វីង​ស្តា បាន​មាន​ប្រសាសន៍​ថា កម្មករ​ចំនួន​បី​នាក់​ត្រូវ​បាន​នគរ​បាល​នាំ​ខ្លួន​ទៅ​​​ ហើយ​ពេល​នេះ​​សហជីព​មិន​ដឹង​ថា​ ពួក​គេ​នៅ​កន្លែងណា​ឡើយ​។ អ្នក​ស្រី​បាន​​ឲ្យ​ដឹង​ថា “កម្មករ​បី​នាក់​ត្រូវ​បាន​ចាប់ខ្លួន​ ដែល​ប្រហែល​ដោយសារកាល​ពី​ម្សិលមិញ [ថ្ងៃច័ន្ទ​] ពួកគេ​ទាំង​អស់​នោះ​បាន​បិទ​ផ្លូវ​”។

អ្នកស្រី ប៊ិន ស្រីមុំ បាន​មាន​ប្រសាសន៍​ថា កម្មករ​ទាំង​បី​នាក់​នេះ​បាន​ចូល​រួម​​ជាមួយ​សហជីព​សេរី​កម្មករ​។ បើ​ទោះជា​កម្មករ​នៅ​រោងចក្រ​វីង​ស្តា ដែល​ជា​សមាជិក​សហជីព​អំណាច​កម្មករ​ខ្មែរ​បាន​ធ្វើ​កូដ​កម្ម​ចាប់​តាំង​ពី​ថ្ងៃ​ទី​២៦ ខែ​មេសា​មក​ក៏ដោយ ក៏​អ្នក​ស្រី​បាន​មាន​ប្រសាសន៍​ថា ថ្ងៃច័ន្ទ គឺ​ជា​ថ្ងៃ​ដំបូង​​ដែល​កម្មករ​បាន​បិទ​កំណាត់​​ផ្លូវ​ជាតិ​លេខ​៣ នៅ​ជាប់​រោងចក្រ​នេះ​។ អ្នក​ស្រី​បាន​​ឲ្យ​ដឹង​ថា “នគរ​បាល​ប្រហែលជា​ស្ដីបន្ទោស​ពួកគេ​ថា បាន​បង្ក​ការ​បិទ​ផ្លូវ​ ប៉ុន្តែ​កម្មករ​ទាំង​អស់​ចង់​បាន​ដំណោះ​ស្រាយ​ដូច្នេះ​ហើយ​ក៏​បាន​សម្រេច​ចិត្ត​រួម​គ្នា​ធ្វើ​កូដ​កម្ម​”​។​

កម្មករ​ម្នាក់​នៅ​រោងចក្រ​វីង​ស្តា ដែល​គ្រាន់​តែ​ប្រាប់​ឈ្មោះថា ដា ដោយសារ​ខ្លាច​បាត់​បង់​ការ​ងារ​របស់​នាង​ បាន​និយាយ​ថា នគរ​បាល​បាន​នាំ​ខ្លួន​អ្នក​តវ៉ា​បី​នាក់​ ខណៈ​ដែល​កម្មករ​ផ្សេង​ទៀត​ដែល​ប្រមូល​ផ្ដុំ​គ្នា​នៅ​ព្រឹក​ព្រលឹម​បាន​ភៀស​ខ្លួន​​ចេញ​ពី​ទីកន្លែង​កើត​ហេតុ​។ អ្នក​ស្រី​បាន​មាន​ប្រសាសន៍​ថា “តំណាង​កម្មករ​បាន​ព្យាយាម​ចុះទៅ​រោង​ចក្រ​នេះ​នៅ​ព្រឹក​ព្រលឹម​ ​ដើម្បី​​ដំឡើង​ឧគ្ឃោ​ស​នសព្ទ​សម្រាប់​ការ​តវ៉ា​ ប៉ុន្តែ​នគរ​បាល​បាន​រារាំង​ពួកគេ​ ហើយ​បន្ទាប់​នោះ​បាន​ដាក់​ខ្នោះ​ពួក​គេ និង​ចាប់​ពួកគេ​ចូល​ក្នុង​រថយន្ត​”។

ស្ត្រី​ឈ្មោះ ប៉ែន​ ហុង អាយុ​៣០​ឆ្នាំ​បាន​ឲ្យ​ដឹង​ថា នៅ​ពេល​គាត់​​បាន​ធ្វើ​ដំណើរ​ទៅ​ធ្វើការ​នៅ​រោង​ចក្រ​មួយ​ក្បែរ​នោះ គាត់​​បាន​ឃើញ​ហេតុ​ការណ៍​នោះ​។ គាត់​​បាន​និយាយ​ថា “ខ្ញុំ​បាន​ឃើញ​រថយន្ត​ពីរ​គ្រឿង​​ជាមួយ​​នគរ​បាល​ ហើយ​ពួក​គេ​បាន​​ចាប់​មនុស្ស​បី​នាក់​​បោះ​ចូល​ក្នុង​រថយន្ត ហើយ​អ្នក​ផ្សេង​ទៀត​រត់គេច​ខ្លួន​” ។

អ្នកស្រី​ ប៊ិន ស្រីមុំ បាន​មាន​ប្រសាសន៍​ថា ការ​ចាប់​ខ្លួននេះ​អាច​នឹង​​បញ្ឆេះ​ឲ្យ​មាន​ការ​តវ៉ា​បន្ថែម​ទៀត​ទៅ​វិញ​ទេ​ បន្ទាប់ពី​តំណាង​សហជីព​ និង​អ្នក​គ្រប់​គ្រង​រោងចក្រ​វីង​ស្តា ឈាន​ដល់​កិច្ច​ព្រមព្រៀង​បណ្ដោះ​អាសន្ន​មួយ​កាល​ពី​ម្សិល​មិញ​ដើម្បី​បញ្ចប់​កូដ​កម្ម​នេះ​។

អ្នក​ស្រី​បាន​ឲ្យ​ដឹង​ថា រោង​ចក្រ​នេះ​បាន​ព្រម​ព្រៀង​អំឡុង​ការ​ប្រជុំ​មួយ​អំពី​ការ​ទាម​ទារ​បួន​ចំណុច រាប់​ទាំង​ប្រាក់​សុខភាព​៥ដុល្លារ​ក្នុង​មួយ​ខែ​ ប្រាក់​ថ្លៃ​អាហារ​​ប្រចាំថ្ងៃ​០,៥០​ដុល្លារ និង​ការ​បើក​ប្រាក់​ខែ​អំឡុង​ពេល​ដែល​កម្មករ​ធ្វើ​កូដ​កម្ម​។ ក៏ប៉ុន្តែ​តំណាង​រោងចក្រ​បាន​លើកឡើង​ថា ពួកគេ​នឹង​អនុវត្ត​តាម​កិច្ច​ព្រម​ព្រៀង​នេះ​លុះ​ត្រាតែ​​កម្មករ​វិល​ត្រឡប់​​ចូល​ទៅ​ធ្វើ​ការ​ងារ​របស់​ខ្លួន​វិញ​នៅ​ថ្ងៃនេះ​។

អ្នកស្រី​ ស្រីមុំ បាន​ឲ្យ​ដឹង​ថា “កម្មករ​ទាំង​អស់​លែង​ចង់បាន​ប្រាក់​ទៀត​ហើយ​។ ពេល​នេះ​ពួកគេ​ចង់​ឲ្យ​មាន​ការ​ដោះលែង​កម្មករ​ដែល​ត្រូវ​បាន​ចាប់​ខ្លួន​។ ខ្ញុំ​គិត​ថា កម្មករ​នឹង​មិន​ត្រឡប់​ទៅ​ធ្វើការ​វិញ​នៅ​ថ្ងៃ​ស្អែក​នេះ​ទេ​”។ តំណាង​រោងចក្រ​វីង​ស្តា មិន​អាច​ទាក់​ទង​បាន​ដើម្បី​សុំ​ការ​អត្ថាធិប្បាយ​បាន​ឡើយ៕ ប៊ុននី​

(រាយការណ៍​បន្ថែម​ដោយ វណ្ណ រើន​)​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស