28 C
Phnom Penh

ហ៊ែក​​​ឃើ​សារភាពថាបានជ្រៀតចូល​គេហទំព័រ​របស់​អង្គភាព​ប្រឆំាងអំពើ​ពុក​រលួយ​​

ដោយ ឌឹ ខេមបូឌា ដេលី

បទវិភាគ

ប្រធាន​អង្គភាព​ប្រឆាំង​​អំពើ​​ពុក​​រលួយ បាន​ឲ្យដឹងថា សមាជិក​ក្រុម​ហ៊ែកឃើ​អនាមិក​កម្ពុជា​​ពីរនាក់ ដែល​ត្រូវ​​បា​ន​ចោទ​ប្រកាន់​​កាល​ពីថ្ងៃ​ច័ន្ទ​ ពីបទ​​ជ្រៀត​ចូល​​គេហ​​ទំព័រ​​​របស់​អង្គភាព​ប្រឆាំង​អំពើ​​ពុក​​រលួយ​ បាន​​​សារ​ភាព​​​​ថា ខ្លួន​ពិត​ជាបាន​ប្រព្រឹត្ត​​​បទ​ល្មើស​​នេះ​មែន​កាល​​ពីម្សិល​​មិញ។

លោក ឱម ​យុិនទៀង ប្រធាន​​អង្គភាព​​ប្រឆាំង​​អំពើពុក​រលួយ បានលើកឡើង​​អំ​ឡុង​សន្និ​​​សីទ​សារព័ត៌មានមួយថា ឈ្មោះ កែវ ស៊ីផេង ​អាយុ​២៦ឆ្នាំ និងឈ្មោះ ​សូ​​​ហង្ស​​​ រតនា អាយុ​២៦ឆ្នាំ ​បានប្រាប់​​សមត្ថថា ​​ពួកគេ​បាន​ជ្រៀតចូល​គេ​​ហ​​ទំព័រ​​​របស់​អង្គភាព​​​ប្រឆាំង​​អំពើ​​ពុក​រលួយកាលពីថ្ងៃ​​ទី ២៩ ខែ​មេសា​​ “ដើម្បី​លេង​សើច” ​​ប៉ុន្តែ​មិនអាច​​ចូល​​​ទៅ​​​ដល់​​​មូល​​​​​​ដ្ឋាន​​​​ទិន្ន​ន័យ​​ក្នុង​គេ​​ហទំព័រ​នេះទេ​។

លោក ឱម យុិន​ទៀង ​បាន​មាន​ប្រសាសន៍​ថា  “ពួកគេ​​បាន​សារភាព​​​ថា ​​ពួកគេ​​បាន​វាយ​ប្រ​ហារ​គេហទំព័រ​​របស់​​​អង្គភាព​ប្រឆាំង​​​អំពើ​​ពុក​​​រលួយ​​ដើម្បី​លេង​សើច​ ហើយ​ពួកគេ​​ចង់​សាក​ល្បង​​ជំនាញ​[បច្ចេក​​វិទ្យា​​ព័ត៌មាន​] របស់​​ខ្លួន​”។

លោក​បាន​មាន​ប្រសាសន៍​បន្ថែម​ថា លោក​មិនយល់​​ថា​​ហេតុ​អ្វី​បាន​​ជា​​បុរស​​ទាំងពីរ​នាក់​នេះ​​ជ្រើស​រើសការ​​​វាយ​ប្រហារ​​គេ​ហ​ទំព័ររបស់​​អង្គភាព​ប្រឆាំង​​អំពើ​ពុក​រលួយ​ទេ។ លោក​បាន​ឲ្យ​ដឹងថា “គេហទំព័រ​របស់​អង្គភាព​ប្រឆាំង​អំ​ពើ​​ពុក​រលួយ​ ប្រើ​សម្រាប់​តែ​​​បង្ហោះ​​​ឯកសារ​​​ និង​​សេចក្តី​រាយ​ការណ៍​​សម្រាប់​បណ្តាញ​​ព័ត៌មាន​ទាញ​យក​​​​ប៉ុណ្ណោះ​​​”។ យុវជន​​​ សីុផេង និង​​​យុវជន រតនា ត្រូវ​​​បាន​​​ចាប់ខ្លួន​​​នៅក្នុង​​​ខេត្ត​​​សៀម​​​រាប​​​កាល​​​ពី​​​ថ្ងៃ​​​ព្រ​​​ហស្បតិ៍។

នៅ​ឯ​សន្និសីទ​សារព័ត៌មាន លោក យុិន​ទៀង ​បាន​​បង្ហាញ​​ភ័ស្តុ​តាង​​ប្រាប់​​អ្នក​យក​ព័ត៌​មាន​​​ប្រឆាំង​នឹង​បុរស​​ទាំងពីរ​ និង​បាន​និយាយ​ថា ​ពួកគេ​​ត្រូវ​បាន​ចោទ​ប្រកាន់​ក្រោម​មាត្រា​៤២៧ នៃក្រម​​ព្រហ្មទណ្ឌ​កម្ពុជា ពី​បទ​ជ្រៀត​ចូល​បណ្តាញ​​ព័ត៌មាន​ដោយ​ខុស​ច្បាប់​ លួច​​ទិន្នន័យ​សម្ងាត់​​​ពី​ប្រព័ន្ធ​​ព័ត៌មាន​ និង​កែ​ទិន្ន​ន័យ។

លោក យុិនទៀង ក៏បាន​មានប្រសាសន៍​ដែរថា យុវ​​​ជន​​​ ស៊ី​ផេង ​និង​យុវជន​​​ រតនា ​​ដែល​ជា​និស្សិត​​នៅ​សាកល​វិទ្យាល័យបច្ចេកវិទ្យា IIC ក្នុង​រាជ​ធានីភ្នំពេញ​ “ឆ្លាត​ជាង​​​ហ៊ែក​ឃើ​​​ពីរនាក់​​ទៀត​ ​” ដែល​ត្រូវបាន​ចាប់​ខ្លួន​​​កាលពីខែ​មុន។ លោក​បាន​មាន​ប្រសាសន៍​ថា​ “អ្នក​ទាំងពីរ​ឆ្លាត​ជាង​បុរស​​ពីរនាក់​​​ដែលត្រូវបាន​ចាប់ខ្លួន​​​​ពី​​​មុន​​​។ ​ពួក​គេ​ឧស្សា​ហ៍​រៀន​សូត្រ​…។ ហេតុ​អ្វី​បានជា​ពួកគេ​មិន​ប្រើ​ទេពកោសល្យ​ពួកគេ​ដើម្បី​ជួយ​អភិវឌ្ឍ​ប្រទេស​ ឬ​ធ្វើ​ការ​​ជាមួយ​ក្រុម​ហ៊ុន​ល្អៗ​?។ យើង​សង្ឃឹ​ម​ថា ពួកគេ​ទាំង​ពី​រ​នាក់​ក្លាយ​ជា​មនុស្ស​ល្អ។ យើង​ចង់​ឲ្យ​ពួកគេ​ស្វែង​រក​ផ្លូវ​ដ៏​ល្អ​ប្រសើរ​បំផុត​ដើម្បី​ធ្វើ​អ្វី​ល្អ​ៗ​សម្រាប់​សង្គម​របស់​យើង”។

កាល​ពី​ដើមខែ​មេសា​ សមាជិក​ក្រុម​ហ៊ែក​ឃើ​អនាមិក​កម្ពុជា​ ឈ្មោះ ប៊ុន ឃីង មង្គល​បញ្ញា អាយុ​២១​ឆ្នាំ និង​ឈ្មោះ ជូ សុង​​​ហេង​ អាយុ២១​ឆ្នាំ​ត្រូវ​បាន​ចោទ​ប្រកាន់​​ថា បាន​វាយ​ប្រហារ​គេ​ហ​ទំព័រ​រដ្ឋាភិបាល​ចំនួន​៣០​ និង​លួច​ទិន្ន​ន័យ​។

កាល​ពី​ម្សិលមិញ​ផង​ដែរ សមាជិក​ក្រុម​នេះ​បាន​ជ្រៀត​ចូល​គេ​ហ​ទំព័រ​របស់​ Gendarmerie Royale Khmer និង​ជំនួស​គេ​ហ​ទំព័រ​នេះ ដោយ​​សារ​​​មួ​​​យ​​​ថា …”ជន​​​ពុក​​​រលួយ​​​ខ្លាច​​​ពួក​​​យើង​  ជន​​​ស្មោះ​ត្រង់គាំ​ទ្រ​យើង​ អ្នក​​​ក្លាហាន​ចូល​រួម​ជាមួយ​យើង​”។​ នៅ​​​ក្នុង​​​គេ​ហ​ទំព័រ​នេះ​ក៏​មាន​​​​ខ្សែ​វីដេ​អូ​ចាស់​មួយ​​​ដែរ​​​ ដែល​​​បង្កើត​ឡើង​ដោយ​ក្រុម​​​នេះ​​​​ គំរាម​វាយ​ប្រហារ​​​​ប្រព័ន្ធ​​​អិុន​ធើ​ណិត​របស់​​រដ្ឋាភិបាល​កម្ពុជា​បន្ថែម​ទៀត​។

​អំឡុ​ង​សន្និសីទ​សារព័ត៌មាន​កាល​ពី​ម្សិលមិញ លោក យិុន​ទៀង ក៏​បាន​លើក​ឡើង​ដែរ​ថា កាល​ពី​ឆ្នាំ​ទៅ​អង្គភាព​ប្រឆាំង​អំពើ​ពុក​រលួយ​បាន​ទទួល​ពាក្យ​បណ្តឹង​ចំនួន​៧០០​ករណី​​ ​​​ក្នុង​នោះ​១១៧​ករណី​ចោទ​ប្រកាន់​មន្ត្រី​ជាន់​ខ្ពស់​ពី​បទ​ពុក​រលួយ​ និង​​៣៥០​ករណី​ទៀត​ពាក់​ព័ន្ធ​នឹង​មន្ត្រី​ថ្នាក់​ក្រោម​។ ពាក្យ​បណ្តឹង​នៅ​សេស​សល់​​មិន​បាន​បញ្ចេញ​ឈ្មោះ​មន្ត្រី​ជាក់​លាក់​នោះ​ទេ​។ ចំណោម​ករណី​ពាក់​ព័ន្ធ​នឹង​មន្ត្រី​ជាន់​ខ្ពស់​ លោក​បាន​មាន​ប្រសាសន៍​ថា ២៥​ករណី​បាន​ឈាន​​​ដល់​​​ការ​ចាប់​ខ្លួន​ ខណៈ​ដែល​តែ​ពីរ​ករណី​ប៉ុណ្ណោះ​ពាក់​ព័ន្ធ​នឹង​មន្ត្រី​ថ្នាក់​ក្រោម​បាន​ឈានដល់​ការ​ចាប់​ខ្លួន​៕ ប៊ុន​នី​

(រាយការណ៍​បន្ថែម​ដោយ​ Joshua Wilwohl)​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស