កាលពីថ្ងៃអង្គារ សាលាដំបូងរាជធានីភ្នំពេញបានពន្យារពេលសវនាការនៅក្នុងរឿងក្ដីរបស់អ្នកតវ៉ា២៥នាក់ ដែលត្រូវបានចាប់ខ្លួនអំឡុងពេលកម្មកររោងចក្រកាត់ដេរធ្វើកូដកម្មនៅក្នុងទីក្រុងកាលពីចុងឆ្នាំមុន។
យុវជនពីរនាក់ ដែលត្រូវបានចាប់ខ្លួននៅក្នុងការប៉ះទង្គិចគ្នាជាមួយនគរបាលនៅជិតស្ពានស្ទឹងមានជ័យកាលពីខែវិច្ឆិកា និងត្រូវបានចោទប្រកាន់ពីបទបង្ករបួសស្នាម និងបំផ្លិចបំផ្លាញទ្រព្យសម្បត្តិនោះ ត្រូវបានប្រាប់ថា សាលក្រមពួកគេនឹងប្រកាសនៅថ្ងៃទី៣០ ខែឧសភា។
ទោះជាយ៉ាងណា មនុស្សទាំង២៣នាក់ដែលត្រូវបានទាហាន និងកងរាជអាវុធហត្ថវាយដំ និងចាប់ខ្លួនកាលពីខែមករា ទំនងជាពិបាកទទួលបានសវនាការលឿនណាស់។
កាលពីថ្ងៃអង្គារ តុលាការបានឲ្យដឹងថា ខ្លួននឹងបន្តបើកសវនាការរឿងក្ដីរបស់ពួកគេក្នុងរយៈពេលពីរសប្ដាហ៍ទៀត គឺនៅថ្ងៃទី២០ ខែឧសភា ដោយពីមុនបានជំរុញឲ្យមានការបើកសវនាការរឿងក្ដីនេះ១១ថ្ងៃក្រោយពីបានបើកសវនាការកាលពីថ្ងៃទី២៥ ខែមេសា។
លោក នី ចរិយា ដែលកំពុងតាមដានសវនាការរឿងក្ដីនេះក្នុងនាមជាប្រធានផ្នែកឃ្លាំមើលនៅអង្គការសិទ្ធិមនុស្សអាដហុក បាននិយាយថា “យោងតាមការឃ្លាំមើលរបស់យើងលើរឿងក្ដីជាច្រើនក្នុងរយៈពេលប៉ុន្មានឆ្នាំនេះ រឿងក្ដីនេះចម្លែកណាស់ ដោយសារតុលាការកំពុងធ្វើបែបនេះ”។
លោក នី ចរិយា បានបញ្ជាក់ពីការខ្វះភ័ស្ដុតាងដាក់បន្ទុកនៅក្នុងការបើកសវនាការជំនុំជម្រះអ្នកទោសទាំង២៣នាក់ទាំងពីរលើក។ នៅក្នុងសវនាការកាលពីថ្ងៃអង្គារ ព្រះរាជអាជ្ញាពឹងផ្អែកតែលើនគរបាលដែលបាននិយាយប្រាប់ពីរឿងរ៉ាវរបស់អ្នកតវ៉ាមួយក្រុមធំ ដែលបានគប់ដុំថ្ម និងដំបងដែកដាក់ពួកគេប៉ុណ្ណោះ។ លោកបានមានប្រសាសន៍ថា “ការពន្យារពេលនេះតុលាការចង់រកយុទ្ធសាស្ត្រ ឬនីតិវិធីផ្សេង ដើម្បីរកភ័ស្ដុតាងដាក់បន្ទុកចុងចោទ ដូចដែលខ្ញុំបានសង្កេតឃើញថា តុលាការគ្មានភ័ស្ដុតាងដាក់បន្ទុកចុងចោទក្រៅពីរូបថតពីរបីសន្លឹកទេ”។
លោក សុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា ជាអង្គការជំនួយផ្នែកច្បាប់ បានមានប្រសាសន៍ថា ដំបូងអ្នកទោសទាំងនេះទំនងជាឆាប់ទទួលបានសវនាការ។ លោកបានមានប្រសាសន៍ថា “ខ្ញុំគិតថា សវនាការដំបូងធ្វើឡើងលឿន ខ្ញុំមានកូនក្ដីនៅខេត្តបន្ទាយមានជ័យ ដែលបានរង់ចាំសវនាការអស់រយៈពេលមួយឆ្នាំមកហើយ”។ លោក សុក សំអឿន បានមានប្រសាសន៍អំពីការពន្យារពេលដ៏យូរនេះថា “ប៉ុន្តែវាចម្លែក។ ពិបាកនិយាយពីមូលហេតុពន្យារពេលនេះណាស់ ក្រោយពីមានការបើកសវនាការលឿននេះ”។
លោក អាំង មាលតី ប្រធានសាលាដំបូងរាជធានីភ្នំពេញ និងលោកចៅក្រម លាង សំណាត ដែលទទួលបន្ទុកដោះស្រាយរឿងក្ដីរបស់អ្នកទោស១៣នាក់ក្នុងចំណោមអ្នកទោសទាំង២៣នាក់នេះ បានបដិសេធមិនធ្វើអត្ថាធិប្បាយអំពីមូលហេតុចំពោះការពន្យារពេលនេះទេ។
លោក កោ វណ្ឌី អនុប្រធានតុលាការនេះបានលើកឡើងថា ការពន្យារពេលនេះប្រហែលជាមកពីមានរឿងក្ដីជាច្រើនកំពុងរង់ចាំបើកសវនាការ។លោកបានមានប្រសាសន៍ដោយមិនបញ្ជាក់លម្អិតថា “ប្រហែលជាចៅក្រមបានពន្យារពេលរឿងក្ដីនេះ ដោយសារមានរឿងក្ដីច្រើន ដែលត្រូវបើកសវនាការ”។
លោក អំ សំអាត អ្នកគ្រប់គ្រងផ្នែកបច្ចេកទេសនៅអង្គការលីកាដូ បានមានប្រសាសន៍ថា ការពន្យារពេលនេះធ្វើឲ្យមានបញ្ហាកាន់តែច្រើន ដោយសារការត្រួតត្រាដ៏តឹងរឹុងរបស់រដ្ឋាភិបាលលើប្រព័ន្ធតុលាការ និងដោយសារការជាប់ពាក់ព័ន្ធរបស់អ្នកទោសទាំងនេះជាមួយការតវ៉ាប្រឆាំងរដ្ឋាភិបាល កាលពីឆ្នាំមុន។
លោក អំ សំអាត បានមានប្រសាសន៍ថា “ចៅក្រមគ្រាន់តែបានសាកសួរចុងចោទប៉ុណ្ណោះរហូតមកទល់ពេលនេះ។ ដូច្នេះហាក់ដូចជាមានការសន្និដ្ឋានរួចហើយនៅក្នុងរឿងក្ដីនេះ”៕ គឹមហឿន
(រាយការណ៍បន្ថែមដោយ Alex Willemyns)