មន្ត្រីម្នាក់បាននិយាយថា កាលពីថ្ងៃអង្គារ សាលាដំបូងខេត្តសៀមរាបបានផ្តន្ទាទោសលោក ម៉ៅ តាន់អ៊ាម មេធាវីជនជាតិខ្មែរម្នាក់ឲ្យជាប់ពន្ធនាគាររយៈពេលពីរឆ្នាំកន្លះ ពីបទទិញពេស្យាចារកុមារ ប៉ុន្តែ គាត់នឹងមិនជាប់ពន្ធនាគារសូម្បីតែមួយថ្ងៃ បន្ទាប់ពីតុលាការបានព្យួរទោសទាំងអស់។
លោក ឈួន សុភា ព្រះអាជ្ញារងអមសាលាដំបូងខេត្តបានមានប្រសាសន៍ថា តុលាការក៏បានបង្គាប់ឲ្យលោក ម៉ៅ តាន់អ៊ាម បង់ប្រាក់ចំនួន៤លានរៀលឲ្យជនរងគ្រោះផងដែរ។ លោក សុភា បានមានប្រសាសន៍ថា “ខ្ញុំគិតថា សេចក្តីសម្រេចរបស់តុលាការស័ក្តិសមហើយ ហើយយើងអាចទទួលយកបាន ប្រសិនបើក្រុមគ្រួសារជនរងគ្រោះមិនយល់ព្រម ពួកគេមានសិទ្ធិប្តឹងឧទ្ធរណ៍”។ ប៉ុន្តែលោកមិនធ្វើអត្ថាធិប្បាយបន្ថែមទេ។
លោក សម ប៊ុនប៉ា ចៅក្រមប្រធានក្រុមប្រឹក្សាជំនុំជម្រះបានបដិសេធមិនធ្វើអត្ថាធិប្បាយអំពីសាលក្រមនេះទេ។
លោក តាន់អ៊ាម ត្រូវបានចោទប្រកាន់កាលពីខែកុម្ភៈឆ្នាំ២០១៣ បន្ទាប់ពីនគរបាលនិងក្រុមសើុបអង្កេតមកពីអង្គការសកម្មភាពដើម្បីកុមារ ជាអង្គការប្រឆាំងជនរូួមភេទជាមួយកុមារបានឆ្មក់ចូលផ្ទះសំណាក់របស់លោកក្នុងក្រុងសៀមរាប ហើយបានឃើញលោកនៅជាមួយក្មេងប្រុសអាយុ១៥ឆ្នាំម្នាក់ ។ ក្មេងប្រុសរូបនេះបាននិយាយថា ខ្លួនទទួលបានប្រាក់សម្រាប់ការរួមភេទ។
មេធាវីរូបនេះដែលជាសមាជិកគណៈមេធាវីកម្ពុជាបានសារភាពប្រាប់នគរបាលថា លោកបានរួមភេទជាមួយអនីតិជនរូបនេះមែន ប៉ុន្តែ បានលើកឡើងកាលពីម្សិលមិញថា ការផ្តន្ទាទោសរបស់តុលាការគឺធ្ងន់ធ្ងរណាស់។
លោកបានបដិសេធការផ្តន្ទាទោសនេះ ហើយបាននិយាយថា ក្មេងប្រុសរូបនេះដែលលោកធ្លាប់ជួបនៅតាមមាត់ស្ទឹងក្នុងខេត្តសៀមរាបនោះ បានគោះទ្វារបន្ទប់ផ្ទះសំណាក់របស់លោក ហើយបានសុំឲ្យមេធាវីរូបនេះនាំគាត់ទៅហូបបាយ។លោក តាន់អ៊ាម បានអះអាងថា នៅពេលអ្នកទាំងពីរបានចេញពីផ្ទះសំណាក់ នគរបាលបានតាមដានពួកគេ។ លោកបានមានប្រសាសន៍ថា “វាអយុត្តិធម៌ណាស់ ពីព្រោះខ្ញុំមិនបានប្រព្រឹត្តបទល្មើសទេ។ នគរបាល និងអង្គការសកម្មភាពដើម្បីកុមារបានឃុបឃិតគ្នា ពីព្រោះពួកគេចង់បានប្រាក់ខ្ញុំ និងបង្ខូចកេរ្តិ៍ឈ្មោះខ្ញុំ ហើយពួកគេបានប្រើប្រាស់ក្មេងប្រុសនេះធ្វើជាធ្នាក់”។
លោក សំលៀង សិលា នាយកប្រចាំប្រទេសនៃអង្គការសកម្មជនដើម្បីកុមារបានមានប្រសាសន៍ថា អង្គការរបស់លោកនឹងប្តឹងឧទ្ធរណ៍ជំទាស់សាលក្រមនេះ ហើយលោកបានមានប្រសាសន៍ថា អង្គការរបស់លោកមិនដែលជួបរឿងបែបនេះទេ។
លោកបានបន្ថែមថា “អង្គការសកម្មភាពដើម្បីកុមារមិនដែលជួបរឿងបែបនេះទេ។ ខ្ញុំសង្ឃឹមថា រឿងនេះមិនជាប់ទាក់ទងនឹងសមាជិកភាពរបស់លោកនៅគណៈមេធាវីកម្ពុជា ឬតួនាទីរបស់លោកនៅក្នុងសង្គមឡើយ។ មិនថាមានតួនាទីប៉ុណ្ណាទេ គេមិនដែលអនុញ្ញាតឲ្យជនណាម្នាក់បង្កគ្រោះថ្នាក់ដល់កុមារឡើយ”៕សារុន