30 C
Phnom Penh

​អ្នក​បើក​បរ​រថ​យ​ន្ត​​ក្រុ​ង​ភ្នំពេញ​សុរិយា​ត្រូវ​តុលាការ​កោះ​ហៅ​ទៅ​សាក​សួរ​​ជុំ​វិញ​ការ​បំភិត​បំភ័យ​ និង​បរិហារកេរ្តិ៍​

ដោយ ឌឹ ខេមបូឌា ដេលី

បទវិភាគ

សាលា​ដំបូង​រាជ​ធានី​ភ្នំពេញ​បាន​កោះ​ហៅ​អតីត​អ្នក​បើក​​បរ​រថយន្ត​ក្រុង​របស់​ក្រុម​ហ៊ុន​​ដឹក​ជញ្ជូន​ភ្នំពេញ​​សុរិយា​មក​សាក​សួរ​កាល​ពី​ថ្ងៃ​អង្គារ បន្ទាប់​ពី​តុលាការ​នេះ​បាន​ទទួល​ពាក្យ​បណ្តឹង​ពី​ក្រុម​ហ៊ុន​រថយន្ត​ក្រុង​​នេះ​ ដែល​ចោទ​ប្រកាន់​អ្នក​បើក​បរ​​ទាំង​ពីរ​ពី​បទ​បំភិត​បំភ័យ និង​បរិ​ហារ​កេរ្តិ៍។

អ្នក​បើក​បរ​ឈ្មោះ​ យឹម គុយ​បា និង​ឈ្មោះ ផុ​ន វិសាល​ ត្រូវ​បាន​កោះ​ហៅ​ឡើង​តុលាការ​​នៅ​ថ្ងៃ​សុក្រ​ នេះ​បើ​យោង​តាម​លោក​ គុយ​បា។ លោក​ គុយ​បា​ បាន​មាន​ប្រសាសន៍​ថា “ក្រុម​ហ៊ុន​នេះ​បាន​ប្តឹង​យើង​ពី​បទ​បំភិត​បំភ័​យ​ និង​បរិហារ​កេរ្តិ៍​” និង​​បទ​រក្សាទុក​រថ​យន្ត​ក្រុង​របស់​ក្រុម​ហ៊ុន​នេះ​ជា​បណ្តោះ​អាសន្ន​ អំឡុ​ង​កូដ​កម្ម។

លោក​ គុយ​បា និង​លោក​ វិសាល​ ស្ថិត​ក្នុង​ចំណោម​អតីត​អ្នក​បើក​រថយន្ត​ក្រុង​​មួយ​ក្រុម​មាន​គ្នា​​១៨​នាក់​ដែល​អះ​អាង​ថា ពួក​គាត់​ត្រូវ​បាន​បណ្តេញ​ចេញ​​ពី​ការ​ងារ​កាល​ពី​ក្នុង​ខែ​មេសា ដោយ​សារ​ធ្វើ​កូដ​កម្ម​ទាម​ទារ​ដំឡើង​ប្រាក់​ខែ​​ និង​បង្កើត​សហជីព​​។ តាំង​ពី​ត្រូវ​បាន​បណ្តេ​ញ​ចេញ​មក​​ អតីត​អ្នក​បើក​បរ​រថយន្ត​ក្រុង​ទាំង​នេះ​បាន​ធ្វើ​ការ​តវ៉ា​ជា​ច្រើន​លើក​នៅ​ចំណត​​រថ​យន្ត​ក្រុង​សុរិយា​​ក្បែរ​ផ្សារ​ធំ​ថ្មី​ដោយ​ទាម​ទារ​​ឲ្យ​ក្រុម​ហ៊ុន​ទទួល​យក​ពួក​គេ​ចូល​ធ្វើ​ការ​វិញ​ ឬ​ផ្តល់​សំណង​ យោង​ទៅ​តាម​ច្បាប់​ការងារ​។

អំឡុង​កូដ​កម្ម​ដំបូង​របស់​ខ្លួន​​កាល​ពី​ថ្ងៃ​ទី​៣ ខែ​មេសា មុន​ពេល​ត្រូវ​បាន​បណ្តេញ​ចេញពី​ការងារ​​ ក្រុម​អ្នក​បើក​បរ​ទាំង​នេះ​បាន​ដក​សោ​រថយន្ត​ក្រុង​របស់​ក្រុម​ហ៊ុន​នេះ​ ទុកជា​ការ​តវ៉ា​។

លោក គុយ​បា បាន​មាន​ប្រសាសន៍​ថា “ខ្ញុំ​ជឿ​ថា អ្នកគ្រប់គ្រង​ទូទៅ​របស់​ក្រុម​ហ៊ុន​នេះ​មាន​បំណង​បញ្ឈប់​យើង​មិន​ឲ្យ​តវ៉ា​​ជាមួយ​សហ​ជីព​ និង​ទាម​ទារ​ដំឡើង​ប្រាក់​ខែ​នោះ​ទេ​។​ខ្ញុំ​មិន​អាច​ទៅ​តុលាការ​នៅ​ថ្ងៃ​ទី​៩​ ខែ​ឧសភា​បាន​ទេ​។ ខ្ញុំ​នឹង​ដាក់​លិខិត​មួយ​ច្បាប់​ដើម្បី​ពន្យារ​ការ​កោះ​ហៅ​នេះ​”។

លោក ចាន់ សុផាន់​ណា អ្នកគ្រប់គ្រង​ទូទៅ​របស់​​ក្រុម​ហ៊ុន​ដឹក​ជញ្ជូន​ភ្នំពេញ​សុរិយា​បាន​មាន​ប្រសាសន៍​ថា លោ​ក​បាន​ដាក់​ពាក្យ​បណ្តឹង​ទៅ​តុលាការ​ បន្ទាប់​ពី​បុរស​ពីរ​នាក់​គំរាម​វាយ​​បុគ្គលិក​ដែល​មិន​ចូល​រួ​ម​កូដ​កម្ម​របស់​ពួក​គេ​កាល​ពី​សប្តាហ៍​មុន​។

លោក​បាន​មាន​ប្រសាសន៍​ថា “ខ្ញុំ​ត្រូវ​ធ្វើ​ពាក្យ​បណ្តឹង​ ពីព្រោះ​អ្នក​បើក​បរ​ពីរ​នាក់​នោះ​ស្លៀក​ពាក់​ឯកសណ្ឋាន​ក្រុម​ហ៊ុន​អំឡុង​ពេល​ធ្វើ​បាតុកម្ម​ និង​បាន​គំរាម​បុគ្គលិក​ផ្សេង​ទៀត​ឲ្យ​ធ្វើ​ការ​តវ៉ា​។ ក្រុម​ហ៊ុន​​មិន​​អាច​ទទួល​នូវ​អ្វី​ដែល​ពួកគេ​បាន​ធ្វើ​​ឡើយ​”។

លោក អៀន គឹម​ហ៊ុន មន្ត្រី​នៅ​សហ​ព័ន្ធ​ការ​ងារ​កម្ពុជា​ដែល​បាន​ជួយ​​អ្នក​បើក​បរ​បង្កើត​សហ​ជីព​បាន​​មាន​ប្រសាសន៍​ថា លោក​បាន​ណែ​នាំ​មេធាវី​របស់​សហព័ន្ធ​ការងារ​កម្ពុជា​ឲ្យ​ព្រាង​លិខិត​មួយ​ច្បាប់​ស្នើ​សុំ​ពន្យារ​ពេល​សម្រាប់​អ្នក​បើក​បរ​​​ឡើង​តុលាការ​។

លោក​បាន​មាន​ប្រសាសន៍​ថា “ពេល​នេះ​យើង​បាន​​ផ្តល់​​លិខិត​មួយ​ច្បាប់​ដល់​មេធាវី​របស់​យើង​ដើម្បី​ពន្យារ​ដីកា​កោះ​របស់​តុលាការ​ និង​រង​់ចាំ​រហូត​ដល់​ក្រោយ​​ពី​​យើង​ជួប​ជាមួយ​ក្រុម​ប្រឹក្សា​អាជ្ញា​កណ្តាល​នៅ​ថ្ងៃ​ស្អែក​។ យើង​ជឿ​ជាក់​ថា ក្រុម​ហ៊ុន​ខ្លាច​ការ​តវ៉ា​របស់​យើង​ និង​កំពុង​តែ​គំរាម​អ្នក​បើក​បរ​ឲ្យ​ឈប់​ធ្វើ​ការ​តវ៉ា​”៕ ប៊ុន​នី ​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស