ក្រុមហ៊ុនវៀតណាមនៅពីក្រោយចម្ការកៅស៊ូនៅកម្ពុជាមួយចំនួនដែលត្រូវបានចោទប្រកាន់ថា បានចាប់យកដី និងកាប់ឈើខុសច្បាប់នោះបានធ្វើតាមសំណើរបស់ក្រុមហ៊ុនសាជីវកម្មហិរញ្ញវត្ថុអន្តរជាតិ (IFC) ដែលជួយផ្តល់មូលនិធិដល់ប្រតិបត្តិការរបស់ក្រុមហ៊ុននេះ ដើម្បីឲ្យផ្អាកការរានដីព្រៃបណ្តោះអាសន្ននៅក្រុមហ៊ុនបុត្រសម្ព័ន្ធមួយចំនួនក្នុងចំណោមក្រុមហ៊ុនបុត្រសម្ព័ន្ធក្នុងស្រុករបស់ខ្លួន។
នៅក្នុងសេចក្តីសម្រេចកាលពីថ្ងៃទី២៨ខែមេសា និងទទួលបានកាលពីម្សិលមិញ ក្រុមហ៊ុន HoangAnhGiaLai (HAGL)លើកឡើងថា ខ្លួននឹងផ្អាក ”ការទាមទារសិទ្ធិកាន់កាប់” ឬការរានដីនិងសកម្មភាពនៅក្រុមហ៊ុនចម្ការកៅស៊ូបីក្នុងចំណោមក្រុមហ៊ុនចម្ការកៅស៊ូទាំងប្រាំពីររបស់ខ្លួននៅក្នុងប្រទេសកម្ពុជាចាប់ពីថ្ងៃទី១ខែឧសភា ដល់ថ្ងៃទី៣០ខែវិច្ឆិកា។
បន្ទាប់ពីមានការសើុបអង្កេតរយៈពេលមួយខែ អង្គការ GlobalWitness ជាអង្គការការពារបរិស្ថានកាលពីឆ្នាំ២០១៣បានចោទចម្ការកៅស៊ូនៅកម្ពុជារបស់ក្រុមហ៊ុន HAGL ថាបានរំលោភច្បាប់ជាច្រើន រួមមានការប្លន់យកដីពីសហគមន៍មូលដ្ឋាន និងការកាប់ឈើខុសច្បាប់ទាំងក្នុងនិងក្រៅដីសម្បទានរបស់ខ្លួន។
ក្រុមហ៊ុនIFC ដែលមានភាគហ៊ុនក្នុងក្រុមហ៊ុន HAGL បានទទួលយកពាក្យបណ្តឹងពីសហគមន៍ចំនួន១៧ក្នុងចំណោមសហគមន៍ទាំងនោះ ដែលកាលពីខែកុម្ភៈបានចោទក្រុមហ៊ុននេះថា បានរំលោភគោលនយោបាយការពារសុវត្ថិភាព ហើយឥឡូវនេះកំពុងព្រាងរបាយការណ៍ស្តីពីការចោទប្រកាន់ទាំងនោះ។
នៅក្នុងសេចក្តីសម្រេចផ្អាកការរានដីនេះ ក្រុមហ៊ុន HAGL លើកឡើងថា ចំណាត់ការនេះធ្វើឡើងបន្ទាប់ពីមានកិច្ចប្រជុំជាមួយមន្ត្រីច្បាប់របស់ក្រុមហ៊ុន IFC នៅក្នុងរាជធានីភ្នំពេញកាលពីថ្ងៃទី២ ខែមេសា។
សេចក្តីសម្រេចនោះលើកឡើងថា “អំឡុងរយៈពេលផ្អាកប្រតិបត្តិការនេះ ក្រុមហ៊ុនបុត្រសម្ព័ន្ធទាំងអស់ត្រូវបានអនុញ្ញាតឲ្យរៀបចំនិងប្រមូលមែកឈើនៅក្នុងតំបន់ដែលខ្លួនកាន់កាប់រួចហើយនោះឲ្យបានមុនថ្ងៃទី២៨ ខែមេសា ឆ្នាំ២០១៤”។
លោក ង្វៀន តាន់អាញ់ ជំនួយការលោក ដូន ង្វៀនឌុក ប្រធានក្រុមហ៊ុន HAGL បានមានប្រសាសន៍ថា ក្រុមហ៊ុនបានយល់ព្រមចំពោះការផ្អាកនេះ ដោយបង្ហាញថា ក្រុមហ៊ុន IFC មានឆន្ទៈក្នុងការដោះស្រាយវិវាទដីធ្លីនេះឲ្យបានត្រឹមត្រូវ។ លោកបានមានប្រសាសន៍ថា “យោងតាមសំណើរបស់មន្ត្រីច្បាប់នេះ…យើងស្ម័គ្រចិត្តចូលរួមក្នុងដំណើរការដោះស្រាយរវាងក្រុមហ៊ុន និងដើមបណ្តឹង។ យើងបង្ហាញឆន្ទៈរបស់យើងនៅក្នុងដំណើរការនេះ”។
លោកបានមានប្រសាសន៍ថា ក្រុមហ៊ុនHAGL បានសម្រេចផ្អាកដំណើរការទាំងអស់រហូតដល់ទី៣០ខែវិច្ឆិកា ពីព្រោះក្រុមហ៊ុនសង្ឃឹមថា នឹងដោះស្រាយវិវាទដីធ្លីរួចរាល់នៅពេលនោះ។
លោក សល់ នឿយ អ្នកភូមិម្នាក់ក្នុងចំណោមអ្នកភូមិដែលបានដាក់ពាក្យបណ្តឹងទៅក្រុមហ៊ុន IFC និយាយថា ក្រុមហ៊ុនរបស់លោកមិនដែលទទួលបានដំណឹងអំពីសេចក្តីសម្រេចរបស់ក្រុមហ៊ុនHAGLទេ ហើយទើបតែបានដឹងអំពីរឿងនេះតាមរយៈការសង្កេតឃើញថា ចម្ការកៅស៊ូនៅជុំវិញនោះបានផ្អាកការរានដីព្រៃកាលពីខែមេសា។
លោកបានមានប្រសាសន៍ថា ចំណាត់ការនេះមិនគ្រប់គ្រាន់ទេ ហើយថា ចម្ការកៅស៊ូទាំងអស់គួរបោះបង្គោលកំណត់ព្រំប្រទល់របស់ខ្លួនភ្លាមៗដើម្បីកុំឲ្យមានការភាន់ច្រឡំទៀតថា ដីនោះជារបស់នរណា។ លោកបានមានប្រសាសន៍ថា “យើងនៅតែបារម្ភអំពីការបាត់បង់ដីស្រែចម្ការរបស់យើង ប្រសិនបើពួកគេមិនបោះបង្គោលកំណត់ព្រំប្រទល់ឲ្យបានច្បាស់លាស់ទេនោះ”។
លោក អ៊ាង វុទ្ធី នាយកប្រតិបត្តិអង្គការសមធម៌កម្ពុជាជាអង្គការមួយក្នុងចំណោមអង្គការមិនមែនរដ្ឋាភិបាលមួយចំនួនដែលបានជួយសហគមន៍ទាំងនេះក្នុងការដាក់ពាក្យបណ្តឹងទៅក្រុមហ៊ុន IFC នោះ ក៏បានមានប្រសាសន៍ផងដែរថា ចំណាត់ការនេះមិនមែនជាអ្វីដែលក្រុមហ៊ុនHAGLគួរធ្វើនោះទេ។
លោកបានមានប្រសាសន៍ថា “នេះគឺជាជំហានវិជ្ជមានមួយ ប៉ុន្តែ …មានភូមិតែ១៣ប៉ុណ្ណោះដែលពួកគេបានយល់ព្រមផ្អាក។ ប៉ុន្តែ មានភូមិ១៧ដែលបានដាក់ពាក្យបណ្តឹង…ហើយ២៣ភូមិទៀតបានរងផលប៉ះពាល់”។ លោកបានមានប្រសាសន៍ថា ក្រុមហ៊ុនHAGL គួរផ្អាកប្រតិបត្តិការទាំងអស់រួមទាំងការដាំដើមឈើនៅលើដីដែលក្រុមហ៊ុនបានរានរួចហើយ និងនៅលើចម្ការកៅស៊ូទាំងអស់ដែលជាប់ពាក់ព័ន្ធនឹងពាក្យបណ្តឹងរហូតដល់វិវាទដីធ្លីនេះត្រូវបានដោះស្រាយរួចរាល់។
នៅពេលមន្ត្រីច្បាប់ក្រុមហ៊ុន IFC បញ្ចប់ការវាយតម្លៃរបស់ខ្លួនអំពីស្ថានភាពនោះហើយ សហគមន៍អាចសម្រេចថា តើត្រូវឲ្យក្រុមហ៊ុន IFC ព្យាយាមសម្របសម្រួលក្នុងការរកដំណោះស្រាយជាមួយក្រុមហ៊ុន HAGL ឬធ្វើការត្រួតពិនិត្យឲ្យបានពេញលេញឡើងវិញលើការវិនិយោគរបស់ក្រុមហ៊ុននេះ៕សារុន