32 C
Phnom Penh

បុរស​​ជនជាតិតួកគីត្រូវបាន​ចាប់​​ខ្លួន​ពីបទ​ទិញ​ព្រហ្មចារី​​របស់​កុមារ

ដោយ ឌឹ ខេមបូឌា ដេលី

បទវិភាគ

នគរបាល​បាន​ឲ្យ​ដឹងថា បុរស​​តួកគី​​អាយុ​៥១ឆ្នាំ​ម្នាក់​​ត្រូវបាន​ចាប់​ខ្លួន​​​កាល​​ពីថ្ងៃ​​ពុធ​​​​ដោយ​​​នគរបាល​​ប្រឆាំង​ការជួញមនុស្ស​​​ក្នុងរាជធានីភ្នំពេញ​ ពីបទ​​​ទិញ​ព្រហ្ម​ចារី​​​របស់ក្មេង​ស្រី​​​អាយុ​១៤ឆ្នាំ​​ពីរនាក់​។

យោងតាម​លោក កែវ ​ធា ​នាយ​ការិយាល័យ​នគរបាល​ប្រឆាំង​​ការជួញ​ដូរមនុស្ស​រាជ​ធានី​​ភ្នំពេញ​​បាន​ឲ្យ​ដឹងថា ម្តាយ​​របស់​ជនរងគ្រោះម្នាក់ ​ចំណោម​​ជន​រងគ្រោះទាំង​​ពីរនាក់​នេះ​ក៏ត្រូវបាន​ចាប់​ខ្លួន​​​ដែរពីបទ​​​លក់​កូនស្រី​របស់​ខ្លួន​ឲ្យ​​ជនជាតិ​​តួកគី​រូបនេះ​ ​ចំ​ណែក​ស្ត្រី​ខ្មែរ​ទី​ពីរ​​ម្នាក់ទៀត​​​ត្រូវបាន​ចាប់​​ខ្លួន​​​​ពីបទ​សញ្ចរកម្ម​ក្នុង​ករណីទិញ​ព្រហ្ម​ចារី​​នេះ។

លោក កែវ​ ធា ​បានមាន​ប្រសាសន៍ថា ឈ្មោះ អាយ​​ឌីន ហ្គូកទេព (AydinGoktepe) ត្រូវ​បាន​ចាប់ខ្លួន​នៅវេលាម៉ោង​ប្រមាណ​៦និង៥០នាទី​ល្ងាច​នៅក្បែរ​ផ្ទះ​សំណាក់​​​របស់​គាត់​​​ក្នុងសង្កាត់​វត្តភ្នំ ខណ្ឌដូនពេញ។ លោក កែវ ​ធា បានមានប្រសាសន៍ថា “យើងតាម​ដានគាត់​​ប្រហែល​កន្លះ​ខែ​មក​ហើយ​ ពីព្រោះ​​​ជន​នេះ​បានស្វែងរក​ក្មេងស្រីព្រហ្មចារី​​រួម​​ភេទជាមួយ​ខ្លួន​នៅ​ក្នុង​រាជធានី​ភ្នំពេញ​ គាត់​បាន​មក​ (ទីនេះ​) ដើម្បីស្វែង​រក​ក្មេងស្រីព្រហ្មចារី​ដើម្បី​រួមភេទ​តាម​រយៈ​​​ការ​សួរ​អ្នក​រត់​ម៉ូតូ​ឌុប និង​អ្នក​រត់​រឺុម៉កកង់បី”។

លោកបានមាន​ប្រសាសន៍​ថា ហ្គូកទេព ​​មាន​មុខរបរជាជាងម៉ាស៊ីន រស់​នៅ​ក្នុង​រាជធានី​ភ្នំពេញ​​រយៈពេល​ប្រហែល​​មួយខែ​​នៅផ្ទះ​សំណាក់ម្លិះ (Malis) ក្បែរ​វត្តភ្នំ ប៉ុន្តែថា ​នគរបាល​​បាន​ដឹងថា ​គាត់មាន​គម្រោង​ចាក​ចេញពីប្រទេស​​​កម្ពុជាទៅកាន់ប្រទេស​ថៃ​នៅសប្តាហ៍នេះ។​

ឈ្មោះ ឌឿន ស្រីណែត ​​​អាយុ​២២ឆ្នាំ គឺជា​អ្នក​រៀបចំ​​ចាត់​ចែង​សម្រាប់​ម្តាយ​​របស់​ក្មេងស្រីម្នាក់​​ចំណោម​ក្មេងស្រី​អាយុ​១៤ឆ្នាំ​នេះ លក់កូនស្រី​របស់ខ្លួន​​ឲ្យ​ ហ្គូកទេព ក្នុង​តម្លៃ​៧០០ដុល្លារ​។ ទោះជាយ៉ាងនេះក្តី បន្ទាប់ពីលក់​​កូនស្រីរូបនេះហើយ ​បុរស​​ជនជាតិ​​តួកគីនេះ​​មិនបាន​គោរព​តាម​ការ​ព្រម​ព្រៀង​គ្នា​ទេ​ និង​បានឲ្យលុយ​ពួកគេ​តែ​៤០០​ដុល្លារប៉ុណ្ណោះ។ ហ្គូកទេព ក៏បាន​​ទិញ​ព្រហ្មចារី​​ក្មេងស្រីអាយុ​១៤ឆ្នាំម្នាក់​ទៀត​ដែរ​ ​ប៉ុន្តែ​នគរបាល​​កំពុង​ស៊ើប​អង្កេតករណីនេះ​នៅឡើយ។

ជនសង្ស័យ​ទាំងបីនាក់​នេះ​ ​ពេលនេះកំពុង​ត្រូវ​នគរបាល​ប្រឆាំងការជួញ​ដូរមនុស្ស​ឃុំ​ខ្លួន​ ខណៈ​​ដែល​លោក កែវ ​ធា រៀបចំបញ្ជូន​សំណុំរឿង​​​របស់​​ពួកគេ​​​ទៅ​សាលា​ដំបូង​​រាជ​​ធានី។ ជន​រងគ្រោះ​​​ទាំងពីរ​កំពុងត្រូវបាន​គាំពារ​​ដោយ​​​អង្គការ ក្តីសង្ឃឹមពិភពលោក (WorldHope) ជាអង្គការ​​ក្រៅ​រដ្ឋាភិបាល​ប្រឆាំង​​ការ​​ជួញ​ដូរ​មនុស្ស​។

អង្គការ​សកម្មភាព​ដើម្បីកុមារ​ ដែលជា​អង្គការ​ក្រៅ​រដ្ឋាភិបាល​ប្រឆាំងការ​រួម​​ភេទ​​ជាមួយ​កុមារ​ ​​បានលើកឡើង​ក្នុងសេចក្តីថ្លែងការណ៍មួយ​​កាល​ពីម្សិល​មិញ​​ថា ខ្លួនបាន​​សហការ​​ក្នុងការ​ស៊ើបអង្កេត​ ហ្គូកទេព ​​បន្ទាប់​​ពីទទួល​​បានព័ត៌មាន​ពីអ្នកឲ្យ​ការណ៍​ម្នាក់​ដែល​ត្រូវ​បា​ន​សុំនាំក្មេងស្រី​​​ទៅរួមភេទ​​​ជាមួយ​​ជនជាតិ​តួកគី​រូបនេះ។

លោក យី ម៉ូដែន អនុប្រធាន​ចុះ​ប្រតិបត្តិការផ្ទាល់​របស់​អង្គការ​សកម្មភាព​ដើម្បីកុមារ​ បានលើកឡើង​ក្នុង​​សេចក្តី​ថ្លែង​ការណ៍នេះថា “បើ​​រកឃើញ​​ពិរុទ្ធភាព បុរសជន​​ជាតិ​តួកគី​រូបនេះ ​​នឹង​ត្រូវ​បណ្តេញ​ចេញ​​ពី​ប្រទេស​កម្ពុជា បន្ទាប់​​ពី​​ការ​​ជាប់ពន្ធនាគារ​រួច​​ ដើម្បីធានា​​​ថា ជននេះ​មិនអាច​ធ្វើ​បាប​​កុមារ​កម្ពុជា​ទៀត​”៕ ប៊ុននី​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស