នៅពេលច្បាប់ចរាចរណ៍ត្រូវបានអនុម័តនៅក្នុងឆ្នាំ២០០៧ ច្បាប់នេះបានតម្រូវឲ្យដោះស្លាកលេខខេមរភូមិន្ទចេញពីយានយន្តឯកជន ដែលរត់នៅលើផ្លូវថ្នល់ ហើយផ្លាស់ប្ដូរមកប្រើស្លាកលេខស៊ីវិលវិញក្នុងរយៈពេលមួយឆ្នាំ។ 
ប៉ុន្តែរយៈពេលជាង៦ឆ្នាំបន្ទាប់ពីឱសានវាទនេះ គេនៅតែមើលឃើញរថយន្តទំនើបៗពាក់ស្លាកលេខពណ៌ក្រហមខៀវនេះដដែល។ នៅសប្ដាហ៍នេះគេឃើញរថយន្តស៊េរីផ្សេងៗគ្នា និងទំហំផ្សេងៗគ្នារាប់សិបគ្រឿង ដែលពាក់ស្លាកលេខខេមរភូមិន្ទ រត់តាមផ្លូវនានាក្នុងរាជធានីភ្នំពេញ ឬចតនៅក្បែរហាងនិងភោជនីយដ្ឋាន ទោះបីជាច្បាប់ចែងថា រថយន្តប្រើប្រាស់សម្រាប់តែយោធាត្រូវបាញ់ពណ៌ត្រេអីុរបស់កងទ័ព និងមានស្លាកសញ្ញាទីបញ្ជាការក៏ដោយ។
នៅតាមបណ្ដោយមហាវិថីព្រះសីហនុកាលពីថ្ងៃពុធ អ្នកបើកបររថយន្តលុចសិុស៥៧០ម្នាក់ ដែលបានចតរថយន្តទំនើបនេះនៅខាងក្រៅបណ្ណាគារអន្តរជាតិ បាននិយាយដោយសុំមិនបញ្ចេញឈ្មោះថា គាត់ជាអ្នកបើកបរឲ្យចៅហ្វាយរបស់គាត់ដែលជាម្ចាស់រថយន្តនេះ។ គាត់និយាយថា “ចៅហ្វាយរបស់ខ្ញុំប្រើស្លាកលេខនេះយូរហើយ ប៉ុន្តែគាត់ជាមេបញ្ជាការកងទ័ព ហេតុអ្វីបានជាគាត់ប្រើស្លាកលេខកងទ័ពសម្រាប់រថយន្តរបស់គាត់មិនបាន?”។
ឧត្តមសេនីយ៍ ចៅ ភិរុណ អគ្គនាយកនៃអគ្គនាយកដា្ឋនសម្ភារបច្ចេកទេសនៃក្រសួងការពារជាតិ បានមានប្រសាសន៍ថា ក្រសួងនៅតែបន្តចេញស្លាកលេខខេមរភូមិន្ទសម្រាប់រថយន្តប្រើប្រាស់ផ្ទាល់ខ្លួនរបស់មន្ត្រីយោធា។
លោកបានមានប្រសាសន៍ថា ជាការពិត មន្ត្រីយោធាដែលមានលទ្ធភាពទិញរថយន្តផ្ទាល់ខ្លួន គឺពិតជាជួយដល់កងយោធពលខេមរភូមិន្ទ ពីព្រោះយោធាគ្មានលទ្ធភាពទិញរថយន្តឲ្យគ្រប់ៗគ្នានោះទេ។
លោកបានមានប្រសាសន៍ថា “យើងចេញស្លាកលេខខេមរភូមិន្ទឲ្យមន្ត្រីយោធាសម្រាប់ប្រើប្រាស់ផ្ទាល់ខ្លួន ពីព្រោះរដ្ឋគ្មានថវិកាទិញរថយន្តឲ្យបានគ្រប់គ្រាន់ទេ ដូច្នេះរដ្ឋពឹងផ្អែកលើមន្ត្រីយោធា ដែលមានលទ្ធភាពទិញរថយន្ត”។ លោកបានលើកឡើងទៀតថា លោកមិនចាំពីចំនួនស្លាកលេខខេមរភូមិន្ទដែលប្រើប្រាស់នៅពេលបច្ចុប្បន្នទេ។ ទោះជាយ៉ាងណា លោកបានមានប្រសាសន៍ថា ចំនួនរថយន្តស៊ីវិលដែលពាក់ស្លាកលេខខេមរភូមិន្ទទំនងជាបានធ្លាក់ចុះក្នុងរយៈពេលប្រាំមួយឆ្នាំមកនេះ។
លោកមានប្រសាសន៍ថា “ពេលនេះឧកញ៉ាហាក់ដូចជាមិនសូវប្រើប្រាស់ស្លាកលេខនេះច្រើនដូចកាលពីមុនទេ ពីព្រោះកងរាជអាវុធហត្ថ នឹងត្រួតពិនិត្យ ហើយស្លាកលេខខេមរភូមិន្ទនឹងត្រូវដោះចេញ ប្រសិនបើស្លាកលេខទាំងនោះក្លែងក្លាយ”។
ខណៈដែលមិនទាន់មានការធ្វើវិសោធនកម្មច្បាប់នេះនៅឡើយនោះ ឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើេផ្ទៃប្រទេស បានមានប្រសាសន៍ថា ពេលនេះកងរាជអាវុធហត្ថមិនបានអនុវត្តច្បាប់នេះទេ ដោយសារតែបញ្ហាសន្ដិសុខពាក់ព័ន្ធនឹងស្ថានភាពជាប់គាំងផ្នែកនយោបាយនាពេលបច្ចុប្បន្ន។
លោកបានមានប្រសាសន៍ថា “ស្លាកលេខខេមរភូមិន្ទមិនមែនធ្វើសម្រាប់ប្រើប្រាស់ជាសាធារណៈនិងសម្រាប់ប្រយោជន៍កូនៗរបស់ឧកញ៉ានោះទេ។ វាជាបញ្ហាធ្ងន់ធ្ងរមួយដែលបុគ្គលមួយចំនួនមានអត្តចរិតច្រឡោងខាមប្រើប្រាស់ស្លាកលេខខេមរភូមិន្ទលើរថយន្តរបស់ពួកគេ ហើយបើកបរក្នុងល្បឿនយ៉ាងលឿនហាក់ដូចជាផ្លូវថ្នល់ទាំងនោះកសាងដោយឪពុកម្ដាយរបស់ពួកគេសម្រាប់ឲ្យតែពួកគេបើកបរអ៊ីចឹង”។
លោកបានចោទសួរថា “ប៉ុន្តែយើងមមាញឹកណាស់ក្នុងការការពារសន្ដិសុខជាតិ ខណៈពេលកំពុងមានវិបត្តិនយោបាយបន្ទាប់ពីការបោះឆ្នោតជាតិ ដូច្នេះតើយើងម៉េចនឹងអាចគិតពីបញ្ហានោះបានទៅ?”។
លោក ខេង ទីតូ បានមានប្រសាសន៍ទៀតថា នៅពេលស្ថានភាពជាប់គាំងផ្នែកនយោបាយនាពេលបច្ចុប្បន្នត្រូវបានដោះស្រាយរួចរាល់ កងរាជអាវុធហត្ថនឹងចាប់ផ្ដើមអនុវត្តច្បាប់ស្លាកលេខនេះ។
រថយន្ត Mitsubishi Carol ធុនតូចមួយគ្រឿងដែលចតនៅតាមបណ្ដោយមហាវិថីព្រះសីហនុកាលពីថ្ងៃពុធ មានពាក់ស្លាកលេខខេមរភូមិន្ទ។
អ្នកបើកបររថយន្តនេះឈ្មោះ កេត ពិគា អាយុ៣៥ឆ្នាំ ដែលជាទាហានមកពីកងកិត្តិយសត្រែទ័ពនិងជាអ្នកបើកបរផ្ទាល់ឲ្យឧត្តមសេនីយ៍ផ្កាយពីរមួយរូបដែលគាត់មិនបញ្ជាក់អត្តសញ្ញាណនិយាយថា រថយន្តនេះត្រូវបានចុះបញ្ជីត្រឹមត្រូវ។ គាត់និយាយថា “ក្រសួងបានឲ្យ [មេរបស់ខ្ញុំ] រថយន្តតូយ៉ូតាឡង់គ្រីស័រមួយគ្រឿង ប៉ុន្តែគាត់បដិសេធមិនព្រមទទួលយក ពីព្រោះគាត់ស្រឡាញ់កូនឡាន”។ បុរសនេះនិយាយទៀតថា ទោះបីជាឧត្តមសេនីយ៍ផ្កាយពីររូបនេះមានរថយន្តសរុបចំនួន១៨គ្រឿងក៏ដោយ ក៏មានតែរថយន្ត Mitsubishi Carol នេះប៉ុណ្ណោះដែលពាក់ស្លាកលេខខេមរភូមិន្ទ។
គាត់និយាយទៀតថា គាត់ដឹងថា មិនមែនរថយន្តទាំងអស់ដែលពាក់ស្លាកលេខខេមរភូមិន្ទសុទ្ធតែស្របច្បាប់ឡើយ ប៉ុន្តែគាត់បានគូសបញ្ជាក់ថា ស្លាកលេខទាំងអស់ត្រូវតែចុះបញ្ជីត្រឹមត្រូវ។ បុរសរូបនេះបាននិយាយបន្តថា “ប្រសិនបើយើងមិនធ្វើការនៅក្រសួងទេ ហើយទិញឬប្រើប្រាស់ស្លាកលេខខេមរភូមិន្ទ ពេលនោះអ្នកដែលទទួលបន្ទុកចេញស្លាកលេខខេមរភូមិន្ទ នឹងត្រូវចាប់ឲ្យទទួលខុសត្រូវ នៅពេលមានបញ្ហាណាមួយកើតឡើង [ដូចជា] លួចដឹកជញ្ជូនឈើគ្រញូង ឬថ្នាំញៀនជាដើម”។
កាលពីខែមុន បុរសជនជាតិចិនម្នាក់ ដែលបើកបររថយន្តស៊េរីទំនើបមួយគ្រឿងមានពាក់ស្លាកលេខខេមរភូមិន្ទ បានបើកបរពេលស្រវឹង ហើយបានជ្រុលចង្កូតទៅបុករថយន្តប្រមូលសំរាមស៊ីនទ្រីនៅម៉ោង៣ទៀបភ្លឺ បណ្ដាលឲ្យកម្មករប្រមូលសំរាមវ័យ១៩ឆ្នាំម្នាក់រងរបួសជាទម្ងន់។ ទាំងមន្ត្រីនៅក្រសួងការពារជាតិ មន្ត្រីនៅអគ្គស្នងការដ្ឋាននគរបាលជាតិនិងផ្នែកនគរបាលចរាចរណ៍ បានបដិសេធម្ដងហើយម្ដងទៀតមិនលាតត្រដាងថា រថយន្តបង្កហេតុនេះជាកម្មសិទ្ធិរបស់អ្នកណា ឬហេតុអ្វីបានជាជនជាតិចិនជាអ្នកបើកបរវានោះទេ។
លោក ព្រាប កុល ប្រធានអង្គការតម្លាភាពកម្ពុជាបានមានប្រសាសន៍ថា ការហាមប្រាមមិនឲ្យប្រើប្រាស់ស្លាកលេខខេមរភូមិន្ទផ្ទាល់ខ្លួន គឺគ្មានប្រយោជន៍ឡើយ ប្រសិនបើមិនអនុវត្តច្បាប់ទេនោះ។ លោកមានប្រសាសន៍ថា “វាជាឧទាហរណ៍មួយទៀតបង្ហាញពីការបង្កើតច្បាប់ តែអនុវត្តផ្ទុយ ដោយសារតែខ្វះការអនុវត្តច្បាប់ ជាពិសេសក្នុងចំណោមមន្ត្រីជាន់ខ្ពស់ ហើយវាបង្ហាញពីទម្រង់នៃអំពើពុករលួយ ដែលធ្វើឲ្យបុគ្គលមានខ្នងរួចខ្លួនពីការទទួលខុសត្រូវ”។
លោកបានមានប្រសាសន៍បន្ថែមទៀតថា រថយន្តយោធាគឺប្រើសម្រាប់តែយោធាបំពេញភារកិច្ចផ្លូវការប៉ុណ្ណោះ។ លោកបានបន្តថា “មានមូលហេតុតែពីរគត់ គឺទី១មន្ត្រីប្រើប្រាស់ស្លាកលេខខេមរភូមិន្ទសម្រាប់ផ្ទាល់ខ្លួន ហើយមួយទៀត គឺដោយសារតែពួកគេធ្វើអ្វីមួយខុសច្បាប់ និងចង់គេចវេះពីការទទួលខុសត្រូវ”៕ សុខុម