ក្តីសង្ឃឹមឲ្យមានការដោះលែងជាបណ្តោះអាសន្នសម្រាប់លោក វន់ ពៅ មេដឹកនាំ សហជីព និងកម្មកររោងចក្រកាត់ដេរ និងសមាជិកសហជីព២០នាក់ទៀត ដែលត្រូវបានឃុំខ្លួនអំឡុងកូដកម្មកាលពីដើមខែមករានោះ ត្រូវបានបញ្ចប់ដោយតុលាការកំពូលកាលពីថ្ងៃសុក្រ បន្ទាប់ពីការដាក់ពាក្យសុំលើកទី៥របស់ពួកគេឲ្យមានការដោះលែងពីពន្ធនាគារនោះ ត្រូវបានបដិសេធ។
លោក វន់ ពៅ ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធ កំពុងត្រូវបានជំនុំជម្រះរួមជាមួយនឹងមនុស្ស២២នាក់ទៀតដែលព័ទ្ធចាប់ខ្លួន អំឡុងកូដកម្មរោងចក្រកាត់ដេរកាលពីថ្ងៃទី២ និងទី៣ ខែមករា និងដែលត្រូវបានចោទប្រកាន់ពីបទបង្កអំពើហិង្សាដោយចេតនា និងបំផ្លាញទ្រព្យសម្បត្តិសាធារណៈ។ ការជំនុំជម្រះដែលចាប់ផ្តើមកាលពីថ្ងៃទី២៥ខែមេសា ត្រូវបានលើកពេលរហូតដល់ថ្ងៃទី២០ខែឧសភា។
លោក ឃឹម ប៉ុន ប្រធានអង្គជំនុំជម្រះបានមានប្រសាសន៍ថា “តុលាការកំពូលបានសម្រេចតម្កល់សាលក្រមរបស់សាលាឧទ្ធរណ៍ ពីព្រោះចៅក្រមសាកសួរបច្ចុប្បន្នបានបិទការសើុបអង្កេត ហើយសវនាការជំនុំជម្រះកំពុងដំណើរការ ដូច្នេះចុងចោទត្រូវតែនៅក្នុងពន្ធនាគារដើម្បីរង់ចាំសវនាការជំនុំជម្រះបន្ទាប់របស់ខ្លួននៅសាលាដំបូងរាជធានីភ្នំពេញ”។
នៅក្រៅតុលាការ អ្នកគាំទ្រប្រមាណ៣០នាក់បានចោទប្រកាន់តុលាការនេះពីធ្វើប្រតិបត្តិការក្រោមឥទ្ធិពលរបស់រដ្ឋាភិបាល ហើយអំពាវនាវឲ្យមានការដោះលែងបុរសទាំងនេះ ដែល២១នាក់ក្នុងចំណោមនោះពេលនេះកំពុងត្រូវឃុំខ្លួននៅពន្ធនាគារព្រៃស។
ការស្នើសុំការដោះលែងជាបណ្តោះអាសន្នរបស់លោក វន់ ពៅ នាពេលកន្លងមកត្រូវបានបដិសេធពីរលើកមកហើយ ដោយសាលាដំបូងរាជធានី និងពីរលើកដោយសាលាឧទ្ធរណ៍។
លោក សំ សុគង់ មេធាវីរបស់លោក វន់ ពៅ បានមានប្រសាសន៍ថា លោកខកចិត្តដែលឱកាសសម្រាប់ការដោះលែងលោកត្រូវបានរលាយ។ លោកបានមានប្រសាសន៍ថា “យើងមានការសោកស្តាយថា តុលាការកំពូលបានលាយបញ្ចូលការជំនុំជម្រះ និងសវនាការដោះលែងជាបណ្តោះអាសន្នជាមួយគ្នា”។
ក្រមនីតិវិធីព្រណ្មទណ្ឌចែងថា ចៅក្រមត្រូវតែកំណត់អាទិភាពដើម្បីទុកឲ្យជនជាប់ចោទមានសេរីភាព ជំនួសឲ្យការឃុំខ្លួនពួកគេមុនការជំនុំជម្រះ។
អ្នកស្រី ប្រាក់ សុវណ្ណរី ភរិយារបស់លោក វន់ ពៅ បានមានប្រសាសន៍ថា អ្នកស្រីអស់សង្ឃឹមពីព្រោះស្វាមីរបស់អ្នកស្រីមានបញ្ហាសុខភាពដែលអ្នកស្រីគិតថា មិនត្រូវបានលើកឡើងអំឡុងការឃុំខ្លួនលោក វន់ ពៅ។
នៅក្នុងសេចក្តីថ្លែងការណ៍មួយ អង្គការសិទ្ធិមនុស្សអាដហុកក៏បានច្រានចោលសេចក្តីសម្រេចនេះដែរ។ អង្គការអាដហុកបានលើកឡើងថា ” សេចក្តីសម្រេចរបស់តុលាការកំពូលគ្មានមូលដ្ឋានច្បាប់ច្បាស់លាស់ទេ ហើយគ្រាន់តែអនុវត្តតាមតុលាការជាន់ទាបប៉ុណ្ណោះ”៕ ប៊ុននី