លោក អាត់ ធន់ មេដឹកនាំសហជីពឯករាជ្យម្នាក់បានលើកឡើងកាលពីម្សិលមិញថា លោកបានប្រមូលប្រាក់ជិតគ្រប់ហើយពីក្រុមអ្នកគាំទ្រសម្រាប់បង់ប្រាក់ធានានៅក្រៅឃុំចំនួន២៥.០០០ដុល្លារទៅឲ្យសាលាដំបូងរាជធានីភ្នំពេញ ហើយលោកនឹងប្រគល់ប្រាក់នេះទៅឲ្យតុលាការនៅថ្ងៃនេះ។
តុលាការបានចោទប្រកាន់លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាពីបទញុះញង់ឲ្យមានអំពើហិង្សានៅពេលកម្មកររោងចក្រកាត់ដេរធ្វើកូដកម្មកាលពីខែកញ្ញា ហើយបានបង្គាប់ឲ្យលោកបង់ប្រាក់ដើម្បីបាននៅក្រៅឃុំឲ្យគ្រប់ចំនួននៅថ្ងៃច័ន្ទសប្ដាហ៍ក្រោយ ដើម្បីចៀសវាងការឃុំខ្លួនបណ្ដោះអាសន្ន។
លោក អាត់ ធន់ បានមានប្រសាសន៍ថា លោកប្រមូលប្រាក់បាន១០.០០០ដុល្លារពីសមាជិកសហជីព និងអ្នកគាំទ្រផ្សេងទៀត និងប្រាក់១០.០០០ដុល្លារទៀតពីសហជីព កម្មករ និងអង្គការសិទ្ធិមនុស្ស រួមមានសហព័ន្ធសហជីពអន្តរជាតិ។
លោកបានបន្ថែមថា “បើទោះណាជាយើងមិនមានប្រាក់គ្រប់គ្រាន់ក៏ដោយ ក៏យើងអាចផ្ដល់ឲ្យពួកគេនូវចំនួនដែលយើងប្រមូលបាន។ យើងនឹងបន្តប្រមូលប្រាក់ទៀតរហូតដល់គ្រប់ចំនួន”។ លោកបានមានប្រសាសន៍ថា ពេលលោកទៅតុលាការនេះ លោកក៏នឹងដាក់ពាក្យបណ្ដឹងជំទាស់នឹងសេចក្ដីបង្គាប់របស់តុលាការកាលពីខែមុនដែលបង្គាប់លោកឲ្យចៀសវាងការជួបជុំគ្នាជាសាធារណៈ និងមិនឲ្យលោកចុះទៅមើលរោងចក្រពេលមានករណីប្រឆាំងរូបលោកឬ មិនឲ្យលោកជួបជាមួយនិយោជិតរបស់ខ្លួននោះដែរ៕ សារុន