មន្ត្រីតុលាការម្នាក់បានឲ្យដឹងកាលពីម្សិលមិញថា សាលាដំបូងខេត្តកណ្ដាលនឹងសាកសួរអ្នកទោសប្រាំនាក់នៅខែក្រោយនេះជុំវិញការលួចសារិរិកធាតុព្រះពុទ្ធមានអាយុកាល២.៥០០ឆ្នាំ ពីកំពូលភ្នំឧដុង្គកាលពីក្នុងខែធ្នូ ដើម្បីឲ្យដឹងប្រាកដថា តើពួកគេពិតជាមានជាប់ពាក់ព័ន្ធឬយ៉ាងណា។
លោក លឹម សុគន្ធថា ចៅក្រមស៊ើបសួរនៅតុលាការនេះបានលើកឡើងថា គ្មានភ័ស្តុតាងបន្ថែមថ្មីដើម្បីនាំខ្លួនបុរសទាំងនេះទៅជំនុំជម្រះទោសទេ បើទោះជាពួកគេត្រូវបានឃុំខ្លួនជាបណ្ដោះអាសន្ន ចាប់តាំងពីមានការចាប់ខ្លួនពួកគេកាលពីក្នុងខែធ្នូក៏ដោយ។ លោកបានមានប្រសាសន៍ថា អ្នកទោសដែលក្នុងនោះចំនួនបីនាក់ជាសន្តិសុខនៅលើភ្នំនេះ នឹងត្រូវសាកសួរនៅដើមខែក្រោយនេះ ក៏ប៉ុន្តែមិនទាន់មានកាលបរិច្ឆេទពិតប្រាកដឡើយ។ លោកបានមានប្រសាសន៍ថា “ប្រសិនបើយើងសាកសួរពួកគេ ហើយពួកគេនិយាយថា ពួកគេមិនពាក់ព័ន្ធនឹងបទល្មើសនេះទេ ពួកគេនឹងត្រូវដោះលែងឆាប់ៗ ហើយជនសង្ស័យដែលពាក់ព័ន្ធនឹងបទល្មើសនេះនឹងត្រូវបញ្ជូនទៅតុលាការ”។
លោកចៅក្រម សុគន្ធថា បានឲ្យដឹងថា “រហូតមកទល់ពេលនេះ យើងមិនទាន់មានភ័ស្តុតាងបន្ថែមថ្មីណាមួយដើម្បីចោទប្រកាន់ជនសង្ស័យប្រាំនាក់នេះទេ ប៉ុន្តែជនសង្ស័យថ្មីម្នាក់បានសារភាពថា ខ្លួនពិតជាបានប្រព្រឹត្តបទល្មើសនេះដោយខ្លួនឯង”។
ឈ្មោះ កែវ រស្មី អាយុ២៤ឆ្នាំ ជាកសិករតូចតាចមកពីស្រុកទ្រាំង ខេត្តតាកែវ ត្រូវបានចាប់ខ្លួនកាលពីខែកុម្ភៈ និងត្រូវបានចោទប្រកាន់ពីបទលួចសារិរិកធាតុ ដែលត្រូវបានគេរកឃើញនៅក្នុងផ្ទះបាយរបស់ជននេះ។
សារិរិកធាតុព្រះពុទ្ធនេះត្រូវបានដាក់តម្កល់នៅក្នុងព្រះសក្យមុនីចេតីយនៅលើកំពូលភ្នំ ដែលកសាងអស់ប្រាក់៤,៥លានដុល្លារដោយព្រះបរមរតនកោដ្ឋ នរោត្តម សីហនុ ក្នុងឆ្នាំ២០០២ ប៉ុន្តែត្រូវបានគេលួចយកទៅរួមជាមួយនឹងបដិមាដែលមានតែងលម្អមួយចំនួនផងដែរនាយប់មួយកាលពីក្នុងខែធ្នូ។
ជនទាំងប្រាំនាក់ត្រូវគេសាកសួរ រួមមានសន្តិសុខបីនាក់ដែលបំពេញភារកិច្ចយាមកាមនៅទីនោះ ឈ្មោះ ចម ថៃ អាយុ៥៧ឆ្នាំ សៀង សារិន អាយុ៥៨ឆ្នាំ និង ឈ្មោះ កា សាក់ អាយុ៤៦ឆ្នាំ ដែលត្រូវបានចោទពីបទចោរកម្មមានស្ថានទម្ងន់ទោស។
ឈ្មោះ ផា សុខែម អាយុ៥៩ឆ្នាំ ជាប្រធានសន្តិសុខប្រចាំនៅព្រះសក្យមុនីចេតីយនេះ និងឈ្មោះ កាន់ សុភ័ក្ត្រ អាយុ៣៩ឆ្នាំជាអ្នករត់ម៉ូតូឌុប ក៏ត្រូវបានចោទប្រកាន់ផងដែរ។ អ្នកទាំងប្រាំនាក់នេះបានទទូចថា ខ្លួនជាជនស្លូតត្រង់ ហើយនគរបាលមិនទាន់ផ្ដល់ភ័ស្តុតាងដាក់បន្ទុកណាមួយចំពោះពួកគេនៅឡើយទេ៕ ប៊ុននី