កាលពីម្សិលមិញ ចៅសង្កាត់រងក្រុងបាត់ដំបងម្នាក់បានដាក់ពាក្យបណ្ដឹងទៅគណៈកម្មការរៀបចំការបោះឆ្នោតខេត្ត ដោយចោទប្រកាន់គណបក្សសង្គ្រោះជាតិថា មិនបានជូនដំណឹងរូបលោកនៅពេលពួកគេបញ្ចាំងវីដេអូនយោបាយតាមទីសាធារណៈនៅក្នុងសង្កាត់របស់លោកកាលពីថ្ងៃទី៦ និងទី៧ ខែឧសភា។
ទាក់ទងនឹងពាក្យបណ្ដឹងដែលប្ដឹងដោយលោក សួន សុខេន ចៅសង្កាត់រងស្វាយប៉ោលោក កែវ ស៊ីណា ដែលជាសមាជិកគណៈកម្មការរៀបចំការបោះឆ្នោតខេត្តបាត់ដំបង បានមានប្រសាសន៍ថា “ខ្ញុំបានទទួលពាក្យបណ្ដឹងនេះហើយ”។ លោកមានប្រសាសន៍ថា “គណបក្សសង្គ្រោះជាតិមិនគោរពច្បាប់បោះឆ្នោត។ ពួកគេមិនបានសុំការអនុញ្ញាតពីអាជ្ញាធរសង្កាត់ស្វាយប៉ោ ដើម្បីធ្វើយុទ្ធនាការ ឬសុំបញ្ចាំងវីដេអូតាមទីសាធារណៈឡើយ”។
លោក ស៊ីណា បានបន្ថែមថា បើទោះណាជាគណបក្សប្រឆាំងមិនមានការអនុញ្ញាតពីគណៈកម្មការរៀបចំការបោះឆ្នោតខេត្ត ដើម្បីធ្វើយុទ្ធនាការឃោសនាក្នុងខេត្តបាត់ដំបងក៏ដោយ ក៏គណបក្សនេះគួរសុំការអនុញ្ញាតពីមន្ត្រីសង្កាត់សម្រាប់សកម្មភាពជាក់លាក់មួយចំនួនដែរ។
កាលពីល្ងាចថ្ងៃទី៦ ខែឧសភា មន្ត្រីនិងសកម្មជនគណបក្សសង្គ្រោះជាតិមួយក្រុមដឹកនាំដោយលោកស្រី មូរ សុខហួរ សមាជិកសភាជាប់ឆ្នោតរបស់គណបក្សនៅក្នុងខេត្តនេះបានចាប់ផ្ដើមបញ្ចាំងវីដេអូនយោបាយតាមអេក្រង់ដែលដាក់នៅលើរថយន្តតាមទីតាំងមួយចំនួនក្នុងក្រុងបាត់ដំបង រួមមានសង្កាត់ស្វាយប៉ោជាដើម។
នគរបាលបានបិទផ្លូវដែលយុទ្ធនាការចល័តរបស់គណបក្សសង្គ្រោះជាតិបានឈប់ ដោយបានរារាំងប្រជាពលរដ្ឋជាច្រើនមិនឲ្យទៅមើលវីដេអូនោះ ដែលរៀបរាប់ពីការបណ្ដេញចេញពីដីធ្លី ការបង្ក្រាបដ៏ហិង្សារបស់នគរបាលទៅលើការតវ៉ា និងសាររបស់មេដឹកនាំគណបក្សប្រឆាំង។
នៅពេលត្រូវបានទាក់ទងកាលពីម្សិលមិញ លោកស្រី មូរ សុខហួរ បានមានប្រសាសន៍ថា គណបក្សរបស់លោកស្រីបានធ្វើតាមនីតិវិធីចាំបាច់មួយចំនួនដើម្បីធ្វើយុទ្ធនាការនៅក្នុងសង្កាត់នេះ។
លោកស្រី មូរ សុខហួរ មានប្រសាសន៍ថា “យើងមានការអនុញ្ញាតពីគណៈកម្មការរៀបចំការបោះឆ្នោតខេត្តដើម្បីធ្វើយុទ្ធនាការក្នុងក្រុងបាត់ដំបងនេះ ហើយពួកគេដឹងហើយថា យើងនឹងចាក់បញ្ចាំងវីដេអូរាល់យប់”។
ច្បាប់ស្ដីពីការបោះឆ្នោតជ្រើសរើសតំណាងរាស្ត្រចែងថា គណបក្សទាំងអស់ត្រូវជូនដំណឹងមន្ត្រីឃុំ-សង្កាត់ជាមុនពីការប្រើប្រាស់ទីសាធារណៈសម្រាប់សកម្មភាពយុទ្ធនាការ។ ទោះជាយ៉ាងណា ច្បាប់នេះមិនមានក្នុងច្បាប់ស្ដីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលធ្វើឡើងនៅថ្ងៃទី១៨ ខែឧសភាឡើយ។
ប៉ុន្តែលោក អឹុម សួស្ដី ប្រធានគណៈកម្មាធិការជាតិរៀបចំការបោះឆ្នោត (គ.ជ.ប.) បានមានប្រសាសន៍ថា គណបក្សសង្គ្រោះជាតិគួរសហការជាមួយមន្ត្រីមូលដ្ឋានដើម្បីរក្សាសណ្ដាប់ធ្នាប់សាធារណៈ។ លោកបានមានប្រសាសន៍ថា “ពួកគេគួរជូនដំណឹងដល់មន្ត្រីមូលដ្ឋាន ដើម្បីឲ្យពួកគេអាចរៀបចំ និងការពារសន្តិសុខអំឡុងការធ្វើយុទ្ធនាការ”៕ សារុន