បន្ទាប់ពីដំណើរការសាកល្បងបានរយៈពេលមួយខែមានអ្នកដំណើរជិះពេញៗរថយន្តក្រុងចំនួន១០គ្រឿងនោះ ក្រុមហ៊ុនចិនមួយបានសន្យាកាលពីដើមខែមីនាថា នឹងវិនិយោគថវិការាប់លានដុល្លារលើគម្រោងនេះដើម្បីបន្ថែមរថយន្តក្រុងថ្មីរាប់រយគ្រឿងទៀត។
ក្រុមមន្ត្រីបាននិយាយថា ប៉ុន្តែក្រុមហ៊ុនក្លូបល ត្រេដ ឌីវេឡុបម៉ិន (Global Trade Development) បានរត់ចោលគម្រោងនេះកាលពីខែមុន បន្ទាប់ពីសាលារាជធានីមិនព្រមលើកលែងពន្ធសម្រាប់អាជីវកម្មតាក់ស៊ីម៉ែត្ររបស់ក្រុមហ៊ុននេះ ហើយឥឡូវនេះសាលារាជធានីជាអ្នកទទួលខុសត្រូវចំពោះការគ្រប់គ្រងសេវារថយន្តក្រុងដែលទើបដំណើរការថ្មីនេះ នៅពេលដែលខ្លួនកំពុងស្វែងរកក្រុមហ៊ុនថ្មីឲ្យកាន់កាប់បន្ត។
លោក ឡុង ឌីម៉ង់ អ្នកនាំពាក្យសាលារាជធានីបាននិយាយកាលពីថ្ងៃអង្គារថា មន្ទីរសាធារណការនិងដឹកជញ្ជូនរាជធានីជាអ្នកគ្រប់គ្រងសេវារថយន្តក្រុងនេះ ហើយបានសន្យាថា នឹងមិនមានការរអាក់រអួលដល់សេវារថយន្តក្រុង ដែលមាន៣៦ចំណតនៅតាមមហាវិថីព្រះមុនីវង្សទៀតទេ នៅពេលខ្លួនស្វែងរកក្រុមហ៊ុនថ្មីបាន។
លោកបាននិយាយថា “ប្រតិបត្តិការរថយន្តក្រុងនៅក្នុងទីក្រុងភ្នំពេញនឹងមិនឈប់ទេ វានឹងបន្តដំណើរការជារៀងរហូត ហើយលោកបានបដិសេធមិនប្រាប់ថា មានក្រុមហ៊ុនប៉ុន្មានចង់បានកិច្ចសន្យានេះ ឬប្រាប់ឈ្មោះក្រុមហ៊ុនទាំងនោះឡើយ។
ផែនការសម្រាប់ប្រព័ន្ធដឹកជញ្ជូនសាធារណៈបានចំណាយពេលជាច្រើនឆ្នាំមុនពេលចាប់ផ្ដើមដំបូងកាលពីខែកុម្ភៈជាមួយការសាកល្បងបានជោគជ័យរបស់អង្គការ JICA នៅដំណាក់កាលទី១ នៃផែនការមេសម្រាប់សេវាដឹកជញ្ជូនក្នុងក្រុងរបស់ខ្លួន។
ប៉ុន្តែការគាំទ្រដែលបានស្វាគមន៍ការមកដល់របស់រថយន្តក្រុងនេះបានធ្លាក់ចុះភ្លាមៗ បន្ទាប់ពីអង្គការ JICA បានប្រគល់គម្រោងរថយន្តក្រុងនេះទៅឲ្យក្រុមហ៊ុនក្លូបលត្រេត ដែលបានទទួលកិច្ចព្រមព្រៀងនេះដោយគ្មានការដេញថ្លៃ ហើយមានការព្រមព្រៀងគ្នាតែមាត់។
ក្រុមហ៊ុននេះបានសន្យាចំណាយលុយ១២លានដុល្លារដើម្បីបន្ថែមរថយន្តក្រុងថ្មីជាង៣០០គ្រឿងឲ្យដំណើរការតាមផ្លូវចំនួន១០ក្នុងទីក្រុង ប៉ុន្តែបានដកខ្លួនចេញវិញភ្លាមៗដោយសារអ្វីដែលលោក លឹម អានដ្រេ នាយកប្រតិបត្តិក្រុមហ៊ុននេះចាត់ទុកថា ជាបញ្ហាបច្ចេកទេស។ លោកបាននិយាយថា “គម្រោងនេះចប់ហើយ គឺវាចប់ជារៀងរហូត”។ ប៉ុន្តែលោកមិនព្រមធ្វើអត្ថាធិប្បាយបន្ថែមទេ។
លោក ឡុង ឌីម៉ង់ បាននិយាយថា សាលារាជធានីឈប់ធ្វើការជាមួយក្រុមហ៊ុនក្លូបលត្រេដបន្ទាប់ពីបានដឹងច្បាស់ថា ក្រុមហ៊ុននេះស្វែងរកការលើកលែងពន្ធដើម្បីខ្លួនអាចនាំចូលមិនមែនតែរថយន្តក្រុងប៉ុណ្ណោះទេ ប៉ុន្តែថែមទាំងនាំចូលរថយន្តតាក់ស៊ីម៉ែត្រ សម្រាប់ក្រុមហ៊ុនគាត់ដោយឥតបង់ពន្ធទៀតផង។
លោក ឡុង ឌីម៉ង់ បាននិយាយថា “គាត់ភ្ជាប់ក្រុមហ៊ុនតាក់ស៊ីម៉ែត្ររបស់គាត់ជាមួយរថយន្តក្រុង ប៉ុន្តែរថយន្តតាក់ស៊ីឯកជនមិនអាចភ្ជាប់ជាមួយរថយន្តក្រុងបានទេ”។
លោក អ៊ុំ គឹមសាន អនុប្រធានការិយាល័យដឹកជញ្ជូននៅមន្ទីរសាធារណការនិងដឹកជញ្ជូនរាជធានីដែលបច្ចុប្បន្ន គ្រប់គ្រងសេវារថយន្តក្រុងនេះនិយាយថា គេក៏បានដឹងច្បាស់ដែរថា ក្រុមហ៊ុនក្លូបល ត្រេដ មិនធ្វើតាមការប្ដេជ្ញារបស់ខ្លួនឡើយ។
លោកបាននិយាយថា “ពួកគេប្រហែលជាមិនអាចធ្វើការងារនេះបានល្អទេ។ ដូច្នេះឥឡូវនេះយើងកំពុងគ្រប់គ្រងសេវារថយន្តក្រុងនេះ ហើយបានគ្រប់គ្រងរយៈពេលមួយខែមកហើយ ខណៈដែលសាលារាជធានីកំពុងស្វែងរកមនុស្សដែលអាចបន្ថែមរថយន្តក្រុងជាច្រើនទៀត”។
លោក គឹមសាន និយាយថា ក្រុមហ៊ុនមួយចំនួនបានបង្ហាញការចាប់អារម្មណ៍ចំពោះសេវារថយន្តក្រុងនេះ ប៉ុន្តែលោកគ្រាន់តែបញ្ជាក់ថា ក្រុមហ៊ុនកូរ៉េខាងត្បូងស៊ីធី ត្រែន ខេមបូឌា (City Trans Cambodia)បានបង្ហាញការចាប់អារម្មណ៍របស់ខ្លួនសាជាថ្មីបន្ទាប់ពីការដេញថ្លៃរបស់ខ្លួនដំបូងចំនួន៥លានដុល្លារត្រូវបានសាលារាជធានីច្រានចោល ហើយឲ្យក្រុមហ៊ុនក្លូបលជាអ្នកឈ្នះការដេញថ្លៃនោះ។ លោកបាននិយាយថា “ក្រុមហ៊ុនកូរ៉េខាងត្បូងនេះកំពុងចរចា ប៉ុន្តែយើងមិនទាន់បានកំណត់កាលបរិច្ឆេទសម្រាប់ការពិភាក្សាជាមួយក្រុមហ៊ុននេះទេ”។
កាលពីខែមីនា លោក ចយ ដេយុង នាយកក្រុមហ៊ុនត្រែនឆយ(Trans Choice)ដែលគ្រប់គ្រងក្រុមហ៊ុនតាក់ស៊ីឯកជនដែរនោះ បាននិយាយថា លោកមិនយល់ចំពោះការដេញថ្លៃឈ្នះនេះទេ ហើយលោកបានព្យាករដោយត្រឹមត្រូវថា គូប្រជែងរបស់លោកនៅមិនបានយូរទេ។ លោកបាននិយាយថា នៅក្នុងវិស័យដឹកជញ្ជូនសាធារណៈដែលល្បីខាងខាតនេះ ការឈ្នះការដេញថ្លៃខ្ពស់បែបនេះមិនមានន័យទេ។
លោកបាននិយាយកាលពីថ្ងៃច័ន្ទថា “យើងបានត្រឡប់មកចរចាវិញ ហើយសង្ឃឹមថា យើងនឹងមានកិច្ចព្រមព្រៀងជាមួយសាលារាជធានីក្រោយថ្ងៃឈប់សម្រាក។ សាលារាជធានីទទួលសំណើរបស់យើងហើយ ហើយវាអាស្រ័យលើសាលារាជធានីក្នុងការសម្រេចថា តើពួកគេអាចធ្វើបានឬមិនអាចធ្វើបាន”។
ថ្វីបើមានការធានាពីរដ្ឋាភិបាលក៏ដោយ ក៏អ្នកបើកបររថយន្ត និងអ្នកដំណើរបាននិយាយនៅសប្ដាហ៍នេះថា ពួកគេមានការព្រួយបារម្ភចំពោះការដំណើរការមិនល្អនៃសេវារថយន្តក្រុងសាធារណៈនេះ។
លោក ប្រាក់ សុផល អាយុ៤១ឆ្នាំ ជាអ្នកបើកបររថយន្តក្រុងបាននិយាយថា “ខ្ញុំសង្ឃឹមថា សេវានេះបន្តទៀត ពីព្រោះខ្ញុំចង់បានការងារមានស្ថិរភាព ប៉ុន្តែខ្ញុំខ្លាចសាលាក្រុងបិទរថយន្តក្រុង ហើយវានឹងធ្វើឲ្យខ្ញុំពិបាក”។
អ្នកស្រី ដួង សុកាន អាយុ៦៣ឆ្នាំបាននិយាយថា គាត់ព្រួយបារម្ភប្រសិនបើរថយន្តក្រុងឈប់រត់ ព្រោះវាជួយឲ្យអ្នកស្រី និងស្ត្រីផ្សេងទៀតចំណាយតិចក្នុងការធ្វើដំណើរទៅផ្សារ។ អ្នកស្រីបាននិយាយថា “ខ្ញុំធ្លាប់ចំណាយ៨.០០០រៀលក្នុងមួយថ្ងៃ ប៉ុន្តែឥឡូវនេះខ្ញុំចំណាយតែ៣.០០០រៀលប៉ុណ្ណោះ ដូច្នេះខ្ញុំសង្ឃឹមថា រថយន្តក្រុងនឹងមានជារៀងរហូត ពីព្រោះរថយន្តក្រុងងាយស្រួល និងមានសុវត្ថិភាពជាងម៉ូតូឌុប៕គឹមហឿន