ជនរងគ្រោះនិងអង្គការសិទ្ធិមនុស្សបានឲ្យដឹងថា សន្តិសុខដែលជួលដោយលោក ឃុន សៀ ជាអ្នកជំនួញអចលនទ្រព្យដ៏មានឥទ្ធិពល ដែលតាមចោទថាបាននិងកំពុងគំរាមកំហែងប្រជាពលរដ្ឋចំនួនបីគ្រួសារ ក្នុងជម្លោះដីធ្លីមួយក្នុងខណ្ឌទួលគោក រាជធានីភ្នំពេញ កាលពីសប្ដាហ៍មុនបានគំរាមសម្លាប់បុគ្គលិកសិទ្ធិមនុស្សម្នាក់។
លោក វណ្ណ សុផាត អ្នកសម្របសម្រួលផ្នែកគម្រោងកំណែទម្រង់ដីធ្លីប្រចាំមជ្ឈមណ្ឌលសិទ្ធិមនុស្សកម្ពុជា បានចុះទៅទីនោះដើម្បីពិនិត្យតាមដានស្ថានភាព និងថតរូបភាព បន្ទាប់ពីសន្តិសុខដែលគេដឹងថា ធ្វើការឲ្យក្រុមហ៊ុន ឃុន សៀ បានប្រមូលផ្ដុំគ្នាម្ដងទៀតនៅខាងក្រៅផ្ទះរបស់ឈ្មោះ លី ស៊្រាងខេង ដែលគ្រួសាររបស់គាត់បានទទួលរងការគំរាមកំហែង និងការបំភិតបំភ័យធ្ងន់ធ្ងរជាងគេពីក្រុមហ៊ុននេះកាលពីឆ្នាំមុន។
លោក សុផាត បានឲ្យដឹងកាលពីម្សិលមិញថា បុរសមួយក្រុមមានគ្នាប្រាំមួយនាក់បានជួបបុគ្គលិកសិទ្ធិមនុស្ស នៅពេលដែលគាត់ទៅជិតលំនៅដ្ឋានរបស់គ្រួសារអ្នកភូមិទាំងនេះនៅក្នុងសង្កាត់បឹងកក់១ នៅវេលាម៉ោងប្រហែល៤និង៣០នាទីល្ងាច។ ក្មេងស្ទាវទាំងនោះប្រដាប់ដោយឧបករណ៍ជាអាវុធ និងស្រែកប្រមាថឲ្យគាត់ភ័យខ្លាច។
លោកបានមានប្រសាសន៍ថា “ពួកគេបានដើរសំដៅមករកខ្ញុំ ដោយមានពូថៅនិងកាំបិតបុ័ងតោ ហើយបានច្រានទ្រូងខ្ញុំ បង្ខំឲ្យខ្ញុំចេញពីដីនោះ ហើយប្រាប់ខ្ញុំថា ខ្ញុំមិនអាចគេចពីពួកគេបានឡើយ ហើយថាពួកគេនឹងសម្លាប់ខ្ញុំ បើសិនថតរូបពួកគេ”។ លោកបានបន្ថែមថា “ពេលនេះ ខ្ញុំកំពុងតែពិចារណាថា តើត្រូវបញ្ជូនរឿងនេះទៅតុលាការដើម្បីប្ដឹងសន្តិសុខក្រុមហ៊ុននេះដែរឬអត់”។
លោក យឹម លាង ប្រធានអង្គភាពអង្គរក្សរបស់លោក ជា ស៊ីម ប្រធានព្រឹទ្ធសភានិងជាដៃគូរកស៊ីជាមួយលោក ឃុន សៀ បានឲ្យដឹងថា លោកមិនដឹងអំពីហេតុការណ៍នេះឡើយ។ លោកបានមានប្រសាសន៍ថា “ខ្ញុំមិនដឹងអំពីករណីនេះទេ ក៏ប៉ុន្តែ គាត់ជឿថា បើមានគេគំរាមសម្លាប់គាត់ អ៊ីចឹងគាត់ត្រូវប្ដឹងទៅនគរបាលទៅ”។ លោកបានបង្វែរសំណួរទៅលោក ណាច ទ្រី មេធាវីរបស់លោក ឃុន សៀ ដែលក៏បានបដិសេធថា មិនដឹងអំពីហេតុការណ៍នេះដែរ។
ក្រុមគ្រួសារដែលពាក់ព័ន្ធក្នុងជម្លោះដីធ្លីជាមួយនឹងមហាសេដ្ឋីរូបនេះ បានចោទប្រកាន់សន្តិសុខពីការបំភិតបំភ័យ រួមទាំងការប៉ុនប៉ងដុតផ្ទះ និងគំរាមកំហែងជាច្រើនទៀត។ កាលពីក្នុងខែមីនា ពស់ពិសជាច្រើនត្រូវបានបោះចូលក្នុងផ្ទះគ្រួសារមួយ។
អង្គការសង្កេតការណ៍ដើម្បីការពារអ្នកការពារសិទ្ធិមនុស្ស(Observatory for Protection of Human Rights Defenders) មានមូលដ្ឋាននៅក្រុងហ្សឺណែវ បានចេញសេចក្ដីថ្លែងការណ៍មួយកាលពីម្សិលមិញ ដោយថ្កោលទោសការគំរាមកំហែងចុងក្រោយពីសំណាក់ក្រុមហ៊ុននេះ និងបានអំពាវនាវឲ្យរដ្ឋាភិបាលចាត់វិធានការ៕ ប៊ុននី