32 C
Phnom Penh

អាជ្ញាធរ​ខេត្តស្ទឹង​ត្រែង ចាប់​បាន​ឈើ​ធ្នង់ខុស​ច្បាប់

ដោយ ឌឹ ខេមបូឌា ដេលី

បទវិភាគ

ក្រុមមន្ត្រី​បាន​ឲ្យដឹង​កាល​ពីម្សិល​មិញថា ​​អាជ្ញាធរ​​នៅ​ក្នុងខេត្ត​​ស្ទឹង​ត្រែង​​បាន​រក​ឃើញ​និង​រឹប​​អូស​បានឈើប្រណីត​ ដឹក​​ជញ្ជូន​តាម​​​រថ​យន្ត​ចំនួន​បីគ្រឿង​កាល​​ពីយប់ថ្ងៃ​​​អាទិត្យ​ ចេញ​ពី​ឧទ្យានជាតិ​វីរ​​ជ័យ​ដែល​ត្រូវបានការ​​ពារ​។

លោក យ៉ន ឌិន ស្នងការ​រង​នគរបាល​​ខេត្ត​​បានមាន​ប្រសាសន៍ថា ​គេ​បាន​ឃាត់​និង​បា​ន​ឆែក​ឆេររថយន្ត​ ខណៈ​ដែល​រថ​យន្ត​ទាំង​នេះ​ព្យាយាម​ឆ្លង​កាត់​ក្រុង​ស្ទឹង​ត្រែង​ ពី​ព្រោះ​នគរ​បាល​សង្ស័យ​ថា រថយន្ត​ទាំង​នេះ​ដឹក​ឈើ​ច្រើន​ជាង​ការ​អនុញ្ញាត​​។ លោក​ យ៉ន ឌិន បាន​ពន្យល់​ថា បើទោះ​ជា​​ក្រុម​ហ៊ុន​ដែលជាម្ចាស់​រថយន្ត​មាន​ការ​អនុញ្ញាត​ដឹក​ជញ្ជូន​ឈើ​ធ្នង់​​ប្រណីតក៏​ដោយ ​​ក៏​ចំនួន​ឈើ​បី​រថយន្ត​នោះ​ទំនងជា​​ផ្ទុក​លើស​ចំណុះ​​ដែរ។

លោក​បាន​មាន​ប្រសាសន៍​ថា “យើង​បាន​បញ្ឈប់​រថ​យន្ត​ទាំង​នេះ​ ដើម្បី​​យើង​អាច​ប្រមាណ​ចំនួន​​ឈើ​​នៅ​ក្នុង​រថ​យន្ត​ ពីព្រោះ​យើង​ជឿ​ថា រថយន្ត​នេះ​ផ្ទុក​​ហួ​ស​កម្រិត​ពី​អាជ្ញា​ប័ណ្ណ​ដែល​ក្រុម​ហ៊ុន​មាន​ ដូច​ដែល​បាន​ចែង​នៅ​ក្នុង​លិខិត​អនុញ្ញាត​របស់​ខ្លួន​”។ លោក​បាន​មាន​ប្រសាសន៍​បន្ថែម​ថា រថយន្ត និង​ឈើ​ទាំង​​នោះ ត្រូវ​បាន​​បញ្ជូន​ទៅ​ស្នង​​ការ​​ដ្ឋាន​នគរបាល​ខេត្ត​កាល​ពី​ថ្ងៃ​ច័ន្ទ​ ដើម្បី​ត្រួត​ពិនិត្យ​បន្ថែម​ទៀត​។ លោក​បាន​បដិសេធ​មិន​ផ្តល់​សេចក្តី​លម្អិត​បន្ថែម​ទៀត​ឡើយ​”។ លោក​បាន​បង្វែរ​សំណួរ​ទៅ​ លោក ឈឿន តុលា​ ប្រធាន​រដ្ឋ​បាលខណ្ឌ​ព្រៃ​ឈើ​ខេត្ត​ស្ទឹង​ត្រែង​ដែល​មិន​អាច​ទាក់​ទង​បាន​កាល​ពី​ម្សិលមិញ​។

លោក​ ហ៊ូ សំអុល អ្នក​សម្រប​សម្រួល​របស់​អង្គការ​សិទ្ធិ​មនុស្ស​អាដ​ហុក​ប្រចាំ​ខេត្ត​នេះ​បាន​មាន​ប្រសាសន៍​ថា ការ​សើុប​អង្កេ​ត​ដោយ​អង្គការ​របស់​លោក​បាន​រក​ឃើញ​ថា ឈើ​នេះ​កន្លង​មក​ត្រូវ​បាន​រឹប​អូស​ដោយ​មន្ត្រី​រដ្ឋ​បាល​​ខណ្ឌ​ព្រៃ​ឈើ​ខេត្ត​ស្ទឹង​ត្រែង​។ លោក​បាន​មាន​ប្រសាសន៍​ថា ហើយ​ក្រោយ​មក​ត្រូវ​បាន​លក់​ទៅ​ឲ្យ​ក្រុម​ហ៊ុន​មួយ​នៅ​ក្នុង​ក្រុង​តាខ្មៅ​ ខេត្ត​កណ្តាល ​ជា​ទី​ដែល​ឈើ​នេះ​ត្រូវ​បាន​ដឹក​ជញ្ជូន​​ទៅ​នៅ​ពេល​ដែល​នគរ​បាលស្ទាក់​ចាប់​ម្តង​ទៀត​។

លោក​ សំអុល បាន​មាន​ប្រសាសន៍​ថា “យើង​បាន​សើុប​អង្កេត និង​រក​ឃើញ​ថា មន្ត្រី​ឧទ្យាន​ជាតិ​វីរជ័យ​បាន​រឹប​អូស​ឈើ​នេះ​ពី​អ្នក​កាប់​ឈើ​ខុស​ច្បាប់​នៅ​ទី​នោះ ហើយ​ពួក​គេ​បាន​និង​កំពុង​តែ​លក់​ឈើ​ដែល​រឹប​អូស​បាននេះ ​ទៅ​ឲ្យ​ក្រុម​ហ៊ុន​ឯកជន​នានា​ដើម្បី​ប្រមូល​ប្រាក់​​​សម្រាប់​ប្រើ​ផ្ទាល់​ខ្លួន​”។ លោក​បាន​បន្ថែម​ថា ឈើ​នេះ​មាន​ចំនួន​​៥៣​ម៉ែត្រ​គូប​។ លោក​ សំអុល​ មិន​បាន​ស្គាល់​ឈ្មោះ​ក្រុម​ហ៊ុន​ដែល​ទិញ​ឈើ​នេះ​ឡើយ​។

ការ​​ទាក់​ទង​​តាម​ទូរស័ព្ទ​ម្តង​ហើយ​ម្តង​ទៀត​ទៅ​មន្ត្រី​ខេត្ត​ និង​រដ្ឋបាល​ព្រៃ​ឈើ​ជាតិ​ មិន​ទាន់​មាន​ចម្លើយ​​​តប​ទេ​កាល​ពី​ម្សិលមិញ​។ ឧទ្យាន​ជាតិ​វីរ​ជ័យ​លាត​សន្ធឹង​នៅ​តំបន់​ខាងលិច ពី​ចុង​​ភាគ​ឦសាន​នៃ​ខេត្ត​រតន​គិរី​ជាប់ព្រំដែន​វៀត​ណាម​ដល់​​ខេត្ត​ស្ទឹង​ត្រែង​។ បើ​ទោះ​ជា​ព្រៃ​​ទំហំ​៣៣០.០០០ហិកតា​ត្រូវ​បាន​ការ​ពារ​ក៏​ដោយ ក៏អ្នក​កាប់​ឈើ​ខុស​ច្បាប់​កាប់​ដើម​ឈើ​គ្រញូង​​ស្រេច​តែ​ចិត្ត​គ្មាន​ប្រណីដើម្បី​លក់​ ដែល​ត្រូវ​គេ​កែច្នៃ​​ជា​គ្រឿង​សង្ហារិម និង​លក់​ក្នុង​តម្លៃ​ខ្ពស់ហួសប្រមាណ​។

នៅ​តាម​ខេត្ត​ ឈើ​ធ្នង់​​១ម៉ែត្រ​គូប​តម្លៃ​ប្រមាណ​៨០០​ដុល្លារ​ ក៏​ប៉ុន្តែ តម្លៃ​កាន់​តែ​ខ្ពស់​ជាង​នេះ​​នៅ​ក្នុង​រាជ​ធានី​ភ្នំពេញ​ និង​ប្រទេស​វៀត​ណាម​។ អង្គការ​សិទ្ធិ​មនុស្ស​ដូច​ជា​ អង្គការ​អាដ​ហុក​​ជាដើម​បាន​ចោទ​ជា​យូ​រ​មក​ហើយ​ថា ការ​សហការ​គ្នា​​រវាង​អាជ្ញា​ធរ​ និង​អ្នក​កាប់​ឈើ​ខុស​ច្បាប់​​ ធ្វើ​ឲ្យ​ការ​ប៉ុន​ប៉ង​ការពារ​​ព្រៃ​ឈើ​មិន​បាន​សម្រេច៕​ ប៊ុន​នី​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស