26 C
Phnom Penh

អ្នក​​​ច្បាប់​​​នឹង​​​ចាប់​​​ផ្ដើម​​​សម្រប​​​សម្រួល​​​រវាង​​​ក្រុម​​​អ្នកភូមិ​​​​​​ និង​​​ក្រុម​​​ហ៊ុន​​​ចម្ការ​​​កៅស៊ូ

ដោយ ឌឹ ខេមបូឌា ដេលី

បទវិភាគ

អ្នក​​​ច្បាប់​​​មក​​ពី​​​ក្រុម​​​ហ៊ុន​​​សាជីវកម្ម​​​ហិរញ្ញវត្ថុ​​​អន្តរជាតិ​​​បាន​​​បញ្ចប់​​​ការ​​​ពិនិត្យ​​​ពាក្យ​​​បណ្ដឹង​ដែល​​​អ្នកភូមិជា​​​ច្រើន​​​គ្រួសារ​​​បាន​​​ប្ដឹង​​​មក​​​ក្រុម​​​ហ៊ុ​​ន​​​នេះ​​​ជុំវិញ​​​ការ​​​ផ្ដល់​​​ហិរញ្ញប្បទាន​​​របស់​​​ក្រុម​​​ហ៊ុន​​​នេះ​​​ដល់​​​ចម្ការ​​​កៅស៊ូ​​​មួយ​​​ចំនួន​​​ដែល​​​មាន​​​ភាព​​​ចម្រូង​​​ចម្រាស​​​ ហើយ​​​ឥឡូវ​​​នេះ​​នឹង​​​សម្រប​​​សម្រួល​​​​​​ដល់​​​កិច្ច​​​ប្រឹង​​​ប្រែង​​​ជួយ​​​​ដោះ​​​ស្រាយ​​របស់​​​​​ភាគី​​​ទាំង​​​ពីរ។

សហគមន៍​​​ជន​​​ជាតិ​​​ភាគ​​​តិច​​​មួយ​​​ក្រុម​​​ដែល​​​មាន​​​១៧​​​សហគមន៍​​​ក្នុង​​​ខេត្ត​​​រតនគិរី​​​ ភាគ​​​ឦសាន​​​បាន​​​ប្ដឹង​​​ទៅក្រុម​​​ហ៊ុន​​​សាជីវកម្ម​​​ហិរញ្ញវត្ថុ​​​អន្តរជាតិ​​​ ជា​​ដៃ​​​គូ​​​ផ្តល់​​​ហិរញ្ញប្បទាន​​​របស់​​​ធនាគារ​​​ពិភព​​​លោក​​​ កាលពីខែ​​កុម្ភៈ ដោយសារ​​ក្រុមហ៊ុននេះ​​​បន្ត​​​ផ្ដល់​​​ហិរញ្ញប្បទាន​​​ដល់​​​ក្រុម​​​ហ៊ុន Hoang Anh Gia Lai​ (HAGL) ជាក្រុម​​​ហ៊ុន​​​របស់​​​វៀតណាម ដែល​​​កាន់​​​កាប់​​​ចម្ការកៅស៊ូ​​​មួយ​​​ចំនួន​​​នៅ​​​កម្ពុជា​​​ដែលរងការ​​​ចោទប្រកាន់​​​ថា បាន​​​ប្លន់យក​​​ដីស្រែ​​​របស់ពួកគាត់​​​ ហើយ​​​កាប់​​​ឈើក្នុង​​​​ព្រៃ​​​ដូន​​​តាពិសិដ្ឋ​​​របស់​​​ពួកគាត់​​​ទៀត។ ក្រុមហ៊ុន HAGL បាន​​​បដិសេធ​​​ការ​​​ចោទ​​​ប្រកាន់ទាំង​​​នេះ​​​ ហើយ​​​បាន​​​អះអាង​​​ថា ក្រុម​​​ហ៊ុន​​​បាន​​​អនុវត្ត​​​តាម​​​ច្បាប់​​​ទាំង​​​អស់។

នៅក្នុង​​​របាយការណ៍​​​ខ្លីមួយ​​ដែល​​​បាន​​​ចេញ​​​ផ្សាយ​​​កាលពីម្សិលមិញ អ្នក​​​ច្បាប់​​​របស់​​​ក្រុម​​​ហ៊ុន​​​សាជីវកម្ម​​​ហិរញ្ញវត្ថុ​​​អន្តរជាតិ​​​ បាន​​​​​រៀប​​​រាប់​​ពីការ​​​អះអាង​​​របស់អ្នក​​​ភូមិ​​​​​ និង​​​​​​ការ​​​អះអាង​​​​​​របស់​​​ក្រុម​​​ហ៊ុន​​​នេះ​ ហើយ​​​លើក​​​ឡើង​​​​​ថា ភាគីទាំងពីរ​​​បាន​​​យល់​​​ព្រម​​​អនុញ្ញាត​​​ឲ្យ​​​ខ្លួន​​​ជួយស​​​ម្រប​​​សម្រួល​​​ការ​​​ចរចា​​​ដើម្បី​​​ដោះស្រាយ​​​វិវាទ​​​នេះ​​​។ក្រុមហ៊ុន​នេះមិនបាន​កំណត់ពេល​​​វេលា​​​​​​ទេ ប៉ុន្តែ​​​បាន​​​លើក​​​ឡើង​​​ថា ការ​​​ចរចា​​​នឹង​​​ចាប់​​​ផ្ដើម​​​នៅ​​​ពេល​​​ខ្លួន​​​កំណត់វិធាន​​​សម្រាប់​​​ការ​​​ចរចា​​​រួច​​​ហើយ។

របាយការណ៍​​​ដដែល​​​នេះ​​​លើក​​​ឡើង​​​ថា “បញ្ហា​​​នេះ​​​រួម​​​មានកិច្ច​​​ព្រម​​​ព្រៀង​​​ទាក់​​​ទង​​​នឹង​​​…ទីកន្លែងរៀបចំកិច្ចប្រជុំ​​​ អ្នកតំណាង និង​​​ការ​​​រក្សា​​​ភាព​​​សម្ងាត់។ ភាគី​​​ទាំងពីរ​​​ក៏ត្រូវ​​​ព្រម​​​ព្រៀង​​លើ​​​បញ្ហា​​​ដែលពួកគេ​​​ចង់​​​​ឲ្យ​​​ដំណើរ​​​ការ​​​​​​រក​​​ដំណោះ​​​ស្រាយ​​​​​​នេះ​​​ជួយ​​​ដោះ​​​ស្រាយ​​​ផង​​​ដែរ​​​។ តាម​​​សំណើរ​​​បស់​​​អ្នក​​​ច្បាប់​​​រូប​​​នេះ ​​​ក្រុម​​​ហ៊ុន​​​ HAGL បាន​​​យល់​​​ព្រម​​​ផ្អាក​​​​​​កាប់​​​ឈើ​​​បណ្ដោះ​​​អាសន្ន​​​នៅ​​ក្នុង​​​ដីសម្បទាន​​​របស់​​​ខ្លួន​​​នៅក្បែរសហគមន៍ចំនួន​​​១៣​​​ក្នុង​​​ចំណោម​​​សហគមន៍ទាំង​​​១៧​​​ ដែល​​​បាន​​​ដាក់ពាក្យ​​​បណ្ដឹង​​​គិត​មកដល់ថ្ងៃទី១ ខែឧសភា​​​។

លោក អ៊ាង វុទ្ធី នាយក​​​ប្រតិបត្តិអង្គការ​​​​សមធម៌កម្ពុជា ជាអង្គការ​​​ក្រៅរដ្ឋាភិបាល​​​មួយ​​​ក្នុង​​​ចំណោម​​​អង្គការ​​​ក្រៅរដ្ឋាភិបាល​​​ជាច្រើន​​​ដែល​​​បានជួយ​​​គ្រួសារ​​​អ្នក​​​ភូមិ​​​ក្នុង​​​ការ​​​ដាក់ពាក្យ​​​បណ្ដឹង​​​នោះ​​​បាន​​​មាន​​​ប្រសាសន៍​​​ថា ការ​​​ផ្អាក​​នេះ​​​មិនទាន់​​​គ្រប់​​​គ្រាន់​​​ទេ ប៉ុន្តែ​​​យ៉ាង​​​ហោច​​​ណាស់​​​ក៏បង្ហាញ​​​ពី​​​ឆន្ទៈ​​​ក្នុង​​​ការ​​​ចរចា​​​របស់​​​ក្រុមហ៊ុន​​​ HAGLដែរ។

លោក​​​បាន​​​មាន​​​ប្រសាសន៍​​​ថា “ដំណើរការ​​​សម្រប​​​សម្រួលពិត​​​ប្រាកដ​​​មិនទាន់​​​ចាប់​​​ផ្ដើម​​​នៅ​​​ឡើយ​​​ទេ ប៉ុន្តែ​​​រហូត​​​មកទល់​​​ពេល​​​នេះ​​​ក្រុម​​​ហ៊ុន​​​បាន​​​បង្ហាញ​​​ចំណុចវិជ្ជមាន​ខ្លះៗតាម​​​រយៈការ​​​ផ្អាក​​​​​កា​​​រ​​​កាប់​​ឈើ​​”។ ទោះយ៉ាងណា លោក សល់ នឿយ តំណាង​​​អ្នក​​​ភូមិ​​​ម្នាក់​​​ដែល​​​បាន​​​ដាក់ពាក្យបណ្ដឹង​​​បាន​​​និយាយ​​​ថា ក្រុមហ៊ុន​បុត្រសម្ព័ន្ធ​​​របស់​​​ក្រុម​​​ហ៊ុន HAGL ​​​នៅ​​​ជិត​​​សហគមន៍​​​របស់​​​លោក​​​ក្នុង​​​ស្រុក​​​អណ្ដូង​​​មាស​​​ បាន​​​កាប់​​​ឈើ​​​ពេញ​​​មួយ​​​ខែ​​​តែម្ដង​​​។

លោក​​​ នឿយ បាន​​​និយាយ​​​ថា លោក​​​បារម្ភថា ក្រុម​​​ហ៊ុន HAGL នឹង​​​ព្យាយាម​​​បញ្ចុះ​​​បញ្ចូលអ្នក​​​ភូមិ​​​ឲ្យ​​​ទទួល​​​យក​​​សំណង​​​សម្រាប់​​​ដីដែល​​​ក្រុម​​​ហ៊ុន​​​បាន​​​រំលោភ​​​យកពីពួកគាត់ ប៉ុន្តែ​​​លោក​​​បាន​​​អះអាង​​​ថា ពួកគាត់​​​​នឹង​​​ទទួល​​​យក​​​តែដីចាស់​​​របស់​​​ពួកគាត់​​​វិញប៉ុណ្ណោះ។ លោក​​​បាន​​​និយាយ​​​ថា “យើង​​​ចង់​​​បាន​​​ដីរបស់យើង​​​វិញ ពីព្រោះ​​​ជីវភាព​​​រស់​​​នៅ​​​របស់​​​អ្នក​​​ភូមិ​​​ពឹង​​​ផ្អែក​​​លើ​​​ការ​​​ធ្វើ​​​ស្រែចម្ការ​​​”៕ សារុន​​​​​​​​​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស