29 C
Phnom Penh

បុគ្គលិកក្រុមហ៊ុន​ប្រេងឥន្ធនៈ​ដទៃទៀត​ច្រណែន​ខណៈដែលបុគ្គលិក​ក្រុមហ៊ុន​កាល់តិច​បន្ត​ធ្វើ​កូដកម្ម

ដោយ ឌឹ ខេមបូឌា ដេលី

បទវិភាគ

នៅថ្ងៃ​​​ទី ៣​​​នៃ​​​កូដកម្ម​​​ទូទាំង​​​ទីក្រុង បុគ្គលិក​​ក្រុម​​​ហ៊ុន​​​កាល់តិច​​​ ប្រហែល​​​១០០នាក់​​​បាន​​​តវ៉ា​​​កាល​​​ពី​​​ម្សិលមិញនៅ​​​ស្ថានីយ​​​ប្រេង​​​ឥន្ធនៈ​​​ដ៏​​​ធំ​​​ដែល​​​ស្ថិត​​​នៅ​​​កាច់​​​ជ្រុង​​​មហាវិថីព្រះ​​​មុនីវង្ស និង​​​មហាវិថី​​​ម៉ៅ​​​សេ​​​ទុង​​​។

 បុគ្គលិក​​ក្រុម​​​ហ៊ុន​​​កាល់​តិច​​​ កំពុង​ស្រែក​ទាម​ទារឲ្យ​ថៅ​កែ​ក្រុម​ហ៊ុន​នេះ​ ដំឡើង​ប្រាក់​ឈ្នួល​នៅ​​​​ស្ថានីយ​​​ប្រេង​​​ឥន្ធនៈ​កាច់​​​ជ្រុង​​​មហា​វិថីព្រះ​​​មុនីវង្ស និង​​​មហាវិថី​​​ម៉ៅ​​​សេ​​​ ទុង​​​​ កាល​ពីម្សិល​មិញ​។
បុគ្គលិក​​ក្រុម​​​ហ៊ុន​​​កាល់​តិច​​​ កំពុង​ស្រែក​ទាម​ទារឲ្យ​ថៅ​កែ​ក្រុម​ហ៊ុន​នេះ​ ដំឡើង​ប្រាក់​ឈ្នួល​នៅ​​​​ស្ថានីយ​​​ប្រេង​​​ឥន្ធនៈ​កាច់​​​ជ្រុង​​​មហា​វិថីព្រះ​​​មុនីវង្ស និង​​​មហាវិថី​​​ម៉ៅ​​​សេ​​​ ទុង​​​​ កាល​ពីម្សិល​មិញ​។

ស្ថានីយ​​​កាល់តិច​​​ទាំង​​​១៧​​​កន្លែង​​​ក្នុង​​​រាជ​​​ធានី​​​ភ្នំពេញ​​​នៅ​​​បិទ​​​​​​មិនទាន់​​​ដំណើរ​​​ការ​​​នៅ​​​ឡើយទេ​​​ ខណៈ​​​ពេល​​​ដែល​​​បុគ្គលិក​​​ប្រហែល​​​៣០០​​​នាក់​​​បន្ត​​​តវ៉ា​​​ទាម​​​ទារ​​​ដំឡើង​​​ប្រាក់​​​ឈ្នួល​​​និង​​អត្ថ​​​ប្រយោជន៍​​​ផ្សេងៗ​​​ទៀត​​​ទាំង​​​មិន​​​សប្បាយ​​​ចិត្ត។​​​

លោក ជួន សុ​​​ភ័ណ​​​ណា​​​រ៉ា ជា​​​បេឡាករ​​​បាន​​​និយាយ​​​ថា “យើង​​​ចង់​​​បាន​​​ប្រាក់​​​ឈ្នួល​​​១៦០​​​ដុល្លារ​​​ក្នុង​​​មួយ​​​ខែ​​​ ពី​​​ព្រោះ​​​ប្រាក់​​​ឈ្នួលរបស់​​​យើង​​​មិន​​​អាច​​​ផ្គត់​​​ផ្គង់​​​គ្រួសារ​​​របស់​​​យើង​​​បាន​​​ទេ។ យើង​​​មិន​​​អាច​​​បញ្ជូន​​​កូន​​​ៗ​​​របស់​​​យើង​​​ទៅ​​​រៀន​​បាន​​​ទេ​​​”។

បច្ចុប្បន្ន​​​នេះ​​​ បុគ្គលិក​​​ភាគ​​​ច្រើន​​​ទទួល​​​បាន​​​ប្រាក់​​​ឈ្នួល​​​១១០​​​ដុល្លារ​​​ក្នុង​​​មួយ​​​ខែ​​​ ហើយ​​​​​​ទាម​​​ទារ​​​សុំ​​​ដំឡើង​​​៥០​​​ដុល្លារ​​​ទៀត​​​ ព្រម​​​ទាំង​​​ប្រាក់​​​ឧបត្ថម្ភ​​​ប្រចាំ​​​ឆ្នាំ​​​ស្មើ​​​នឹង​​​ប្រាក់​​​ឈ្នួល​​​មួយ​​​ខែ​​​។

កាល​​​ពី​​​ខែ​​​មេសា ក្រុម​​​ហ៊ុន​​​កាល់​​​តិច ដែល​​​ជា​​​ក្រុម​​​ហ៊ុន​​​យីហោ​​​របស់​ក្រុម​​​ហ៊ុន​​ ឈេហ្វរ៉ុន ដែល​​​មាន​​​មូល​​ដ្ឋាន​​​នៅ​​​អាមេរិក​​​នោះ បាន​​​ដំឡើ​​​ង​​​ប្រាក់​​​ឈ្នួល​​​ពី​​​៩០​​​ដុល្លារ​​​ក្នុង​​​មួយ​​​ខែ​​​ ប៉ុន្តែ បុគ្គលិក​​​​​​ និង​​​សហជីព​​​អះអាងថា ការ​​​ដំឡើង​​​នេះនៅតែ​​​មិន​​​ទាន់​​​ឆ្លុះ​​​បញ្ចាំង​​​ពីតម្លៃ​​​ម្លូបអាហារ និង​​​អតិផរណា​​​ខ្ពស់​​​ដដែល។

ទន្ទឹមនឹង​នេះដែរ ខណៈ​​​ដែល​​​បុគ្គលិក​​​ក្រុម​​​​​​ហ៊ុន​​​​​​ កាល់​​​តិច នៅ​​​តែ​​​ប្តេជ្ញា​​​ធ្វើ​​​កូដ​​​កម្ម​​​នោះ​​​ បុគ្គលិកមួយ​​​ចំនួន​​​នៅស្ថានីយប្រេង​​​ឥន្ធនៈ​​​ដទៃ​​​ទៀត​​​ក្នុង​​​រាជ​​​ធានី​​​បាន​​​លើក​​​ឡើង​​​ថា ពួក​​​គេ​​​ច្រណែននឹង​​​​សកម្ម​​​ភាព​​​នេះ​​​។

ធារី​​​ ជា​​​បុគ្គលិក​​​ម្នាក់​​​​​​នៅ​​​ស្ថានីយ​​​ប្រេង​​​ឥន្ធ​​​នៈមួួយក្នុង​ចំណោមស្ថានីយប្រេងឥន្ធនៈ​​​​សូគីមិុច​​​ ក្នុង​​​រាជ​​​ធានី​​​ភ្នំពេញ ដែល​​​សុំ​​​មិន​​​ប្រាប់​​​នាម​​​ត្រកូល​​​របស់​​​ខ្លួន​​​និយាយ​​​ថា “យើង​​​ចង់​​​ធ្វើ​​​កូដ​​​កម្ម​​​ដែរ​​​ ប៉ុន្តែ យើង​​​មិន​​​អាច​​​ធ្វើ​​​បាន​​​ ដោយសារយើង​​​មិនមាន​​​​​​សហជីព​​​ និង​​​មេ​​​ដឹក​​​នាំ​​​គាំទ្រ​​​ពួក​​​យើង​​​”។

ធារី ដែល​​​មាន​​​អាយុ​​​២៧​​​ឆ្នាំ​​​ និង​​​កូន​​​ពីរ​​​នាក់​​​បាន​​​និយាយ​​​ថា អ្នកស្រី​​​តស៊ូ​​​ផ្គត់​​​ផ្គង់​​​គ្រួសារ​​​របស់​​​ខ្លួន​​​ជា​​​មួយ​ប្រាក់​​​ឈ្នួល​​​ត្រឹមតែ​​​១០០ដុល្លារ​​​ក្នុង​​​មួយខែ​​​ពី​​​ក្រុម​​​ហ៊ុន​​​ដែល​​​កាន់​​​កាប់​​​ដោយ​​​ឧកញ៉ា​​​ សុខ គង់ នេះ។ អ្នក​​​ស្រី​​​បាន​​​និយាយ​​​ថា “យើង​​​មិន​​​អាច​​​រស់​​​ដោយ​​​ប្រាក់​​​ឈ្នួល​​​ប៉ុណ្ណឹង​បាន​​​ទេ ពី​​​ព្រោះ​ថ្លៃ​​​ជួល​​​ផ្ទះ ម្ហូប​​​អាហារ​​​ និង​​​ទឹក​​​ភ្លើង​​​កើន​​​ឡើង​​​ជា​​​និច្ច​​​។

ប្រសិន​​​បើ​​​ក្រុម​​​ហ៊ុន​​​អាច​​​ផ្តល់​​​ប្រាក់​​​ឈ្នួល​​​១៦០​​​ដុល្លារ​​​ក្នុង​​​មួយ​​​ខែនោះ ​​​បុគ្គលិក​​​អាច​​​មាន​​​ជីវភាព​​​សមរម្យ​​​”។ នៅ​​​ស្ថានីយ​​​ប្រេង​​​ឥន្ធនៈ​​​​សូគីមិុច​​មួយទៀត​​​នៅ​​​ក្នុង​ទីក្រុង ​​​បុគ្គលិក​​​ម្នាក់​​​ដែល​​​សុំ​​​មិន​​​បញ្ចេញ​​​ឈ្មោះ​​​ដែរ​​​នោះ​​​បាន​​​និយាយ​​​ថា គាត់​​​សង្ឃឹម​​​ថា មិត្ត​​​រួម​​​ការ​​​ងារ​​​របស់​​គាត់​​​ប្រហែល​ជា​​​​ធ្វើ​​​ដូច្នេះដែរ​​​។

បុគ្គលិក​​​រូប​​​នេះ​​​ដែល​​​មាន​​​ប្រាក់​​​ឈ្នួល​​​​​១២​​​០​​​ដុល្លារ​​​ក្នុង​​​មួយ​​​ខែ​​​ បន្ទាប់​​​ពី​​​ធ្វើ​​​ការនៅ​ស្ថានីយនេះ​​​បាន​រយៈ​​​ពេល​​​បី​​​ឆ្នាំ​​នោះបាន​​​និយាយ​​​ថា “ខ្ញុំ​​​ត្រូវ​​​រង់​​​ចាំ​​​មើល​​​សិន​​​ថា​​​តើ​​​បុគ្គលិក​​​ផ្សេង​​​ទៀត​​​ធ្វើ​​​អ្វី។ ប្រសិន​​​បើ​​​ពួក​​​គេ​​​ធ្វើ​​​កូដ​​​កម្ម​​​ ខ្ញុំ​​​នឹ​​​ង​​​ចូល​​​រួម​​​ដែរ​​​។

គាត់​​​បាន​​​និយាយ​​​ថា “យើង​​​បារម្ភ​​​ថា ក្រុម​​​ហ៊ុន​​​នេះមិន​​​អាច​​​ផ្តល់​​​ប្រាក់​​​ឈ្នួលដូចនោះ​​​ដល់​​​យើង​​​បាន​​​ទេ​​​ ពី​​​ព្រោះ​​​ក្រុម​​​ហ៊ុន​​​នេះ​​​ជា​​​របស់​​​​​​ឧកញ៉ា។ ប៉ុន្តែ ពួក​​​គេ​​​គួរ​​​ផ្តល់​​​ប្រាក់​​​ឈ្នួល​​​ឲ្យ​​​យើង​​​១៦០​​​ដុល្លា​​រ​​​ក្នុង​​​មួយ​​​ខែ ព្រោះ​​​យើង​​​ប្រឹង​​​ប្រែង​​​ធ្វើ​​​ការ​​​ខ្លាំង​​​ណាស់​​​”។

ទន្ទឹម​​​នឹង​​​នេះ​​​ដែរ​​​ បុគ្គលិក​​​នៅ​​​ស្ថានីយ​​​ប្រេង​​​ឥន្ធនៈ​​​នានា​​​នៅ​​​ក្នុង​​​ទីក្រុង​​​បាន​​​និយាយ​​​ថា ពួក​​​​​​​​​គេ​​​លក់​​​ដាច់​​​ខ្លាំង​​​ណាស់​​​​នៅ​​​សប្តាហ៍​​​នេះ​​​។ បុគ្គលិក​​​ម្នាក់​​​នៅ​​​ស្ថានីយ​​​ប្រេង​​​ឥន្ធ​​​នៈ​​​តេលា បាន​​​និយាយ​​​ថា “យើង​​ចាក់​​​សាំង​​​​​​មិន​​​ឈប់ឡើយ​​​​​​​ចាប់​​​តាំង​​​ពី​​​បុគ្គលិក​​​ក្រុម​​​ហ៊ុន​​​កាល់​​​តិច​​​ធ្វើ​​​កូដ​​​កម្ម​​​មក។​​​ បុគ្គលិក​​​កាល់​​​តិច​​​​​​ធ្វើ​​​​កូដកម្ម​​​​​​​ទាម​​​ទារ​​​ដំឡើង​​​ប្រាក់​​​ឈ្នួល​​​ដោយ​​​សារ​​​ការ​​​លក់​​​ដាច់​​​​។ លោក សុភ័ណ​​​ណារ៉ា ជា​​​បេឡាករ​​​​នៅ​​​ក្រុម​​​ហ៊ុន​​​កាល់តិច​​​ បាន​​​ព្យាករ​ពី​​​និ​​​យោ​​​ជក​​​របស់​​​ខ្លួន​​​ថា “ពួក​​​គេ​​​នឹង​​​បាត់​​​បង់​​​អតិ​​​ថិជន​​​ និង​​​បាត់​​​បង់​​​ប្រាក់​​​ចំណេញ​​​​​ទៀត”៕សារុន​​​​​​​​​​​​​​​​​​​​​​​​​​​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស