លោក សេរហ្គេ ប៉ូឡុនស្គី អតីតមហាសេដ្ឋីអចលនទ្រព្យរុស្ស៊ី និងជាជនរត់គេចខ្លួន ដែលថ្មីៗនេះត្រូវបានដោះលែងពីពន្ធនាគារក្នុងប្រទេសកម្ពុជា មានផែនការអភិវឌ្ឍកោះមួយចំនួននៅឆ្នេរសមុទ្រក្នុងខេត្តព្រះសីហនុ។
រយៈពេលមិនដល់មួយខែផង បន្ទាប់ពីតុលាការកំពូលបានបដិសេធមិនធ្វើបត្យាប័នរូបគាត់ទៅប្រទេសរុស្ស៊ី តាមការចោទប្រកាន់ពីបទកិបកេងប្រាក់ លោក ប៉ូឡុនស្គី និយាយថា ខ្លួនចង់លើកស្ទួយឧស្សាហកម្មទេសចរណ៍ តាមរយៈការបង្កើតតំបន់ទេសចរណ៍មួយនៅឆ្នេរភាគខាងត្បូងក្នុងប្រទេសកម្ពុជា។
ប៉ូឡុនស្គី បានលើកឡើងក្នុងអីុម៉េលនៅសប្ដាហ៍នេះថា “ខ្ញុំមានកោះចំនួនប្រាំបីនៅឆ្នេរព្រះសីហនុ ជាទីដែលខ្ញុំកំពុងមានផែនការធ្វើវិនិយោគ”។ គាត់បាននិយាយថា “ខ្ញុំបានចរចាជាមួយភ្នាក់ងារទេសចរណ៍និងក្រុមហ៊ុនអភិវឌ្ឍន៍ទេសចរណ៍នៅក្នុងប្រទេសនេះរួចហើយ។ ឆ្នាំក្រោយ យើងមានផែនការនាំភ្ញៀវទេសចរប្រហែល៥០.០០០នាក់មកកាន់ប្រទេសកម្ពុជា។ ខ្ញុំគិតថា អ្នកដែលមកទស្សនាចង់ទស្សនាអ្វីច្រើនជាងនេះក្រៅពីប្រាសាទអង្គរវត្ត ហើយបន្ទាប់មកនឹងចំណាយពេលវិស្សមកាលដែលនៅសេសសល់របស់ពួកគេនៅលើឆ្នេរខ្សាច់ក្នុងប្រទេសថៃនិងប្រទេសវៀតណាម”។
ប៉ូឡុនស្គី ដែលកំពុងប្រឈមនឹងការចោទប្រកាន់ពីបទបង្ករបួសស្នាមនៅក្នុងសាលាដំបូងខេត្តព្រះសីហនុនៅឡើយ ដោយសារយកកាំបិតវាយប្រហារបុរសដើរទូកជនជាតិខ្មែរប្រាំមួយនាក់ និយាយថា ផែនការវិនិយោគរបស់គាត់ ដែលមានឈ្មោះថា Archipelago នឹងជួយនាំភ្ញៀវទេសចររាប់លាននាក់មកកាន់កោះរបស់គាត់នៅឆ្នេរសមុទ្រព្រះសីហនុ។
បុរសរូបនេះបានឲ្យដឹងថា “យើងនឹងនាំភ្ញៀវទេសចរមកប្រមាណបីលាននាក់ក្នុងមួយឆ្នាំៗ ដែលមិនទាន់មានឱកាសឃើញសោភ័ណភាពជាច្រើន ដោយសារតែហេដ្ឋារចនាសម្ព័ន្ធមិនទាន់អភិវឌ្ឍ និងកង្វះសេវាកម្មនិងសុវត្ថិភាព។ ការគណនារបស់ខ្ញុំបង្ហាញថា ក្នុងរយៈពេលប្រាំឆ្នាំខាងមុខ វាអាចនឹងធ្វើឲ្យប្រាក់ចំណូលពីវិស័យទេសចរណ៍នៅទីនេះក្នុងប្រទេសកម្ពុជាបានកើនឡើងដល់ទៅបីដង”។
ក៏ប៉ុន្តែផែនការរបស់លោក ប៉ូឡុនស្គី ក៏រាប់បញ្ចូលឆ្នេរសមុទ្រដ៏ស្រស់ស្អាតនិងតំបន់ទេសចរណ៍ជាច្រើនទៀតផងដែរ។ គាត់បាននិយាយថា “ក្រៅពីនោះ ខ្ញុំចង់សាងសង់សាលាមត្ដេយ្យនិងសាលារៀនមួយកន្លែង ហើយខ្ញុំក៏សង្ឃឹមដែរថា ទីបំផុតខ្ញុំនឹងអាចធ្វើឲ្យសុបិនរបស់ខ្ញុំចង់កសាង
សាកលវិទ្យាល័យមួយ ក្លាយជាការពិត”។
ប៉ូឡុនស្គី បានបន្តថា ផែនការរបស់គាត់ក៏រាប់បញ្ចូលការប្រែក្លាយកោះនេះឲ្យទៅជាជម្រកមួយសម្រាប់ទេសចរមួយចំនួនដូចខ្លួនគាត់ដែរ ពោលគឺអ្នកគេចខ្លួនពីបញ្ហាផ្លូវច្បាប់នៅក្នុងប្រទេសផ្សេងទៀត ជាពិសេសពីប្រទេសរុស្ស៊ី។
សំដៅដល់សេចក្ដីសម្រេចរបស់តុលាការកំពូលច្រានចោលសំណើរបស់ប្រទេសរុស្ស៊ីសុំធ្វើបត្យាប័នគាត់ បូឡុនស្គី បាននិយាយថា “ប្រទេសកម្ពុជាគ្មានកិច្ចព្រមព្រៀងបត្យាប័នទេ លើកលែងតែប្រទេសជិតខាងបួនប៉ុណ្ណោះ ហើយពេលនេះថា យើងមានគំរូល្អពាក់ព័ន្ធនឹងការវិនិច្ឆ័យរបស់តុលាការកំពូល។ កត្តានេះនឹងទាក់ទាញអ្នកដែលពាក់ព័ន្ធនឹងបញ្ហាផ្លូវច្បាប់នៅក្នុងប្រទេសអង់គ្លេសដោយសារតែការចំណាយលើសេវាច្បាប់នៅក្នុងប្រទេសនេះខ្ពស់ពេក”។
គាត់បានបន្ថែមថា “ម្យ៉ាងទៀតយើងកំពុងតែសម្លឹងមើលឱកាសដើម្បីបង្កើតតំបន់ដាច់ដោយឡែកសម្រាប់អាជីវកម្មខ្នាតតូចនិងមធ្យមនៅក្នុងទម្រង់វិស័យទេសចរណ៍ស្របច្បាប់។ ខ្ញុំក៏ចង់បង្កើតមជ្ឈមណ្ឌលគាំទ្រមួយសម្រាប់ភ្ញៀវទេសចរនិយាយភាសារុស្ស៊ី ដែលចង់ទិញអចលនទ្រព្យឬចង់ក្លាយជាពលរដ្ឋកម្ពុជា រាប់ទាំងការគាំទ្រពេញទំហឹងតាមផ្លូវច្បាប់សម្រាប់នីតិវិធីណាមួយផងដែរ”។
ទាក់ទងនឹងការវិនិយោគ Archipelago ប៉ូឡុនស្គី ទំនងជាធ្វើតាមការសន្យា អំឡុងសវនាការជំនុំជម្រះការធ្វើបត្យាប័នគាត់លើកដំបូងកាលពីក្នុងខែមករា ដែលពេលនោះគាត់បានប្រាប់សាលាឧទ្ធរណ៍ថា ខ្លួននឹងវិនិយោគទឹកប្រាក់១ពាន់លានដុល្លារនៅក្នុងប្រទេសនេះ ប្រសិនបើលោកត្រូវបានអនុញ្ញាតឲ្យនៅទីនេះ។
អតីតមហាសេដ្ឋីអចលនទ្រព្យជនជាតិរុស្ស៊ីរូបនេះត្រូវបានតាមចាប់ខ្លួននៅក្នុងប្រទេសរុស្ស៊ីតាមការចោទប្រកាន់ពីបទកិបកេងប្រាក់ជាង១៨០លានដុល្លារពីវិនិយោគិនជាង៨០រូបនៅក្នុងគម្រោងអភិវឌ្ឍន៍នៅក្នុងក្រុងមូស្គូដោយឡែកពីរ។
កាលពីខែវិច្ឆិកា និងខែមេសា អាជ្ញាធររុស្ស៊ី បានបញ្ជូនសំណើធ្វើបត្យាប័នមកប្រទេសកម្ពុជា ក៏ប៉ុន្តែតុលាការកំពូលៗរបស់ប្រទេសនេះបានច្រានចោល ដោយលើកឡើងជាសំអាងថា គាត់ត្រូវប្រឈមការចោទប្រកាន់ពីបទបង្ករបួសស្នាមនៅក្នុងប្រទេសកម្ពុជា និងការគ្មានសន្ធិសញ្ញាបត្យាប័នរវាងប្រទេសទាំងពីរ។
បើទោះជាលោក ប៉ូឡុនស្គី អាចយកឈ្នះលើសត្រូវតាមផ្លូវច្បាប់របស់ខ្លួនក៏ដោយ ក៏ក្រុមជំនាញផ្នែកឧស្សាហកម្មនិងមន្ត្រីក្នុងស្រុកនៅតែមន្ទិលសង្ស័យ ចំពោះទស្សនវិស័យរបស់ ប៉ូឡុនស្គី សម្រាប់កោះដែលបច្ចុប្បន្នមិនទាន់អភិវឌ្ឍនេះទោះជាមានសង្សឹមឈ្នះក្ដី។
លោក ហូ វណ្ឌី សហប្រធានក្រុមការងារនៃវិស័យទេសចរណ៍ផ្នែកឯកជនបានមានប្រសាសន៍ថា ផែនការដ៏មានមហិច្ឆតារបស់លោក ប៉ូឡុនស្គី ទំនងជាត្រូវការការគាំទ្រពីវិស័យសាធារណៈ។ លោកបានមានប្រសាសន៍ថា “និយាយវាស្រួលហើយ ប៉ុន្តែធ្វើវាពិបាក។ ខ្ញុំចាំមើលលទ្ធផលចេញសិន។ វាជាមហិច្ឆតា ហើយរដ្ឋាភិបាលឬវិស័យសាធារណៈគួរតែពាក់ព័ន្ធ”។
លោក ស្បោង សារ៉ាត់ ដែលត្រូវបានផ្លាស់ប្ដូរពីមុខតំណែងអភិបាលខេត្តព្រះសីហនុ កាលពីដើមខែនេះបានមានប្រសាសន៍ថា លោកគ្មានមន្ទិលសង្ស័យចំពោះផែនការរបស់ លោក ប៉ូឡុនស្គី នោះទេ ប៉ុន្តែប្រហែលជាត្រូវការពេលដើម្បីធ្វើឲ្យមានរូបរាងឡើង។
លោក សារ៉ាត់ បានមានប្រសាសន៍ថា “ខ្ញុំពិតជាគិតថា វាជាគំនិតល្អមួយ។ ខ្ញុំគិតថា គាត់អាចបញ្ចុះបញ្ចូលមនុស្សមួយចំនួនឲ្យមកទីនេះ”។ ដោយសារតែគាត់បានប្រកាសផែនការរបស់គាត់ គាត់ទំនងជានឹងអនុវត្ត។ វាគ្រាន់តែថា គាត់ត្រូវការពេលវេលាបន្ថែមទៀតប៉ុណ្ណោះ”៕ ប៊ុននី
(រាយការណ៍បន្ថែមដោយ ផន បុប្ផា)