នគរបាលបានឲ្យដឹងកាលពីម្សិលមិញថា បុរសបីនាក់ត្រូវបានចាប់ខ្លួននៅក្នុងរាជធានីភ្នំពេញកាលពីថ្ងៃអង្គារ បន្ទាប់ពីដេញតាមយ៉ាងប្រកិត ក្រោយពីពួកគេបានឆក់កាបូបរបស់ស្ត្រីម្នាក់។
យោងតាមលោក អ៊ុច សុខុន អធិការនគរបាលខណ្ឌដូនពេញបានឲ្យដឹងថា នគរបាលបានបាញ់មួយគ្រាប់ឡើងលើ ខណៈកំពុងតែដេញតាមបុរសទាំងនេះ បន្ទាប់ពីជនរងគ្រោះស្រែកថាចោរនៅក្នុងសង្កាត់ផ្សារថ្មី៣។
លោក ញ៉ែម សៅណុល នាយនគរបាលព្រហ្មទណ្ឌខណ្ឌបានមានប្រសាសន៍ថា “វាពិបាកចាប់ខ្លួនពួកគេ ប៉ុន្តែនៅពេលដែលនគរបាលចាប់បាន នគរបាលបានឃើញកាបូបមួយមានប្រាក់៥០.០០០រៀល [ប្រហែល១២,៥០ដុល្លារ] និងទូរស័ព្ទដៃមួយគ្រឿង ដែលក្រោយមកត្រូវបានប្រគល់ឲ្យជនរងគ្រោះវិញ”។
ជនសង្ស័យឈ្មោះ បៀ សារ៉ាច អាយុ១៩ឆ្នាំ ជិន ជា អាយុ២២ឆ្នាំ និងឈ្មោះ ថន សៀរ៉ា អាយុ១៩ឆ្នាំ នឹងត្រូវបញ្ជូនទៅតុលាការដើម្បីប្រឈមនឹងការចោទប្រកាន់នៅថ្ងៃនេះ។
ក្នុងករណីដោយឡែកមួយទៀត ឈ្មោះ ចាន់ រូ៉ អាយុ៣០ឆ្នាំ និងឈ្មោះ តេក ស៊ីឡេង អាយុ២៧ឆ្នាំ ត្រូវបានចាប់ខ្លួនកាលពីម្សិលមិញ បន្ទាប់ពីប្លន់នៅផ្ទះមួយ ក្នុងសង្កាត់ស្រះចក ខណ្ឌដូនពេញ។
យោងតាមលោក សុខុន អធិការនគរបាលខណ្ឌបានឲ្យដឹងថា បុរសទាំងពីរនាក់នេះ ជាជនអនាថា ហើយកំពុងត្រូវឃុំខ្លួននៅអធិការដ្ឋាននគរបាលខណ្ឌ មុនពេលបញ្ជូនទៅតុលាការនាថ្ងៃនេះ៕ប៊ុននី