30 C
Phnom Penh

អង្គការសង្គមស៊ីវិល​ស្នើឲ្យ​រដ្ឋសភា​ពិនិត្យ​មើល​សេចក្តីព្រាងច្បាប់​​ប្រព័ន្ធតុលាការ​ឡើង​វិញ

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ អង្គការ​សង្គម​ស៊ីវិល​បានអំពាវនាវឲ្យ​រដ្ឋសភា​ចំណាយពេល​បន្ថែម​ទៀត​ក្នុង​ការ​កែសម្រួល​ច្បាប់​ដ៏ចម្រូង​ចម្រាស​ចំនួន​បី​ទាក់ទង​ប្រព័ន្ធតុលាការ​ ដែល​អង្គការ​ទាំង​នេះ​លើក​ឡើង​ថា មិន​បាន​ធានា​អំពីឯករាជភាព​នៃប្រព័ន្ធតុលាការដែលមាន​បញ្ហាច្រើន​ក្នុង​ប្រទេស​​កម្ពុជា​ឡើយ។

ការ​អំពាវនាវនេះ​ធ្វើ​ឡើង​ខណៈ​ដែល​រដ្ឋសភា​គ្រោង​កោះ​ប្រជុំ​ពេញ​អង្គ​នៅ​ថ្ងៃ​អង្គារ​ដើម្បី​អនុម័តសេចក្តីព្រាងច្បាប់​ទាំង​បី​នេះ​ គឺ​ច្បាប់​ស្ដីពី​ការ​រៀបចំ​ និង​ការ​ប្រព្រឹត្តទៅ​នៃ​ឧត្តម​ក្រុម​ប្រឹក្សា​នៃ​អង្គចៅក្រម​ ច្បាប់​ស្ដីពីការ​រៀបចំ និង​ការ​ប្រព្រឹត្តទៅ​នៃ​ប្រព័ន្ធតុលាការ​ និង​ច្បាប់​ស្ដីពី​លក្ខន្តិកៈចៅក្រម​ និង​ព្រះរាជអាជ្ញា។ កាលពីខែមុន ទីស្ដីការ​គណៈរដ្ឋមន្ត្រី​បាន​យល់​ព្រម​ចំពោះសេចក្តីព្រាង​ច្បាប់​នេះ​ ហើយ​បាន​បញ្ជូន​ទៅ​រដ្ឋសភា។

លោក ឌុច ពិសិដ្ឋ អ្នក​សម្រប​សម្រួលគម្រោង​នៅ​មជ្ឈមណ្ឌល​សិទ្ធិមនុស្ស​កម្ពុជា​បាន​មាន​ប្រសាសន៍​ថា “យើង​ចង់​បញ្ចុះបញ្ចូលឲ្យ​រដ្ឋសភា​ផ្ដល់ឱកាស​​​​ឲ្យ​​​អង្គការ​សង្គម​ស៊ីវិល​ពិភាក្សា​អំពី​សេចក្ដី​ព្រាង​ច្បាប់​ទាំង​បីនេះ​ជាមុន​សិន។ ប្រសិន​បើ​យើង​ពិនិត្យ​សេចក្ដី​ព្រាង​ច្បាប់ទាំង​បីនេះ​ ឯករាជភាព​នៃ​ប្រព័ន្ធ​តុលាការ​មិន​ទាន់ត្រូវ​​បាន​ធានា​នៅ​ឡើយ​ទេ”។

ប្រទេស​ផ្ដល់ជំនួយ​និង​អង្គការ​សិទ្ធិមនុស្ស​​​​បាន​​​និង​​​កំពុង​ដាក់​សម្ពាធ​លើ​រដ្ឋាភិបាល​ច្រើន​ឆ្នាំ​មក​ហើយឲ្យ​អនុម័តច្បាប់​ស្ដីពី​កំណែទម្រង់​ប្រព័ន្ធតុលាការ​ ប៉ុន្តែ​សេចក្ដីព្រាង​ច្បាប់​ថ្មី​​​នេះ​បាន​ធ្វើ​​​ឲ្យ​​​មាន​កង្វល់​ថា សេចក្តីព្រាងច្បាប់​ទាំង​នេះអាច​ធ្វើ​​​ឲ្យ​​​មាន​​​ឥទ្ធិពល​​​មិន​​​ល្អ​លើ​ឯករាជ​ភាព​នៃ​ប្រព័ន្ធ​តុលាការ​ ដែល​ទីបំផុត​បាន​ផ្ដល់​អំណាច​បន្ថែមទៀតឲ្យស្ថិត​ក្នុង​កណ្ដាប់​ដៃ​លោក​នាយក​រដ្ឋមន្ត្រី ហ៊ុន សែន។

លោក នី ចាន់ឌី ប្រធាន​ផ្នែក​​​បច្ចេកទេស​ច្បាប់​នៅអង្គការ​ជំនួយ​ផ្នែក​ច្បាប់​កម្ពុជា បាន​មាន​ប្រសាសន៍​ថា ប្រសិន​បើ​សេចក្តីព្រាងច្បាប់​ទាំង​នេះ​ត្រូវ​បាន​អនុម័ត​​​ទាំង​​​អ៊ីចឹង​​​មែននោះ ក្រុម​មន្ត្រី​តុលាការ​នឹង​មាន​ការ​ត្រួត​​​ត្រា​​​ដោយ​​​ស្រប​ច្បាប់​លើ​​​នីតិវិធី​​​របស់​​​តុលាការ​។ លោក​បានមាន​ប្រសាសន៍​ថា ” សេចក្ដីព្រាង​ច្បាប់​ទាំង​នេះ​ គឺ​ជា​អាវុធមុខ​ពីរ​។ សេចក្តីព្រាងច្បាប់​​នេះ​ជួយ​មន្ត្រីតុលាការ​ឲ្យ​មាន​ច្បាប់​ត្រឹម​ត្រូវ​ដើម្បី​គ្រប់​គ្រង​ស្ថាប័ន​របស់​ខ្លួន​ ពីព្រោះ​ពួក​គេ​មិន​មាន​ច្បាប់​ដូច​នេះ​ឡើយ​ក្នុង​ពេល​កន្លង​មក។ ចំណុច​អវិជ្ជមាន​គឺ​ថា ក្រសួង​យុត្តិធម៌មាន​អំណាច​ច្រើន​ហួស​​លើ​ឧត្តម​ក្រុម​ប្រឹក្សា​នៃអង្គចៅក្រម​”។

លោក ជាម យៀប សមាជិក​សភាជាន់​ខ្ពស់​គណបក្ស​ប្រជា​ជន​កម្ពុជា​បាន​មាន​ប្រសាសន៍​ថា រដ្ឋសភា​នឹង​មិនពន្យារពេល​​​សម័យ​ប្រជុំពេញ​អង្គ​នៅ​សប្ដាហ៍​ក្រោយ​ ដើម្បី​ផ្តល់​ឱកាស​ឲ្យ​អង្គការ​សង្គម​ស៊ីវិលពិនិត្យ​ពិច័យ​សេចក្ដីព្រាង​ច្បាប់​ទាំង​នេះ​ឡើយ​។ លោក​​បាន​មាន​ប្រសាសន៍​ថា “គ្មាន​នរណា​ម្នាក់​អាច​ពន្យារពេល​សម័យ​ប្រជុំសភា​បាន​ទេ។ អង្គការ​សង្គម​ស៊ីវិលអាច​ធ្វើវិសោធនកម្ម​ច្បាប់​បាន​នៅ​ពេល​ពួកគេ​ជាប់​ឆ្នោត​ជា​សមា​ជិក​​សភា​”៕ សារុន

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស