មន្ត្រីនគរបាលម្នាក់បាននិយាយកាលពីម្សិលមិញថា សមាជិកអាយុ៣៣ឆ្នាំរបស់រណសិរ្សរំដោះជាតិខ្មែរដែលត្រូវបានចាប់ខ្លួននៅក្រុងប៉ោយប៉ែតកាលពីថ្ងៃច័ន្ទ ត្រូវបានចោទប្រកាន់ពីបទក្លែងបន្លំឯកសារសាធារណៈ និងរៀបចំផែនការផ្តួលរំលំរដ្ឋាភិបាល។
ឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យនគរបាលជាតិបានមានប្រសាសន៍ថា “ព្រះរាជអាជ្ញារងសាលាដំបូងរាជធានីភ្នំពេញលោក ហ៊ាង សុភ័ក្រ បានចោទបុរសឈ្មោះ ហេន ចាន់ អាយុ៣៣ឆ្នាំ ពីបទក្លែងបន្លំឯកសារសាធារណៈ និងរៀបចំផែនការផ្ដួលរំលំរដ្ឋាភិបាល បន្ទាប់ពីនគរបាលបានបញ្ជូនគាត់ទៅតុលាការ កាលពីថ្ងៃពុធ”។ លោកបានបន្ថែមថា “លោក ចាន់ ត្រូវបានបញ្ជូនទៅឃុំខ្លួនបណ្ដោះអាសន្ននៅមណ្ឌលអប់រំកែប្រែទី១ នៃពន្ធនាគារព្រៃស”។
លោកបាននិយាយថា បន្ថែមពីលើការចោទប្រកាន់ពីបទក្លែងបន្លំឯកសារសាធារណៈដែលអាចមានទោស១០ឆ្នាំ និងពីបទប្រើប្រាស់ឯកសារនោះ ដែលអាចមានទោសជាប់ពន្ធនាគារ៣ឆ្នាំនោះ លោក ចាន់ ត្រូវបានចោទប្រកាន់តាមមាត្រា៤៥៣នៃក្រមព្រហ្មទណ្ឌពីបទរៀបចំផែនការផ្ដួលរំលំរដ្ឋាភិបាល ដែលអាចមានទោសរហូតដល់១០ឆ្នាំ។ លោក គឹម ចេងប៊ុន ក្រឡាបញ្ជីនៅតុលាការនេះបានបញ្ជាក់ពីបទចោទប្រកាន់ទាំងនេះ។
ក្រោយពេលចាប់ខ្លួនគាត់ តាមការចោទថា លោក ចាន់ បានព្យាយាមឆ្លងដែនចូលមកប្រទេសកម្ពុជាដោយប្រើលិខិតឆ្លងដែនក្លែងក្លាយ និងមានសៀវភៅ ដែលសរសេរដោយលោក សំ សេរី ប្រធានរណសិរ្សរំដោះជាតិខ្មែរ ដែលកំពុងរស់នៅក្នុងប្រទេសដាណឺម៉ាក ប៉ុន្តែត្រូវបានផ្ដន្ទាទោស កាលពីខែមុន ជាមួយមនុស្ស១២នាក់ទៀតពីបទព្យាយាមផ្ដួលរំលំរដ្ឋាភិបាល។ លោកនាយករដ្ឋមន្ត្រី ហ៊ុន សែន បានចាត់ទុករណសិរ្សរបស់គាត់ថា ជាអង្គការភេរវកម្ម។
លោក ហ្វីល រ៉ូបឺតសុន អនុប្រធានប្រចាំអាស៊ីនៃអង្គការឃ្លាំមើលសិទ្ធិមនុស្សក៏បានមានប្រសាសន៍កាលពីម្សិលមិញដែរថា លោកបានទាក់ទងទៅការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សក្នុងទីក្រុងបាងកក ហើយពួកគេបានបញ្ជាក់ថា លោក ហេន ចាន់ គឺជាអ្នកស្វែងរកសិទ្ធិជ្រកកោនផ្លូវការក្នុងប្រទេសថៃ។
លោក រ៉ូបឺតសុន បានមានប្រសាសន៍ថា ទោះជាយ៉ាងណា លោកយល់ថា ករណីនេះមិនទាន់ចប់ទេ និងមិនទាន់មានការសម្រេចអំពីឋានៈជាជនភៀសខ្លួនរបស់លោក ចាន់ ទេ។
អ្នកស្រី គិច ទ្រាន អាយុ៥៧ឆ្នាំជាម្ដាយរបស់លោក ចាន់ បាននិយាយថា នគរបាលបានឆែកឆេរផ្ទះរបស់គាត់នៅក្នុងខេត្តកំពង់ស្ពឺ ក្រោយពីការចាប់ខ្លួនកូនប្រុសគាត់កាលពីដើមសប្ដាហ៍នេះ។ អ្នកស្រីបាននិយាយថា “ខ្ញុំមិនដឹងថា វាជាប់ពាក់ព័ន្ធនឹងការចាប់ខ្លួនកូនប្រុសខ្ញុំកាលពីថ្ងៃច័ន្ទ ដូចម្ដេចឡើយ។ ខ្ញុំដឹងថា គ្មានភ័ស្ដុតាងនៅជាប់ខ្លួនគាត់ទេនៅពេលចាប់ខ្លួនគាត់ ឬនៅក្នុងផ្ទះរបស់ខ្ញុំ”។
អ្នកស្រី ទ្រាន បាននិយាយថា អ្នកស្រីបានធ្វើដំណើរទៅទីក្រុងភ្នំពេញកាលពីម្សិលមិញ ដើម្បីព្យាយាមជួបកូនប្រុសគាត់ ដែលបានរស់នៅប្រទេសថៃ។ ឆ្មាំពន្ធនាគារដែលលើកឡើងពីថ្ងៃឈប់សម្រាកបានឲ្យគាត់ទៅវិញ ប៉ុន្តែប្រាប់គាត់ថា គាត់អាចត្រឡប់មកវិញនៅថ្ងៃនេះ។ អ្នកស្រីបាននិយាយថា “ខ្ញុំមិនទាន់មានមេធាវីការពារកូនខ្ញុំនៅឡើយទេ ហើយខ្ញុំមិនដឹងអំពីស្ថានភាពរបស់គាត់ទេ ចាប់តាំងពីគេចាប់ខ្លួនគាត់មក”។ លោក សេរី ប្រធានរណសិរ្សរំដោះជាតិខ្មែរ បាននិយាយតាមទូរស័ព្ទថា បទចោទប្រកាន់ទាំងនេះមិនយុត្តិធម៌ទេ ពីព្រោះយើងធ្វើសកម្មភាពដោយអហិង្សា និងមិនខុសច្បាប់ទេ៕ គឹមហឿន
(រាយការណ៍បន្ថែមដោយ Lauren Crothers)