លោកឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានឲ្យដឹងកាលពីម្សិលមិញថា កម្ពុជាកំពុងតែពិចារណាលើសុពលភាពលិខិតឆ្លងដែនពីរយៈពេលបីឆ្នាំទៅរយៈពេល១០ឆ្នាំ ចាប់ពីចុងឆ្នាំនេះទៅ។
លោកបានមានប្រសាសន៍ថា “យើងទើបតែមានគំរោងមួយដើម្បីចេញលិខិតឆ្លងដែនមានសុពលភាពរយៈពេល១០ឆ្នាំ។ ខ្ញុំជឿថា វាអាចចាប់ផ្តើមក្នុងឆ្នាំ២០១៤។ តម្លៃលិខិតឆ្លងដែនថ្មីនេះ គឺ១០០ដុល្លារប៉ុណ្ណោះ”។
លោក សុភ័គ បានមានប្រសាសន៍ថា ប្រជាពលរដ្ឋខ្មែរដែលមានលិខិតឆ្លងដែនរួចហើយនោះ នៅតែអាចបន្តប្រើប្រាស់លិខិតឆ្លងដែនរបស់ខ្លួនដោយយោងទៅតាមកម្មវិធីចាស់ ឬពួកគាត់អាចស្នើសុំធ្វើថ្មីមួយទៀតក៏បាន។ លោកបានឲ្យដឹងថា “ប្រសិនបើប្រជាពលរដ្ឋមានលិខិតឆ្លងដែនរួចហើយនោះ ពួកគាត់អាចធ្វើលិខិតឆ្លងដែនថ្មីមួយទៀតបាន ហើយអាចបង់តម្លៃដូចគ្នា”។
លោកឧត្តមសេនីយ៍ ម៉ៅ ចាន់តារា អគ្គនាយកនៃអគ្គនាយកដ្ឋានអត្តសញ្ញាណកម្មបានបញ្ជាក់ថា ផែនការនេះមានហើយ។ លោកបានបន្តថា “យើងនឹងអនុវត្ត” ។ លោកបានបដិសេធមិនធ្វើអត្ថាធិប្បាយបន្ថែមទៀតឡើយ។
លោក អាង គឹមអ៊ាង ជាប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ថា មកទល់ពេលនេះក្នុងឆ្នាំនេះ ចំនួនប្រជាជនខ្មែរដែលធ្វើដំណើរទៅក្រៅប្រទេសមានការកើនឡើង បើធៀបនឹងរយៈពេលដដែលកាលពីឆ្នាំមុន៕ ប៊ុននី