អាជ្ញាធរ​រឹបអូស​ឈើដែល​ដឹក​លើសចំនួន​អនុញ្ញាត​ដល់ទៅ​ទ្វេដង​ក្នុង​ខេត្ត​ស្ទឹងត្រែង

អាជ្ញាធរ​​​បាន​​​និយាយ​​​កាលពីម្សិល​​​មិញ​​​ថា ឈើ​​​ធ្នង់​​​មួយ​​​ចំនួន​​​ធំ​​​ដែល​​​​​​បាន​​​កាប់​​​ពី​​​ក្នុង​​​តំបន់​​​ការ​​​ពារ​​​នៃឧទ្យានជាតិ​​​វីរជ័យ​​​និង​​​ត្រូវ​​​បាន​​​រឹប​​​អូស​​​ក្នុង​​​ខេត្ត​​​ស្ទឹង​​​ត្រែង​​​កាលពីថ្ងៃ​អាទិត្យ​នោះ​​​មាន​ចំនួន​​​ជាង​​​៦០​​​ម៉ែត្រគូបលើ​​​ស​​​ចំនួន​អនុញ្ញាត​​​។

លោក នូ ហួរ នាយ​​​នគរ​​​បាល​​​ប្រឆាំង​​​គ្រឿង​​​ញៀន​​​ខេត្ត​​​បាន​​​មាន​​​ប្រសាសន៍​​​ថា រថយន្ត​​​បីគ្រឿង​​​ដែល​​​ជា​​​កម្មសិទ្ធិ​​​របស់​​​ក្រុ​​ម​​​ហ៊ុន​​​ឯកជន​​​មួយ​​​ត្រូវ​​​បាន​​​គេ​​​ឃើញ​​​ដឹក​​​ឈើ​​​ចំនួន​​​១២១​​​ម៉ែត្រគូប​​​ នៅពេល​​​​​ចំ​​​នួន​​​ឈើ​​​ដែល​​​អនុញ្ញាត​​​ឲ្យ​​​ក្រុម​​​ហ៊ុ​​​ន​​​នេះ​​​ដឹក​​​ គឺ​​​តែ៥៣​​​ម៉ែត្រ​​​គូប​​​ប៉ុណ្ណោះ។

រថយន្ត​​​ទាំង​​​នេះ​​​ត្រូវ​​​បានឃាត់ ខណៈ​​​ដែល​​​បើក​​​ឆ្លង​​​កាត់​​​ក្រុង​​​ស្ទឹង​​​ត្រែង ពីព្រោះនគរ​​​បាល​​​សង្ស័យ​​​ថា រថយន្ត​​​ទាំង​​​នេះ​​​ដឹក​​​ឈើ​​​លើស​​​ចំនួន​​​ច្បាប់អនុញ្ញាត​​​។

លោក ជាន យូដុង អនុប្រធាន​​​រដ្ឋបាល​​​ព្រៃឈើ​​​ខេត្ត​​​បានមាន​​​ប្រសាសន៍​​​កាលពីម្សិល​​​មិញ​​​ថា ឥឡូវ​​​នេះ​​​ឈើ​​​ទាំង​​​នេះ​​​ត្រូវ​​​បាន​​​រក្សាទុក​​​នៅ​​​ការិយាល័យ​​​របស់​​​លោក​​​ ហើយ​​​នឹង​​​ត្រូវ​​​លក់​​​នៅពេល​​​ឆាប់ៗ​​​នេះ ​​​”ដើម្បី​​​យកប្រាក់​​​ចូលថវិកា​​ជា​តិ”។

លោក យូដុង បានបដិសេធ​​​មិន​​​ធ្វើ​​​អត្ថាធិប្បាយ ​​​ថាតើ​​​ឈើ​​​នេះ​​​នឹង​​​ត្រូវ​​​ប្រគល់​​​ឲ្យ​​​ក្រុម​​​ហ៊ុន​​​ ទ្រី ភាពឬយ៉ាង​​​ណា។ ក្រុម​​​ហ៊ុន​​​នេះ​​​ទទួល​​​បាន​​​សិទ្ធិ​​​ផ្ដាច់​​​មុខក្នុងការ​​​​ប្រមូល​​​ទិញ​​​ឈើ​​​ដែល​​​រឹប​​​អូស​​​បាន​​​ជិត​​​៥.០០០​​​ម៉ែត្រគូប ពីបណ្ដា​​​ខេត្ត​​​ទូទាំង​​​ប្រទេស​​​ បន្ទាប់ពី​​​បាន​​​បង់​​​ប្រាក់​​​ឲ្យ​​​រដ្ឋា​ភិបាល​​​ចំនួន​​​៣,៤​​​លាន​​​ដុល្លារ​​​ដើម្បី​​​បាន​​​សិទ្ធិនេះ​​​កាលពី​​​ឆ្នាំមុន​​​។

លោក ជ័យ សិទ្ធិ ប្រធាន​​​ការិយាល័យ​​​រដ្ឋបាល​​​ក្រុម​​​ហ៊ុន​​​ ទ្រី ភាព បានមាន​​​ប្រសាសន៍​​​ថា ក្រុម​​​ហ៊ុន​​​គាំទ្រ​​​វិធានការ​តឹងរ៉ឹងរបស់​​​អាជ្ញាធរ​​​ទៅលើ​​​ការ​​​ដឹក​​​ឈើ​​​ខុស​​​ច្បាប់​​​នេះ​​​។ លោក​​​បានមាន​​​ប្រសាសន៍​​​ថា “យើង​​​រីក​​​រាយ​​​ និង​​​ស្វាគមន៍ចំពោះ​​​ការ​​​រឹបអូស​​​ឈើ​​​​​​របស់​​អាជ្ញាធរ​​​ ពីព្រោះ​​​នេះជា​​​ទង្វើ​​​ខុស​​​ច្បាប់​​​”។

លោក ហ៊ូ សំអុល អ្នក​​​សម្រប​​​សម្រួល​​​អង្គការ​​​សិទ្ធិមនុស្ស​​​ក្នុង​​​ស្រុក​​​អាដ​​​ហុក​​​ប្រចាំ​​​ខេត្ត​​​នេះ បាន​​​មាន​​​ប្រសាសន៍​​​កាលពីថ្ងៃអង្គារ​​​ថា ឈើ​​​​​​នេះ​​​ត្រូវ​​​បាន​​​ដឹក​​​យក​​​ទៅ​​​លក់​​​​​ឲ្យ​​​ក្រុម​​​ហ៊ុន​​​មួយ​​​ក្នុង​​​ក្រុង​​​តាខ្មៅ​​​ ខេត្ត​​​កណ្ដាល ហើយ​​​ត្រូវ​​​នគរ​​​បាល​​​ស្ទាក់​​​ចាប់​​​បាន​​​តែ​​​ម្តង។ លោក​​​បាន​​​មាន​​​ប្រសាសន៍​​​ថា លោក​​​មិន​​​ស្គាល់​​​ឈ្មោះ​​​ក្រុម​​​ហ៊ុន​​​ដែល​​​ទិញ​​​ឈើ​​​នេះ​​​ទេ។

លោក​​​ យូដុង បាន​​​អះអាង​​​ថា លោកក៏មិន​​​ស្គាល់​​​ឈ្មោះ​​​ក្រុម​​​ហ៊ុន​​​នេះ​​​ដែរ ប៉ុន្តែ​​​បាន​​​មាន​​​ប្រសា​សន៍​​​ថា “អ្នក​​​បើក​​​បរ​​​រថយន្ត​​​បាន​​​ប្រាប់​​​យើង​​​ថា ក្រុមហ៊ុន​​​នេះ​​​ស្ថិត​​​ក្នុង​​​រាជធានី​ភ្នំពេញ”។

បើ​​​ទោះណាជាឧទ្យានជាតិ​​​វីរជ័យ​​​ទំហំ​​​៣៣០.០០០​​​ហិកតា​ត្រូវ​បាន​ការ​ពារ​​​យ៉ាង​តឹងរ៉ឹង​ក៏ដោយ ក៏អ្នក​​​កាប់​​​ឈើ​​​ខុស​​​ច្បាប់​​​នៅ​​​តែ​​​កាប់​​​ឈើ​​​ប្រណីត​​​ៗ​​​ ដែល​​​អាច​​​លក់​​​ក្នុង​​​តម្លៃ​​​ខ្ពស់​​​ដដែល។ នៅតាម​​​បណ្ដាខេត្ត​​​ ឈើ​​​ប្រភេទ​​​ធ្នង់​​​មួយ​​​ម៉ែត្រគូប​​​មាន​​​តម្លៃ​​​រហូត​​​ដល់​​​៨០០​​​ដុល្លារ​​​។ តម្លៃ​​​គឺ​​​កាន់តែខ្ពស់​​​នៅ​​​ក្នុង​​​រាជ​​​ធានី​​​ភ្នំពេញ និង​​​នៅ​​​ប្រទេស​​​វៀតណាម​​​៕ សារុន​​​​​​​​​​​​​​​​