ប្រធានក្រុមហ៊ុនសាងសង់មួយដែលកំពុងអភិវឌ្ឍផ្លូវវេងស្រេង ដែលមានជង្ហុកធំៗនិងហុយទ្រលោម បានលើកឡើងកាលពីម្សិលមិញថា គម្រោងស្ថាបនាផ្លូវនេះនឹងត្រូវការពេលវេលាយូរជាងការរំពឹងទុកដល់ទៅពីរដង។
កាលពីខែវិច្ឆិកា លោក ប៉ា សុជាតិវង្ស អភិបាលរាជធានីភ្នំពេញបានប្រកាសថា ប្រវែង៦,៥គីឡូម៉ែត្រនៃផ្លូវដែលមានរោងចក្រកាត់ដេរជាច្រើនអមសងខាងនេះ នឹងត្រូវក្រាលបេតុងហើយនៅដំណាច់ឆ្នាំ២០១៤។
ប៉ុន្តែ កាលពីម្សិលមិញ ប្រធានក្រុមហ៊ុនសាងសង់ TCM Construction បានលើកឡើងថា ដោយសារតែអាជីវកម្ម និងលំនៅដ្ឋាននានាទន្ទ្រានចូលដីចំណីផ្លូវ គម្រោងនេះមិនអាចចប់រួចរាល់មុនដំណាច់ឆ្នាំ២០១៥នោះទេ។
ប្រធានក្រុមហ៊ុនសាងសង់ដែលប្រាប់ឈ្មោះរបស់ខ្លួនត្រឹម ទៀង ដោយសារតែខ្លាចបាត់បង់កិច្ចសន្យានោះ បានមានប្រសាសន៍ថា “មានប្រជាពលរដ្ឋច្រើនណាស់រស់នៅលើដីចំណីផ្លូវ ដែលប្រហែលជាធ្វើឲ្យយើងមិនអាចបញ្ចប់តាមពេលព្រមព្រៀងគ្នាបាន។ ប្រសិនបើប្រជាពលរដ្ឋទាំងនេះរើចេញអស់ យើងអាចធ្វើបានលឿនជាងនេះឆ្ងាយ”។
លោកបានមានប្រសាសន៍ថា “ដោយសារតែការងារយឺតយ៉ាវ យើងសម្រេចបានតែ១៥ភាគរយប៉ុណ្ណោះ។ យើងអំពាវនាវសុំឲ្យក្រសួងសាធារណការ និងដឹកជញ្ជូន និងសាលារាជធានី ជួយដោះស្រាយបញ្ហាប្រជាពលរដ្ឋរស់នៅលើដីចំណីផ្លូវនេះ”។លោកបានប៉ាន់ប្រមាណថា ផែនការរយៈពេល១៤ខែនេះបានក្លាយជាគម្រោងរយៈពេល២៨ខែទៅហើយ។
ផែនការដ៏ធំរបស់សាលារាជធានីសម្រាប់ផ្លូវវេងស្រេងរួមមានការពង្រីកទំហំផ្លូវឲ្យដល់២៨ម៉ែត្រ ដោយ១៩,៥ម៉ែត្រជាផ្លូវចាក់បេតុង និង២,៥ម៉ែត្រជាសួនស្មៅនៅចំកណ្តាល។
បច្ចុប្បន្នផ្លូវនេះមានសភាពដូចតំបន់សមរភូមិ និងគ្រួសខ្សាច់ដែលមានថ្មរដិបរដុប និងមានជង្ហុកជ្រៅត្រឹមក្បាលជង្គង់ ហើយផ្នែកដែលចាក់បេតុងរួចមានចរាចរប្រជ្រៀតគ្នាកកកុញ និងគ្រឿងចក្រអមដោយគំនរដីធំៗ។
លោក ឃួង ស្រេង អភិបាលរងរាជធានីភ្នំពេញបានមានប្រសាសន៍កាលពីម្សិលមិញថា អ្នកដែលរស់នៅលើដីចំណីផ្លូវនេះ គឺរស់នៅលើដីរដ្ឋ។ លោកបានមានប្រសាសន៍ថា “សម្រាប់ប្រជាពលរដ្ឋដែលរស់នៅជាប់ផ្លូវត្រូវតែរើចេញ ប៉ុន្តែ សំណងមិនមែនជាការងាររបស់សាលារាជធានី ឬមន្ត្រីមូលដ្ឋានទេ វាជាការងារបស់ក្រសួងសេដ្ឋកិច្ច និងហិរញ្ញវត្ថុ”។ កាលពីម្សិលមិញ តំណាងក្រសួងសេដ្ឋកិច្ច និងហិរញ្ញវត្ថុបានបដិសេធមិនឆ្លើយបំភ្លឺទេពាក់ព័ន្ធនឹងរឿងនេះ។
យោងតាមលោក កែន លូ អគ្គលេខាធិការនៃសមាគមរោងចក្រកាត់ដេរនៅកម្ពុជា បានឲ្យដឹងថា ផ្លូវវេងស្រេងជាតំបន់មួយក្នុងចំណោមតំបន់ចំនួនបីដែលសម្បូរដោយរោងចក្រកាត់ដេរនៅក្នុងរាជធានីភ្នំពេញ។ លោកមានប្រសាសន៍ថា ស្ថានភាពផ្លូវនេះមិនបានធ្វើឲ្យការនាំចេញសម្លៀកបំពាក់ពីតំបន់នេះធ្លាក់ចុះទេ ប៉ុន្តែវាធ្វើឲ្យអ្វីៗដំណើរការកាន់តែយឺត។
លោក មាស ពិសី អាយុ៣២ឆ្នាំដែលរស់នៅលើដីចំណីផ្លូវវេងស្រេងបាននិយាយកាលពីម្សិលមិញថា អាជ្ញាធរបានឲ្យគាត់រើចេញដោយគ្មានសំណង។ គាត់បានលើកឡើងបន្តទៀតថា “ខ្ញុំបានរើផ្ទះខ្ញុំរួចហើយកាលពីពីរខែមុន ទោះបីជាពួកគេគួរតែផ្តល់សំណងខ្លះដល់ខ្ញុំក៏ដោយ។ ចិត្តរបស់ខ្ញុំចង់បានសំណង ប៉ុន្តែ ខ្ញុំដឹងថា ខ្ញុំមិនអាចប្រឆាំងនឹងពួកគេបានទេ”៕ សុខុម
(រាយការណ៍បន្ថែមដោយ MattBlomberg )