26 C
Phnom Penh

គណបក្ស​​​សង្គ្រោះ​​​ជាតិ​​​បំពាន​​​បម្រាម គ.ជ.ប.​​​ នៅ​​​ពេល​​​អ្នក​​​គាំទ្រ​​​រាប់ពាន់​​​នាក់​​​ហែក្បួន​​​ទូទាំង​​​រាជធានីភ្នំពេញ​​​

ដោយ ឌឹ ខេមបូឌា ដេលី

បទវិភាគ

គណបក្ស​​​សង្គ្រោះ​​​ជាតិបាន​​​ប្រើប្រាស់​​​ថ្ងៃ​​​ចុង​​​ក្រោយ​​​នៃ​​​យុទ្ធនាការ​​​ឃោសនា​​​បោះ​​​ឆ្នោត​​​ក្រុម​​​ប្រឹក្សា​​​កាល​​​ពី​​​ថ្ងៃ​​​សុក្រ​​​ ដើម្បី​​​ធ្វើ​​​ការ​​​ដង្ហែ​​​ក្បួន​​​នយោបាយ​​​ធំបំផុត​​​ប្រចាំ​​​ឆ្នាំ​​​ ដោយ​​​មាន​​​អ្នក​​​គាំទ្រ​​​​​​រហូត​​​ដល់​​​ទៅ​​​១៥.០០០​​​នាក់​​​ហែក្បួន​​​ពី​​​តំបន់​​​ជាយ​​​ខាង​​​ត្បូង​​​​​​នៃ​​​រាជធានីភ្នំពេញ​​​មក​​​កាន់​​​វត្តភ្នំ​​​ នៅ​​​ភាគ​​​​​​ខាង​​​ជើង​​​។

លោក​​​ សម រង្ស៊ី និង​​​លោក​​​ កឹម សុខា ​កំពុង​ដឹកនាំ​អ្នក​គាំទ្រ​រាប់​ពាន់​នាក់​ក្នុង​ការ​ដង្ហែ​ក្បួន​ឃោសនា​ក្នុង​រាជធានី​ភ្នំពេញ​កាលពី​ម្សិល​មិញ​ ។​ស៊ីវ​ ចាន់ណា
លោក​​​ សម រង្ស៊ី និង​​​លោក​​​ កឹម សុខា ​កំពុង​ដឹកនាំ​អ្នក​គាំទ្រ​រាប់​ពាន់​នាក់​ក្នុង​ការ​ដង្ហែ​ក្បួន​ឃោសនា​ក្នុង​រាជធានី​ភ្នំពេញ​កាលពី​ម្សិល​មិញ​ ។​ស៊ីវ​ ចាន់ណា

ការ​​​ហែក្បួននេះ​​​ដឹកនាំ​​​ដោយ​​​មេដឹកនាំ​​​គណបក្ស​​​ប្រឆាំង​​​ គឺ​​​លោក​​​ សម រង្ស៊ី និង​​​លោក​​​ កឹម សុខា នេះ​​​បាន​​​បញ្ចប់​​​ទៅ​​​ដោយ​​​គ្មាន​​​ផ្ទុះ​​​អំពើ​​​ហិង្សា​​​ឡើយ​​​ ប៉ុន្តែ​​​គណបក្ស​​​សង្គ្រោះ​​​ជាតិ​​​អាច​​​ប្រឈម​​​នឹង​​​បណ្ដឹង​​​ផ្លូវ​​​ច្បាប់​​​ បន្ទាប់ពី​​​ក្បួន​​​ដង្ហែ​​​នេះ​​​បាន​​​ចេញ​​​ពី​​​តម្រាយ​​​ផ្លូវ​​​ដែល​​​សាលា​​​រាជធានី​​​បាន​​​សម្រេចឲ្យ​​​ហែ​​​ និង​​​​​​ឆ្ពោះ​​​ទៅ​​​ទីលាន​​​ប្រជាធិបតេយ្យ​​​ កន្លែង​​​ដែល​​​អ្នក​​​គាំទ្រ​​​គណបក្ស​​​សង្គ្រោះ​​​ជាតិ​​​បាន​​​លើក​​​គ្រវែង​​​របាំង​​​​​​បិទ​​​ផ្លូវ​​​របស់​​​នគរបាល​​​។

លោក​​​ ឡុង​​​ ឌីម៉ង់ អ្នក​​​នាំពាក្យ​​​សាលា​​​រាជធានីភ្នំពេញ​​​បាន​​​មានប្រសាសន៍​​​ថា “ពួក​​​គាត់​​​បាន​​​ល្មើស​​​ច្បាប់​​​ ពីព្រោះ​​​ពួក​​​គាត់​​​​​​បាន​​​ប្រាប់​​​យើង​​​ថា ពួក​​​គាត់​​​នឹង​​​មិន​​​ហែ​​​​​​ទៅ​​​វត្តភ្នំ​​​ ឬ​​​ទីលានប្រជា​​​ធិបតេយ្យ​​​ឡើយ។ លោក​​​ ឃួង​​​ ស្រេង​​​ [អភិបាល​​​រង​​​រាជធានីភ្នំពេញ​​​] បាន​​​ចុះហត្ថលេខា​​​លើ​​​លិខិត​​​មួយ​​​ច្បាប់​​​រួច​​​ហើយ​​​ ដើម្បី​​​ផ្ញើទៅ​​​ [គណៈកម្មការ​​​រៀបចំ​​​ការ​​​បោះឆ្នោត​​​រាជធានី] ដើម្បី​​​​​​ប្ដឹង​​​គណបក្ស​​​សង្គ្រោះ​​​ជាតិ​​​ ដែល​​​មិន​​​គោរព​​​តាម​​​ការ​​​ព្រមព្រៀង​​​របស់​​​យើង​​​នៅ​​​ក្នុង​​​កិច្ច​​​ប្រជុំ​​​មួយ​​​កាល​​​ពី​​​សប្ដាហ៍​​​មុន​​​”។

គណបក្ស​​​សង្គ្រោះ​​​ជាតិ​​​បាន​​​ប្រកាស​​​ជា​​​សាធារណៈ​​​អំពី​​​តម្រាយ​​​ផ្លូវ​​​ហែក្បួន​​​ឃោសនា​​​ ដែល​​​សាលា​​​រាជធានី​​​បាន​​​​​សម្រេច​​​ ដែល​​​​​​ត្រូវ​​​បត​​​់ឆ្វេង​​​ចេញ​​​ពី​​​​​​មហាវិថី​​​ព្រះ​​​មុនីវង្ស​​​ឡើង​​​ទៅ​​​មហាវិថី​​​កម្ពុជា​​​ក្រោម​​​។ ប៉ុន្តែ​​​​​​នៅ​​​ពេល​​​អ្នក​​​គាំទ្រ​​​ជា​​​ច្រើន​​​ពាន់​​​នាក់​​​បាន​​​ហែឆ្ពោះ​​​ទៅ​​​ភាគ​​​ខាង​​​ជើង​​​តាម​​​បណ្ដោយ​​​មហាវិថី​​​ដ៏​​​សំខាន់​​​នេះ​​​ ផែនការ​​​ក៏​​​បានប្រែប្រួល​​​ ហើយ​​​ក្បួន​​​ដង្ហែ​​​ក៏​​​បាន​​​បត់​​​ស្ដាំ​​​ឆ្ពោះទៅ​​​ទីលាន​​​ប្រជាធិបតេយ្យ​​​ ដែល​​​គណៈកម្មាធិការ​​​ជាតិ​​​រៀបចំ​​​ការ​​​បោះឆ្នោត​​​ (គ.ជ.ប.) ប្រកាស​​​ថា ជា​​​តំបន់​​​ហាម​​​ធ្វើ​​​យុទ្ធនាការ​​​ឃោសនា។

បន្ទាប់ពី​​​ការ​​​ដង្ហែ​​​ក្បួន​​​នេះ​​​ លោក​​​ សម រង្ស៊ី បាន​​​មាន​​​ប្រសាសន៍​​​តាម​​​ទូរស័ព្ទ​​​ថា ការ​​​សម្រេច​​​ហែក្បួន​​​ទៅ​​​ទីលាន​​​ប្រជាធិបតេយ្យ​​​ ដែល​​​មាន​​​កម្លាំង​​​សន្ដិសុខ​​​យាម​​​កាម​​​យ៉ាង​​​តឹង​​​រឹុង​​​ គឺ​​​ធ្វើ​​​ឡើង​​​ដោយ​​​ឥត​​​គ្រោង​​​ទុក​​​ ហើយ​​​ថា អ្នក​​​គាំទ្រ​​​ជា​​​អ្នក​​​ទាមទារ​​​ឲ្យ​​​ហែ​​​ទៅ​​​កាន់ទីនោះ។ លោក​​​បាន​​​មាន​​​ប្រសាសន៍​​​ថា ដោយ​​​មាន​​​អ្នក​​​គាំទ្រ​​​យ៉ាង​​​ច្រើន​​​ហែតាម​​​ពី​​​ក្រោយ​​​ វា​​​ជា​​​ឱកាស​​​ដ៏ល្អ​​​ដើម្បី​​​បង្ហាញ​​​ពី​​​កម្លាំង​​​របស់​​​គណបក្ស​​​សង្គ្រោះ​​​ជាតិ​​​។

លោក​​​ សម រង្ស៊ី បាន​​​មាន​​​ប្រសាសន៍​​​ថា “យើង​​​ចង់​​​ប្រាប់​​​ [រដ្ឋាភិបាល​​​] ថា ប្រសិន​​​បើ​​​យើង​​​ចង់​​​ យើង​​​អាច​​​ឡោម​​​ព័ទ្ធ​​​ពួក​​​គេ​​​ និង​​​កាន់កាប់​​​ទីលាន​​​ប្រជាធិបតេយ្យ​​​បាន។ ទាហាន​​​នឹង​​​ក្លាយ​​​ជា​​​អ្នក​​​ទោស​​​នៅ​​​ទីលាន​​​ប្រជាធិបតេយ្យ​​​។ តើ​​​ទាហាន​​​ពីរបី​​​រយ​​​នាក់​​​អាច​​​ទប់​​​ទល់​​​ម៉េច​​​នឹង​​​បានទៅ​​​ ប្រសិន​​​បើ​​​យើង​​​ពិត​​​ជា​​​ប៉ុនប៉ង​​​កាន់​​​កាប់​​​ទីលាន​​​ប្រជាធិបតេយ្យ​​​មែន​​​នោះ?”។

នៅ​​​ម៉ោង​​​ប្រហែល​​​៥​​​ល្ងាច​​​ នៅ​​​ចុង​​​ប៉ែក​​​ខាង​​​ត្បូង​​​នៃ​​​វត្ត​​​ភ្នំ​​​ មាន​​​សន្ដិសុខ​​​ខណ្ឌដូនពេញ​​​ប្រហែល​​​ជាង​​​២០​​​នាក់​​​ឈរ​​​នៅ​​​​​​ទីលាន​​​ប្រជាធិបតេយ្យ​​​ អ្នក​​​ខ្លះ​​​ពាក់​​​មួក​​​ការពារ​​​សុវត្ថិភាព​​​ អ្នក​​​ខ្លះ​​​គ្រវី​​​ដំបង ហើយ​​​អ្នក​​​ខ្លះ​​​ទៀត​​​មើល​​​ទៅ​​​ដូច​​​ជា​​​មិន​​​ចង់​​​ឲ្យ​​​មាន​​​កា​​​រប៉ះទង្គិច​​​គ្នា​​​ទេ​​​។

អ្នក​​​គាំទ្រ​​​គណបក្ស​​​ប្រឆាំង​​​មួយ​​​ចំនួន​​​បាន​​​ឈប់​​​ ហើយ​​​​​​ឌឺដង​​​ដាក់​​​សន្ដិសុខ​​​ទាំង​​​នោះ​​​ ដែល​​​ត្រូវ​​​បាន​​​សាលា​​​រាជធានី​​​ប្រើប្រាស់​​​ក្នុង​​​រយៈ​​​ពេល​​​ប៉ុន្មាន​​​ខែ​​​ថ្មីៗ​​​នេះ​​​ ដើម្បី​​​បំបែក​​​​​​បាតុកម្ម​​​របស់​​​គណបក្ស​​​ប្រឆាំង​​​ និង​​​បាតុកម្ម​​​របស់​​​កម្មករ​​​ដោយ​​​ហិង្សា​​​។

បន្ទាប់​​​មក​​​ អ្នករៀបចំ​​​ការ​​​ហែក្បួន​​​បាន​​​នាំ​​​ក្បួន​​​នេះ​​​ឡើង​​​មក​​​មហាវិថី​​​ព្រះ​​​នរោត្តម​​​ ឆ្ពោះ​​​ទៅ​​​កាន់​​​ទីលាន​​​ប្រជាធិបតេយ្យ​​​ កន្លែង​​​ដែល​​​នគរបាល​​​ចរាចរ​​​ដាក់​​​របាំង​​​បិទ​​​ផ្លូវ មាន​​​រថពាស​​​ដែក​​​ និង​​​នគរបាល​​​បង្ក្រាប​​​បាតុកម្ម​​​កាន់​​​​​​គ្រាប់​​​បែក​​​ផ្សែង​​​​​​នៅ​​​ចម្ងាយ​​​ប្រហែល​​​៥០​​​ម៉ែត្រ​​​ត្រង់​​​ច្រក​​​ចូល​​​ស្ពាន​​​នាគ​​​។ នៅ​​​ពេល​​​អ្នក​​​ហែក្បួន​​​​​​ទាំង​​​នេះ​​​គ្រវែង​​​របាំង​​​បិទ​​​ផ្លូវ​​​ មន្ត្រី​​​កង​​​កម្លាំង​​​ម្នាក់​​​ដែល​​​បញ្ជា​​​នគរបាល​​​បង្ក្រាប​​​បាតុកម្ម​​​បាន​​​ស្រែក​​​ថា “វ៉ៃ​​​ពួក​​​វា​​​ឲ្យ​​​ងាប់​​​ វ៉ៃ​​​ពួក​​​វា​​​ឲ្យ​​​ងាប់​​​!”។

លោក​​​ រៀល ខេមរិន​​​ តំណាង​​​រាស្ត្រ​​​ជាប់​​​ឆ្នោត​​​​​​មណ្ឌល​​​​​​ស្វាយ​​​រៀង​​​របស់​​​គណបក្ស​​​សង្គ្រោះ​​​ជាតិ​​​ បាន​​​ដើរ​​​ចេញ​​​ពី​​​ក្រុម​​​អ្នក​​​គាំទ្រ​​​​​​ ហើយ​​​បាន​​​ហែក្បួន​​​ឆ្ពោះ​​​ទៅ​​​ចំណុច​​​ទំនេរ​​​មួយ​​​​​​ចន្លោះ​​​ជួរ​​​នគរបាល​​​ និង​​​បាតុកម្ម​​​ ហើយ​​​មេបញ្ជា​​​ការ​​​នគរបាល​​​បង្ក្រាប​​​បាតុកម្ម​​​ម្នាក់​​​ក៏​​​បាន​​​ចេញ​​​មក​​​ជួប​​​លោក​​​នៅ​​​ពេល​​​នោះ​​​។

ពួក​​​គាត់​​​ទាំង​​​ពី​​​រ​​​បាន​​​ជជែក​​​គ្នា​​​យ៉ាង​​​តឹង​​​សរសៃ​​​ក​​​ មុន​​​ពេល​​​ការ​​​ហែក្បួន​​​ត្រូវ​​​បាន​​​ដឹកនាំ​​​ឡើង​​​វិញ​​​ចេញ​​​ពី​​​ទីលាន​​​ប្រជាធិបតេយ្យ​​​ឆ្ពោះ​​​ទៅ​​​ភាគ​​​ខាង​​​កើត​​​។ លោក​​​ រៀល ខេមរិន​​​ បាន​​​មាន​​​ប្រសាសន៍​​​ជា​​​ក្រោយ​​​អំពី​​​កងកម្លាំង​​​របស់​​​រដ្ឋាភិបាល​​​​​​ថា “ខ្ញុំ​​​មិន​​​ដឹង​​​ថា មនុស្ស​​​ទាំង​​​នេះ​​​ចង់​​​បាន​​​អ្វី​​​នោះ​​​ទេ​​​។​​​ យើង​​​គ្រាន់​​​តែ​​​ហែក្បួន​​​ប៉ុណ្ណោះ​​​ ប៉ុន្តែ​​​ពួក​​​គេ​​​មក​​​ព្យាយាម​​​​​​បំភិត​​​បំភ័យ​​​ពួក​​​យើង​​​”។

បន្ទាប់​​​មក​​​ការ​​​ហែក្បួន​​​នេះ​​​បាន​​​ឆ្ពោះ​​​ទៅ​​​ភាគ​​​ខាង​​​ត្បូង​​​តាម​​​បណ្ដោយ​​​ផ្លូវ​​​លេខ​​​១៩​​​មុន​​​ពេល​​​បត់​​​ទៅ​​​​​​មហាវិថី​​​កម្ពុជា​​​ក្រោម​​​វិញ ដោយ​​​នៅ​​​ទីនោះ​​​លោក​​​ សម រង្ស៊ី បាន​​​ឡើង​​​ជិះ​​​លើ​​​រថយន្ត​​​​​​ ហើយ​​​បាន​​​​​​ស្រែក​​​ថ្កោល​​​ទោស​​​គណបក្ស​​​ប្រជាជន​​​កម្ពុជា​​​កំពុង​​​កាន់​​​អំណាច​​​។

លោក សម រង្ស៊ី ​​​បាន​​​មាន​​​ប្រសាសន៍​​​ថា “ពួក​​​គេ​​​ធ្វើ​​​ឲ្យ​​​ប្រទេស​​​ក្រីក្រ​​​។ យុវជន​​​គ្មាន​​​ការងារ​​​ធ្វើ​​​   និស្សិត​​​៣០០.០០០​​​ទៅ​​​៤០០.០០០នាក់​​​ចេញ​​​ពី​​​សាលា​​​ជា​​​រៀង​​​រាល់​​​ឆ្នាំ​​​ ហើយ​​​ទាត់​​​ខ្យល់​​​ ចំណែក​​​ឯ​​​កូន​​​អ្នក​​​មាន​​​ មាន​​​អ្វី​​​ៗគ្រប់​​​យ៉ាង។​​​ ប្រសិន​​​បើ​​​គណបក្ស​​​ប្រជាជន​​​ដឹកនាំ​​​ មុខ​​​ជា​​​អត់​​​​​​ការ​​​ងារ​​​ធ្វើ​​​​​​។​​​ មេដឹកនាំ​​​នៃ​​​​​​សង្គម​​​របស់​​​យើង​​​គ្មាន​​​សមត្ថភាព​​​ធ្វើ​​​ឲ្យ​​​ប្រទេស​​​រីកចម្រើន​​​ទេ គាត់​​​គ្រាន់​​​តែ​​​ចែក​​​សារុង​​​ប៉ុណ្ណោះ​​​”។

លោក​​​ ឡុង​​​ ឌីម៉ង់ អ្នក​​នាំពាក្យ​​​សាលា​​​រាជធានី​​​ភ្នំពេញ​​​បាន​​​មាន​​​ប្រសាសន៍​​​ថា គណបក្ស​​​សង្គ្រោះជាតិ​​​សម​​​​​​ប្រឈម​​​នឹង​​​វិធាន​​​ការ​​​របស់​​​​​​គ.ជ.ប. ចំពោះ​​​ការ​​​ហែក្បួន​​​នេះ​​​ និង​​​ចំពោះ​​​ការ​​​គ្រវែង​​​របាំង​​​​​​​​​បិទ​​​ផ្លូវ​​​របស់​​​នគរបាល​​​នៅ​​​ជិត​​​វត្តភ្នំ​​​។ លោក​​​បាន​​​លើកឡើង​​​ទៀត​​​ថា​​​ “ពួក​​​គាត់​​​បាន​​​ធ្វើ​​​​​​លើស​​​ពី​​​យុទ្ធនាការ​​​ឃោសនា ពួក​​​គាត់​​​បាន​​​ញុះញង់​​​ឲ្យ​​​មាន​​​ការ​​​ស្អប់​​​ខ្ពើម”។

ទោះ​​​ជា​​​យ៉ាង​​​ណា លោក សម រស្ស៊ី​​​ បាន​​​មាន​​​ប្រសាសន៍​​​ថា គណបក្ស​​​សង្គ្រោះ​​​ជាតិ​​​គ្រាន់​​​តែ​​​ប្រើ​​​ប្រាស់​​​រយៈ​​​ពេល​​​នៃ​​​ការ​​​ធ្វើ​​​យុទ្ធនាការ​​​ឃោសនា​​​បោះឆ្នោត​​​ ដើម្បី​​​បង្ហាញ​​​ដល់​​​ក្រុម​​​ប្រឹក្សា​​​ឃុំ​​​-សង្កាត់​​​ចំនួន​​​១១.៤៥៩នាក់​​​នៅ​​​ទូទាំង​​​ប្រទេស​​​ ដែល​​​ក្នុង​​​នោះជាង​​​៨.០០០​​​នាក់​​​មក​​​ពី​​​គណបក្ស​​​ប្រជាជន​​​កម្ពុជា​​​ថា ប្រជាពលរដ្ឋ​​​យ៉ាង​​​ច្រើន​​​បាន​​​ចេញ​​​មក​​​គាំទ្រ​​​គណបក្ស​​​ប្រឆាំង​​​នៅ​​​មុន​​​ការ​​​បោះឆ្នោត​​​នៅ​​​ថ្ងៃ​​​អាទិត្យ​​​នេះ​​​ប៉ុណ្ណោះ។

លោកបាន​​​មាន​​​ប្រសាសន៍​​​ទៀត​​​ថា “យើង​​​ចង់​​​ឲ្យ​​​អ្នក​​​បោះឆ្នោត​​​ដឹង​​​ថា ប្រជាពលរដ្ឋ​​​ដែល​​​បាន​​​បោះឆ្នោត​​​ឲ្យ​​​ពួក​​​គេ​​​ បាន​​​ប្ដូរ​​​មក​​​គាំទ្រ​​​គណបក្ស​​​សង្គ្រោះ​​​ជាតិ​​​វិញ​​​ហើយ​​​ ហើយ​​​ប្រសិន​​​បើ​​​ពួក​​​គេ​​​ចង់​​​ផ្លាស់​​​ប្ដូរ​​​ដែរ​​​ ប្រជាពលរដ្ឋ​​​គាំទ្រ​​​ពួក​​​គេ”៕ សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស