ជនជាតិដើម​​​ភាគតិច​​​ជង​​​នៅ​​​ជ្រលង​​​ភ្នំ​​​អារ៉ែង​​​បញ្ឈប់​​​សកម្មភាព​​​សិក្សា​​​របស់​​​វិស្វករ​​​ចិន​​​ជាថ្មី​​​​​​​

​​​​​​ប្រជាជន​​​ជនជាតិ​​​ដើម​​​ភាគតិច​​​​​​ជង​​​មួយ​​​ក្រុម​​​ដែល​​​មាន​​​គ្នា​​​២០​​​នាក់​​​នៅ​​​តំបន់​​​ជ្រលង​​​ភ្នំ​​​អារ៉ែង​​ក្នុង​​​ខេត្ត​​​កោះកុង​​​ បាន​​​បិទ​​​ផ្លូវដើម្បីរារាំង​​​កុំ​​​ឲ្យ​​​វិស្វករ​​​ចិន​​​មួយ​​​ក្រុម​​​ចូលទៅ​​​ដល់​​​ទីតាំង​​​ទំនប់​​​វារី​​​អគ្គិសនី​​​ដែល​​​ត្រូវបាន​​​ស្នើ​​​ឡើង​​​ដ៏​​​ចម្រូង​​​ចម្រាស​​​។

អ្នកភូមិ​​​ជន​​​ជាតិ​​​ជង​​​ជាច្រើន​​​នាក់​​​បាន​​​នាំគ្នា​​​ជួបជុំ​​​នៅ​​​​​​ក្បែរ​​​ផ្លូវ​​​​​​ឆ្ពោះទៅ​​​ទីតាំង​​​ទំនប់​​​វារី​​​អគ្គិសនី​​​ស្ទឹង​​​ឆាយ​​​អារ៉ែង​​​ អស់​​​រយៈពេល​​​ពីរ​​​ខែ​​​កន្លង​​​មក​​​ហើយ ក្នុង​​​គោល​​​បំណង​​​ទប់​​​ស្កាត់​​​មិន​​​ឲ្យ​​​វិស្វករ​​​ចិន​​​មួយ​​​ក្រុម​​​ព្យាយាម​​​សិក្សា​​​តំបន់​​​នោះ​​​។ ពួកគាត់​​​បាន​​​ទទួល​​​ជោគជ័យ​​​ក្នុង​​​ការ​​​បញ្ឈប់​​​សកម្មភាព​​​បុគ្គលិក​​​ចំនួន​​​ពីរ​​​ដង​​​រួច​​​មក​​​ហើយ។

លោក វ៉ែន វន តំណាង​​​អ្នកភូមិទាំង​​​នេះ​​​បាន​​​ឲ្យ​​​ដឹង​​​ថា ពួកគាត់​​​បាន​​​បិទ​​​ផ្លូវ​​​ជាថ្មី​​​ម្ដង​​​ទៀត​​​កាលពីម្សិលមិញ​​​​​​នៅវេលាម៉ោង​​​ប្រហែល​​​១១​​​ព្រឹក​​​ នៅ​​​ឃុំ​​​ឫស្សីជ្រុំ ស្រុក​​​ថ្មបាំង បន្ទាប់​​​ពីពួក​​​គាត់​​​ទទួល​​​បាន​​ដំណឹង​​​ថា មាន​​​រថយន្ត​​​ពីរ​​​គ្រឿង​​​ដឹក​​​អ្នក​​​ដំណើរ​​ជនជាតិ​​​ចិន​​​បរ​​​កាត់​​​ឃុំនោះ។

លោក​​​បាន​​​មាន​​​ប្រសាសន៍ថា “គេ​​​ប្រាប់​​​យើង​​​ថា គេ​​​នឹង​​​សិក្សា​​​អំពី​​​ហេតុប៉ះពាល់​​​នៃ​​​គម្រោង​​​ទំនប់វារីអគ្គិសនី​​​នេះ​​​។ យើង​​​មិន​​​ចង់​​​ឲ្យ​​​ពួកគេ​​​សិក្សា​​​ពី​​​ហេតុប៉ះពាល់​​​ទេ ពីព្រោះ​​​ទោះ​​​បីជា​​​ពួកគេ​​​រក​​​ឃើញ​​​ថា ហេតុ​​​​​​ប៉ះពាល់មាន​​​ទំហំធំ​​​ក៏ដោយ ក៏ពួកគេ​​​នឹង​​​ធ្វើរបាយការណ៍​​​ថា ហេតុប៉ះពាល់​​​នោះមាន​​​ទំហំតូច ហើយ​​​ទីបញ្ចប់​​​ពួកគេ​​​នឹង​​​សង់​​​ទំនប់នោះ​​​”។

លោក​​​បាន​​​​​​ឲ្យដឹង​​​បន្ថែមទៀត​​​ថា បន្ទាប់​​​ពីត្រូវ​​​បាន​​​ហាម​​​ឃាត់​​​ ក្រុម​​​វិស្វករ​​​នោះ​​​ក៏សម្រេច​​​ចិត្ត​​​បើក​​​រថយន្ត​​​ត្រឡប់​​​ទៅ​​​ទីរួម​​​ស្រុកវិញ ហើយ​​​ថា អ្នកភូមិ​​​ប្រហែលជា​​​៤០ទៅ​​​៥០​​​នាក់​​​​​​ត្រួត​​​ពិនិត្យ​​​ផ្លូវ​​​នេះ​​​ពេញមួយ​​​យប់​​​ ដើម្បី​​​ធ្វើ​​​ឲ្យ​​​ប្រាកដ​​​ថា មិន​​​មាន​​​វិស្វករ​​​ត្រឡប់​​​មក​​​វិញ​​​។

ទំនប់វារី​​​អគ្គិសនី​​​ស្ទឹង​​​អារ៉ែង​​​ ដែល​​​មាន​​​កម្រិត​​​​​​១២០​​​មេហ្គាវ៉ាត់​​​នៅ​​​ក្នុង​​​គម្រោង​​​សាង​​​សង់​​​របស់​​​ក្រុម​​​ហ៊ុន​​​ចិន​​​ស៊ីណូហ៊ីដ្រូ (Sinohidro) ប៉ុន្តែ​​​វា​​​ជាគម្រោង​​​ដែល​​​ត្រូវ​​​បាន​​​មជ្ឈដ្ឋាន​​​នានា​​​​រំពឹង​​​ថា នឹង​​​បណ្ដាល​​​ឲ្យ​​​ប្រជាជន​​​រាប់​​​រយ​​​គ្រួសារ​​​បាត់​​​បង់ដី​​​ និង​​​លិច​​​ទឹក​​​លើ​​​ដី​​​ទំហំសរុប​​​ប្រហែល​​​២០.០០០​​​ហិកតា រួមទាំង​​​តំបន់​​​សត្វព្រៃ​​​រស់នៅ​​​សំខាន់ៗ​​​ផង​​​ដែរ​​​ ជាពិសេស​សត្វ​​​​ក្រពើ​​​ភ្នំដែល​​​ជិត​​​ផុត​​​ពូជ​​​តែម្ដង​​​។

លោក​​​ អុិន គង់ចិត្រ អ្នក​​​សម្រប​​​សម្រួលអង្គការ​​​សិទ្ធិមនុស្ស​​​លីកាដូប្រចាំ​​​ខេត្ត​​​កោះកុង​​​​​​កាលពីម្សិលមិញ​​​​​​បាន​​​អំពាវ​​​នាវ​​​ឲ្យ​​​រដ្ឋាភិបាល​​​លុប​​​ចោល​​​គម្រោង​​​នោះ ដោយ​​​លើកឡើង​​​ថា ស្ថានភាព​​​បង្ហាញ​​​ច្បាស់​​​ណាស់​​​ថា គម្រោង​​​ទំនប់វារីអគ្គិសនី​​​នោះ​​​នឹង​​​មិន​​​បម្រើ​​​ផល​ប្រយោជន៍​​​សហគមន៍មូល​​​ដ្ឋាន​​​ទេ។

លោក​​​បានមាន​​​ប្រសាសន៍​​​ថា “រដ្ឋាភិបាល​​​ ជាពិសេស​​​ក្រសួង​​​រ៉ែ និង​​​ថាម​​​ពល​​​គួរ​​​តែ​​​ភ្ញាក់​​​ខ្លួន​​​ ហើយ​​​លុប​​​ចោល​​​គម្រោង​​​នោះ ពីព្រោះអ្វីគ្រប់​​​យ៉ាង​​​ដែល​​​រដ្ឋាភិបាល​​​បាន​​​ធ្វើ​​​ ប្រជា​​​ជន​​​ក្នុង​​​សហគមន៍​​​មិនពេញ​​​ចិត្ត​​​ទេ”។

ក៏ប៉ុន្តែ លោក ពេជ្រ ស៊ីយន់ ប្រធាន​​​មន្ទីរ​​​រ៉ែ និង​​​ថាមពល​​​ខេត្ត​​​កោះកុង បាន​​​លើក​​​​​ឡើង​​​ថា លទ្ធផល​​​នៃ​​​ការ​​​វាយ​​​តម្លៃ​​​គម្រោង​​​នេះនឹង​​​​​​បន្ត​​​ទៅមុខ​​​ ហើយប្រសិន​​​បើ​​​ប្រជាជន​​​ជនជាតិ​​​ដើម​​​ភាគតិច​​​ជង នៅតែ​​​បន្ត​​​បិទ​​​ផ្លូវ​​​ទៀត អាជ្ញាធរ​​​នឹង​​​ចាត់​​​វិធាន​​​ការ​​​ចំពោះពួកគាត់​​​។ លោក​​​បាន​​​មាន​​​ប្រសាសន៍​​​ថា “វា​​​មិន​​​មែន​​​ជា​​​រឿង​​​ត្រឹម​​​ត្រូវ​​​ទេ ដែលអ្នក​​​ភូមិ​​​ទៅរារាំង​​​សកម្មភាព​​​ធ្វើ​​​ដំណើរ​​​របស់​​​ពួកគេ​​​។ ពួកគេ​​​គ្រាន់​​​តែ​​​មក​​​សិក្សា​​​ពីហេតុ​​​ប៉ះពាល់​​​ដោយសារ​​​គម្រោង​​​ទំនប់វារីអគ្គិសនី​​​នេះ​​​ប៉ុណ្ណោះ​​​”៕ ប៊ុននី​​​​​​​​​​​​​​​​​​​​​​​​​​​​​​​​​​