27 C
Phnom Penh

បុគ្គលិក​​​ក្រុម​​​ហ៊ុន​​​កាល់តិច​​​ផ្អាក​​​ធ្វើ​​​កូដ​​​កម្ម​​​ដើម្បី​​​ទុក​​​ពេល​​​សម្រាប់​​​សិក្សា​​​កម្រិត​​​ដំឡើង​​​ប្រាក់​​​ឈ្នួល​​​

ដោយ ឌឹ ខេមបូឌា ដេលី

បទវិភាគ

មួយ​​​សប្ដាហ៍​​​បន្ទាប់ពី​​​​​​កូដ​​​កម្ម​​​បាន​​​កើត​​​ឡើង​​​បុគ្គលិក​​​នៅ​​​​​ស្ថានីយ​​​ប្រេង​​​​​​កាល់តិច​​​បាន​​​យល់​​​ព្រម​​​ត្រឡប់​​​ទៅធ្វើការ​​​វិញ​​​កាលពីម្សិលមិញ បន្ទាប់ពី​​​ក្រុម​​​ហ៊ុន​​​នេះ​​​បាន​​​សន្យា​​​ផ្ដល់​​​ប្រាក់​​​លើក​​​ទឹក​​​ចិត្ត​​​ចំនួន​​​២០​​​ដុល្លារ​​​ ដើម្បី​​​ទុក​​​ពេល​​​​​​ឲ្យ​​​ក្រុម​​​ហ៊ុន​​​ប្រេង​​​នេះ​​​សិក្សា​​​ពី​​​លទ្ធភាព​​​ដំឡើង​​​ប្រាក់​​​ឈ្នួល​​​របស់​​​ខ្លួន​​​ នេះ​​​បើ​​​យោងតាម​​​ប្រសាសន៍​​​ប្រធាន​​​សហជីព​​​ដែល​​​បាន​​​លើក​​​ឡើង​​​កាលពី​​​ថ្ងៃសុក្រ។

លោក ស ម៉ូរ៉ា ប្រធាន​សហព័ន្ធ​​​សហជីព​​​កម្មករចំណីអាហារ និង​សេវា​កម្មកម្ពុជា​​​​ បាន​​​ឲ្យ​​​ដឹង​​​ថា បន្ទាប់ពី​​​មាន​​​កិច្ច​​​ព្រម​​​ព្រៀង​​​នេះ​​​បុគ្គលិក​​​នឹង​​​ត្រឡប់ទៅ​​​ធ្វើការ​​​តាម​​​ស្ថានីយ​​​​រៀង​​​ៗ​​​ខ្លួន​​​វិញ ដោយ​​​ចាប់​​​ផ្ដើម​​​នៅ​​​ថ្ងៃ​​​នេះ​​​។ លោក​​​បានមាន​​​ប្រសាសន៍​​​ថា បន្ទាប់ពី​​​យើង​​​បាន​​​ប្រជុំគ្នា​​​កាលពី​​​ព្រឹក​​​មិញ ក្រុម​​​ហ៊ុន​​​នឹង​​​បុគ្គលិក​​​បាន​​​ឯកភាព​​​គ្នា​​​លើ​​​ប្រាក់​​​លើក​​​ទឹក​​​ចិត្ត​​​២០​​​ដុល្លារ​​​ និង​​​រយៈ​​​ពេល​​​ពីរខែ​​​សម្រាប់​​​ក្រុម​​​ហ៊ុន​​​សិក្សា​​​ថា តើ​​​ខ្លួន​​​អាច​​​មាន​​​លទ្ធភាព​​​ដំឡើង​​​ប្រាក់​​​ឈ្នួល​​​បាន​​​ប៉ុន្មាន​​​លើ​​​ប្រាក់​​​ឈ្នួល​​​បច្ចុប្បន្ន”។

បុគ្គលិក​​​ប្រហែល​​​៣០០​​​នាក់​​​នៅ​​​ស្ថានីយ​​​ប្រេង​​​កាល់តិច ទាំង​​​១៧​​​ទីតាំង​​​ក្នុង​​​រាជធានី​​​ភ្នំពេញ បាន​​​ចាប់​​​ផ្ដើម​​​ធ្វើកូដកម្ម​​​កាលពីថ្ងៃច័ន្ទ ដើម្បីទាម​​​ទារ​​​ប្រាក់​​​ឈ្នួល​​​១៦០​​​ដុល្លារ​​​ក្នុង​​​មួយ​​​ខែ​​​ និង​​​ប្រាក់​​​លើក​​​ទឹក​​​ចិត្ត​​​ប្រចាំ​​​ឆ្នាំដែល​​​មាន​​​ចំនួន​​​ស្មើនឹង​​​ប្រាក់​​​ឈ្នួល​​​មួយ​​​ខែ​​​។

កាលពីខែមេសា បុគ្គលិក​​​ទាំង​​​នេះ​​​ទទួល​​​បាន​​​ប្រាក់​​​ឈ្នួល​​​បន្ថែមពី​​​៩០ដុល្លារ ដល់​​​១១០​​​ដុល្លារ​​​ ក៏ប៉ុន្តែ​​​ពួកគេបាន​​​លើក​​​ឡើង​​​ថា កម្រិត​​​ប្រាក់​​​ឈ្នួល​​​នេះ​​​មិន​​​អាច​​​យកទៅ​​​ដោះស្រាយ​​​ថ្លៃចំណាយ​​​ក្នុង​​​ជីវភាព​​​រស់​​​នៅ​​​បាន​​​ទេ។

កាលពីដើម​​​សប្ដាហ៍នេះ ​​​កិច្ច​​​ចរចា​​​រវាង​​​បុគ្គលិក​​​ និង​​​ក្រុម​​​ហ៊ុន​​​បាន​​​ជាប់​​​គាំង​​​ បន្ទាប់ពី​​​តំណាង​​​ក្រុម​​​ហ៊ុន​​​ឈេហ្វរ៉ុន បាន​​​ស្នើ​​សុំ​​​រយៈ​​​ពេលជាច្រើន​​​ខែ​​​ដើម្បី​​​សិក្សា​​​លទ្ធភាព​​​ផ្ដល់​​​ប្រាក់​​​ឈ្នួល​​​ប្រចាំ​​​ខែ​​​ចំនួន​​​១៦០​​​ដុល្លារ​​​។ ទោះជា​​​យ៉ាង​​​ណា ប្រាក់​​​លើក​​​ទឹក​​​ចិត្ត​​​ចំនួន​​​​​​២០​​​ដុល្លារ​​​នេះ​​​ហាក់ដូច​​​ជា​​​មិន​​​ទាន់​​​ផ្ដល់ភាព​​​ច្បាស់​​​លាស់​​​ដល់​​​កម្មករ​​​ទាក់ទង​​​នឹង​​​ការ​​​រង់ចាំ​​​ឲ្យ​​​ក្រុម​​​ហ៊ុន​​​បញ្ចប់​​​សកម្មភាព​​​សិក្សា​​​របស់​​​ខ្លួន​​​។

លោក ម៉ូរ៉ា បានមាន​​​ប្រសាសន៍​​​ថា “បុគ្គលិក​​​នឹង​​​ត្រឡប់ទៅធ្វើការវិញ​​​នៅថ្ងៃស្អែក ក៏ប៉ុន្តែ​​​បើ​​​លទ្ធផល​​​នៃការ​​​សិក្សា​​​នេះ​​​បង្ហាញ​​​ថា កម្រិត​​​ដំឡើង​​​ប្រាក់​​​ឈ្នួល​​​មិន​​​អាច​​​ទទួល​​​យក​​​បានទេ​​​នោះ បុគ្គលិក​​​នឹង​​​ធ្វើកូដកម្ម​​​ឡើង​​​វិញ​​​ទៀត​​​”។

លោក ម៉ូរ៉ា បាន​​​ប៉ាន់​​​ស្មាន​​​ថា ស្ថានីយ​​​ប្រេង​​​របស់​​​ក្រុមហ៊ុន​​​កាល់តិច​​​នីមួយៗ​​​អាច​​​រក​​​ប្រាក់​​​ចំណូល​​​បាន​​​​​​ប្រហែល​​​១០.០០០​​​ដុល្លារ​​​ក្នុង​​​មួយ​​​ថ្ងៃពី​​​ការ​​​លក់​​​ប្រេង​​​សាំង​​​ និង​​​ហាង​​​លក់​​​ទំនិញ​​​របស់​​​ខ្លួន​​​ ក៏ប៉ុន្តែ​​​ប្រាក់​​​ចំណូលទាំង​​​នេះ​​​ត្រូវ​​​បាន​​​ខាត​​​បង់​​​ ពោលគឺ​​​ទឹក​​​ប្រាក់​​​ចំនួន​​​ប្រហែល​​​​​​៨៥០.០០០​​​ដុល្លារ​​​សម្រាប់​​​ស្ថានីយ​​​ទាំង​​​១៧​​​នេះ​​​ត្រូវបាន​​​ខាត​​​បង់​​​។

អ្នកស្រី​​ ថន ចាន់លក្ខណ៍ អ្នកនាំាពាក្យ​​​ក្រុ​​​ម​​​ហ៊ុន ​​​ឈេហ្វរ៉ុន ​​​បា​​​ន​​​ឲ្យ​​​ដឹង​​​ថា ក្រុម​​​ហ៊ុន​​​នេះ​​​កំពុង​​​ខិត​​​ខំ​​​ដោះស្រាយ​​​ស្ថានភាព​​​យ៉ាង​​​ខ្លាំង​​​។ អ្នកស្រីបាន​ឲ្យដឹង​តាម​រយៈ​អុីម៉េល​កាលពី​យប់​មិញ​ថា “ក្រុមហ៊ុន ឈេហ្វរ៉ុន (ខេមបូឌា) លីមីតធីត បាន​ជួប​ចរចា​ជាមួយ​តំណាងសហជីព​កាលពី​ព្រឹកមិញ​ ហើយ​នឹង​ពិនិត្យ​ជម្រើស​របស់ខ្លួនវិញ​ ដើម្បីដោះ​ស្រាយ​បញ្ហា​នេះ។ ក្រុម​ហ៊ុននេះ​នឹង​ជូន​ដំណឹងដល់​សហជីព​ នៅពេល​មាន​ការ​ចេញ​សេចក្តីសម្រេច​ណាមួយ​”៕ ប៊ុននី​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស