28 C
Phnom Penh

ចំនួន​​​ជនជាតិ​​​ចិន ​​​ឆ្លង​​​ដែន​​​មក​កម្ពុជា​​​នៅ​​​តែ​​​​​កើនឡើង​​​ខណៈ​​​ពេល​​​មាន​​​កុបកម្ម​​​ក្នុង​​​ប្រទេស​​​វៀតណាម

ដោយ ឌឹ ខេមបូឌា ដេលី

បទវិភាគ

ជនជាតិ​​​ចិន​​​ នៅតែ​​​បន្ត​​​ឆ្លង​​​ព្រំដែន​​​មក​​​កាន់ប្រទេស​​​កម្ពុជា​​​កាល​​​ពី​​​ថ្ងៃ​​​សុក្រ​​​ ក្រោយ​​​ពី​​​មាន​​​កុប​​​កម្ម​​​ដ៏​​​តានតឹង​​​​​​បានផ្ទុះ​​​ឡើង​​​នៅក្នុង​​​ប្រទេស​​​វៀតណាម​ ​​ដែល​បណ្តាល​ឲ្យ​បាត់បង់ជីវិតមនុស្សជាច្រើន​នាក់។

លោក ម៉ម យ៉យ អនុប្រធាន​​​​​​ការិយាល័យ​​​អន្តោប្រវេសន៍​​​ប្រចាំ​​​ច្រក​​​អន្តរជាតិ​​​បាវិត​​​ក្នុង​​​ខេត្ត​​​ស្វាយរៀង​​​ បាន​​​មាន​​​ប្រសាសន៍​​​ថា ចំនួន​​​សរុប​​​នៃ​​​ប្រជាជន​​​ចិន​​​ ដែល​​​ឆ្លង​​​ដែន​​​​​​ចូល​​​មក​​​ប្រទេស​​​កម្ពុជា​​​ បាន​​​កើន​​​ឡើង​​​ពី​​​ប្រហែល​​​៦៤០​​​នាក់​​​ កាល​​​ពី​​​ថ្ងៃ​​​ពុធ​​​ មក​​​ដល់​​​ប្រហែល​​​១.០០០​​​នាក់​​​ កាលពី​​​ថ្ងៃ​​​សុក្រ ជា​​​តួលេខ​​​មួយ​​​ខ្ពស់​​​ជាង​​​ធម្មតា​​​ដល់​​​ទៅ​​​ប្រាំ​​​មួយ​​​ដង​​​។

លោក​​​បាន​​​មាន​​​ប្រសាសន៍​​​ថា “យើង​​​បាន​​​សង្កេត​​​ឃើញ​​​ថា រហូត​​​មក​​​ទល់​​​ថ្ងៃ​​​នេះ​​​ ប្រជា​​​ជន​​​ចិន ​​​ជាង​​​១.០០០​​​នាក់​​​បាន​​​ឆ្លង​​​ដែន​​។ ស្ថាន​​ភាព​​​មាន​​​សភាព​​​ធម្មតា​​​ ពីព្រោះ​​​ពួក​​​គេ​​​ចូល​​​មក​​​ដូច​​​ទេសចរ​​​ដទៃ​​​ទៀត​​​ដែរ ប៉ុន្តែ​​​​​​ទឹក​​​មុខ​​​របស់​​​ពួក​​​គេ​​​ក្រៀម​​​ក្រំ”។

មនុស្ស​​​រហូត​​​ដល់​​​ទៅ​​​២១​​​នាក់​​​ បាន​​​បាត់​​​បង់​​​ជីវិត​​​នៅ​​​ក្នុង​​​ប្រទេស​​​វៀតណាម​​​ ចាប់​​​តាំង​​​ពី​​​កុបកម្ម​​​បាន​​​ផ្ទុះ​​​ឡើង​​​ក្រោយ​​​ពី​​​មាន​​​​​​វត្ត​​​មាន​​​សំណង់​​​អណ្ដូង​​​ប្រេង​​​កាត​​​មួយ​​​របស់​​​ចិន​​​នៅ​​​​​​ផ្នែក​​​មួយ​​​នៃ​​​សមុទ្រ​​​ចិន​​​ខាង​​​ត្បូង​​​ ដែល​​​វៀតណាម​​​អះអាង​​​សិទ្ធិ​​​កាន់​​​កាប់​​​។​ រោងចក្រ​​​តៃវ៉ាន់​​​ មួយ​​​ចំនួន​​​ក៏​​​ត្រូវ​​​បាន​​​ដុត​​​បំផ្លាញ​​​​​​ដែរ​​​​​​ចាប់​​​តាំង​​​ពី​​​ភាព​​​តាន​​​តឹង​​​បាន​​​ពុះ​​​កញ្ជ្រោល​​​ខ្លាំង​​​ឡើង​​​ កាល​​​ពី​​​ថ្ងៃ​​​អង្គារ​​​មក។

លោក​​​ សីុម ជី ប្រធាន​​​សមាគម​​​កម្ពុជា​​​-វៀតណា​ម បាន​​​មាន​​​ប្រសាសន៍​​​ថា សមាគម​​​របស់​​​លោក​​​នឹង​​​ទាក់​​​ទង​​​ទៅស្ថានទូត​​​ចិន​​​ ដើម្បី​​​ពិភាក្សា​​​អំពី​​​បញ្ហា​​​នេះ​​​។

មុន​​​ពេល​​​បដិសេធ​​​មិន​​​ធ្វើ​​​អត្ថាធិប្បាយ​​​បន្ថែម​​​ទៀត​​​ លោក​​​ ស៊ីម ជី បាន​​​មាន​​​ប្រសាសន៍​​​ថា “យើង​​​មិន​​​ទាន់​​​កំណត់​​​កាល​​​បរិច្ឆេទ​​​នៅ​​​ឡើយ​​​​​​ទេ​​​ ប៉ុន្តែ​​​វា​​​អាច​​​នឹង​​​ឆាប់ៗ​​​តាម​​​ដែល​អាច​​​ធ្វើ​​​ទៅ​​​បាន​​​ ហើយ​​​ខ្ញុំ​​​មិន​​​ដឹង​​​ថា មនុស្ស​​​ប៉ុន្មាន​​​នាក់​​​នឹង​​​មក​​​ជាមួយ​​​ខ្ញុំ​​​ទេ​​​”។

លោក​​​ ត្រាន វ៉ាន់​​​ថុង​​​ អ្នក​​​នាំពាក្យ​​​ស្ថានទូត​​​វៀតណាម​​​​​​ប្រចាំ​​​កម្ពុជា​​​​​​បាន​​​មាន​​​ប្រសាសន៍​​​ថា រដ្ឋមន្ត្រី​​​ការ​​​បរទេស​​​នៃ​​​ប្រទេស​​​ទាំង​​​ពីរ​​​ កំពុង​​​ត្រៀម​​​ធ្វើ​​​ការ​​​ចរចា​​​ជុំ​​​វិញ​​​បញ្ហា​​​នេះ។

លោក​​​បាន​​​មាន​​​ប្រសាសន៍​​​ទៀត​​​ថា​​​​​​ “អាជ្ញាធរ​​​ចិន​​​ បាន​​​រំលោភ​​​អធិបតេយ្យ​​​ដែន​​​សមុទ្រ​​​របស់​​​វៀតណាម​​​ យ៉ាង​​​ធ្ងន់​​​ធ្ងរ​​​។ ខ្ញុំ​​​មិន​​​ដឹង​​​ថា តើ​​​ជនជាតិ​​​វៀតណាម​​​នឹង​​​ធ្វើ​​​ការ​​​តវ៉ា​​​នៅ​​​ស្ថានទូត​​​ចិន ​​​ឬ​​​យ៉ាង​​​ណា​​​នោះ​​​ទេ ប៉ុន្តែ​​​រដ្ឋាភិបាល​​​កម្ពុជា​​​ បច្ចុប្បន្ន​​​បាន​​​ហាម​​​ប្រាម​​​រួច​​​​​​ហើយ​​​មិន​​​ឲ្យ​​​មាន​​​ការ​​​តវ៉ា​​​ឬ​​​ការ​​​ហែក្បួន​​​ឡើយ​​​ ហើយ​​​ជនជាតិ​​​វៀតណាម​​​ ដែល​​​រស់​​​នៅ​​​កម្ពុជា​​​ គោរព​​​ច្បាប់​​​កម្ពុជា​​​”។ លោក​​​បាន​​​មាន​​​ប្រសាសន៍​​​បន្ថែម​​​ទៀត​​​ថា “ជនជាតិ​​​ចិន​​​ ដែល​​​មក​​​កម្ពុជា​​​ គឺ​​​មក​​​កម្ពុជា​​​ដោយ​​​ខ្លួន​​​ឯង” មិន​​​មែន​​​ដោយ​​​សារតែ​​​ពួក​​​គេ​​​ត្រូវ​​​បាន​​​បង្ខំ​​​ឲ្យ​​​ចេញ​​​ពី​​​ប្រទេស​​​វៀតណាម​​​ដោយ​​​សារ​​​អំពើ​​​ហិង្សា​​​នោះទេ។

កាល​​​ពី​​​ថ្ងៃ​​​សុក្រ គណបក្ស​​​សង្គ្រោះជាតិ​​​ក៏​​​បាន​​​ចេញ​​សេចក្ដី​​​ថ្លែង​​​ការណ៍​​​មួយ​​​ដែរ​​​ ដើម្បី​​​គាំទ្រ​​​អ្វី​​​ដែល​​​ខ្លួន​​​ហៅ​​​ថា “ជន​​​ភៀស​​​ខ្លួន​​​ចិន​” ហើយ​​​បាន​​​ស្នើ​​​ឲ្យ​​​អ្នក​​​គាំទ្រ​​​គណបក្ស​​​ប្រឆាំង​​​ជួយ​​​ជន​​​ជាតិ​​​ចិន​​​ ដែល​​​មក​​​ដល់​​​ថ្មីៗ​​​តាម​​​លទ្ធភាព​​​ដែល​​​អាច​​​ធ្វើ​​​ទៅ​​​បាន​​​។

សេចក្ដី​​​ថ្លែង​​​ការណ៍​​​នេះ​​​មាន​​​ខ្លឹម​​​សារ​​​ដូច្នេះ​​​ថា “សូម​​​បង​​​ប្អូន​​​ជន​​​រួម​​​ជាតិ​​​មេត្តា​​​ជួយ​​​ជន​​​ជាតិ​​​ចិន​​​ ដែល​​​កំពុង​​​ភៀសខ្លួន​​​តាម​​​រយៈ​​​ការ​​​ផ្ដល់​​​ចំណី​​​អាហារ​​​ ការ​​​ស្នាក់​​​នៅ​​​ និង​​​ថ្នាំ​​​ពេទ្យ​​​”។

លោក​​​ សម រង្ស៊ី ប្រធាន​​​គណបក្ស​​​សង្គ្រោះ​​​ជាតិ​​​ ដែល​​​ល្បីល្បាញ​​​ខាង​​​ប្រើ​​​វោហា​​​សាស្ត្រ​​​ប្រឆាំង​​​ជនជាតិ​​​វៀតណាម​​​​​​បាន​​​មាន​​​ប្រសាសន៍​​​កាល​​​ពី​​​ខែ​​​មករាថា គណបក្ស​​​របស់​​​លោក​​​គាំទ្រ​​​ការ​​​អះអាង​​​សិទ្ធ​​ិ​​​​កាន់​​​កាប់​​​របស់​​ចិន​​​ លើ​​​​​​ដែន​​​សមុទ្រ​​​មាន​​​វិវាទ​​​នេះ​​​ ដែល​​​ផ្នែក​​​ខ្លះ​​​នៃ​​​​​​​​​​ប្រទេស​​​វៀតណាម​​​ ​​ហ្វីលីពីន​​​ ឥណ្ឌូនេសុី ម៉ាឡេស៊ី ព្រុយណេ និង​​​កោះ​​​តៃវ៉ាន់​​​ ដែន​​​សមុទ្រ​​​នេះ​​​ក៏​​​ត្រូវ​​​បាន​​​អះអាង​​​សិទ្ធិ​​​កាន់​​​កាប់​​​ដែរ​​​។

លោក​​​ ញ៉ែម​​​ បុញ្ញរិទ្ធ អ្នកនាំ​​​​​​ពាក្យ​​​គណបក្ស​​​សង្គ្រោះ​​​ជាតិ​​​បាន​​​មាន​​​ប្រសាសន៍​​​​​​ថា វៀតណាម​​​ មិនទាន់​​​សាកល្បង​​​ខ្លួន​​​ឯង​​​ផ្ទាល់​​​នោះ​​​ទេ។ លោក​​​បាន​​​លើក​​​ឡើង​​​ទៀត​​​ថា “វៀតណាម​​​​​​បាន​​​អនុញ្ញាត​​​ឲ្យ​​​ពល​​​រដ្ឋ​​​របស់​​​ខ្លួន​​​ធ្វើ​​​បាតុកម្ម​​​​​​ប្រឆាំង​​​ជនជាតិ​​​ចិន​​​ ហើយ​​​ជន​​​ជាតិ​​​កំពុង​​​ភៀស​​​ខ្លួន​​​មក​​​កម្ពុជា​​​ ប៉ុន្តែ​​​នៅ​​​ក្នុង​​​ប្រទេស​​​កម្ពុជា​​​ ពួក​​​គេ​​​បាន​​​អនុញ្ញាត​​​ឲ្យ​​​ជនជាតិ​​​វៀតណាម​​​ កាប់​​​បំផ្លាញ​​​ព្រៃ​​​ឈើ និង​​​យក​​​ដី​​​របស់​​​ប្រជាពល​​​រដ្ឋ​​​កម្ពុជា​​​”៕ សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស