នៅក្នុងការតស៊ូរបស់លោកដើម្បីសិទ្ធិរបស់កម្មករនោះ លោក ស ម៉ូរ៉ា នៅតែរឹងរូស។ សមាជិករបស់លោក ស មូ៉រ៉ា មេដឹកនាំសហជីពដែលនៅពីក្រោយការបិទស្ថានីយប្រេងឥន្ធនៈកាល់តិចទូទាំងរាជធានីភ្នំពេញនេះ នៅតែបន្តធ្វើកូដកម្មកាលពីម្សិលមិញ បើទោះជាមានកិច្ចព្រមព្រៀងច្បាស់ លាស់កាលពីថ្ងៃសុក្រឲ្យបុគ្គលិកត្រឡប់ទៅធ្វើការតាមស្ថានីយរបស់ខ្លួនវិញក៏ដោយ។
លោក ស ម៉ូរ៉ា បានមានប្រសាសន៍កាលពីម្សិលមិញថា “យើងយល់ព្រមជាគោលការណ៍តែប៉ុណ្ណោះ”។ លោកបានពន្យល់់ប្រាប់ថា លោកចង់ឲ្យមានកិច្ចព្រមព្រៀងជាលាយលក្ខណ៍អក្សរមុនពេលសមាជិករបស់លោកត្រឡប់ទៅធ្វើការវិញ។”យើងមិនបានទទួលព័ត៌មានអ្វីឡើយ”។
បុគ្គលិកក្រុមហ៊ុនកាល់តិចប្រហែល៣០០នាក់ដែលគាំទ្រដោយសហព័ន្ធសហជីពកម្មករចំណីអាហារនិងសេវាកម្មកម្ពុជាបានធ្វើកូដកម្មចាប់តាំងពីថ្ងៃច័ន្ទ សប្តាហ៍មុនទាមទារដំឡើងប្រាក់ឈ្នួលពី១១០ដុល្លារដល់១៦០ដុល្លារ។
កាលពីថ្ងៃសុក្រ ក្រុមហ៊ុនកាល់តិចបានផ្តល់ប្រាក់ឧបត្ថម្ភចំនួន២០ដុល្លារដល់បុគ្គលិកដើម្បីឲ្យត្រឡប់ទៅធ្វើការវិញ ខណៈដែលក្រុមហ៊ុនធ្វើការសិក្សាពីប្រាក់ឈ្នួលនេះរយៈពេលពីរខែសិន។
លោក ស ម៉ូរ៉ា បានប្រាប់អ្នកយកព័ត៌មានថា លោកបានយល់ព្រមចំពោះកិច្ចព្រមព្រៀងនេះ ប៉ុន្តែ ស្ថានីយប្រេងកាល់តិចទាំងអស់នៅបិទដដែលកាលពីចុងសប្តាហ៍នេះ។
អ្នកនាំពាក្យក្រុមហ៊ុនកាល់តិចម្នាក់បាននិយាយថា ក្រុមហ៊ុនកំពុងពិនិត្យមើលជម្រើសរបស់ខ្លួននៅឡើយ។ ការតស៊ូរបស់លោក ស ម៉ូរ៉ា ដើម្បីទាមទារសិទ្ធិសម្រាប់កម្មករនោះបានចាប់ផ្តើមពេលលោកសម្រាកព្យាបាលជំងឺនៅមន្ទីរពេទ្យកាលពីឆ្នាំ២០០១។
លោក ស ម៉ូរ៉ា ជាកម្មករកាត់ដែរនៅរោងចក្រមួយ ដែលនៅពេលនោះលោកមានជំងឺ ហើយបានសុំច្បាប់ឈប់សម្រាក។ ថៅកែរបស់លោកបានបដិសេធ ហើយមិនយូរប៉ុន្មានលោក ស ម៉ូរ៉ា ត្រូវបានអនុញ្ញាតឲ្យទៅព្យាបាលនៅមន្ទីរពេទ្យ។
អង្គុយនៅក្នុងផ្ទះរបស់លោកក្នុងរាជធានីភ្នំពេញ ដែលប្រើជាការិយាល័យរបស់លោកផងដែរនោះ លោក ស ម៉ូរ៉ា បានមានប្រសាសន៍កាលពីម្សិល មិញថា ពួកគេបានចាត់ទុកពួកយើងដូចជាសត្វ។ ពួកគេបានបង្ខំខ្ញុំឲ្យធ្វើការទាំងឈឺ ហើយបានព្រមានខ្ញុំមិនឲ្យឈប់ទៀតទេ បន្ទាប់ពីចេញពីមន្ទីរពេទ្យវិញ”។
បន្ទាប់ពីសុខភាពលោកប្រសើរឡើងវិញ លោក ស ម៉ូរ៉ា បានចាប់ផ្តើមធ្វើជាអ្នកស្ម័គ្រចិត្តនៅសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ជាសហជីពឯករាជ្យធំបំផុតក្នុងវិស័យកាត់ដេរ។
កាលពីឆ្នាំ២០០៥ លោក ស ម៉ូរ៉ា បានបាត់បង់ការងារនៅពេលរោងចក្រដែលលោកធ្វើការនោះបានបិទ ហើយកាលពីឆ្នាំ២០០៧លោកបានបង្កើតសហព័ន្ធសហជីពកម្មករចំណីអាហារ និងសេវាកម្មកម្ពុជាដែលឥឡូវនេះមានសមាជិកប្រហែល៣.០០០នាក់ ហើយនៅពេលថ្មីៗនេះបានធ្វើឲ្យមានការចុះផ្សាយមានព័ត៌មានជាច្រើនចំពោះការតវ៉ានឹងក្រុមហ៊ុនធំៗមួយចំនួននៅក្នុងប្រទេស។
កាលពីដើមខែនេះ លោក ស ម៉ូរ៉ា បានចរចាសុំដំឡើងប្រាក់ឈ្នួលពី១២០ដុល្លារ ដល់១៥០ដុល្លារសម្រាប់បុគ្គលិកនៅក្រុមហ៊ុន ខេមប្រូ៊ ជាក្រុមហ៊ុនផលិតស្រាបៀរអង្គរ ប្រកបដោយជោគជ័យ។ ការទាមទាររបស់បុគ្គលិកបានជោគជ័យបន្ទាប់ពីបានធ្វើកូដកម្មបានតែពីរថ្ងៃប៉ុណ្ណោះ។
កាលពីមុនសហជីពរបស់លោក ស ម៉ូរ៉ា បានតវ៉ានឹងក្រុមហ៊ុនដ៏ធំមួយទៀតគឺក្រុមហ៊ុន ខេមបូឌា ប្រ៊ូវើរី អិលធីឌី ដែលនៅពេលនោះលោកបានចរចាសុំដំឡើងប្រាក់ឈ្នួល៤០ដុល្លារសម្រាប់ស្ត្រីផ្សព្វផ្សាយស្រាបៀរ ដែលមានប្រាក់ឈ្នួលតែ៦០ដុល្លារ។
លោក ស ម៉ូរ៉ា បានមានប្រសាសន៍ថា គន្លឹះក្នុងការរៀបចំបានជោគជ័យក្នុងវិស័យពាណិជ្ជកម្មគឺត្រូវផ្តោតគោលដៅលើក្រុមហ៊ុន ដែលកាន់កាប់ដោយក្រុមហ៊ុនយីហោអន្តរជាតិ មិនមែនក្រុមហ៊ុនរបស់ពាណិជ្ជករខ្មែរមានអំណាចទេ។ លោក ស ម៉ូរ៉ា បានមានប្រសាសន៍ថា “ប្រសិនបើក្រុមហ៊ុននោះមានទំនាក់ទំនងជាមួយក្រុមហ៊ុនយីើហោអន្តរជាតិ ពួកគេមានការទទួលខុសត្រូវផ្នែកសង្គម។ ប្រសិនបើក្រុមហ៊ុនទាំងនោះគ្រប់គ្រងដោយខ្មែរនោះ ពួកគេមិនខ្វល់ពីសិទ្ធិរបស់បុគ្គលិកឡើយ”។
ក្រុមហ៊ុន Carlsberg ជាក្រុមហ៊ុនផលិតស្រាបៀរដ៏ធំរបស់ដាណឺម៉ាក មានភាគហ៊ុនក្នុងក្រុមហ៊ុន ខេមប្រ៊ូ និងក្រុមហ៊ុន Heineken មានភាគហ៊ុននៅក្រុមហ៊ុន ខេបូឌា ប្រូ៊វើរី លីមីតធីត។ ក្រុមហ៊ុនកាល់តិច គឺជាឈ្មោះយីហោរបស់ក្រុមហ៊ុន ឈេហ្វរ៉ុនជាក្រុមហ៊ុនប្រេងឥន្ធនៈដ៏ធំរបស់អាមេរិកក្នុងប្រទេសកម្ពុជា។
ភាពជោគជ័យរបស់សហជីពលោកចំណាយកម្លាំងច្រើនណាស់។ លោកបានលើកឡើងថា ជួនកាលលោកបានហែក្បួនកាត់រាជធានីជាមួយបុគ្គលិកដែលធ្វើការឲ្យក្រុមហ៊ុនដែលលោកតវ៉ាជំទាស់ ហើយលោកបារម្ភថា គេនឹងឃ្លាំមើលផ្ទះរបស់លោក ហើយលោកបានបដិសេធមិនទទួលសំណូកឲ្យបញ្ឈប់ការតវ៉ាឡើយ។
ប៉ុន្តែ លោក ស ម៉ូរ៉ា នៅតែប្តេជ្ញាចិត្តចំពោះបុព្វហេតុរបស់លោក។ លោកបានមានប្រសាសន៍ថា “ប្រសិនបើយើងខ្លាចអ្នកទាំងនេះ គេអាចធ្វើអ្វីតាមចិត្តរបស់ពួកគេ។ ប៉ុន្តែ ប្រសិនយើងនៅតែតស៊ូ យើងសង្ឃឹមថា អាចធ្វើឲ្យមានការផ្លាស់ប្តូរមិនខាន៕ សារុន