មន្ត្រីអន្តោប្រវេសន៍ម្នាក់បាននិយាយថា ជនជាតិចិនជាង១.៦០០នាក់បានឆ្លងដែនពីប្រទេសវៀតណាមចូលមកប្រទេសកម្ពុជា កាលពីសប្តាហ៍មុន ខណៈដែលកុបកម្មនៅទីនោះបានបណ្តាលឲ្យមនុស្សដល់ទៅ២១នាក់ស្លាប់ ពេលដែលក្រុមមនុស្សបានប្រតិកម្មដោយហិង្សាចំពោះការដាក់ឧបករណ៍បូមប្រេងរបស់ចិននៅក្នុងតំបន់សមុទ្រចិនខាងត្បូង ដែលទាមទារសិទ្ធិកាន់កាប់ដោយវៀតណាម។
កាលពីថ្ងៃពុធ មនុស្ស៦៤០នាក់បានឆ្លងដែនចូលប្រទេសកម្ពុជា ខណៈដែលក្រុមមនុស្សប្រឆាំងជនជាតិចិនបានដុតរោងចក្រ និងក្រុមហ៊ុនរបស់ចិននៅទូទាំងប្រទេសវៀតណាម ដោយចំនួនជនអ្នកឆ្លងដែនមានការកើនឡើងពេញមួយសប្តាហ៍។
លោក ម៉ម យ៉យ អនុប្រធាននគរបាលអន្តោប្រវេសន៍នៅច្រកទ្វារអន្តរជាតិបាវិតក្នុងខេត្តស្វាយរៀងបានមានប្រសាសន៍ថា ប៉ុន្តែ បន្ទាប់ពីការសន្យារបស់រដ្ឋាភិបាលវៀតណាមកាលពីថ្ងៃសៅរ៍ ថានឹងបង្ក្រាបមិនឲ្យមានភាពចលាចលបន្ថែមទៀតនោះ ការឆ្លងព្រំដែនបានត្រឡប់មករកភាពធម្មតាវិញហើយកាលពីម្សិលមិញ។
លោកបានមានប្រសាសន៍ថា “កាលពីសប្តាហ៍មុន មានប្រជាជនចិនជាច្រើនបានឆ្លងដែន ប៉ុន្តែ នៅថ្ងៃនេះមានប្រហែល៤០នាក់ប៉ុណ្ណោះបានឆ្លងដែនតាមច្រកទ្វារអន្តរជាតិបាវិត ដែលជាចំនួនដូចធម្មតាអ៊ីចឹង”។
កាលពីថ្ងៃសៅរ៍នោះដែរ ក្រសួងការបរទេសចិនបានព្រមានពលរដ្ឋខ្លួនកុំឲ្យធ្វើដំណើរទៅប្រទេសវៀតណាមរហូតដល់ស្ថានភាពប្រសើរឡើងវិញសិន។
លោក ម៉ម យ៉យ បានមានប្រសាសន៍ថា គិតត្រឹមថ្ងៃម្សិលមិញមានជនជាតិចិនតែ៨០នាក់ប៉ុណ្ណោះក្នុងចំណោមជនជាតិចិនជាង១.៦០០នាក់ដែលបានភៀសខ្លួនមកកាន់ប្រទេសកម្ពុជានោះ បានត្រឡប់ទៅប្រទេសវៀតណាមវិញតាមច្រកទ្វារអន្តរជាតិនេះ៕សារុន