26 C
Phnom Penh

សមាជិក​រណសិរ្ស​រំដោះ​ជាតិ​ខ្មែរ​បដិសេធថា​មិន​បាន​រៀប​ចំ​ផែនការ​ផ្តួល​រំ​លំ​រដ្ឋាភិបាល​

ដោយ ឌឹ ខេមបូឌា ដេលី

បទវិភាគ

ហេន ចាន់ អាយុ​៣៣​ឆ្នាំ​ ជា​សមាជិក​រណសិរ្ស​រំដោះ​ជាតិ​ខ្មែរ​ ដែល​ត្រូវ​បាន​ចាប់​ខ្លួន​កាល​ពី​សប្ដាហ៍​មុន​ និង​ត្រូវ​បាន​ចោទ​ប្រកាន់​ពី​បទ​ក្លែង​បន្លំ​លិខិត​ឆ្លង​ដែន​ និង​រៀបចំ​ផែន​ការ​ផ្ដួល​រំលំ​រដ្ឋាភិបាល​នោះ ​បាន​និយាយ​នៅ​តុលាការ​កាល​ពី​ម្សិលមិញ​ថា គាត់​មិន​មាន​គោល​បំណង​ហិង្សា​ទេ​ ហើយ​គ្រាន់​តែ​មាន​ផែន​ការ​ផ្សព្វផ្សាយ​សៀវភៅ​រិះគន់​រដ្ឋាភិបាល​ប៉ុណ្ណោះ។

លោក​ ហេន ចាន់​ បាន​និយាយ​​នៅ​ក្នុង​បន្ទប់​រង់ចាំ​ទាំង​ដៃ​ជាប់​ខ្នោះ ស្លៀក​ពាក់​ឯកសណ្ឋាន​ពន្ធនាគារ​ពណ៌​ទឹកក្រូច​នៅ​មុន​ពេល​សាកសួរ​នៅ​សាលា​ដំបូង​រាជធានីភ្នំពេញ​កាល​ពី​ម្សិល​មិញ​ថា គាត់​ត្រូវ​បាន​សមាជិក​រណសិរ្ស​រំដោះ​ជាតិ​ខ្មែរ​ស្នើ​សុំ​ឲ្យ​ដឹក​សៀវភៅ​ទាំង​នោះ​។ រណសិរ្ស​រំដោះ​ជាតិ​ខ្មែរ​​​​ គឺ​​​ជា​ក្រុម​តស៊ូ​មតិ​ផ្នែក​នយោបាយ​គាំទ្រ​លទ្ធិ​ប្រជាធិបតេយ្យ​ ដែល​​​ត្រូវ​បាន​លោក​នាយក​រដ្ឋ​មន្ត្រី​ ហ៊ុន​ សែន​ ចាត់​ទុក​ថា ជា​អង្គការ​ភេរវកម្ម។

គាត់​បាន​និយាយ​សំដៅ​ដល់​សៀវភៅ​ “អាថ៌កំបាំង​នៃ​កម្ពុជា” ជា​សៀវភៅ​ប្រឆាំង​គណបក្ស​ប្រជាជន​កម្ពុជា​ ដែល​និពន្ធ​ដោយ​ស្ថាបនិក​ក្រុម​នេះ​ថា “ខ្ញុំ​បាន​ឆ្លង​ដែន​តាម​ច្រក​ទ្វារ​ព្រំដែន​ជាំ​សាងាំ​ នៅ​ក្នុង​ស្រុក​អន្លង់​វែង​ ខេត្ត​ឧត្តរមានជ័យ កាល​ពី​សប្ដាហ៍​មុន ជាមួយ​សៀវភៅ​ជាង​២០០​ក្បាល​របស់​រណសិរ្ស​រំដោះ​ជាតិ​ខ្មែរ​”។ គាត់​បាន​និយាយ​ថា “គេ​ឲ្យ​ខ្ញុំ​ចែក​ចាយ​សៀវភៅ​ទាំង​នេះ​នៅ​កម្ពុជា​”។

លោក​ សំ សេរី ប្រធាន​រណសិរ្ស​រំដោះ​ជាតិ​ខ្មែរ​រស់​នៅ​ក្នុង​ប្រទេស​ដាណឺម៉ាក ជា​ប្រទេស​ដែល​គាត់​បាន​ទទួល​សិទ្ធិ​ជ្រក​កោន​ផ្នែក​នយោបាយ។ កាល​ពី​ខែ​មេសា គាត់​និង​សមាជិក​១២​នាក់ទៀត​របស់​រណសិរ្ស​នេះ​ត្រូវ​បាន​រក​ឃើញ​ពិរុទ្ធ​ភាព​ពីបទ​រៀបចំ​ផែនការ​ផ្ដួល​រំលំ​រដ្ឋាភិបាល​ ហើយ​ត្រូវ​បាន​ផ្ដន្ទាទោស​ដាក់​ពន្ធនាគារ​ចន្លោះ​ពី​ប្រាំ​ឆ្នាំ​ដល់​ប្រាំបួន​ឆ្នាំ​ និង​​មាន​ប្រាំពីរ​នាក់​កំពុង​ជាប់​ឃុំ​នៅ​ពន្ធនាគារ​ព្រៃ​ស​។

និយាយ​​​​​​ជា​សាធារណៈ​ជា​លើក​ដំបូង​ចាប់​តាំង​ពី​កា​រចាប់​ខ្លួន​គាត់​មក​ លោក ចាន់ បាន​និយាយ​កាល​ពី​ម្សិលមិញ​ថា គាត់​អាច​ឆ្លង​ដែន​ដោយ​គ្មាន​បញ្ហា​ឡើយ​ ប៉ុន្តែ​គាត់​ត្រូវ​បាន​ចាប់​ខ្លួន​នៅ​ទីក្រុង​ភ្នំពេញ​នៅ​ពេល​ធ្វើ​ដំណើរ​ទៅ​ផ្ទះ​ម្ដាយ​គាត់​នៅ​ក្នុង​ខេត្ត​កំពង់​ស្ពឺ​។

គាត់​បាន​និយាយ​ថា “ខ្ញុំ​មាន​សៀវភៅ​រណសិរ្ស​រំដោះជាតិ​ខ្មែរ​ចំនួន​២៥០​ក្បាល​ នៅ​ក្នុង​តាក់​ស៊ី ហើយ​នៅ​ពេល​ដែល​នគរបាល​ឆែក​ឆេរ​ នគរបាល​បាន​ចាប់​ខ្លួន​ខ្ញុំ​នៅ​ក្នុង​សង្កាត់​ជ្រោយចង្វា​តែ​ម្ដង​”។

គាត់​បាន​និយាយ​អំពី​ថ្ងៃ​ដែល​ខ្មែរ​ក្រហម​ដួល​រលំ​ថា “សៀវភៅ​ទាំង​នេះ​ត្រូវ​បាន​បោះ​ពុម្ព​នៅ​ក្នុង​ប្រទេស​ថៃ និង​រៀបចំ​ដោយ​រណសិរ្ស​រំដោះ​ជាតិ​ខ្មែរ។ ពួក​គេ​បាន​ឲ្យ​ខ្ញុំ​យក​សៀវភៅ​នេះ​មក​កម្ពុជា ប៉ុន្តែ​ខ្ញុំ​ដឹង​ថា សៀវភៅ​​ដែល​និយាយ​អំពី​រណសិរ្ស​រំដោះ​ជាតិ​ខ្មែរ​​នេះ​គឺ​ជា​សៀវភៅ​ប្រឆាំង​គណបក្ស​ប្រជាជន​កម្ពុជា​ និង​ថ្ងៃ​៧​មករា”។ លោក​ ចាន់​ បាន​និយាយថា “ខ្ញុំ​មិន​ដឹង​ថា លិខិត​ឆ្លង​ដែន​នេះ​ក្លែង​ក្លាយ​ទេ​។ រណសិរ្ស​រំដោះ​ជាតិ​ខ្មែរ​បាន​រៀបចំ​ឲ្យ​ខ្ញុំ​ ប៉ុន្តែ​ឯកសារ​ទាំងអស់​ត្រូវ​បាន​បោះពុម្ព​នៅ​ក្នុង​ប្រទេស​ថៃ​”។

ប៉ុន្តែ​ចំពោះ​ការ​​​​ចោទ​ប្រកាន់​ពី​បទ​រៀបចំ​ផែនការ​ផ្ដួល​រំលំ​រដ្ឋាភិបាល​ជា​បទ​ឧក្រិដ្ឋ​ដែល​អាច​មាន​ទោស​ជាប់​ពន្ធនាគារ​រហូត​ដល់​១០​ឆ្នាំនេះ​ លោក​ ចាន់​ បាន​និយាយ​ថា គាត់​គ្មាន​កំហុស​ទេ​។ គាត់​បាន​និយាយ​ថា ​“ឥឡូវ​នេះ​ គេ​បាន​បញ្ជូន​ខ្ញុំ​ទៅ​ឲ្យ​ចៅ​ក្រម​ស៊ើបសួរ​ ដើម្បី​សាកសួរ​បន្ថែម​ទៀត​ ដោយ​គ្មាន​មេធាវី​ការពារ​​​។ ខ្ញុំ​គ្មាន​ទោស​ទេ​”។

គេ​មិន​អាច​ទាក់ទង​លោក​ អឹុម វណ្ណៈ ចៅ​ក្រម​ស៊ើបសួរ​ ដើម្បី​សុំ​អត្ថាធិប្បាយ​បាន​ទេ​។

លោក​ សេរី បាន​និយាយ​តាម​ទូរស័ព្ទ​ពី​ប្រទេស​ដាណឺម៉ាក កាល​ពី​ម្សិលមិញ​ថា ក្រុម​របស់​លោក​មិន​បាន​ធ្វើ​លិខិត​ឆ្លង​ដែន​ក្លែង​ក្លាយ​ទេ​ ហើយ​ខ្ញុំ​ក៏​មិន​បាន​ឲ្យ​លោក​ ចាន់​ ឆ្លង​ចូល​មក​កម្ពុជា​ដែរ​។ គាត់​បាន​និយាយ​ថា “អំពីលិខិត​ឆ្លងដែន​ក្លែង​ក្លាយ​នេះ​ យើង​មិន​ដឹង​រឿង​នេះ​ទេ​។ រណសិរ្ស​រំដោះជាតិ​ខ្មែរ​មិន​មាន​គោល​ការណ៍​ធ្វើ​ឯកសារ​ក្លែង​ក្លាយ​ទេ​។ លោក​ ចាន់​ បាន​សម្រេច​ចិត្ត​វិល​ត្រឡប់​មក​កម្ពុជា​​ដោយ​ខ្លួន​ឯង​ ហើយ​បន្ទាប់​ពី​គាត់​បាន​សម្រេច​ចិត្ត​រួច​ហើយ​ យើ​ងបាន​ឲ្យ​សៀវភៅ​គាត់​ខ្លះ”។ លោក​ សេរី បាន​និយាយ​ថា លោកកំពុង​រក​មេធាវី​ឲ្យ​លោក​ ចាន់៕ គឹមហឿន

(រាយការណ៍​បន្ថែម​ដោយ LaurenCrothers)

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស