តំណាងបុគ្គលិកបាននិយាយថា ស្ថានីយប្រេងឥន្ធនៈកាល់តិចទាំងអស់នៅបិទនៅឡើយកាលពីម្សិលមិញ បន្ទាប់ពីមន្ត្រីក្រុមហ៊ុនមិនបានធ្វើកិច្ចព្រមព្រៀងជាលាយលក្ខណ៍អក្សរ ដោយលើកឡើងថា ពួកគេនឹងផ្ដល់ប្រាក់ឧបត្ថម្ភ២០ដុល្លារដើម្បីឲ្យបញ្ចប់កូដកម្មនេះជាបណ្ដោះអាសន្នសិន។
ឈួន សុភ័ណណារ៉ា បាននិយាយថា “យើងមិនទាន់ត្រឡប់ទៅធ្វើការវិញនៅឡើយទេ ពីព្រោះក្រុមហ៊ុនកាល់តិចមិនបានចេញលិខិតផ្លូវការលើកឡើងពីអ្វីដែលបានព្រមព្រៀងគ្នាកាលពីថ្ងៃសុក្រឡើយ” ។ គាត់បានបន្ថែមថា “តំណាងក្រុមហ៊ុនបានអះអាងថា ការិយាល័យប្រចាំតំបន់មិនបានយល់ព្រមចំពោះកិច្ចព្រមព្រៀងនេះទេ ប៉ុន្តែខ្ញុំគិតថា ក្រុមហ៊ុនមិនមានឆន្ទៈដោះស្រាយបញ្ហានេះឡើយ” ។
យោងតាមលោក ស ម៉ូរ៉ា ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា បានឲ្យដឹងថា កាលពីថ្ងៃសុក្រ មន្ត្រីក្រុមហ៊ុនកាល់តិចបានយល់ព្រមផ្ដល់ប្រាក់ឧបត្ថម្ភដល់បុគ្គលិកចំនួន២០ដុល្លារ ខណៈដែលខ្លួនត្រូវធ្វើការសិក្សារយៈពេលពីរខែដើម្បីវាយតម្លៃអំពីប្រាក់ឈ្នួលនេះសិន។
ចាប់តាំងពីថ្ងៃទី១២ ខែឧសភាមក បុគ្គលិកប្រហែល៣០០នាក់បានធ្វើកូដកម្មទាមទារដំឡើងប្រាក់ឈ្នួលពី១១០ដុល្លារ ដល់១៦០ដុល្លារ។ អ្នកនាំពាក្យក្រុមហ៊ុនកាល់តិចម្នាក់បាននិយាយថា ក្រុមហ៊ុននឹងជួបប្រជុំនៅម៉ោង២រសៀលថ្ងៃនេះជាមួយតំណាងក្រសួងការងារព្រមទាំងបុគ្គលិកផងដែរ។ បុគ្គលិកបាននិយាយថា កូដកម្មនឹងបន្តធ្វើដដែល ប្រសិនបើមិនមានកិច្ចព្រមព្រៀងទេនោះ៕ សារុន