គណៈប្រតិភូជប៉ុនបានមកដល់ប្រទេសកម្ពុជាកាលពីម្សិលមិញសម្រាប់ដំណើរទស្សនកិច្ចរយៈពេលប្រាំថ្ងៃដើម្បីវាយតម្លៃអំពីតម្រូវការជំនួយក្នុងការកែទម្រង់ប្រព័ន្ធបោះឆ្នោត។
នៅក្នុងសេចក្ដីប្រកាសព័ត៌មានមួយ ស្ថានទូតជប៉ុនបានលើកឡើងថា គណៈប្រតិភូមួយក្រុមដែលមានសមាជិក១០នាក់ដឹកនាំដោយលោក សេនយ៉ា ម៉ូរី អគ្គនាយករងផ្នែកអភិវឌ្ឍន៍ឧស្សាហកម្ម និងគោលនយោបាយសាធារណៈនៃទីភ្នាក់ងារសហប្រតិបត្តិការអន្តរជាតិជប៉ុនរួមទាំងមន្ត្រីរដ្ឋាភិបាល និងសាស្ត្រាចារ្យជាច្រើនរូបទៀត។
សេចក្តីប្រកាសព័ត៌មានដដែលនេះលើកឡើងថា គណៈប្រតិភូនេះនឹងជួបប្រជុំជាមួយមន្ត្រីគណបក្សប្រជាជនកម្ពុជា និងគណបក្សសង្គ្រោះជាតិ ព្រមទាំងដៃគូអភិវឌ្ឍន៍អន្តរជាតិ និងអង្គការសង្គមស៊ីវិលផងដែរ “ដើម្បីសិក្សាអំពីស្ថានភាពបច្ចុប្បន្ន និងបញ្ជាក់ពីតម្រូវការសម្រាប់កំណែទម្រង់ ដើម្បីទទួលបានព័ត៌មានចាំបាច់សម្រាប់ឲ្យដឹងថាតើជប៉ុនត្រូវផ្តល់ជំនួយបែបណាដល់កំណែទម្រង់ប្រព័ន្ធបោះឆ្នោតនៅកម្ពុជា”។
សេចក្តីប្រកាសនេះបន្តថា ដំណើរទស្សនកិច្ចនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានស្នើសុំជំនួយបែបនេះកាលពីខែវិច្ឆិកា។
លោកស្រី ឡូរ៉ា ថនតុន នាយិកាប្រចាំប្រទេសនៃវិទ្យាស្ថានជាតិប្រជាធិបតេយ្យ ដែលមានមូលដ្ឋានក្នុងទីក្រុងវ៉ាស៊ីនតោន ដែលជាសមាជិកសម្ព័ន្ធកំណែទម្រង់ការបោះឆ្នោតផងដែរបានមានប្រសាសន៍ថា លោកស្រីរំពឹងថា ក្រុមនេះនឹងមានសំណួរជាច្រើន។
លោកស្រីបានមានប្រសាសន៍ថា “ដោយសារវិទ្យាស្ថានជាតិប្រជាធិបតេយ្យមានការជាប់ពាក់ព័ន្ធដែរនោះ យើងនឹងឆ្លើយសំណួររបស់ពួកគេទាំងអស់ ប៉ុន្តែយើងនឹងលើកឡើងម្តងទៀតអំពីអនុសាសន៍សម្រាប់ធ្វើកំណែទម្រង់ដូចដែលយើងបានស្នើឡើងពីមុនអ៊ីចឹង”។
លោកស្រី ថនតុន បានបន្ថែមថា “យើងនឹងលើកឡើងសាជាថ្មីអំពីសារៈសំខាន់នៃការកែទម្រង់គណៈកម្មាធិការជាតិរៀបចំការបោះឆ្នោត ដើម្បីឲ្យមានតម្លាភាព និងបើកទូលាយ។ ហើយយើងគិតថា ចាំបាច់ត្រូវកែទម្រង់ដំណើរការចុះឈ្មោះបោះឆ្នោត”។
កិច្ចប្រជុំមួយក្នុងចំណោមកិច្ចប្រជុំដំបូងដែលមាននៅក្នុងរបៀបវារៈគឺត្រូវជួបប្រជុំជាមួយគណបក្សសង្គ្រោះជាតិនៅថ្ងៃនេះ។ លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិបានមានប្រសាសន៍ថា លោកសង្ឃឹមថា ដំណើរទស្សនកិច្ចនេះនឹងធ្វើឲ្យមានការចរចាឡើងវិញជាមួយគណបក្សប្រជាជនកម្ពុជា ដែលបានជាប់គាំងចាប់តាំងពីខែមុនមក។
លោក សុន ឆ័យ បានមានប្រសាសន៍ថា “យើងមានគណៈប្រតិភូមកពីប្រទេសជប៉ុន ហើយពួកគេនឹងជួបប្រជុំជាមួយសមាជិកទាំងសងខាងនៃគណៈកម្មាធិការរួម [ស្ដីពីកំណែទម្រង់ការបោះឆ្នោត] ហើយជំនួបនេះអាចធ្វើឲ្យគណៈកម្មាធិការរួមនេះមានសកម្មភាពឡើងវិញ និងមានការពិភាក្សារួម”។ លោកបានបន្ថែមថា “ខ្ញុំគិតថា គណបក្សប្រជាជនកម្ពុជាចង់បន្តការចរចាឡើងវិញដែរ។ យើងចាប់ផ្ដើមដោយការជួបប្រជុំជាមួយគណៈប្រតិភូជប៉ុនដាច់ដោយឡែកពីគ្នា ប៉ុន្តែយើងសង្ឃឹមថា នឹងមានឱកាសជួបគ្នា”។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត បានស្វាគមន៍ជំនួយនេះ។ លោកបានមានប្រសាសន៍ថា “តាមធម្មតា យើងមានចំណេះដឹង វាងាយស្រួលសម្រាប់យើងក្នុងការអនុវត្តជាក់ស្តែង។ យើងមានចំណេះដឹងកាន់តែទូលំទូលាយ យើងធ្វើការងារបានកាន់តែល្អ។ គណៈប្រតិភូជប៉ូនមកទីនេះដើម្បីសិក្សាអំពីប្រព័ន្ធបោះឆ្នោត ហើយមិនយូរប៉ុន្មាន ពួកគេនឹងជួយកែទម្រង់ប្រព័ន្ធបោះឆ្នោតឲ្យយើង”៕ សារុន
(រាយការណ៍បន្ថែមដោយ ZsomborPeter និង ផន បុប្ផា)