27 C
Phnom Penh

គ្រូបង្រៀន​ដែលអះអាងថា មាន​អំពើពុករលួយ​ ត្រូវ​ព្រមាន​មិន​ឲ្យ​និយាយ​ជាមួយ​ប្រព័ន្ធ​ផ្សព្វផ្សាយ

ដោយ ឌឹ ខេមបូឌា ដេលី

បទវិភាគ

សមាគម​គ្រូបង្រៀន​បាន​លើក​ឡើង​ថា គ្រូបង្រៀន​នៅខេត្ត​ឧត្តរមាន​ជ័យ​ ដែល​កាល​ពី​សប្ដាហ៍​មុន​បាន​ចោទ​មន្ត្រី​អប់​រំស្រុក​ថា ​បាន​លួច​ប្រាក់​ខែ​របស់​ពួកគាត់​នោះ កាលពី​ម្សិល​មិញ ត្រូវ​បាន​គំរាម​បណ្ដេញ​ចេញ​ចំពោះ​ការ​និយាយ​ជា​មួយ​ប្រព័ន្ធ​ផ្សព្វផ្សាយ​​។ ប្រធាន​ការិយាល័យ​អប់រំ​ស្រុក​អន្លង់​វែង​បាន​កោះ​ហៅ​គ្រូបង្រៀន​ និង​មន្ត្រី​សាលា​​ប្រហែល​១៥​នាក់​មក​កាន់​ការិយាល័យ​ស្រុក​ដើម្បី​ធ្វើការ​គំរាម​។

អ្នកគ្រូ​ ញ៉ន សារុន តំណាង​សមាគម​គ្រូបង្រៀន​កម្ពុជា​ឯករាជ្យ​ និង​ជា​គ្រូបង្រៀន​ម្នាក់​នៅ​សាលា​បឋម​សិក្សា​អន្លង់​វែង ជា​សាលា​ដែល​​គ្រូ​បង្រៀន​​១៧​នាក់​បាន​ដាក់​ពាក្យ​បណ្ដឹង​ថា ពួកគាត់​ត្រូវ​បាន​កាត់​ប្រាក់​​បង្រៀន​ថែម​ម៉ោង​នោះ បាន​មាន​ប្រសាសន៍​ថា “នៅព្រឹក​នេះ​មន្ត្រី​អប់រំស្រុក និង​ខេត្តបាន​ប្រាប់​ពួក​យើង​ថា ប្រសិន​បើ​យើង​និយាយ​ជាមួយ​ប្រព័ន្ធ​ផ្សព្វផ្សាយ​ទៀត យើង​អាច​ត្រូវ​លុប​ឈ្មោះ​ចេញពីបញ្ជី​គ្រូបង្រៀន​”។ អ្នក​គ្រូ​បាន​បន្ថែម​ថា “ពួកគេ​និយាយ​ថា យើង​​គួរ​និយាយជាមួយ​មន្ត្រី​ជាមុន​សិន មុន​ពេល​និយាយ​ជាមួយ​ប្រព័ន្ធ​ផ្សព្វផ្សាយ​”។

គ្រូ​បង្រៀន​១៧​នាក់​នៅ​សាលា​បឋម​សិក្សា​អន្លង់​វែង និង​គ្រូបង្រៀន​៨០​នាក់​ទៀត​មក​ពី​ទូទាំង​ខេត្ត​មិន​ទទួល​បាន​ប្រាក់​បង្រៀន​ថែម​ម៉ោង​សម្រាប់​ឆមាសទី១នៃឆ្នាំសិក្សា​​នេះ​ទេ ប៉ុន្តែ​បែរ​ជា​បាន​ទៅ​លើ​គ្រូ​ដែល​មិន​ត្រូវ​បាន​ទៅវិញ​ ហើយត្រូវបាន​មន្ត្រី​អប់​រំ​ស្រុក​យក​​លុយ​ទាំង​នោះ​មក​វិញ។

ដំបូង​សមាគម​គ្រូបង្រៀន​កម្ពុជា​ឯករាជ្យ​បាន​​​ដាក់ពាក្យ​បណ្ដឹង​ទៅ​ក្រសួង​អប់​រំ​​កាលពី​ថ្ងៃទី​១២ ខែ​ឧសភា ហើយ​មួយ​ថ្ងៃ​ក្រោយ​មក​បាន​ទាក់​ទង​ទៅ​ប្រព័ន្ធ​ផ្សព្វផ្សាយ​។ ជាការ​ឆ្លើយ​តប​ ក្រុម​មន្ត្រី​ខេត្ត​បាន​អះអាង​ថា កំហុស​បច្ចេក​ទេស​បណ្ដាល​ឲ្យ​មាន​បញ្ហា​ក្នុង​ការ​បើក​ប្រាក់​នេះ ហើយ​បាន​សន្យាកែតម្រូវ​​បញ្ហា​នេះ​។

លោក ឈឿន ឈា ប្រធាន​មន្ទីរ​អប់រំ​ខេត្ត​ឧត្តរ​មាន​ជ័យ​បាន​មាន​​ប្រសាសន៍​ថា គ្រូ​បង្រៀន​ទាំង​នោះ​ត្រូវ​បាន​កោះ​ហៅ​ឲ្យ​មក​ប្រជុំ​ដើម្បី​ស្ដាប់​ការ​ពន្យល់​ មិន​មែនបំភិត​បំភ័យ​ឡើយ​។ លោក ឈឿន ឈា បាន​មាន​ប្រសាសន៍​ថា “យើង​បាន​ប្រាប់​មន្ត្រីអប់​រំ​ឲ្យ​ហៅ​គ្រូ​បង្រៀន​ដែល​មាន​បញ្ហា​មក​ពន្យល់​អំពី​កំហុស​បច្ចេកទេសនេះ​”។ លោក​បាន​បន្ថែម​ថា គ្រូបង្រៀនទាំង​នេះ​គួរ​ចំណាយ​ពេល​និយាយ​ជា​មួយ​ក្រុម​មន្ត្រី​ប្រសើរ​ជាង​និយាយ​ជា​មួយ​ប្រព័ន្ធ​ផ្សព្វផ្សាយ។

ទោះ​ជាយ៉ាង​ណា លោក​ រស់ សាលីន ប្រធាន​ខុទ្ទកាល័យ​ក្រសួង​អប់​រំ​បាន​មាន​ប្រសាសន៍​ថា លោក​មិន​បាន​ទទួលព័ត៌មាន​នេះទេ ប៉ុន្តែ​គ្រូបង្រៀន​មាន​សិទ្ធិ​និយា​យ​ពី​ទុក្ខ​លំបាក​របស់​ខ្លួន​ជា​មួយ​ប្រព័ន្ធ​ផ្សព្វផ្សាយ​។ លោក សាលីន បាន​មាន​ប្រសាសន៍​ថា “យើង​មិន​មាន​គោល​នយោបាយ​ហាម​ឃាត់​ពួកគាត់​មិន​ឲ្យ​និយាយ​ជា​មួយ​ប្រព័ន្ធ​ផ្សព្វផ្សាយ​ទេ”។

លោក សឿន ភារិន ជាគ្រូបង្រៀន​នៅ​សាលា​បឋម​សិក្សា​តាដេវ ក្នុង​ស្រុក​អន្លង់វែង និង​ជា​សមាជិក​សមាគម​គ្រូបង្រៀន​កម្ពុជា​ឯករាជ្យ​បាន​មាន​ប្រសាសន៍​ថា លោក​កំពុង​រង់ចាំ​ការ​ដោះ​ស្រាយ​ប្រាក់​ខែ​របស់​លោក។ លោក​បាន​មាន​ប្រសាសន៍ថា “រហូត​មក​ទល់​ពេល​នេះ ខ្ញុំមិន​ទាន់​ទទួល​បាន​ប្រាក់ខែ​របស់ខ្ញុំពេញ​ទេ ប៉ុន្តែ​ពួកគេបាន​ហៅ​យើង​ទៅ​គំរាម​ទៀត។ នៅពេល​យើង​ត្រូវ​ការ​និយាយ​​ជា​មួយ​មន្ត្រី​ទាំង​នោះ យើង​មិន​អាច​រក​ពួកគេ​ឃើញ​ទេ។ ប៉ុន្តែ​នៅ​ពេល​យើង​និយាយ​ជា​មួយ​ប្រព័ន្ធ​ផ្សព្វផ្សាយ​ ពួក​គេ​មក​លឿន​ណាស់​”៕ សារុន

(រាយការណ៍​​បន្ថែម​ដោយ MattBlomberg)​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស